Bacha Baa Botsa

Ke’ng Seo Nka se Aparang?

Heather o mothating oa ho tsoa ka tlung, ’me batsoali ba hae ha ba kholoe seo ba se bonang.

Ntate oa hae o re: “Ke ha u se u apere ha u le tjee?”

Heather o re ka ho makala: “E, bothata bo kae? Ke mpa ke ikela mabenkeleng feela le metsoalle.”

’Mè oa hae o re: “Eseng u apere joalo!”

Heather oa tletleba, o re: “Empa ’Mè, bana ba bang kaofela ba apara tjena, . . . ebile ha u apere tjena ke hona ha u apere!”

Ntate o araba a halefile, o re: “Ha re rate tsela eo u apereng ka eona. Joale, khutlela ka kamoreng u e’o chencha ausinyana, ho seng joalo ha ho moo u eang teng!”

TABA ea ho loanela liphahlo ha e qale hona joale. E ka ’na eaba batsoali ba hao le bona ba ’nile ba loanela liphahlo le batsoali ba bona ha ba ne ba lekana le uena. Mohlomong ka nako eo ba ne ba ikutloa ka tsela eo u ikutloang ka eona kajeno! Empa hona joale ba se ba fetotse maoa, ’me le lula le qabana ka liaparo.

U re: Se ntula hantle.

Ba re: Sea makatsa.

U re: Se setle!

Ba re: Se hlaha.

U re: Se chipi.

Ba re: Se hlile se tšoanetse. . . . Karolo e ’ngoe ea sona ha e eo!

Na ho na le seo le ka se etsang hore le khaotse ho loana? E, se teng! Megan ea lilemo li 23 o tseba lekunutu la seo. O re: “Ha ho hlokahale hore le phehisane khang. Le ka lumellana.” Ra lumellana? Na seo se bolela hore u lokela ho apara joaloka motho ea lilemo li 40? Che! Ho lumellana ho mpa ho bolela hore uena le batsoali ba hao le ka buisana ka liaparo tse ling tseo u ka li khethang tseo uena hammoho le batsoali ba hao le ka li thabelang. Ho etsa seo ho tla u tsoela molemo joang?

 1. U tla bonahala u apere hantle, esita le lithakeng tsa hao.

 2. Batsoali ba hao ha ba na ho nyatsa seo u se aparang hakaalo.

 3. Ha batsoali ba hlokomela kamoo u bontšang boikarabelo kateng tabeng ena, ba ka ’na ba u fa bolokolohi bo eketsehileng.

Ha re oele temeng. Nahana ka seaparo se itseng seo u se “batlang matleng,” seo u se boneng Inthaneteng kapa lebenkeleng. Ntho ea pele eo u lokelang ho e etsa ke . . 

Ho Nahana ka Melao-motheo ea Bibele

Bibele ha e bue hakaalo ka moaparo. Ha e le hantle, u ka qeta metsotso e seng mekae u balla holimo likeletso tsohle tsa Mangolo tse buang ka taba ena ka ho toba! Empa ka metsotso eo, u tla fumana tataiso ea bohlokoa le e utloahalang. Ka mohlala:

◼ Bibele e eletsa basali hore ba ikhabise “ka boitlhompho le ho hlaphoheloa kelellong.”a—1 Timothea 2:9, 10.

Lentsoe “boitlhompho” le ka ’na la u tšoenya. U ka ’na ua ipotsa, ‘Na ke lokela ho apara liaparo tse sa boheheng?’ Le hanyenyane! Tabeng ena, boitlhompho bo bolela ho apara ka tsela e nang le seriti le e bontšang ho nahanela maikutlo a ba bang. (2 Bakorinthe 6:3) Ho na le liaparo tse ngata tse ka etsang sena. Danielle ea lilemo li 23 o re: “Ho ka ’na ha e-ba thata, empa u ntse u ka apara ka tsela ea feshene le hoja e se ka tsela e makatsang.”

◼ Bibele e re ha ho tluoa tabeng ea ponahalo, u lokela ho ameha ka “motho ea ka sephiring oa pelo.”—1 Petrose 3:4.

Moaparo o se nang boitlhompho o ka ’na oa u bitsetsa mahlo ka nakoana, empa botle bo ka hare ke bona bo tla etsa hore batho ba hōlileng le lithaka tsa hao ba u hlomphe kamehla. Na lithaka tsa hao li ka hla tsa u hlompha? E—esita le tsona li ka ’na tsa bona booatla ba ho apara ka tsela e makatsang. Brittany ea lilemo li 16 o re: “Hoa soabisa ho bona kamoo basali ba lekang ho hohela banna kateng ka liaparo tseo ba li aparang!” Kay o lumellana le eena. Ha a hlalosa motsoalle e mong oa hae oa mehleng, o re: “Ntho e ’ngoe le e ’ngoe eo a neng a e apara e ne e etsa hore batho ba mo shebe. O ne a batla hore bashemane ba mo shebe, kahoo a apara liaparo tse mo bitsetsang mahlo.”

Keletso: Qoba ho apara liaparo tse u bitsetsang mahlo. Li etsa hore u bonahale eka u tsietsing e khōlō ea ho batla ho bonoa ebile u inahana bouena. Li ka boela tsa etsa hore u hlekefetsoe habonolo—kapa u etsahalloe ke ntho e mpe le ho feta. Ka lehlakoreng le leng, liaparo tse hlomphehang li ntlafatsa ponahalo ea hao ebile li totobatsa litšobotsi tse ntle tseo u nang le tsona.

Kōpa Keletso ho Batsoali

Ho pata liaparo tse makatsang ka mokotleng ebe u li apara ha u fihla sekolong, hase tsela e ntle ea ho etsa lintho. Batsoali ba hao ba tla u tšepa le ho feta haeba u tšepahala, esita le linthong tseo u nahanang hore u ka ba patela tsona. Ha e le hantle, e ka ba bohlale hore u ba botse hore na ba nahana’ng ka liaparo tseo u batlang ho li apara.—Liproverbia 15:22.

Empa ke hobane’ng ha u lokela ho ba botsa? Na hase mosebetsi oa batsoali hore ba u hanele ka lintho tsa feshene? Che. Ke ’nete hore ’mè oa hao le ntate oa hao ba ka ’na ba talima lintho ka tsela e ’ngoe. Empa ka linako tse ling ke sona seo u se hlokang. Nataleine ea lilemo li 17, o re: “Ke ananela keletso ea batsoali ba ka, hobane ha ke batle ho itlosa seriti ha ke tsamaea tseleng kapa hore batho ba bue hampe ka ’na, ka lebaka la tsela eo ke shebahalang ka eona.”

Ntle ho moo, ’nete ke hore: Hafeela u ntse u lula le batsoali ba hao, u tlas’a taolo ea bona. (Bakolose 3:20) Empa ha u utloisisa maikutlo a bona—’me le bona ba utloisisa a hao—u ka ’na ua makatsoa ke kamoo le lumellanang linthong tse ngata kateng. Ka lebaka leo, le ka ’na la khaotsa ho loanela liphahlo!

Keletso: Ha u itekanya ka seaparo se itseng, u se ke ua nahana ka seo u se bonang ka seiponeng feela. Seaparo se ka ’nang sa bonahala se u lekana hantle, se ka ’na sa fetoha ha u lula fatše kapa u thonaka ntho e itseng. Haeba ho khoneha, botsa motsoali kapa motsoalle e mong ea hōlileng tsebong hore na o nahana joang ka sona.

Lihlooho tse ling tsa “Bacha Baa Botsa” li ka fumanoa mocheng oa boitsebiso oa Inthanete ho www.watchtower.org/ype

[Mongolo o botlaaseng ba leqephe]

SEO U KA NAHANANG KA SONA

Nahana ka seaparo se itseng seo u batlang ho se reka. Joale ipotse:

◼ Se fana ka maikutlo afe ka ’na?

◼ Se ka ’na sa susumelletsa ba bang hore ba etse’ng?

◼ Na ke sona seo ke batlang hore batho ba se etse ha ba mpona?

[Lebokose/Setšoantšo se leqepheng la 19]

Lintlha tse ka u thusang ka liaparo

Litaelo: Kopitsa leqephe lena. Kōpa batsoali ba hao hore ba tlatse mela e ka letsohong le letona ’me uena u tlatse e ka letsohong le letšehali. Ha le qeta, u fe batsoali ba hao likarabo tsa hao ’me uena u nke tsa bona, ebe le buisana ka seo le se ngotseng. Na ho na le lintho tse le makatsang? Le ithutile eng eo le neng le sa e tsebe ka e mong, mabapi le tsela eo le talimang lintho ka eona?

․․․․․ Leibole ․․․․․ Leibole

․․․․․ Se ntula hantle ․․․․․ Se mo lula hantle

․․․․․ Theko ea sona ․․․․․ Theko ea sona

․․․․․ Lebaka le leng ․․․․․ ․․․․․ Lebaka le leng ․․․․․

□ “U ke ke ua se reka!” □ “U ke ke ua se reka!”

□ “U ka ’na ua se reka.” □ “U ka ’na ua se reka.”

□ “Ho lokile, u ka se reka.” □ “Ho lokile, u ka se reka.”

□ “Se hlaha.” □ “Se hlaha.”

□ “Sea makatsa.” □ “Sea makatsa.”

□ “Se fesheneng haholo.” □ “Se fesheneng haholo.”

□ “Se turu haholo.” □ “Se turu haholo.”

□ Lebaka le leng ․․․․․ □ Lebaka leleng ․․․․․

NA RE KA SEBELISANA HAMMOHO NTLHENG EE?

․․․․․ □ E □ Mohlomong □ Che

․․․․․ ․․․․․

QETO

․․․․․

[Lebokose/Litšoantšo tse leqepheng la 20]

SEO BACHA BA BANG BA SE BUANG

“Ho loketse ho apara liaparo ‘tsa feshene,’ hafeela li se khahlanong le melao-motheo ea Bibele. Ho na le lintho tse ngata tse ntle tseo u ka li rekang tse amohelehang.”—Derrick.

“Ha ke sa le monyenyane, ke ne ke batla ho itaola. Ke ne ke sa rate ho bolelloa hore na ke apare eng. Empa ha nako e ntse e ea, ke ile ka hlokomela hore batho ha ba ntlhomphe ka tsela eo ke neng ke batla hore ba ntlhomphe ka eona—leha ho le joalo, boemo bo ile ba fetoha ha ke qala ho ela hloko seo batsoali ba ka le batho ba bang ba hōlileng ba se buang.”—Megan.

“Ha ke bona banana ba apereng ka tsela e makatsang, seo se etsa hore ke se ke ka hlola ke ba hlompha hakaalo. Ka lehlakoreng le leng, ha ke bona batho ba apere hantle ka tsela e nang le seriti, ke ee ke re ka pelong, ‘Ke kamoo ke batlang hore batho ba mpone ke le kateng.’”—Nataleine.

[Lebokose/Setšoantšo se leqepheng la 21]

HO THOE’NG KA BASHEMANE?

Melao-motheo ea Bibele e tšohliloeng sehloohong sena ea sebetsa le ho bashemane. Aparang ka tsela e hlomphehang. Etsang hore motho ea ka sephiring—e leng seo le hlileng le leng sona—a bonahale ka ho hlaka. Ha u nahana ka seaparo se itseng, ipotse: ‘Se tla fana ka maikutlo afe ka ’na? Na se bontša seo ke hlileng ke leng sona?’ Hopola hore liaparo ke mokhoa o mong oa boitsebahatso. Tiisa hore liaparo tsa hao li bonahatsa seo u se lumelang!

[Lebokose/Setšoantšo se leqepheng la 21]

MOLAETSA O EANG HO BATSOALI

Nahana ka boemo bo boletsoeng qalong ea sehlooho sena, ’me u nke hore Heather ke morali oa hao. Ua hlokomela hore ho tšoana le ha a sa apara—’mele oohle o ka ntle. Hang ha u mo bona, u re, “Khutlela ka kamoreng u e’o chencha ausinyana, ho seng joalo ha ho moo u eang teng!” Seo se ka ’na sa u khotsofatsa. Etsoe morali oa hao ha a na boikhethelo haese hore a etse seo u mo bolellang sona. Empa u ka etsa’ng ho mo ruta hore a fetole tsela eo a nahanang ka eona, eseng feela tsela eo a aparang ka eona?

◼ Ntlha ea pele, hopola hore joaloka uena, mocha o ameha ka tsela e tšoanang ka liphello tse ka tlisoang ke ho apara ka tsela e sa hlompheheng, mohlomong o ameha le ho feta. Tlaase botebong ba pelo, ngoana oa hao ha a batle ho bonahala eka ke lekoala kapa hona ho ipitsetsa mahlo ho sa hlokahale. Ka mamello, mo bontše hore ho apara ka tsela e sa hlompheheng ha ho fe motho seriti.b Mo eletse hore na a ka apara eng.

◼ Ntlha ea bobeli, etsa hore “ho ba le kahlolo e molemo ha [hao] ho ke ho tsejoe.” (Bafilipi 4:5) Ipotse, ‘Na ho apara seaparo see ho khahlanong le molao-motheo oa Bibele, kapa e mpa e le feela hore ha ke se rate?’ (2 Bakorinthe 1:24) Haeba ke feela taba ea hore ha u se rate, na u ka mo lumella hore a se apare?

◼ Ntlha ea boraro, u se ke ua bolella ngoana feela hore liaparo tse itseng ha li amohelehe. Mo thuse hore a fumane tse amohelehang. Seo se tla ba molemo haholo.

[Mongolo o botlaaseng ba leqephe]