1 Lebitso la Molimo Mangolong a Seheberu le Mangolong a Segerike a Bakreste “Jehova.”
Seheberu, יהוה (YHWH kapa JHVH)
“Jehova” (Seheb., יהוה, YHWH), lebitso la Molimo, le hlaha ka lekhetlo la pele ho Ge 2:4. Lebitso la Molimo ke leetsi, mofuta o bakelang ketso, boemo bo sa phethahalang, ba leetsi la Seheberu הוה (ha·wahʹ, “ho be”). Ka hona, lebitso la Molimo le bolela “O Etsa Hore ho be.” Sena se senola hore Jehova ke Eena eo, ka ketso e tsoelang pele, a iketsang hore e be Mophethahatsi oa litšepiso, Eo kamehla a phethahatsang merero ea hae.
Thohako e khōlō ka ho fetisisa eo bafetoleli ba kajeno ba e etsang ho Mongoli oa Bomolimo oa Mangolo a Halalelang ke ho tlosa kapa ho pata lebitso la hae le ikhethang. Ha e le hantle lebitso la hae le hlaha tabeng e ngotsoeng ea Seheberu ka makhetlo a 6 828 e le יהוה (YHWH kapa JHVH), eo ka tloaelo e bitsoang Tetragrammaton (ka ho toba e bolela “ho ba le litlhaku tse ’nè”). Ka ho sebelisa lebitso “Jehova,” re tšoareletse haufi-ufi litabeng tse ngotsoeng tsa puo ea pele ’me ha rea latela tloaelo ea hore bakeng sa lebitso la Molimo, Tetragrammaton, re sebelise litlotla tse kang “Morena,” “Adonai” kapa “Molimo.”
Lebitso “Jehova” le hlaha ka makhetlo a 6 973 tabeng e ngotsoeng ea Mangolo a Seheberu a Phetolelo ea Lefatše le Lecha. Ha e le hantle Tetragrammaton e hlaha ka makhetlo a 6 828 tabeng e ngotsoeng ea Seheberu, ho kopanyelletsa le mabitso a mararo a tsoakaneng (Ge 22:14; Ex 17:15; Bhl 6:24) le libakeng tse tšeletseng lihloohoaneng tsa Lipesaleme (7; 18 [makhetlo a mararo]; 36; 102). Re fetoletse Tetragrammaton e le “Jehova” libakeng tsohle tse 6 828 ntle le ho Bhl 19:18, moo ho ileng ha baloa seemeli “ea ka” ho e-na le lebitso la Molimo. Ho feta moo, motheong oa se baliloeng ho Septuagint, re khutliselitse Tetragrammaton ho De 30:16; 2Sa 15:20 le 2Likr 3:1. Re boetse ra khutlisetsa lebitso la Molimo ho Esa 34:16 le Zak 6:8 moo ho lokelang hore ho baloe “Jehova” eseng seemeli “ea ka.” Le tsosolositsoe hape ka makhetlo a 141 moo Masoferime a ileng a fetola lebitso la Molimo hore le baloe e le ʼAdho·naiʹ kapa ʼElo·himʹ.
Ho qoba ho tlōla meeli ea mofetoleli tabeng ea ho hlalosa, re bile seli haholo ka ho fetolela lebitso la Molimo Mangolong a Segerike a Bakreste, kamehla re le seli ho nahanela Mangolo a Seheberu e le boitsebiso bo hlokahalang bakeng sa ho utloisisa taba. Re batlile tumellano liphetolelong tse fumanehang tsa Seheberu tsa Mangolo a Segerike a Bakreste bakeng sa ho tiisa phetolelo ea rōna.
Tetragrammaton ka litlhaku tsa Seheberu (יהוה) e ile ea sebelisoa tabeng e ngotsoeng ea Seheberu le ho Septuagint ea Segerike. Ka hona, ebang Jesu le barutuoa ba hae ba ile ba bala Mangolo ka Seheberu kapa ka Segerike, ba ne ba tla kopana le lebitso la Molimo. Synagogeng e Nazaretha, ha Jesu a ema ’me a amohela buka ea Esaia ’me a bala 61:1, 2 moo ho sebelisitsoeng Tetragrammaton, o ile a bitsa lebitso la Molimo. Sena se ne se le tumellanong le boikemisetso ba hae ba ho tsebahatsa lebitso la Jehova joalokaha ho ka bonoa thapelong ea hae ho Ntat’ae: “Ke senotse lebitso la hao ho batho bao u mphileng bona lefatšeng. . . . Ke ba tsebisitse lebitso la hao ’me ke tla le tsebahatsa.”—Joh 17:6, 26.
Re fetoletse lebitso la Molimo ka makhetlo a 237 phetolelong ea rōna ea Mangolo a Segerike a Bakreste. Ho fumanoe liphetolelo tse ngata tsa Seheberu tse lumellanang le lekhetlo ka leng ho ana a 237 ao le khutliselitsoeng ka ’ona tabeng e ngotsoeng ea sehlooho.