Likoluoa li Haufi le ho Fela

LITŠISINYEHO tsa lefatše, lintoa, litlala le maloetse—tsena ke tse ling tsa lintho tseo Jesu a ileng a bolela esale pele hore li ne li tla tšoaea “qetello ea tsamaiso ea lintho” eo re phelang ho eona hona joale. (Matheu 24:3, 7, 8; Luka 21:7, 10, 11) Ha e le hantle, hase Molimo ea bakang lintho tsena. Jesu le Ntate oa hae, Jehova, ha ba ikarabelle ka tsona.

Empa Molimo o tla ikarabella ka seo liketsahalo tsena tse boletsoeng esale pele li se supang, e leng ho tla ha ’Muso oa Molimo—puso ea leholimo eo Jesu Kreste e leng ’Musi oa eona—le ho timetsoa ha bohle ba hanang bobusi ba Jehova. (Daniele 2:44; 7:13, 14) Ka mor’a moo, lefatše le tla etsoa sebaka sa khotso le se sireletsehileng, ’me batho ha ba sa tla hlola ba tšoha likoluoa tsa tlhaho. Tšepiso ena eo Molimo a faneng ka eona e tla phethahala ka botlalo: “Sechaba sa ka se tla lula sebakeng sa bolulo sa khotso le bolulong bo tletseng kholiseho e feletseng le libakeng tsa bolulo tseo ho seng khathatso ho tsona.”—Esaia 32:18.

Mamela Molimo ’me U Phele!

Joalokaha ho hlalositsoe sehloohong se ka pejana, ho mamela litemoso ho ka pholosa batho. Molao-motheo oo o sebetsa le ho feta ha ho tluoa litemosong tseo Molimo a fanang ka tsona ka Bibeleng. Molimo o tšepisa hore: “Ha e le ea ’mamelang, o tla lula a sireletsehile ’me a ke ke a khathatsoa ke ho tšaba tlokotsi.”—Liproverbia 1:33.

Lipaki Tsa Jehova li ikitlaelletsa ho mamela Molimo ka ho bala Lentsoe la hae le bululetsoeng kamehla le ho sebelisa seo le se rutang. Li u mema hore le uena u etse se tšoanang. E, bohle ba mamelang Jehova, ha ho hlokahale hore ba tšabe bokamoso le tlokotsi e tla oela ba khopo. Ho e-na le hoo, ba ka lebella ho phela ka ho sa feleng Paradeiseng lefatšeng, moo ba tla “fumana thabo e phethehileng khotsong e ngata.”—Pesaleme ea 37:10, 11.

[Lebokose se leqepheng la 8]

MATŠELISO HO BA MESARELONG

Na u shoetsoe ke batho bao u ba ratang, mohlomong ba bolaoa ke koluoa ea tlhaho kapa tlokotsi e itseng? Lilemong tse ka bang 2 000 tse fetileng, motsoalle e mong oa Jesu ea haufi, e leng Lazaro, o ile a khaoletsoa ke lefu. Ha Jesu a utloa ka seo, o ile a ea motseng oa habo Lazaro oa Bethani, a mo tsosa “borokong” ba lefu.—Johanne 11:1-44.

Jesu ha aa ka a etsa mohlolo oo hobane feela a ne a batla ho bontša hore o rata Lazaro le ba lelapa labo empa o o entse hobane a ne a boetse a batla ho tiisa tšepiso ea hae ea hore o tla tsosa “bohle ba mabitleng a khopotso” nakong ea ha a busa ’Musong oa hae. (Johanne 5:28, 29) Ha e le hantle, Paradeiseng e tlang Jesu o tla etsolla lintho tsohle tse kotsi tse etsahetseng ho tloha ha borabele bo qaleha Edene.a—1 Johanne 3:8.

[Mongolo o botlaaseng ba leqephe]

[Lebokose/Setšoantšo se leqepheng la 9]

TŠISINYEHO EA LEFATŠE E FETOTSE TSELA EA KA EA BOPHELO

Ka 1971, ke ne ke le ’mè e mocha ke bile ke labalabela ho bina soprano ’minong oa opera. Ke ne ke tlohile motseng oa heso oa Winnipeg, Manitoba, Canada, ka 1957, ke ile haufi le Hollywood, California, U.S.A., ka tšepo ea hore ke tla finyella ntho eo ke neng ke e rata haholo, e leng ’mino.

’Mè eo e leng e mong oa Lipaki Tsa Jehova, o ne a qetile lilemo tse robong a nketela nakong ea lehlabula a tsoa Canada. O ne a atisa ho buisana le ’na ka Bibele ha a nketetse, a kholisehile hore e fana ka keletso e molemo ka ho fetisisa tabeng ea hore motho a phele a thabile lapeng. Ke ne ke rata ’Mè kahoo ke ne ke mo mamela ka tlhompho. Empa nako le nako ha a tsamaea, ke ne ke lahla lingoliloeng tseo a mphileng tsona, ke kholisehile hore lintho li ntsamaela hantle bophelong.

Joale, mesong ea Labobeli le leng ka February 1971, ke ile ka tsosoa ke tšisinyeho e matla ea lefatše e neng e etsa 6,6 sekaleng sa Richter. Ho ne ho e-na le lerata le thibang litsebe ’me lefatše le reketla ka matla. Ke ile ka mathela ho mora oa ka ke tšohile ’me ka imoloha ha ke mo fumana a sireletsehile betheng ea hae ea bana. Ha ho reketla hoo ho emisa, likhalase tse pshatlehileng le lijana tse tsoileng ka k’haboteng li ne li hasane hohle fatše, ’me metsi a neng a le ka letamong la ho sesa a tletse jarete. Le hoja ba lelapa la ka ba ne ba sireletsehile, ke ile ka sitoa ho robala.

’Mè o ne a buile ka hore ‘matsatsi a ho qetela’ a ne a tla tšoauoa ka “litšisinyeho tse khōlō tsa lefatše.” (2 Timothea 3:1; Luka 21:7-11) Lehlabuleng leo o ile a boela a nketela empa a tla a sa nka lingoliloeng tsa Bibele. Kaha o ne a qetile lilemo tse robong a mpakela empa a sa bone tsoelo-pele, o ne a entse qeto ea hore ha ke thahaselle. Empa o ne a fositse! Ho tloha ha a fihla feela, ke ile ka mo hloma lipotso. Ke ne ke se ke sa nke ’mino le botumo e le lintho tsa bohlokoa hakaalo.

Bekeng eona eo ke ile ka ea libokeng tsa Bokreste le ’Mè Holong ea ’Muso sebakeng sa heso, ’me ka mor’a moo e bile ka seoelo feela ke fosang liboka. O ile a lokisetsa hore ke khanneloe thuto ea lehae ea Bibele. Ke ile ka kolobetsoa ka 1973, ’me kajeno ke qeta lihora tse ka bang 70 khoeli ka ’ngoe ke bolella ba bang litaba tse molemo tsa ’Muso oa Molimo. (Matheu 24:14) Ka sebele ho e-na le hore tšisinyeho ea lefatše e sisinye tumelo ea ka ho Molimo e ile ea nthusa ho e haha.—Joalokaha ho boletse Colleen Esparza.