Bacha Baa Botsa . . .

Nka ba ea Botsoalle Haholoanyane Joang?

“Ha ho mohla nkileng ka hla ka ba motho ea qoqang. Ke ne ke nahana hore haeba ke bua ho itseng, batho ba tla nkoekoetla. ’Mè o lihlong haholo, ’me ke nahana hore ke lona lebaka le entseng hore ke be lihlong le ’na.”—Artie.

NA KA linako tse ling u ee u lakatse eka u ka be u se lihlong haholo—’me u khona ho ba ea phutholohileng le ea botsoalle haholoanyane? Joalokaha sehlooho sa rōna se fetileng letotong lena se bontšitse, lihlong ke tšobotsi e tloaelehileng.a Kahoo, ha ho letho le phoso ka uena haeba u e-na le tšekamelo ea ho ba ea thōtseng, ea nkang lintho ka ho teba, kapa ea sa bueng haholo. Empa lihlong tse feteletseng e ka ba bothata ba sebele. Hampe ke hore li ka u thibela ho thabela botsoalle. ’Me li ka boela tsa u thatafalletsa ho ikutloa u phutholohile kapa ho etsa lintho hantle ha u le har’a batho.

Esita le batho ba baholo ba atisa ho loantšana le lihlong. Barryb ke moholo ka phuthehong ea Bokreste. Empa o na le tšekamelo ea ho thōla ha a le har’a sehlopha. Oa lumela: “Ha ke nahane hore ke na le bokhoni ba ho bua ntho leha e le efe e utloahalang.” Mosali oa hae Diane, o na le bothata bo tšoanang. O bo rarolla joang? O re: “Ke rata ho ba har’a batho ba botsoalle hobane ke nahana hore ba ka tšoara moqoqo.” Litsela tse ling tseo ka tsona u ka iketsang ea botsoalle haholoanyane ke life?

Khaotsa ho Inyenyefatsa

Ntlha ea pele, ho ka ’na ha hlokahala hore u boele u hlahlobe tsela eo u italimang ka eona. Na u lula u inyenyefatsa, u ipolella hore ba bang ha ba na ho u rata kapa hore ha ho letho la bohlokoa leo u ka le buang? Ho ba le maikutlo a fosahetseng ka uena ho ka fella feela ka ho u sitisa ho ba ea botsoalle. Etsoe Jesu o ile a re: “U rate moahelani oa hao joalokaha u ithata”—eseng ho e-na le ho ithata! (Matheu 19:19) Kahoo, ho molemo ebile ho loketse ho ithata ho isa bohōleng bo itseng bo loketseng. Ho ka u fa sebete seo mohlomong u se hlokang e le hore u atamele ba bang.

Haeba u tleloa ke maikutlo a ho ikhalala, u ka ’na ua fumana ho le molemo ho bala khaolo ea 12 e reng, “Ke Hobane’ng ha ke sa Ithate?” bukeng ea Lipotso Bacha Baa Botsa—Likarabo tse Sebetsang.c Boitsebiso boo bo ka ’na ba u thusa ho hlokomela hore ho na le ho hongata hoo u ka fanang ka hona u le motho. Ha e le hantle, ’nete ea hore u Mokreste e bontša hore Molimo o bona ho hong ho bohlokoa ho uena! Etsoe Jesu o ile a re: “Ha ho motho ea ka tlang ho ’na ntle leha Ntate, ea nthomileng, a mo hula.”—Johanne 6:44.

Bontša ba Bang Thahasello

Liproverbia 18:1 ea lemosa: “Motho ea ikhethang ho ba bang o batla ho ikhahlisa eena a ’notši.” E, haeba u itšehla thajana, u ka ’na ua lebisa tlhokomelo e ngata haholo ho uena. Bafilippi 2:4 e re khothalletsa hore re ‘behe leihlo, eseng thahasellong ea botho litabeng tsa rōna feela, empa hape le thahasellong ea botho ho tsa ba bang.’ Ha u lebisa tlhokomelo ea hao lithahasellong le litlhokong tsa ba bang, ha u amehe haholo ka uena. ’Me ha u ameha ka ba bang haholoanyane, ho ka etsahala hore u susumelletsehe ho nka bohato ba pele ba ho tloaelana le bona.

Ka mohlala, nahana ka Lydia, mosali ea tsebahalang e le motho ea botsoalle le ea nang le kamohelo e mofuthu ea baeti. Bibele e re bolella hore ka mor’a hore a utloe mantsoe a moapostola Pauluse ’me a kolobetsoe, o ile a kōpa Pauluse le metsoalle ea hae ka tieo: “Haeba le nkahlotse ke le ea tšepahalang ho Jehova, kenang ka tlung ea ka ’me le lule.” (Liketso 16:11-15) Le hoja e ne e le molumeli e mocha, Lydia o ile a nka bohato ba pele ba hore a tloaelane le bara bana babo—’me ha ho pelaelo hore o ile a amohela litlhohonolofatso tse ngata ka lebaka la seo. Pauluse le Silase ba ile ba ea hokae ha ba lokolloa teronkong? Ka ho thahasellisang, ba ile ba khutlela lapeng la Lydia!—Liketso 16:35-40.

Ka tsela e tšoanang, u tla fumana hore batho ba bangata ba tla arabela thahasellong eo u ba bontšang eona. U ka qala ho etsa see joang? Litlhahiso tse seng kae tse thusang ke tsena.

● Qala hanyenyane. Ho ba ea botsoalle ha ho bolele hore motho a fetohe mponeng ea ratang litaba kapa ea nkehileng ke menyaka ea botsoalle. Sebeletsa ho buisana le batho ka bomong, a le mong ka nako. U ka ’na ua iketsetsa pakane ea hore bonyane u qale moqoqo le motho a le mong lekhetlo le leng le le leng ha u ile sebokeng sa Bokreste. Leka ho bososela. Ithute ho talima motho mahlong.

● Qala moqoqo. U ka ’na ua botsa, ‘Joang?’ Ke ’nete hore haeba u hlile u thahasella ba bang, hangata ha ho be thata ho fumana lintho tseo le ka buang ka tsona. Mocha e mong oa Spain ea bitsoang Jorge o re: “Ke hlokometse hore ho botsa ba bang hore na ba ntse ba phela joang kapa ho ba botsa ka mosebetsi oa bona ho u thusa ho tloaelana le bona hamolemonyana.” Mocha e mong ea bitsoang Fred oa eletsa: “Haeba ha u tsebe seo u lokelang ho se bua, qala pele ka ho botsa batho lipotso.” Ke ’nete hore ha u batle hore batho ba ikutloe eka ba hlongoa lipotso. Haeba ho bonahala eka motho ha a thabele ho araba lipotso, leka ho mo bolella boitsebiso bo itseng ka uena.

Mary, eo e leng motsoali oa mocha ea ka tlaase ho lilemo tse 20, o re: “Ke hlokometse hore tsela e molemo ka ho fetisisa ea ho etsa hore batho ba ikutloe ba phutholohile ke ea ho etsa hore ba bue ka bona.” Kate e mocha oa phaella: “Hoa thusa ho babatsa batho ka moaparo oa bona kapa ntho leha e le efe e ’ngoe. U etsa hore ba ikutloe hore baa ratoa.” Leha ho le joalo, bua seo e leng ’nete, ’me u qobe ho phoqa. (1 Bathesalonika 2:5) Ka tloaelo batho ba tla arabela lipolelong tse mosa le tse mofuthu e le kannete.—Liproverbia 16:24.

● E-ba momameli ea molemo. Bibele e re: “Motho . . . o lokela ho potlaka mabapi le ho utloa, e be ea liehang mabapi le ho bua.” (Jakobo 1:19) Etsoe moqoqo ke phapanyetsano—hase pina e binoang ke motho a le mong. Kahoo, haeba u e-na le tšekamelo ea ho ba lihlong ho bua, ha e le hantle sena se ka ’na sa u tsoela molemo! Batho ba ananela bamameli ba molemo.

● Kenella. Ha u se u khona ho qoqa le motho ka mong, nka bohato bo latelang ba ho qoqa har’a sehlopha. Le mona, liboka tsa Bokreste ke sebaka se loketseng bakeng sa ho hlaolela tšobotsi ena. Ka linako tse ling tsela e bonolo ka ho fetisisa ea ho kenella moqoqong ke ea ho kenella ho o seng o ntse o tsoela pele. Ka sebele, mona temoho le mekhoa e metle ke tsa bohlokoa. U se ke ua itšohlometsa puisanong eo ho totobetseng hore ke ea lekunutu. Empa haeba ho hlakile hore sehlopha se iqoqela ka taba feela e sa reng letho, leka ho kenella moqoqong. E-ba hlokolosi; u se ke ua kena ba bang hanong le ho leka ho laola moqoqo. Leka ho mamela ho se hokae. Ha u ntse u phutholoha, u ka ’na ua ba le tšekamelo ea ho bua mantsoe a seng makae.

● U se ke ua lebella ho ba ea phethahetseng. Ka linako tse ling bacha ba ameha haholo ka ho bua ntho e fosahetseng. Moroetsana e mong oa Italy ea bitsoang Elisa oa hopola: “Ke ne ke lula ke tšohile hore haeba nka bua ntho e itseng, e tla utloahala e fosahetse.” Leha ho le joalo, Bibele e re hopotsa hore bohle ha rea phethahala, kahoo ho ke ke ha khoneha hore re bue ka tsela e phethahetseng. (Baroma 3:23; bapisa le Jakobo 3:2.) Elisa o re: “Ke ile ka hlokomela hore ena ke metsoalle ea ka. Kahoo, e tla utloisisa haeba ke bua ntho e ’ngoe e fosahetseng.”

● E-ba le boikutlo ba bosoasoi. Ke ’nete hore ho thella ha leleme hoa soabisa. Empa joalokaha Fred a hlokomela, “haeba feela u phutholoha ’me u itšeha, seo se feta kapele. U fetola leralla thaba ha u itumella ho ferekana, ho tsieleha, kapa ho tšoenyeha.”

● E-ba le mamello. Hlokomela hore hase motho e mong le e mong ea tla arabela hang-hang. Ho thōla ho bakang ho se phutholohe ha moqoqo o ntse o tsoela pele ha ho hlile ha ho bolele hore motho ha a u rate kapa hore u lokela ho khaotsa ho leka ho bua. Ka linako tse ling batho ba mpa ba touta—kapa ba le lihlong joaloka uena. Maemong a joalo, ho ka ’na ha thusa hore u fe motho eo nako e eketsehileng ea hore a phutholohe ho uena.

● Leka ho qoqa le batho ba baholo. Ka linako tse ling batho ba baholo, haholo-holo Bakreste ba hōlileng tsebong, ba na le kutloelo-bohloko e khōloanyane ho bacha ba loantšanang le ho ba lihlong. Kahoo, u se ke ua tšaba ho qala moqoqo le motho e moholo. Kate o re: “Ke khona ho phutholoha ha ke le har’a batho ba baholo hobane kea tseba hore batho ba baholo ha ba na ho nkahlola, ho ntšoma, kapa ho ntšoabisa joalokaha lithaka tsa ka li ka ’na tsa etsa.”

Ho Susumetsoa ke Lerato

Le hoja litlhahiso tsena li ka ’na tsa thusa, ha ho tsela e bonolo ea ho hlōla lihlong. Qetellong, hase taba ea ho sebelisa bohlale bo itseng kapa leqheka le itseng. Ntlha ea bohlokoa ke hore “u rate moahelani oa hao joalokaha u ithata.” (Jakobo 2:8) E, ithute ho ameha ka batho ba bang—haholo-holo bara le barali beno ba Bakreste. (Bagalata 6:10) Haeba u e-na le lerato la sebele pelong ea hao, u tla hlōla tšabo le ho se itšepe ’me u tla etsa boiteko ba ho tloaelana le ba bang. Joalokaha Jesu a ile a bolela, “molomo o bua ho tsoa ho se tletseng pelong.”—Matheu 12:34.

Barry, ea boletsoeng sethathong, oa hlokomela: “Ha ke ntse ke tloaelana le batho ba bang, ke nolofalloa haholoanyane ho buisana le bona.” Ka mantsoe a mang, ha u ntse u itloaetsa ho ba ea botsoalle, seo se tla u nolofalla haholoanyane. ’Me ha u iphumana u etsa metsoalle e mecha ’me u ikutloa u amoheleha haholoanyane ho ba bang, ha ho pelaelo hore u tla hlokomela hore liphello tseo li ne li tšoaneloa ke boiteko bo entsoeng!

[Mongolo o botlaaseng ba leqephe]

[Setšoantšo se leqepheng la 15]

Nka bohato ba pele ’me u kenelle meqoqong!