Jeremia
16 Jehova a boela a re ho ’na: 2 “U se ke oa nyala mosali ’me u se ke oa ba le bara le barali naheng ena. 3 Etsoe Jehova o re ka bara le barali ba hlahetseng naheng ena le ka bo-’mè ba bona le bo-ntate ba bona: 4 ‘Ba tla bolaoa ke mafu+ empa ha ho na motho ea tla utloa bohloko hobane ba shoele kapa a ba pate. Ba tla ba joaloka moiteli holim’a lefatše.+ Ba tla felisoa ka sabole le tlala+ ’me litopo tsa bona e tla ba lijo tsa linonyana le tsa libata.’
5 Jehova o re:
‘U se ke oa kena ka tlung ea ba llang,
U se ke oa ea lla kapa oa fana ka matšeliso.+
Ke tlositse khotso ea ka bathong bana
Hammoho le lerato la ka le mohau,’ ke Jehova ea chong.+
6 ‘Ba baholo le ba banyenyane ba tla shoa naheng ena.
Ba ke ke ba patoa,
Ha ho na motho ea tla ba llela
Ebile ha ho ea tla itšeha kapa a ipeole bakeng sa bona.*
7 Ha ho na motho ea tla fa ba llang lijo
E le ho ba tšelisa hobane ba shoetsoe.
Ha ho ea tla ba fa kopi ea matšeliso
Hore ba se ke ba noa ka lebaka la ho lahleheloa ke ntate kapa ’mè.
8 U se ke oa kena ka tlung ea mokete
Ho lula le bona hore u je u noe.’
9 Jehova oa mabotho, Molimo oa Iseraele o re: ‘Mehleng ea lona, ke tla felisa molumo oa batho ba thabileng le ba nyakaletseng, lentsoe la monyali le lentsoe la monyaluoa naheng ena ka pel’a mahlo a lona.’+
10 Etlare ha u bolella sechaba sena mantsoe ana ’ohle, se tla re ho uena: ‘Ke hobane’ng ha Jehova a buile ka tlokotsi e kaale-kaale e tla re oela? Ke phoso efe le sebe sefe seo re sitetsoeng Jehova Molimo oa rona ka sona?’+ 11 U re ho sona: ‘Jehova o re: “Ke hobane bo-ntate ba lona ba ntahlile+ ’me ba ’nile ba latela melimo e meng, ba e sebeletsa le ho e inamela.+ Empa ’na ba ntahlile le molao oa ka ha baa o boloka.+ 12 Le entse hampe ho feta baholo-holo ba lona,+ e mong le e mong ka manganga o latela pelo ea hae e mpe ho e-na le ho ’mamela.+ 13 Kahoo, ke tla le ntša naheng ena ke le lahlele naheng eo lona hammoho le baholo-holo ba lona le sa kang la e tseba.+ Le tla sebeletsa melimo e meng moo bosiu le motšehare+ hobane nke ke ka le hauhela.”’
14 Jehova o re: ‘Leha ho le joalo, matsatsi aa tla, ao ka ’ona ba ke keng ba hlola ba re: “Re ikana ka Jehova ea phelang ea ntšitseng batho ba Iseraele naheng ea Egepeta”+ 15 empa ba tla re: “Re ikana ka Jehova ea phelang, ea ntšitseng bana ba Iseraele naheng e ka leboea le linaheng tsohle tseo a neng a ba qhalakanyelitse ho tsona!” Ke tla ba khutlisetsa naheng ea bona eo ke e fileng baholo-holo ba bona.’+
16 Jehova o re: ‘Ke bitsa batšoasi ba bangata ba litlhapi,
Batšoasi bao ba tla ba tšoasa.
Ka mor’a moo, ke tla bitsa litsomi tse ngata,
Li tla ba tsoma thabeng e ’ngoe le e ’ngoe
Le leralleng le leng le le leng le mapatsong a mafika.
17 Etsoe mahlo a ka a shebile lintho tsohle tseo ba li etsang.*
Ba ke ke ba ipata moo nke keng ka ba bona
Ebile ba ke ke ba mpatela liphoso tsa bona.
18 Pele ho tsohle, ke tla ba fa moputso o feletseng oa liphoso le libe tsa bona+
Kaha ba silafalitse naha ea ka ka litšoantšo tsa bona tse sa pheleng* tse nyonyehang
’Me ba tlatsitse lefa la ka ka lintho tsa bona tse nyonyehang.’”+
19 Jehova, matla a ka le setšabelo sa ka,
Sebaka seo ke balehelang ho sona letsatsing la mahlomola,+
Lichaba li tla tla ho uena li tsoa likhutlong tsa lefatše.
Li tla re: “Baholo-holo ba rona ba jele lefa la ho rapela melimo ea bohata,*
Lefeela le lintho tse se nang thuso.”+
20 Na motho a ka iketsetsa melimo?
Eo a e etsang e tla be e se melimo ea ’nete.+
21 “Joale ke tla etsa hore ba tsebe,
Ka nako eo ke tla etsa hore ba tsebe matla a ka le bonatla ba ka,
Ba tla tseba hore lebitso la ka ke Jehova.”