Seo Jesu a Leng Sona Hona Joale

LE HOJA ho thahasellisa ho tseba hore na Jesu o ne a shebahala joang, ke habohlokoa haholoanyane ho ithuta hore na hona joale o boemong bofe le hore na o hokae. O phetha karolo efe morerong oa Molimo mabapi le lelapa la batho?

Histori ea lefatše e ke ke ea re neha likarabo. Li ka fumanoa feela bukeng eo Molimo a e ngotseng molemong oa ba batlang ’nete. ’Me buka eo ke Bibele e Halalelang, kapa Mangolo a Halalelang, buka e ajoang ka ho fetisisa historing ea lefatše.

Bibele hase buka e ’ngoe feela e ngotsoeng ke batho. Le hoja batho ba sebelisitsoe e le bangoli ba hae, Molimo e ne e le eena mongoli oa sebele: “Lengolo lohle le bululetsoe ke Molimo ’me le molemo bakeng sa ho ruta, bakeng sa ho khalemela, bakeng sa ho otlolla lintho, bakeng sa ho laea ka ho loka, e le hore motho oa Molimo a ka tšoaneleha ka botlalo, a hlomelloa ka ho feletseng bakeng sa mosebetsi o mong le o mong o molemo.”—2 Timothea 3:16, 17.

Moapostola Pauluse o ile a hlokomela seo Mangolo a neng a le sona, hobane o ile a ngola: “Ha le amohela lentsoe la Molimo, leo le ileng la le utloa ho rōna, le ile la le amohela, eseng e le lentsoe la batho, empa, feela joalokaha kannete le le joalo, e le lentsoe la Molimo.”—1 Bathesalonika 2:13.

Molimo ke ’Mōpi ea matla ’ohle oa bokahohle bo nang le lihlopha tsa linaleli tse limilione tse likete, le linaleli tse limilione tse likete sehlopheng ka seng. O na le matla a makaakang hore ebe o khonne ho bōpa lintho tseo kaofela! Ka sebele, eo Ea Matla ’Ohle, ea entseng bokahohle bo tsotehang, e ka ba eena mongoli oa buka e neng e ka ba tataiso e ka tšeptjoang bakeng sa motho leha e le ofe ea batlang ’nete.

Seo Bibele e se Bolelang

Lentsoe la Molimo le pepesa liphoso tsa likhopolo tse ngata-ngata le lintho tse nahanoang ka Jesu. Hlokomela boitsebiso bo bong boo e re fang bona ka eena:

• Jesu e bile oa pele ebile e le eena feela ea ileng a bōptjoa ke Molimo ka ho toba leholimong lilemong tse ngata tse fetileng, pele ho mangeloi le bokahohle bo bonahalang. Ke ka lebaka leo a bitsoang ‘Mora ea tsoetsoeng a ’notši’ oa Molimo. Pōpo eohle e ’ngoe e ile ea etsoa ka Mora enoa, “mosebetsi ea hloahloa” oa Molimo, pele e e-ba motho.—Johanne 3:16; 6:38; 8:58; Liproverbia 8:30, NW; Bakolose 1:16.

• Hoo e ka bang lilemong tse 2000 tse fetileng, Molimo o ile a fetisetsa bophelo ba Jesu pōpelong ea moroetsana oa Mojuda, hore a tsoaloe e le motho. Esita le hona joale, batho ba ka etsa ntho eo ka litsela tse itseng e tšoanang le eo, ka ho kopanya peō ea monna le lehe la mosali ka tsela eo e seng ea tlhaho.—Matheu 1:18; Johanne 1:14.

• Jesu o ne a feta seo ho ka thoeng ke motho ea molemo. Ha e se e le motho e moholo, o ile a bonahatsa ka ho phethahala botho bo lerato, bo nang le kutloelo-bohloko le bo lokileng ba Ntate oa hae oa leholimo, Jehova Molimo.—Johanne 14:9, 10; Baheberu 1:3; 1 Johanne 4:7-11, 20, 21.

• E le moemeli oa Molimo lefatšeng, Jesu o ne a hlokomela litlhoko tsa ba futsanehileng le ba hateletsoeng, empa o ne a sa khese ba ruileng. Ka tšehetso ea moea o halalelang o matla oa Molimo, Jesu o ne a folisa ba kulang esita le ho tsosa bafu ka mohlolo. Ka ho etsa mesebetsi e babatsehang joalo, o ile a bontša ka tekanyo e nyenyane hore na o tla etsa eng lefatšeng ka bophara ka mor’a hore a tsosetsoe bophelong ba leholimo le ho ba Morena oa ’Muso oa Molimo oa leholimo.—Matheu 11:4-6; Luka 7:11-17; Johanne 11:5-45.

• ’Muso oo oa Molimo oa leholimo ke oona oo Jesu a ileng a ruta balateli ba hae hore ba o rapelle le hore ba o etelletse pele bophelong ba bona. Ha o se o hlonngoe ka ho feletseng, “o tla robaka o felise mebuso eo [e teng kajeno] kaofela, empa oona o tla ba teng ka ho sa feleng.” Joale ’Muso oo e tla ba oona feela ’muso oa lefatše. Ke oona feela tšepo bakeng sa moloko oa batho o mahlomoleng.—Daniele 2:44; Matheu 6:9, 10

• Molimo e ne e le Ntate oa Jesu, ’me Jesu o ne a tšepahala ho Molimo. Kahoo, ha Jesu a bolaoa, e ne e le motho ea phethahetseng. O ile a fana ka bophelo ba hae bo phethahetseng ho Molimo ka boithatelo e le sehlabelo sa thekollo, ho buseletsa se neng se lahliloe ke Adama ha a fetohela Molimo. Ka ho etsa joalo, Jesu o ile a bula tsela e eang bophelong bo sa feleng bakeng sa bohle ba bontšang tumelo ho eena.—Johanne 3:16; Baroma 3:23, 24; 1 Johanne 2:2.

• E le Morena oa leholimo ea khethiloeng ke Molimo, Jesu o tla phethahatsa morero oa Molimo oa ho tlosa bokhopo lefatšeng ’me a tsosolosetse likelello le ’mele ea moloko oa batho o mamelang phethehong. Joale moloko oa batho o tla phela ka khotso le thabo lefatšeng la paradeise, ho na le matlo a matle le nala ea lijo bakeng sa bohle. Ho kula, masoabi le lefu li tla be li felile ka ho sa feleng. Esita le bafu ba tla tsosoa ’me ba be le monyetla oa ho phela ka ho sa feleng lefatšeng.—Genese 1:26-28; 2:8; Pesaleme ea 37:10, 11, 29; Liproverbia 2:21, 22; Esaia 25:6; 65:21-23; Luka 23:43; Liketso 24:15; Tšenolo 21:3, 4.

Kahoo, Bibele e re bolella ka ho hlaka hore Jesu ke motho oa bohlokoahali morerong oa Molimo oa ho theha lefatše le lecha la ho loka. Ka lebaka la karolo ea bohlokoa eo a e phethang, ke ka nepo Jesu a neng a ka re: “Ke ’na tsela le ’nete le bophelo. Ha ho le ea mong ea tlang ho Ntate haese ka ’na.”—Johanne 14:6; 2 Petrose 3:13.

’Musi ea Nang le Kutloelo-bohloko

Batho ba ikokobelitseng ba batla hore Jesu e be ’musi oa bona lefatšeng le lecha, ’me e tla ba ’musi ea fapaneng le ea thabisang hakaakang! Tsela e ’ngoe eo a ileng a bonahatsa sena ka eona ke ka mesebetsi e hlollang ea ho phekola eo a ileng a e etsa ha a le lefatšeng. (Matheu 15:30, 31) Empa, hlokomela hape hore na e tla ba ’musi oa mofuta ofe.

Nahana pele ka tlaleho ea babusi ba lefatše lena. Histori e bontša hore ho theosa le lilemo, hangata ba ’nile ba e-ba khopo le ho hloka mohau, ba lebisa batho ba bona lintoeng tse ngata, liketsong tse sehlōhō, makhotleng a otlang bakhelohi le lipolaong tse sehlōhō. Lekholong lena la bo20 la lilemo feela, batho ba fetang limilione tse 100 hōle ba ’nile ba bolaoa lintoeng.

Bapisa boitšoaro le tlaleho ea babusi ba lefatše lena le boitšoaro le tlaleho ea Jesu litšebelisanong tsa hae le ba futsanehileng, ba hateletsoeng le ba fokolang: “Ha a bona bongata a utloa a bo hauhela, hobane bo ne bo sohlokehile ’me bo qhalakane joaloka linku tse se nang molisa.” Kahoo o ile a re ho bona: “Tloong ho ’na, lōna bohle ba sehlang le ba imetsoeng, ’me ka sebele ke tla le khatholla. Jarang joko ea ka ’me le ithute ho ’na, kaha ke na le maikutlo a bonolo ’me ke ikokobelitse pelong, ’me le tla fumanela lisoule tsa lōna khatholoho. Etsoe joko ea ka e mosa le mojaro oa ka o bobebe.”—Matheu 9:36; 11:28-30.

Jesu o ne a utloela batho bohloko hakaakang! Ntlheng ena, o ne a etsisa Ntate oa hae oa leholimo. Jesu e ne e le mothofatso oa lerato, ’me o ile a ruta barutuoa ba hae hore ba ratane ka lerato la ’nete, le laoloang ke melao-motheo. Ka tsela eo, ba ne ba ke ke ba lumella morabe, bochaba, boemo ba moruo, bolumeli ba nakong e fetileng kapa ntho leha e le efe e ’ngoe hore e kena-kenane le bonngoe ba bona ba machaba. (Johanne 13:34, 35; Liketso 10:34, 35) Ka sebele, Jesu o ratile batho hoo a ileng a ba tella bophelo ba hae. (Baefese 5:25) Ke eena ’musi eo lefatše lena le mo hlokang le eo le tla ba le eena.

Jesu Hona Joale ke Morena e ‘Motle’

Lentsoe la Molimo la boprofeta le re thusa ho utloisisa hore hona joale Jesu ke Morena ea matla oa leholimo. Mopesaleme o ile a profeta tjena ka eena: “Ka botle u fetisa bana ba batho. . . . Khanyeng ea hao u hloelle koloing ea hao ea hlōlo, u loanele ’nete le molemo le ho loka . . . U rata ho loka, ’me u hloile bokhopo. Ka baka leo, Molimo, Molimo oa hao, o u tlotsitse ka ole ea nyakallo.”—Pesaleme ea 45:2, 4, 7.

E le Morena oa leholimo ea tlotsitsoeng ke Molimo, Jesu o laetsoe hore a nke khato ho bontša lerato la hae bakeng sa ho loka le ho hloea ha hae bokhopo. Kahoo, ka Bibeleng o hlalosoa e le mohlōli ea sa shoeng, “Morena oa marena” eo haufinyane a tla timetsa lira tsohle tsa Molimo. Ho feta moo, o tla khutlisetsa lefatše boemong ba paradeise ’me a tsosolosetse batho phethehong.—Tšenolo 19:11-16.

Karolo e ncha eo Jesu a tla e phetha ha e na ho ba ea ‘Mesia ea mahlomoleng,’ ea songoang, ea otloang le ho bolaoa ke bahanyetsi. Ho e-na le hoo, karolo ea hae e ncha ke ea “Molimo o matla,” ’musi oa lefatše. (Esaia 9:6) Babusi ba bangata ba batho ha ba thabele sena hobane joalokaha Daniele 2:44 e bolela esale pele, mebuso ea bona e tla tloha e timetsoa. A sebelisa Kreste e le mophethahatsi oa kahlolo, Molimo o tla “thumakanya marena ka letsatsi la khalefo ea hae. O tla ahlola har’a lichaba.”—Pesaleme ea 110:5, 6.

Esaia o ile a bolela esale pele hore ka ho etsa sena, Kreste o tla “makatsa lichaba tse ngata; marena a tla hloka puo pel’a hae.” Hobane’ng? “Hobane a tla bona seo a neng a e-so ho se bolelloe [ke metsoalle ea ’ona ea bolumeli e haufi-ufi], a utloe seo a neng a e-so ho se utloe.”—Esaia 52:15.

‘Ho Kotula Sefefo’

Esaia o ne a bua ka bofokoli ba tšebeletso ea baeta-pele ba bolumeli. Ka mohlala, ha ba rute ’nete ea Bibele, empa ba ruta mohlape oa bona lithuto tseo e seng tsa Mangolo mabapi le tlhokofatso e sa feleng mollong oa lihele, boraro-bo-bong ba melimo e meraro ho o le mong, le ho se shoe ha moea—tseo kaofela li simolohang boheteneng. ’Me baruti ba ’nile ba tšehetsa lintoa tsohle tsa lichaba tsa habo bona, esita le haeba seo se bolela ho bolaoa ha batho bao e leng ba bolumeli ba bona. Ena ke tlōlo e tobileng ea melao ea Molimo.—1 Johanne 2:3, 4; 3:10-12; 4:8, 20, 21.

Hape, baruti ba khahla mahlo a mohlape oa bona ka litšoantšo tsa bolumeli, liaparo tsa baruti, likereke tse majabajaba tse nang le ofisi ea mobishopo le litšoantšo tse khabisitsoeng ka likhopolo tsa bohetene, ho kopanyelletsa le selikalikoe sa khanya sa molimo oa letsatsi, empa mahlong a Molimo ke lintho tse se nang molemo. Ba etsa sena ho sa tsotellehe taelo ea Molimo ho bahlanka ba hae: “Fallang, fallang, le tlohe mona; le se ke la ama litšila . . . , lōna ba jarang lipitsa tsa Jehova!”—Esaia 52:11; 2 Bakorinthe 6:14-18.

Ba ipolelang hore ba emela Molimo empa ba tlōla litaelo tsa hae ’me ba ruta ba bang ho etsa se tšoanang ba tla kotula seo ba se jetseng. Ba tla ahloloa haboima ’me ba tla fumana moputso oa bona ha tsamaiso ena ea lintho e felisoa. Joalokaha moprofeta Hosea a buile, “ba jala moea, ’me ba tla kotula sefefo.”—Hosea 8:7; bona le Tšenolo 17:1-3, 15, 16.

Ba Lipelo li Tšepahalang ba Ithuta ’Nete

Ho emela Molimo le Jesu hampe ho etsoang ke baruti ha ho na ho thibela batho ba lipelo li tšepahalang ho ithuta ’nete ka Jesu. Lekholong la pele la lilemo, ha hoa ka ha ba thibela, hobane joalokaha Paul Barnett a ngotse ho The Two Faces of Jesus, “Kreste hase mopalami oa parachuti ea ileng a oela historing a e-tsoa sebakeng, a sa ka a tsebahatsoa.” E, morao koo, ka nepo boprofeta ba Bibele bo ‘ile ba tsebahatsa’ Mesia, ba tiisetsa barutuoa ba hae hore oa tla. Kajeno ho na le bopaki bo bongata haholo bo tsebahatsang ’nete ea hore Molimo o file Jesu matla a ho busa e le “Morena oa marena” ea khanyang, oa leholimo.—Matheu 24:3-13; 2 Timothea 3:1-5, 13.

Ka sebele, “litaba tsena tse molemo tsa ’muso [oa Molimo le Kreste e le ’musi] li tla boleloa lefatšeng lohle leo ho ahiloeng ho lona hore e be bopaki ho lichaba tsohle; ’me joale e ntan’o ba hona bofelo bo tla tla.” (Matheu 24:14) Sena se etsoa ke Lipaki tsa Jehova, tseo palo ea tsona lefatšeng lohle e fetang limilione tse hlano. Kahoo, ruri ba batlang ho tseba Jesu oa sebele ba ka etsa joalo. (Johanne 10:14; 1 Johanne 5:20) ’Me ho mo tseba le ho mo mamela ke ha bohlokoa bakeng sa ho pholoha ‘matšoenyeho a maholo’ a tla timetsa lefatše haufinyane.—Tšenolo 7:9-14; Johanne 17:3; 2 Bathesalonika 1:6-10.

Ka hona, Lipaki tsa Jehova li tla thabela ho u thusa hore u hlahlobe tlhaloso ea Bibele e ipiletsang ea ponahalo ea Mora oa Molimo.

[Setšoantšo se leqepheng la 27]

Kreste o tla felisa bokhopo a le matleng a ’Muso

[Setšoantšo se leqepheng la 28]

Tlas’a puso e lerato ea Kreste, lefatše lena le tla fetoha paradeise