Tsa Mona le Mane

◼ Phetolelo ea Lefatše le Lecha ea Mangolo a Halalelang, e feletseng, e fumaneha ka lipuo tse 43 le ka tse tharo ka Braille; ha Phetolelo ea Lefatše le Lecha ea Mangolo a Segerike a Bakreste eona e fumaneha ka lipuo tse 18 le ka puo e le ’ngoe ka Braille. Ka July 2007, ho ne ho se ho hatisitsoe Libibele tse 143,458,577.

◼ Karolo ea Bibele e tsejoang e le ea khale ka ho fetisisa ke ea mantsoe a hlahang ho Numere 6:24-26, ao ho thoeng ke a Tlhohonolofatso ea Boprista. E ile ea fumanoa e ngotsoe lithathong tse peli tsa silevera, tsa lekholong la bosupa kapa mathoasong a lekholo la botšelela la lilemo B.C.E., tse neng li thatetsoe joaloka moqolo.—BIBLICAL ARCHAEOLOGY REVIEW, U.S.A.

◼ Ka la 31 December, 2006, palo ea lipuo tse khōlō le tse nyenyane tseo bonyane buka e le ’ngoe ea Bibele e ngotsoeng ka tsona e ne e le 2 426—e leng keketseho ea tse 23 ha e bapisoa le ea selemong se fetileng.—UNITED BIBLE SOCIETIES, BRITHANI.

◼ Maamerika a etsang liphesente tse 28 a nka Bibele e hlile e le “lentsoe la sebele la Molimo . . . le lokelang ho nkoa ka tsela ea sebele,” ha a etsang liphesente tse 49 ’ona a e nka e le “lentsoe le bululetsoeng la Molimo empa a sa nke hore ntho e ’ngoe le e ’ngoe e lokela ho nkoa ka tsela ea sebele,” ’me a etsang liphesente tse 19 ’ona a e nka e le “buka ea litšōmo.”—GALLUP NEWS SERVICE, U.S.A.

Ebe ke Eona Bibele ea Sechaena ea Khale ka ho Fetisisa?

Setsebi se bitsoang Yiyi Chen, sa Univesithi ea Peking, se re: “Tlaleho ea khale ka ho fetisisa e buang ka Bibele ea Seheberu e fetoletsoeng ka Sechaena e ngotsoe letlapeng [le ka ho letšehali] le emisitsoeng ka 781 CE.” Letlapa leo le emisitsoeng ke Bakreste ba neng ba latela Nestorius le ile la fumanoa motseng oa Xi’an ka 1625. Chen oa hlalosa: “Lebitso la Sechaena la letlapa lena le fetoletsoe e le ‘Sehopotso sa ho Ata ha Bolumeli bo Hlollang Chaena bo tlisitsoeng ke Daqin’ (. . . Daqin ke lentsoe la Sechaena le bolelang ’Muso oa Roma).” Har’a mantsoe a ngotsoeng letlapeng leo, re fumana lipolelo tsa Sechaena tse kang ‘karolo ea sebele ea mangolo a halalelang’ le “ho fetolela Bibele.’”

[Moo Setšoantšo se Nkiloeng Teng leqepheng la 30]

© Réunion des Musées Nationaux/Art Resource

Letlotlo le Fumanoeng Qhafutsong

Ka 2006, basebetsi ba neng ba fata qhafutsong e nang le litlamatlama tse bolileng ba ile ba fumana buka ea Lipesaleme, eo ho nahanoang hore ke ea hoo e ka bang ea lekholong la borobeli la lilemo C.E. Buka eo e ngotsoeng ka letsoho ka Selatine, ke e ’ngoe ea tse ’maloa tsa mehleng eo tse ntseng li le teng, ’me e hlalosoa e le letlotlo. Maqephe a ka bang 100 a entsoeng ka letlalo, a ntseng a tlanngoe, ke a boleng bo holimo. Koranta ea London ea The Times e re: “Mesaletsa ea ’mete o neng o patile buka ena le mokotla oa letlalo oo e neng e tšetsoe ka ho oona e fana ka maikutlo a hore lipesaleme tsena li ne li patiloe ka morero, mohlomong e le ho li sireletsa litlhaselong tsa mabotho a Scandinavia lilemong tse 1 200 tse fetileng.” Le hoja maqephe a eona a mamarelane ’me ho na le moo a bolileng, litsebi li kholisehile hore li tla khona ho a arola le ho a boloka.

Pokella ea Lintho Tsa Histori

Litlaleho li bontša hore baepolli ba lintho tsa khale ba sefang liqubu tsa mobu oa moo tempele ea Jerusalema e neng e le hona teng ba bokeletse lintho tse entsoeng ka matsoho tse likete, ho tloha ho tsa mehleng ea pele ho Baiseraele ho tla fihlela mehleng ea kajeno. Har’a tsona ho ne ho e-na le motsu o kang o neng o sebelisoa ke lebotho la Nebukadnezare, ea ileng a timetsa tempele ea pele ea Bajuda e neng e hahiloe sebakeng seo. Ntho e khahlang ka ho fetisisa e fumanoeng moo ke tiiso ea letsopa ea lekholong la bosupa kapa la botšelela la lilemo B.C.E., eo ho thoeng e na le lebitso la Seheberu, Gedalyahu Ben Immer Ha-Cohen. Ho latela moepolli oa lintho tsa khale ea bitsoang Gabriel Barkai, mong’a eona “e ka ’na eaba e ne e le mor’abo Pashkure Ben Immere, eo ka Bibeleng [ho Jeremia 20:1] a hlalositsoeng e le moprista le molaoli oa tempele.”