Bacha Baa Botsa . . .

Ke Hobane’ng ha ke Lokela ho ba ea Fapaneng?

“HO THATA ho ba ea fapaneng.” Mocha e mong oa Mokreste o boletse joalo. Haeba le uena u Mokreste, ha ho pelaelo hore u utloisisa hantle kamoo a ikutloang ka teng. Joaloka bacha ba bangata, u batla ho ratoa le ho amoheloa ke ba bang. Bothata ke hore, hangata ho amoheloa ho bolela ho ikamahanya le lithaka tsa hao—ho bua, ho apara, le ho itšoara joaloka tsona. Mocha ea lekang ho ba ea fapaneng o ipeha kotsing ea ho se amoheloe le ho songoa ke batho.

Ka hona bacha ba har’a Lipaki tsa Jehova ba tobane le boemo bo boima. Ka ho totobetseng, joaloka Bakreste, ba fapane le bacha ba bang. Hase hobane ba e-na le boikutlo ba ho iphahamisa kapa ba nahana hore ba molemo ho feta batho ba bang. Ho e-na le hoo, ka baka la koetliso ea bona ea Bibele, hangata ha ba lumellane le lithaka tsa bona litabeng tsa boitšoaro. Ka ho tšoanang, pono ea bona ka litšebeletso tsa ho bontša lerato la naha, ho keteka matsatsi a phomolo a bolumeli, le ho laetsana li ka ’na tsa ba etsa hore ba hlahelle ba fapane le ho etsa hore ba bang har’a lithaka tsa bona ba tenehe.a

Mocha e mong oa Paki o re ho ba ea fapaneng ke “karolo e thata ka ho fetisisa ea ho ba Mokreste.” E mong o re: “Bana ba u nkela fatše. Ka makhetlo a mangata ho ’nile ha thoe ke motho ea se nang thuso le ea sa khahleheng.” Ho phaella moo batsoali ba hao ba Bakreste ba ka ’na ba phehella hore u se be ea fapaneng feela boitšoarong bo botle empa hape le litabeng tse kang moaparo, boitlhopho le khetho ea ’mino.

Batho ba Molimo ke ba Fapaneng!

U ka ’na ua ipotsa: ‘Ke eng se phoso ka ho tšoana le bana ba bang?’ Koana, ho ba ba fapaneng e bile tšobotsi e khethollang batho ba Molimo ho tloha qalong. Ka nako e ’ngoe Molimo o ile oa khetha Iseraele ho “ba letlotlo” la oona le khethehileng. (Exoda 19:5) Hoo ho ne ho bolela ho ba ba fapaneng le batho ba bang. Ho Levitike 18:3, Molimo o ile oa laela: “Le se ke la lekisa se etsoang naheng ea Egepeta, moo le kileng la aha teng, leha e le se etsoang naheng ea Kanana eo ke ea le kenya ho eona, ’me le se ke la latela mekhoa ea bona.”

Baegepeta ba boholo-holo ba ne ba kene ka ho teba borapeling bo silafetseng ba liphoofolo. Tumelo ho se shoeng ha sephefumolohi e ne e le hohle bophelong ba bona. Likamano tsa botona le botšehali pakeng tsa batho ba amanang haufi li ne li tloaelehile. Ka ho tšoanang, Kanana e ne e le naha e tletseng borapeli ba litšoantšo, boitšoaro bo bobe ba botona le botšehali, tšollo ea mali, mahlabelo a bana, le bootsoa. Ka hona Molimo o ile oa lemosa: “Le se ke la itšela sesila ka efe le efe ea ntho tseo, . . . le se ke la etsa leha le le leng la manyala ao.”—Levitike 18:24-26.

Jehova o ile a tšehetsa keletso ena ka kemiso ea Molao e neng e laola hoo e ka bang likarolo tsohle tsa bophelo ba bona: lijo tsa bona (Levitike 11), mekhoa ea bona ea bohloeki (Deuteronoma 23:12, 13), mekhoa ea bona ea likamano tsa botona le botšehali (Levitike 18:6-23). Molao o ne o laola esita le moaparo le boitlhopho ba bona! Jehova o itse: “Ba iketsetse litjellane mephethong ea liaparo tsa bona, melokong eohle ea bona, ’me ba manamise leqhoele le leputsoa tjellaneng e mephethong ea liaparo tsa bona.” (Numere 15:38) Banna ba ne ba tlameha ho tlohela litelu ’me ba ne ba sa lumelloa ho ‘beola litelu tse ka mathōko.’ (Levitike 19:27; 21:5) Molao ona o ne o lokela ho lateloa esita le haeba Mojode a ne a sa rate litjellane liaparong kapa a rata sefahleho se se nang litelu.

Joale, nahana u se u bolelloa hore u lokela ho tlohela litelu le ho apara liaparo tse itseng. Na u ne u ke ke ua halefisoa ke hore u amohuoa litokelo tsa hao? Leha ho le joalo, melao ea Molimo e ne e phetha morero oa bohlokoa le o molemo. Jehova o ile a hlalosa: “Hore le tle le hopole, ’me le etse melao ea ka kaofela, ’me le khethehele Molimo oa lōna. Ke ’na Jehova, Molimo oa lōna.” (Numere 15:38-41) Mokhoa oa ho apara o ne o sebetsa joaloka khopotso e matla e bonahalang ea hore Bajode e ne e le ba fapaneng—batho ba khethiloeng ba halalela ho Jehova. Lithibelo lijong tse itseng li ne li sa sireletse bophelo ba bona bo botle feela empa li ne li ba thibela ho itsoakanya le batho bao e seng Bajode setsoalleng kapa bolumeling. E, ho ne ho ke ke ha etsahala hore ba kopane le bahetene ntle le ho tlōla karolo e itseng ea Molao oa Molimo. Ka hona Molao oa Moshe o ne o sebeletsa joaloka “lerako” le neng le boloka batho ba Oona ba arohile ho lichaba tse ling.—Bapisa le Ba-Efese 2:14.

Bakreste e Tlameha ho ba ba Fapaneng

Kajeno Bakreste ba “holotsoe molaong” oa Moshe ’me ba thabela tokoloho e khōlōhali litabeng tsa boikhethelo. (Ba-Roma 7:6) Leha ho le joalo, Jesu Kreste o bolelletse balateli ba hae: “Ha le karolo ea lefatše . . . Ke le khethile lefatšeng, [’me] ka lebaka lena lefatše le le hloile.” (Johanne 15:19, NW) Jesu o ne a sa bolele hore Bakreste ba lokela ho tsoa qitikoeng ea lefatše. (Bapisa le 1 Ba-Korinthe 5:10.) O ne a mpa a bolela hore ba tlameha ho aroha “lefatšeng”—karolo ea batho ba ikarotseng ho Molimo. Hobane’ng? Hobane joalokaha moapostola Johanne a boletse hamorao, “lefatše lohle le rapaletse ka tlase ho e mobe.”—1 Johanne 5:19.

Nahana ka bacha bao u ba tsebang sekolong. Ho thoe’ng ka monahano oa bona, boitšoaro ba bona, lipuo tsa bona, khetho ea bona ea ’mino kapa liaparo? Na u bona eka bacha ba joalo ba tataisoa ke litekanyetso tsa bomolimo—kapa na ba tataisoa ke melao e thehiloeng ke “molimo oa lefatše lena,” Satane Diabolose? (2 Ba-Korinthe 4:4) Haeba ba tataisoa ke melao e thehiloeng ke eena, u tla be u ipeha kotsing e kaakang haeba u itšoara, u bua, kapa u shebahala habohlasoa joaloka bona! Leha ho le joalo, u tla be u shanofatsa ho ipolela ha hao hore u Paki ea Jehova. Ho hobe le ho feta, u ka ’na ua iphumana u hlōloa ke litšusumetso tse mpe.

Moroetsana ea bitsoang Kim oa lumela: “Metsoalle ea hao ka sebele e susumetsa boitšoaro ba hao. Ha ke sa le sekolong, ke ne ke sa tiea haholo ’neteng [ea Bokreste], kahoo ke ne ke e-na le metsoalle e mengata ea lefatše. Empa hoo ho ne ho se molemo hobane ke ile ka kenella linthong tse ngata tse mpe.” Empa, ha ho hlokahale hore u kenelle ketsong e mpe e tebileng hore u behe kamano ea hao le Molimo kotsing. Lemoha ka hloko seo Bibele e se bolelang ho Jakobo 4:4: “Ha le tsebe hoba ho rata lefatše ke ho loantša Molimo na? Efela ea phehellang ho iketsa motsoalle oa lefatše o ipea sera ho Molimo.”

Na ka ’nete u batla ho ipeha kotsing ea ho ba sera sa Molimo? Ho hlakile hore ha ho joalo! Kahoo etsa hore ho totobale hore ha u karolo ea lefatše. Leha ho le joalo, hona ho bolela ho hongata ho feta ho qoba lithethefatsi le likamano tse mpe tsa botona le botšehali.

Kamoo U ka Bang ea Fapaneng

Ka mohlala, nahana ka khetho ea hao liaparong. Seo u se aparang se fana ka molaetsa oa seo u leng sona, seo u se emelang, seo u se lumelang. Leha ho le joalo, ho fapana le tokisetso ea Bajode, Bokreste bo u neha monyetla o eketsehileng haholoanyane oa ho ba le botho bo fapaneng le boikhethelo. Empa na seo se bolela hore re lokela ho khema le feshene e ’ngoe le e ’ngoe e hlahang?

Ngoanana e mong oa Mokreste o ne a batla ho latela feshene ea nako eo e neng e ratoa ea ho apara li-jean tse tabohileng ha a ea sekolong. Ka tloaelo, ha ho motho ea batlang ho shebahala a salletse morao mokhoeng oa ho apara. Empa ke bohlale hore batsoali ba hao ba behe meeli mekhoeng ea hao ea ho apara e bohlasoa, e tsosang takatso e mpe, e fetelletseng, kapa e khopisang. Haeba u ne u ka apara ka litsela tse joalo, u ne u tla neha ba bang boikutlo bofe? Ngoanana e mocha ea bitsoang Jeffie o ile a elelloa ha a ne a kutile moriri oa hae ka mokhoa o keneng fesheneng. Oa hopola: “Ke ne ke nahana hore o mpa o shebahala e le o ‘fapaneng’ feela. Empa batho ba ile ba qala ho mpotsa, ‘Na kannete u e mong oa Lipaki tsa Jehova?’ ’me hoo ho ile ha ntlhabisa lihlong.”

Ho fanoa ka keletso e leka-lekaneng ho 1 Timothea 2:9, moo Bakreste ba phehelloang ho apara “ka boitlhompho le ka tšabo.” Ka tloaelo u ka ba le boitlhompho ntle le ho shebahala u salletse morao. Ke ’nete hore ho apara ka ho itekanetseng mohlomong ho ke ke ha u etsa motho ea ratoang haholo, empa ho tla u thusa ho hlahella joaloka ea fapaneng—’me ke eona ntho e ka etsang hore o amoheloe ke Molimo.

Ho thoe’ng ka khetho ea hao ea ’mino? ’Mino o nka karolo lihoreng tseo bacha ba bangata ba tsohileng ka tsona. Ha o bolokiloe tekanyong e loketseng, ’mino e ka ba o thabisang le o hahang. Leha ho le joalo, Exoda 32:17-22 e bontša hore ’mino o ka tsosa maikutlo le takatso e hlephileng. ’Me ’mino o mongata oa kajeno ha oa tšoanela ho mameloa ke Mokreste. Ka mohlala, ’mino oa rap le ’mino o morethetho o matla oa ratoa, empa boholo ba ’ona—haeba e se hoo e batlang e le ’ona kaofela—o theiloe likamanong tse mpe tsa botona le botšehali, phetohelo, pefo, kapa esita le tšebelisano le meea. Na u latela seo sehlopha sa bacha ba lilemo tse ka tlaase ho 20 ba se etsang khethong ea hao ea ’mino, kapa na u na le sebete sa ho ba ea khethang?

E, ho hlokahala sebete ho ba ea fapaneng. Ha u hana ho lumella metsoalle le bana ba klaseng ho laola khetho ea hao ea boithabiso, lipuo, kapa moaparo, ruri ho tla tsosa khanyetso. Jesu o ile a lemosa: “Erekaha le se ba lefatše, . . . lefatše le le hloile.” (Johanne 15:19) Ka hona ho ba ea fapaneng e ka ’na ea e-ba e ’ngoe ea lintho tse thata ka ho fetisisa eo u ka lokelang ho e etsa—empa ntho e ke keng ea etsoa. Ke tsela e phahamisang litekanyetso tsa Molimo. Ho u tlisetsa boitlhompho le letsoalo le hloekileng. Potso ke hore, U ka fumana sebete sa ho ba ea fapaneng joang? Tokollo ea rōna e latelang e tla tšohla potso eo.

[Mongolo o botlaaseng ba leqephe]

[Litšoantšo tse leqepheng la 20]

Mocha ea hlōlehang ho ba ea fapaneng le lithaka tsa hae u shanofatsa ho ipolela ha hae hore ke Mokreste