Tsa Mona le Mane
◼ Ka 2007, leqhoa le leoatleng la Arctic le ile la fokotseha “haholo ho tloha ha le ne le qala ho nkoa litšoantšo ka sathelaete.” Leqhoa lena le ne le se le le lisekoere-k’hilomithara tse 4 280 000, ’me le ne le fokotsehile ka karolo ea 23 lekholong ha le bapisoa le tlaleho ea 2005.—NATIONAL SNOW AND ICE DATA CENTER, U.S.A.
◼ United States e na le lithunya tse ngata ka ho fetisisa lefatšeng kaha baahi ba etsang karolo ea 90 lekholong ba na le lithunya. Naha “ea bobeli eo baahi ba eona ba nang le lithunya tse ngata” ke India, moo “batho ba bane ho ba lekholo ba nang le lithunya.”—TIME, U.S.A.
◼ Ngoana ea hlahileng a le libeke li 21 le matsatsi a tšeletseng, ea boima ba ligrama tse 283,5 ea hlahetseng Miami, Florida, U.S.A., “mohlomong ke eena ngoana ea hlahileng pele ho nako ea hae a le monyenyane ka ho fetisisa ’me a phela.” “Bana ba hlahang pele ba e-ba le libeke tse 23 ’me ba le boima bo ka tlaase ho ligrama tse 400 ba nkoa ba se na monyetla o mokaalo oa ho phela.”—REUTERS NEWS SERVICE, U.S.A.
Metsi a Leoatle a se Nang Letsoai
E le ho sebetsana le bothata ba metsi a haellang lihlekehlekeng tse Leoatleng la Aegean, Mokhatlo oa Litaba oa Athene o tlaleha hore bo-rasaense ba Magerike ba entse “mochine oa pele lefatšeng o itsamaisang o phaphamalang leoatleng, o ntšang letsoai metsing empa o sa senye tikoloho.” Mochine ona o tsamaisoang ke moea le matla a letsatsi, o hlahisa metsi a lekaneng ho fepela batho ba 300 letsatsi le letsatsi. Leha boemo ba leholimo bo le bobe mochine ona oa sebetsa, ’me batho ba ka o lekola le ho o laola ba le hōle, ’me o ka isoa sebakeng leha e le sefe moo o hlokahalang.
Ho Sibolloa Masapo a Boholo-holo
Tlaleho ea litaba ea Reuters e hlahang Cherskiy, Sakha, Russia, e re: “Karolong e ka leboea ea Siberia . . . , thempereichara e ntseng e fetoha e qhibilihisa libaka tse neng li lula li le leqhoa, ’me ho hlaha masapo a liphoofolo tsa khale-khale tse kang mofuta oa tlou, litšukulu tse phophomang boea le litau.” Kaha ba bokellang lintho tsa bohlokoa le litsi tsa saense ba ikemiselitse ho lefa chelete e ngata bakeng sa ho fumana mesaletsa e ntseng e le boemong bo botle, batho ba li epollang, ba thusoa ke batho ba sebakeng seo, ba sheba hohle lesabasabeng lena e le hore ba ka fumana lintho tsena tsa bohlokoa. Tlaleho eo e re: “Leqhoa le qhibiliha ka potlako hoo libakeng tse ling . . . limithareng tse ling le tse ling tse seng kae ho hlahellang masapo mobung.”
Joala bo Seng Molaong bo Sebelisoa Hantle
Lilemong tse ’maloa morao tjena, ba sebetsang liofising tsa lekhetho la lintho tse kenang le tse tsoang ha ba sa qhala joala bo fumanoeng ho batho ba bo mokolang. Tlaleho ea Associated Press ea Stockholm e re hona joale joala boo bo sebelisetsoa “ho thusa ho hlahisa mafura a tsamaisang lipalangoang tsa sechaba.” Joala bo etsang lilithara tse ka bang 700 000 bo fumanoeng ka 2006 bo ile ba fetoloa khase e sebelisoang joaloka peterole “ho tsamaisa libese, literaka le literene.” Tlaleho ena e re mafura ana “a molemo khoebong hobane sehlahisoa se a etsang se fumanoa mahala.” Hape ke a bohlokoa hobane ho a sebelisa ho fokotsa mosi o bakang tšilafalo Sweden.
“Seoa sa ho ba Lihlong”
Sunday Telegraph ea Australia e tlaleha hore “melaetsa ea E-mail, ea fono le li-iPod li etsa hore batho ba bangata lefatšeng ba be lihlong.” Ho latela Robin Abrahams, eo e leng setsebi sa kelello, ebile e le mofuputsi, batho ba ka etsang halofo sechabeng hona joale ba ba lihlong ha ba le ka har’a batho, ’me sena se bolela hore batho ba eketsehileng ba lihlong ho feta nakong e fetileng. Abrahams o re “theknoloji e etsa hore re qobe maemo ao re sa rateng ho thulana le ’ona ’me e etsa hore re itšehle thajana le ho feta. Batho ba . . . ngollana melaetsa ka e-mail kapa ka fono ho e-na le hore ba buisane.”