Pono ea Bibele
Na ho Tšoenyeha ho Bontša ho Haelloa ke Tumelo?
“HO TŠOENYEHA HO THIBETSOE.” Moruti e mong oa mathoasong a lekholo la bo20 la lilemo o ile a ngola tlas’a sehlooho sena hore ho tšoenyeha ka lintho tse bonahalang ha ho phoso feela, empa “ke sebe se tebileng.” Haufinyane tjena, mohlalosi e mong ha a bua ka taba ea ho hlōla ho ngongoreha le ho tšoenyeha o ile a re, “Ho ngongoreha ho senola hore ha re tšepe Molimo.”
Maemong ao ka bobeli, bangoli ba ile ba theha qeto ea bona Thutong ea Jesu ea Thabeng, moo a itseng: “Khaotsang ho tšoenyeha.” (Matheu 6:25) Kaha matšoenyeho a ama batho ba bangata kajeno, re ka ’na ra ipotsa: Na Mokreste o lokela ho ikutloa a le molato ha a tšoenyehile? Na ho tšoenyeha ho bontša hore motho o haelloa ke tumelo?
Molimo o Utloisisa ho se Phethahale ha Rōna
Bibele ha e rute hore ho haella ha tumelo ke hona ho bakang matšoenyeho ’ohle. Kaha re phela ‘linakong tse mahlonoko tseo ho leng thata ho sebetsana le tsona,’ ho ke ke ha etsahala hore re se be le lintho tse re tšoenyang ho ea bohōleng bo itseng. (2 Timothea 3:1) Bakreste ba tšepahalang ba tobana le matšoenyeho a letsatsi le letsatsi a bakoang ke ho fokolloa ke bophelo, botsofali, mathata a lichelete, liqabang tsa lelapa, bokebekoa le mathata a mang. Esita le mehleng ea boholo-holo, bahlanka ba Molimo ba ile ba e-ba le lintho tseo ba li tšabang le tse ba ngongorehisang.
Nahana ka tlaleho ea Bibele ea Lota. Molimo o ile a mo laela hore a balehele lithabeng e le ho qoba ho timetsoa le Sodoma le Gomora. Leha ho le joalo, Lota o ile a tšoenyeha. O ile a re: “Ka kōpo, Jehova, ho se ke ha e-ba joalo!” A tsilatsila, o ile a re: “Empa ’na—ha ke khone ho balehela sebakeng se lithaba esere tlokotsi ea lula e le haufi le ’na ’me ka sebele ka shoa.” Ke hobane’ng ha Lota a ne a tšaba lithaba? Bibele ha e bolele. Ho sa tsotellehe hore na lebaka e ne e le lefe, Lota o ile a ikutloa a hlile a tšaba. Molimo o ile a arabela joang? Na Lota o ile a khalemelloa ho hloka tumelo le ho se tšepe Molimo? Che. Ho e-na le hoo, Jehova o ile a bontša ho mo nahanela, a lumella Lota hore a balehele motseng o haufi.—Genese 19:18-22.
Ho na le mehlala e meng ea Bibele ea barapeli ba tšepahalang ba ileng ba tšoenyeha haholo ka linako tse ling. Moprofeta Elia o ile a tšoha ’me a baleha ka mor’a hore a sokeloe ka lefu. (1 Marena 19:1-4) Moshe, Anna, Davida, Habakuke, Pauluse le banna le basali ba bang ba neng ba e-na le tumelo e matla le bona ba ile ba bolela matšoenyeho a bona. (Exoda 4:10; 1 Samuele 1:6; Pesaleme ea 55:5; Habakuke 1:2, 3; 2 Bakorinthe 11:28) Leha ho le joalo, Molimo o ile a bontša kutloelo-bohloko ’me a tsoela pele ho ba sebelisa tšebeletsong ea hae, ka tsela eo, a bontša kutloisiso ea sebele ea ho se phethahale ha batho.
“Sebe se re Tšoasang Habonolo”
Leha ho le joalo, ho tšoenyeha ho sa khaotseng ho ka re fokolisa ’me ha etsa hore re qetelle re sa tšepe Molimo. Moapostola Pauluse o ile a bua ka ho haelloa ke tumelo e le “sebe se re tšoasang habonolo.” (Baheberu 12:1) Ka ho ikopanyelletsa, mohlomong Pauluse a ne a lumela tšekamelo eo a nang le eona e matla ea ho ‘tšoasoa habonolo’ ke ho fokolloa ke tumelo ka nakoana ka linako tse ling.
Mohlomong ho ne ho le joalo le ka Zakaria nakong eo a neng a sa lumele lengeloi ha le mo bolella hore mosali oa hae e tla ba moimana. Ka lekhetlo le leng baapostola ba Jesu ba ile ba sitoa ho folisa mokuli ka lebaka la ‘tumelo e nyenyane’ eo ba neng ba e-na le eona. Leha ho le joalo, batho bana ba ile ba tsoela pele ba ntse ba amoheloa ke Molimo.—Matheu 17:18-20; Luka 1:18, 20, 67; Johanne 17:26.
Ka lehlakoreng le leng, Bibele e boetse e akarelletsa mehlala ea batho ba ileng ba qetella ba sa tšepe Molimo ’me liphello ea e-ba tse tebileng. Ka mohlala, Baiseraele ba bangata ba tsoileng Egepeta ba ile ba thibeloa ho kena Naheng e Tšepisitsoeng ka lebaka la ho haelloa ke tumelo ha bona. Ketsahalong e ’ngoe, ba bile ba bua ka ho toba khahlanong le Molimo, ba re: ‘Ke hobane’ng ha u re ntšitse naheng ea Egepeta ho tla shoella lefeelleng? Etsoe ha ho na bohobe le metsi.’ Molimo o ile a bontša ho se thabe ha hae ka ho ba otla ka linoha tse chefo.—Numere 21:5, 6.
Baahi ba motseng oabo Jesu, oa Nazaretha, ba ile ba fetoa ke tokelo ea ho bona ha mehlolo e mengata e etsetsoa sebakeng seo sa habo bona ka lebaka la ho haelloa ke tumelo. Ho feta moo, moloko oo o khopo oa mehla eo o ile oa nyatsoa ka matla ke Jesu ka lebaka la ho hloka tumelo. (Matheu 13:58; 17:17; Baheberu 3:19) Ke ka nepo moapostola Pauluse a ileng a lemosa: “Hlokomelang, barab’eso, esere le ka mohla mang kapa mang oa lōna a ba le pelo e khopo e hlokang tumelo ka ho suthela hōle le Molimo ea phelang.”—Baheberu 3:12.
E, maemong a feteletseng, ho haelloa ke tumelo ho ka bakoa ke pelo e khopo. Empa ho ne ho se joalo ka Zakaria le ka baapostola ba Jesu mehlaleng e boletsoeng pejana. Ho haelloa ke tumelo ha bona ho ile ha bakoa ke bofokoli ba nakoana. Kakaretso ea bophelo ba bona e bontša hore ba ne ba e-na le ‘lipelo tse hloekileng.’—Matheu 5:8.
Molimo o Tseba Litlhoko Tsa Rōna
Mangolo a re thusa ho bona phapang pakeng tsa matšoenyeho a tloaelehileng le sebe sa ho hloka tumelo. Matšoenyeho a letsatsi le letsatsi, esita le ho khetšemela ka nakoana ho hlokeng tumelo ka lebaka la bofokoli ba botho ha hoa lokela ho ferekanngoa le ho se tšepe Molimo ka ho feletseng, ho bakoang ke ho ba le pelo e khopo, e sa arabeleng. Ka hona, Bakreste ha baa lokela ho lula ba ikutloa ba le molato hobane feela ka linako tse ling ba ee ba tšoenyehe.
Leha ho le joalo, ho hlokahala hore re be hlokolosi e le hore matšoenyeho a se ke a re imela ho tlōla tekano hoo a tla laola bophelo ba rōna. Ke kahoo mantsoe a Jesu e leng a bohlale ha a ne a re: “Le ka mohla le se ke la tšoenyeha ’me la re, ‘Re tla ja’ng?’ kapa, ‘Re tla noa’ng?’ kapa, ‘Re tla apara’ng?’” Sena se lateloa ke mantsoe a khothatsang: “Etsoe Ntat’a lōna oa leholimo oa tseba hore le hloka lintho tsena tsohle. Joale, le ’ne le batle ’muso pele le ho loka ha hae, ’me lintho tsena tse ling tsohle le tla li ekeletsoa.”—Matheu 6:25-33.
[Setšoantšo se leqepheng la 16]
Moapostola Pauluse o ile a ba le matšoenyeho