Tumelo ea Bona e Suthisa Lithaba
TLAS’A sehlooho seo, koranta ea letsatsi le letsatsi ea Buenos Aires Crónica, ea December 7, 1990, e ile ea tlaleha ka kopano ea Lipaki tsa Jehova e neng e tšoeroe mabaleng a papali ea bolo ea maoto River Plate le Vélez Sarsfield. Ka sebele, ke tumelo e matla e ileng ea susumetsa baemeli ba ka bang 6 000 ba tsoang linaheng lisele tse ka holimo ho 20 ho tla Argentina ho tla kopana le baena ba bona ba Maargentina ba mashome a likete Kopanong ea bona ea “Puo e Hloekileng.” Palo ena e ne e akarelletsa liphutheho tse ’maloa tsa Lipaki tsa Makorea tse hona sebakeng seo. Baemeli ba tsoang linaheng lisele ba ne ba tsoa Brithani, Canada, Chile, Japane, Spain, le United States (ho kopanyelletsa Alaska), le linaheng tse ling tse ngata. Ba ile ba susumetsoa ke eng? Takatso ea bona ea ho tšehetsa kopano ea bobeli ea machaba e neng e tšoeroe Argentina.
Ho Neheloa ha Bethele e Ncha
Empa liketso tse khōlō tsa tumelo li ne li ile tsa etsahala nakoana pele ho kopano. Ka October ofisi e ncha ea lekala ea Argentina ea Asociación de los Testigos de Jehová e ile ea neheloa ke sebui sa moeti Theodore Jaracz oa Sehlopha se Busang sa Lipaki tsa Jehova. Mohaho o mocha oa bolulo o ne o hahiloe ke basebetsi ba baithaopi ba 259 ba machaba le ba 690 ba Maargentina. Bethele, kapa “Ntlo ea Molimo,” e karolong ea Buenos Aires, e nang le mekoloko ea lifate mathōkong a literata tsa eona, e na le likamore tsa bolulo tse 129 le ntlo ea ho jela bakeng sa batho ba 300. Kaha Argentina ho na le Lipaki tse ka holimo ho 84 000 ’me ho na le tebello ea keketseho e khōloanyane, ha ho pelaelo hore mohaho ona o mocha oa lekala o tla tlala haufinyane.
“Lipaki tsa Jehova le Puo e Hloekileng”
Sehlooho sa kopano ea machaba sa “Puo e Hloekileng” se ile sa khahla ba bangata, ho kopanyelletsa le baemeli ba phatlalatso ea litaba. Crónica e ile ea hlahisa sehlooho se ka holimo ’me ea qotsa tlhaloso ea “puo e hloekileng” joalokaha e fanoe ke sebui: “Kutloisiso e nepahetseng ea ’nete ka Molimo le morero oa oona bakeng sa lefatše le motho, joalokaha e fumanoa ka Bibeleng . . . Ha motho a ithuta ho bua puo e hloekileng, joale tsela ea hae ea ho nahana, puo ea hae, le boitšoaro ba hae li thehoa ho hlokomeleng Molimo joaloka Molimo o ’notši oa ’nete.”
Motse-moholo Buenos Aires, motse o nammeng o nang le batho ba ka holimo ho limillione tse leshome, o ile oa hlokomelisoa ka kopano e neng e tšoaretsoe ka har’a ’ona. Nakong ea matsatsi a tšeletseng, phatlalatso ea ka mehla ea metsotsoana e 40 ea sea-le-moea le TV, e lumelletsoeng ka molao, e ile ea phatlalatsa ketsahalo eo ntle ho tefiso. Lenaneo la Moqebelo le ile la hohela ba lefapha la khatiso ka ho kolobetsoa ha Lipaki tse ncha. Libate tse tharo tse kang matamo tse neng li le moo bamameli ba ntseng ba li bona li ne li behiloe sekhutlong ka seng sa mabala ao a mabeli a lipapali, empa esita le libate tse 12 tse kang matamo ha lia ka tsa lekana ho qeta kolobetso ka nako bakeng sa lenaneo la thapama. Kahoo libate tse kang matamo tse neng li le Lebaleng la Lipapali la River Plate, li ile tsa tlosoa mahlong a bamameli. River Plate, ho ile ha kolobetsoa ba 1 363 ’me Vélez Sarsfield, ha kolobetsoa ba 748, e leng kakaretso ea ba 2 111! Sehlooho sa Crónica se ne se re: “Pontšo e ’Ngoe e Tsotehang ea Tumelo River le Vélez—Lipaki lia Kolobetsoa.” Ba bileng teng likopanong tse peli e bile batho ba fetang 67 000.
Motsoako oa Machaba
Ha motho a ne a tsamaea har’a bamameli ba bohehang, phapang ea tlhaho ea morabe le bophelo ba sechaba e ne e bonahala. Ho ne ho e-na le khaitseli oa Argentina ea neng a thabela yerba maté ea hae, e leng tee e nooang ka bombilla ea tšepe, kapa lehlakana le kentsoeng koping e khethehileng ea sefate. Har’a ba 800 ba tsoang Spain ho ne ho e-na le bo-khaitseli ba apereng liaparo tse ntle tsa naha eo. Sehlopha sa ba 900 se tsoang Japane se ne se kopanyelletsa basali ba bang ba apereng li-kimono tsa moetlo. Moemeli ea tsoang Mexico o ne a apere sutu e ntšo le katiba ea Mexico e lepeno le leholo. Leha ho le joalo, ho sa tsotellehe phapang ena ea ka ntle, bonngoe ba bona ba moea bo ne ho hlakile hoo bohle ba neng ba bo bona. Qetellong ea kopano, ba bangata ba ile ba fapanyetsana lintho tse nyenyane tsa boikhopotso—libeche tsa kopano, lipene, li-postcard—ntho leha e le efe e neng e tla ba hopotsa ketsahalo ena e ntle.
Moea oa kopano o ile oa tšolohela le liemelong tsa lifofane. Ka ho khetheha sena se ile sa bonahala Miami, Florida, U.S.A., moo ho ileng ha etsahala hore lihlopha tse ngata li kopane teng ha li palama lifofane tse eang libakeng tsa habo tsona ka ho fapana. Ha sehlopha se seholo se tsoang United States se le tseleng se khutla Buenos Aires, se ile sa teana le sehlopha se tsoang Japane, se neng se le tseleng e eang Mexico. Ka potlako, baeti bohle ba Maamerika ba ile ba tšoaroa ke moqoqo oa metsoalle ea bona e thabileng ea Majapane. Batho ba bang ba neng ba le sebakeng seo ba ile ba makatsoa le ho khahloa ke se neng se etsahala. E ne e le Lipaki li abelana moea oa ‘puo ea tsona e hloekileng’!
Lenaneo la kopano le botsoalle ba machaba li ne li hlahelletse haholo hoo ha kopano e fela ka Sontaha, ho neng ho se ea batlang ho tloha mabaleng a lipapali. Ka boithaopo lihlopha tse fapaneng tsa machaba li ile tsa qala ho bina lipina tsa ’Muso ntle ho theipi ka lipuo tsa tsona tse fapaneng le ho tsokelana lisakatuku. Sena se ile sa tsoela pele ka nako e ka etsang hora pele batho ba thabileng ba neng ba tlile kopanong ba qetella ba ile hae. Joalokaha motho ea nkang litšoantšo oa koranta ea Argentina ea sa atiseng ho bontša khahleho linthong tse ngata a ile a bolela: “Sena ha se e-s’o ka se etsahala le ka mohla Argentina . . . boikutlo bo joalo le mofuthu o mokaalo!”
[Litšoantšo tse leqepheng la 15]
Ba fetang 67 000 ba ile ba ba teng Likopanong tse peli tsa Lipaki tsa Jehova tsa “Puo e Hloekileng” Buenos Aires, ka December 6-9, 1990
[Litšoantšo tse leqepheng la 16]
Mohaho o mocha oa lekala la Argentina o loke-tse ho sebeletsa Lipaki tse ka holimo ho 84 000