Khaolo ea 12
Ho Hlonepha Borena Hoa Hlokahala bakeng sa ho Phela ka Khotso
1-3. (a) Ke eng e tlatselitseng ho haneng borena ho jeleng setsi mehleng ea rōna? (b) Boikutlo bona bo bontšoa ka litsela life tse fapaneng? (c) Liphello li utluoa hokae?
LEFATŠE la kajeno le busoa ke moea oa boitaolo. Ho se tšepe borena ho akaretsang ho ntse ho hōla, haholo-holo har’a ba tsoetsoeng ho tloha ka Ntoa ea II ea Lefatše. Hobane’ng? Lebaka le leng ke hore, batsoali ba bona ba ne ba ile ba bona khatello ka tekanyo e ncha, hammoho le mekhoa e bolotsana le e silafetseng ka ho fetisisa ea ba pusong. Ba ba le pono e lerootho ka borena. Ka baka leo, ba bangata ho bona, eare ha e e-ba batsoali, ha baa ka ba ruta bana ba bona ho hlompha borena. Leha e le hore leeme la ba boholong le bonoang ke bana le ile la thusa. Ka baka leo, ho se hlomphe borena ho fetohile ho tloaelehileng.
2 Ho se hlomphe hoo ho bontšoa ka litsela tse sa tšoaneng. Ka linako tse ling ke ka mekhoa ea ho apara kapa ea boitlhopho e bontšang ho hana litekanyetso tse amohelehang. Ho ka ’na hoa akarelletsa ho nyelisa sepolesa pepeneneng, kapa eona pefo le tšollo ea mali. Empa ha hoa lekanyetsoa linthong tsena feela. Le har’a ba sa itlhaloseng ka litsela tsena tse pepenene haholo, ba bangata ba hlokomoloha kapa ba tlōla melao holimo haeba ba sa lumellane le melao e joalo kapa ba fumana hore e-ea ba sitisa.
3 Boemo bona bo amme ka matla moea o ka malapeng, likolong, le libakeng tsa mesebetsi, le moo ho sebelisanoang le ba boholong mebusong. Ho ntse ho eketseha hore batho ba se batle ha e mong a ba bolella hore na ba etse’ng. Ba hahamalla seo ba lumelang hore ke bolokolohi bo eketsehileng. U talimane le boemo bona, u tla etsa joang?
4. Ka seo re se etsang tabeng ena, re bontša boikutlo ba rōna tsekong efe?
4 Tsela eo u e nkang e tla bontša hore na u eme kae tsekong ea borena ba bokahohle ba Jehova. Na u hlile u hlonepha Jehova e le Mohloli oa khotso ea ’nete le tšireletseho? Na u tla batla seo Lentsoe la hae le se laelang e be u se sebelisa bophelong ba hao? Kapa na u tla ea le bao ka boitaolo ba iketsetsang liqeto tsa bona ka hore na se setle le se sebe ke sefe?—Genese 3:1-5; Tšenolo 12:9.
5. (a) Ho latela batho ba tšepisang “bolokolohi” ho atisa ho fella ka eng? (b) Motho ea etsang thato ea Molimo o lokolohile hakae?
5 Tsebo e nepahetseng ea Bibele e ka u sireletsa khahlanong le ho thetsoa ke bao, ‘ha ba tšepisa batho bolokolohi, bona ke makhoba a litloaelo tse bolileng.’ Ho latela ketello pele ea batho ba joalo e ne e tla ba ho ipea feela boemong bo tšoanang ba bokhoba. (2 Petrose 2:18, 19, TLP) Bolokolohi ba ’nete bo ka fumanoa feela ka ho ithuta le ka ho etsa thato ea Molimo. Molao oa oona oa bomolimo ke ‘molao o phethehileng e leng oa tokoloho.’ (Jakobo 1:25) Re ka bua joalo hobane Jehova ha a re etsetse lithibelo ntle ho mabaka, a re sitisa ka melao e se nang morero oa letho o molemo. Empa molao oa hae o fana ka tataiso e fanang ka bolokolohi, khotso, le tšireletseho tse theiloeng kamanong e nepahetseng le Molimo le motho.
6, 7. (a) Ke mang ea boemong bo molemo ka ho fetisisa ho etsa ho hong ka tšebeliso e mpe ea borena? (b) Jesu o bontšitse joang hore na ho etsahala joang ka batho ba inkelang molao matsohong?
6 Ke Molimo o tsebang hamolemo ho feta mang kapa mang hore na tšenyeho ea motho le tšebeliso e mpe ea borena li khōlō hakae. ’Me o fane ka Lentsoe la oona hore ho sa tsotellehe hore na ba hatellang ba boemong bo phahameng hakae, o tla ba bitsa hore ba ikarabelle. (Ba-Roma 14:12) Ka nako e khethiloeng ke Molimo, “ba babe ba tla khaoloa holim’a lefatše, ba lonya ba fotholoe ho lona.” (Liproverbia 2:22) Empa re ke ke ra tleloa ke molemo oa nako e telele haeba re hloka mamello ’me re inkela molao matsohong.—Ba-Roma 12:17-19.
7 Bosiung boo Jesu a ekiloeng a ba a tšoaroa ka bona, o hatisitse sena ho baapostola ba hae. Ka lebaka la maemo a neng a le teng ka hare ho naha, ho akarelletsa boteng ba liphoofolo tse hlaha, batho ba ne ba atisa ho nka lihlomo. Ke kahoo ka lekhetlo leo ho neng ho e-na le lisabole tse peli har’a baapostola ba Jesu. (Luka 22:38) Hoa etsahala joang? Ba bona ha toka e sothoa hampe ha Jesu a tšoaroa ntle ho lebaka. Moapostola Petrose ka ho nkeha maikutlo, a hula sabole ea hae ’me a hlatha tsebe ea e mong oa banna bao. Empa Jesu a khutlisetsa tsebe e ponngoeng ’me a khalemela Petrose: “Busetsa sabole ea hao selateng sa eona, hobane bohle ba tšoereng sabole, ba tla bolaoa ka sabole.” (Mattheu 26:52) Batho ba bangata, le mehleng ea rōna, ba ka be ba bolokiloe lefung la tšohanyetso ka ho latela keletso ena.—Liproverbia 24:21, 22.
Pono e Nepahetseng ka Borena ba Lefatše
8. (a) Joalokaha ho boletsoe ho Ba-Roma 13:1, 2, Bakreste ba lokela ho talima babusi ba lefatše joang? (b) Ho boleloa eng ka polelo ea hore ba ‘beiloe ke Molimo libakeng tsa bona tse nang le matla a lekanyelitsoeng’?
8 Ha a ngolla Bakreste Roma, moapostola Pauluse o ile a bululeloa ke Molimo hore a bolele hore na ba ne ba lokela ho itšoara joang kamanong le marena a lefatše. A ngola: “Motho ka mong a ikokobetse ka tlas’a borena [bo phahameng], hobane ha ho borena bo sa tsoeng ho Molimo, marena a leng teng a beiloe [litulong tsa oona tse nang le matla a lekanyelitsoeng] ke Molimo. Ka baka leo, ea hanang ho borena, o hana molao oa Molimo, ’me ba hanang ba ikhulela tsuo holimo.” (Ba-Roma 13:1, 2, bapisa le NW) Na hona ho bolela hore Molimo ke oona o beileng babusi baa ba lefatše pusong? Ka ho tiileng Bibele e arabela ka che! (Luka 4:5, 6; Tšenolo 13:1, 2) Empa ba teng ka tumello ea oona ’me ‘setulo se nang le matla a lekanyelitsoeng’ seo ba se lutseng historing eohle se lekanyelitsoe ke Molimo. Setulo seo ke sefe?
9. Le hoja ba boholong ba etsa mekhoa e fosahetseng, ke hobane’ng ha re ba hlompha?
9 Lengolo le sa tsoa qotsoa le bolela hore ke se “phahameng.” Ka hona bahlanka ba ’muso ha baa lokela ho hlompholloa. Melao eo ba e sebelisang e lokela ho hlomphuoa. Hona ha ho bolele hore u hlile u khahloa ke batho ba joalo, leha e le hona hore u ananela tšenyeho leha e le efe eo ba ka ’nang ba kopanela ho eona. Empa tlhompho e loketseng e bontšoa ka lebaka la setulo seo ba se lutseng.—Tite 3:1, 2.
10. Ho lefuoa hoa makhetho ho lokela ho talingoa joang, hona hobane’ng?
10 Boholong ba taba, melao ea lefatše e sebeletsa molemo. E thusa ho boloka taolo ’me e tiisa hore batho le thepa ea bona ba sireletsehile ka ho itseng. (Ba-Roma 13:3, 4) Hape, hangata mebuso e lokisetsa litsela, tšebeletso ea tlhoekiso, tšireletso ea mollo, thuto, le litšebeletso tse ling tse tsoelang batho molemo. Na e lokela ho lefeloa litšebeletso tsee? Na re lokela ho lefa makhetho? Potso ena e atisa ho phahamisa maikutlo ka lebaka la makhetho a phahameng le hore hangata lichelete tsa sechaba li sebelisoa hampe. Mehleng ea Jesu, potso e ne e ntse e e-na le litlhahiso tsa bopolotiki. Empa Jesu ha a ka a nka boikutlo ba hore boemo bo teng bo lumella ho se lefe. Ha a bua ka chelete e neng e entsoe ke Sesare oa Roma, o itse: “Ka baka leo, neang Sesare seng sa Sesare, le Molimo seng sa Molimo.” (Matheu 22:17-21, TLP; Ba-Roma 13:6, 7) Che, Jesu ha aa ka a thooletsa maikutlo a hore e mong le e mong a iphetole molao.
11, 12. (a) Mangolo a bontša joang hore ho na le borena bo bong bo lokelang ho nahaneloa? (b) U ne u tla etsa joang haeba marena a lefatše a ntša litaelo tse hananang le se hlokoang ke Molimo, hona hobane’ng?
11 Leha ho le joalo, Jesu o bontšitse hore “Sesare,” ’muso oa lefatše, e ne e se oona matla feela ao ho ka nahanoang ka oona. ‘Marena a phahameng’ ha a phahamela Molimo kapa hona hore a lekana le oona. Ho fapana le hoo, a o fokolla haholo. Ka hona matla a oona a lekanyelitsoe, hase oona a ho qetela. Ka lebaka la sena, hangata Bakreste ba ’nile ba thulana le maemo a ho etsa qeto e thata. Ke qeto eo le uena u tlamehang ho tobana le eona. Ha batho ba pusong ba ipatlela seo e leng sa Molimo, u tla etsa joang? Haeba ba hanela seo Molimo o se laelang, u tla utloa mang?
12 Baapostola ba Jesu ka tlhompho empa e le ka tieo, ba bolella litho tsa lekhotla le phahameng la Jerusalema boemo ba bona: “Ha ho kamoo re ka lesang ho bolela tseo re li boneng le tseo re li utloileng. . . . E ka khona re utloe Molimo [e le Morena] ho e-na le batho.” (Liketso 4:19, 20; 5:29, bapisa NW) Ka linako tse ling mebuso e ’nile ea bea lithibelo nakong ea maemo a tšohanyetso, ’me hoo hoa utloahala. Empa ka linako tse ling lithibelo tsa mebuso li ka ’na tsa lokisetsoa ho kena-kenana le borapeli ba rōna ba Molimo ’me tsa re thatafaletsa ho phethahatsa tlamo e tsoang ho Molimo. Joale? Lentsoe le bululetsoeng la Molimo lea arabela: “E ka khona re utloe Molimo [e le Morena] ho e-na le batho.”
13, 14. (a) Re lokela ho ba hlokolosi hakae tabeng ea ho se utloe melao ea lefatše ka lebaka la mabaka a botho? (b) Ka Mangolo, supa mabaka a sena.
13 Le hoja ho hlonepha tlamo ena ho Molimo ho ka ’na hoa loantšana le se hlokoang ke “Sesare,” hona ho fapane ho hang le ho tlōla ka boomo melao eo re sa lumellaneng le eona. Ke ’nete hore, ponong ea botho, melao eitseng e ka ’na ea bonahala e sa hlokahale kapa e thibela ntle ho mabaka. Empa hoo ha ho lokafatse ho tlōla melao e sa hananeng le melao ea Molimo. Ho thoe’ng haeba batho bohle ba ne ba utloa feela melao eo ba nkang hore e molemo ho bona? Ho ne ho ka isa ho oeng hoa puso feela.
14 Ka linako tse ling motho a ka ’na a ikutloa hore a ka hlokomoloha borena ’me a etsa se mo khahlang hobane mohlomong a ke ke a tšoaroa ’me a fumana kotlo. Empa ho na le kotsi e khōlō ho sena. Ha ho hlokomoloha molao ho ka ’na hoa qala ho ama litaba tse nyenyane, ha motho a sa fumane kotlo mohlomong ho ka mo betefatsa hore a tlōle molao haholoanyane. Joalokaha Moeklesia 8:11 e re: “Ereka ha kahlolo e ahlolang mesebetsi eohle e khopo e sa phakise ho etsahala, ka hoo pelo tsa bana ba batho li ntse li tlala takatso ea ho etsa hampe.” Empa na lebaka la sebele la ho utloa molao ke feela ho tšaba kotlo ea ho se utloe? Bakeng sa Mokreste, ho tlameha ho be le tšusumetso e matla haholoanyane. Moapostola Pauluse o itse ke “lebaka le tlamang”—takatso ea letsoalo le hloekileng. (Ba-Roma 13:5, NW) Motho eo letsoalo la hae le rupetsoeng ka melao-metheo ea Mangolo o tseba hore ho phehella tsela e sa eeng ka molao e ka ba ho nka boemo bo hananang le “molao oa Molimo.” Ho sa tsotellehe hore na batho ba bang ba tseba seo re se etsang, Molimo o-oa se tseba, ’me litebello tsa rōna bakeng sa bophelo ba kamoso li itšetlehile ka oona.—1 Petrose 2:12-17.
15. (a) Ke eng e lokelang ho tataisa motho boikutlong ba hae mabapi le tichere kapa mohiri? (b) Ka tsela ena re qoba ho susumetsoa ke moea oa mang?
15 Ke ’nete le ka boikutlo ba motho e mocha ho tichere ea hae le ka boikutlo ba motho e moholo ho mohiri oa hae oa lefatše. ’Nete ea hore batho ba bangata ba re potolohileng ba etsa lintho tse fosahetseng ha e-ea lokela ho ba lona lebaka le re etellang pele. Le haeba tichere kapa mohiri ba tseba seo re se etsang kapa che, ha hoa lokela ho etsa phapang ea letho. Potso ke hore na, Ho nepahetseng ke hofe? Ho khahlisang Molimo ke hofe? Hape, haeba seo re kōptjoang ho se etsa se sa hanane le molao oa Molimo kapa melao-metheo e lokileng, rea kopanela. Hangata matichere a likolo ke baemeli ba mebuso ea lefatše, ka hona ke bahlanka ba “borena,” ’me kahoo a lokeloa ke tlhompho. ’Me tabeng ea bahiri ba lefatše, ho ka ’na hoa sebelisoa motheo oa Bibele o ho Tite 2:9, 10, le hoja mono Pauluse a ne a ngola ka kamano esele, ea makhoba ho beng ba oona. Pauluse o itse: “Ba ba khahlise . . . ba etse hohle ka botšepehi bo botle, ba tle ba hlophise thuto ea Molimo, ’Moloki oa rōna, nthong tsohle.” (Tite 2:9, 10) Kahoo, re qoba tšusumetso ea Satane, eo moea oa hae “o sebetsang joale baneng ba ho se lumele,” ’me re haha likamano tsa khotso le batho ba bang.—Ba-Efese 2:2, 3.
Borena ka Lapeng
16. Ke tlhokahalo efe bakeng sa bophelo bo momahaneng ba lelapa e boletsoeng ho 1 Ba-Korinthe 11:3?
16 Tikoloho ea lelapa ke sebaka se seng seo ho sona ho hlonepha borena ho ka sebeletsang likamano tsa khotso. Hangata tlhompho e hahang joalo e-ea haella, ho fella ka ho qhalana hoa likamano tsa lelapa ’me hangata ho qhalana hoa lelapa ka bolona. Ho ka etsoa eng ho ntlafatsa boemo? Molao-motheo oa bohlooho, joalokaha o ngotsoe ho 1 Ba-Korinthe 11:3, o na le karabelo: “Hloho ea monna e mong le e mong ke Kreste, ’me hloho ea mosali ke monna, ’me hloho ea Kreste ke Molimo.”
17. (a) Mabapi le bohlooho, sebaka sa monna ke sefe? (b) Kreste o beile mohlala ofe o motle mabapi le bohlooho ba monna?
17 Hlokomela hore polelo ena ea tokisetso ea Jehova ha e qale ka bohlooho ba monna. Ho e-na le hoo, e hlokomelisa ka ’nete ea hore ho na le e mong eo monna a lokelang ho shebella tataiso ho eena, eo a lokelang ho latela mohlala oa hae. Eo ke Jesu Kreste. Ke hlooho ea monna. ’Me litšebelisanong tsa hae le phutheho ea hae, e tšoantšoang le monyaluoa, Kreste o bontšitse tsela ea ho atlehisa bohlooho ba bonna. Mohlala oa hae o motle o ile oa susumelletsa balateli ba hae hore ba arabele ka boithatelo. Ha a etella pele, ho e-na le ho ba ’m’ampoli, ea thata le ea laelang ho balateli ba hae, Jesu o ne a le “mosa le pelo e nolo,” hoo ba neng ba fumanela meea ea bona phomolo. (Mattheu 11:28-30) Na o ne a ba nyelisa ha ba entse liphoso? Ho fapana le hoo, o ne a ba eletsa ka lerato ’me o bile a ba tella bophelo ba hae ho ba hloekisa libeng. (Ba-Efese 5:25-30) Ke lehlohonolo le lekaakang ho lelapa leha e le lefe ho ba le monna ea lekang ka tieo ho latela mohlala oo!
18. (a) Mosali a ka bontša hore o hlompha borena ba monna oa hae ka litsela life? (b) Bana ba ka bontša ho hlompha batsoali ba bona joang, hona hobane’ng?
18 Ha lelapa le e-na le bohlooho bo joalo, ha ho thata hore mosali a shebe ho monna oa hae. Le bana ba mamela habonolo haholoanyane. Empa hape ho na le ho hongata hoo mosali le bana ba ka ho etsang ho tlatsetsa thabong ea lelapa. Mosali ka masene a hae a ho hlokomela lelapa le ka moea oa hae oa tšebelisano, o bontša hore o ‘hlompha monna oa hae ka ho tebileng.’ Na hoo ke ’nete ka lapeng la lōna? (Ba-Efese 5:33, NW; Liproverbia 31:10-15, 27, 28) Tabeng ea bana, ha ba utloa ntate oa bona le ’mè oa bona ka boithatelo ho bontša hore ba hlompha batsoali ba bona, joalokaha Molimo o hloka joalo. (Ba-Efese 6:1-3) Na lapeng le joalo ho ke ke hoa e-ba le khotso e kholoanyane le boikutlo bo boholoanyane ba tšireletseho ea botho ho feta ho leo ho hlompha ba boholong ho haellang ho lona?
19. Haeba e le uena feela ka lapeng ea lekang ho tataisoa ke Lentsoe la Molimo, u lokela ho etsa joang?
19 U ka thusa ho etsa hore lelapa leo u leng ho lona e be sebaka se joalo. Hore na litho tse ling tsa lelapa li ikhethela ho phahamisa litsela tsa Jehova kapa che, u ka ho etsa. Mohlomong ba bang ba tla arabela mohlaleng oa hao o motle. (1 Ba-Korinthe 7:16; Tite 2:6-8) Le haeba ba sa ho etse, seo u se etsang se tla ema e le bopaki ba ho lokela hoa litsela tsa Molimo, ’me hoo ke ntho e ’ngoe ea bohlokoa.—1 Petrose 3:16, 17.
20, 21. (a) Bibele e bontša joang hore borena ba monna le ba batsoali hase bona ba ho qetela? (b) Kahoo, mosali oa Mokreste kapa bana ba lumelang ba ka ’na ba talimana le qeto efe, ’me ba lokela ho susumetsoa ke eng?
20 Hopola hore kaheho eohle ea borena bo ka lapeng e qala ho Molimo. Ka hona banna ba lokela ho ikokobeletsa Kreste, basali banna ba bona “joale ka ha ho tšoaneleha Moreneng,” ’me bana batsoali ba bona “hobane ke taba e khahlisang Morena.” (Ba-Kolosse 3:18, 20; 1 Ba-Korinthe 11:3) Ka hona Molimo o ke ke oa behelloa ka thōko, na ho ka etsoa joalo? Hona ho bolela hore borena ba monna holim’a mosali oa hae le ba batsoali holim’a bana ba bona, ke bo lekanyelitsoeng. Ke hore, molekane oa Mokreste le bana ba tlas’a Molimo le Kreste pele, ba utloa keletso ea bona. Ho balekane ba bang ba sa lumelang kapa batsoali, maikutlo ao a ka ’na a qala a sa thabise. Empa ka sebele a sebeletsa molemo oa bona, hobane a tla thusa hore molekane ea lumelang le bana e be ba tšepahalang le ba hlomphang haholoanyane.
21 Leha ho le joalo, ho thoe’ng haeba monna a ne a ka laela hore mosali oa hae a etse ho hong ho neng ho sa tl’o “tšoaneleha Moreneng”? Seo mosali a tla se etsa se tla bontša hore na ka sebele o ‘tšaba Molimo’ oa ’nete kapa che. (Moeklesia 12:13) Ho joalo ke ’nete ha bana ba hōlile ho lekana hore ba utloisise ba be ba hlomphe Lentsoe la Molimo. Haeba batsoali ba bona ba sa kopanele takatsong ea bona ea ho sebeletsa Jehova, bana ba tlameha ho etsa qeto ea hore na ba tla tšepahala ho Molimo kapa ba kopanele le batsoali ba bona ba sa tšepahaleng. (Mattheu 10:37-39) Empa ntle ho tlameho ea bona ea pele ho Molimo, bana ba lokela ho ikokobetsa “nthong tsohle,” le haeba ho bolela ho etsa lintho tseo ba sa li rateng. (Ba-Kolosse 3:20) Tsela ena ea boitšoaro e ka ’na ea hohella batsoali ba bona litokisetsong tsa Jehova tsa poloko. Ruri “ke taba e khahlisang Morena,” ha sepheo sa motho e le ho tšepahala ho Jehova le litsela tsa hae tse lokileng, ho e-na le ho se utloe ho tsoaloang ke moea oa boitaolo.
Ka Phuthehong ea Bokreste
22, 23. (a) Balebeli ba Bakreste ba sebeletsa litho tsa phutheho joang? (b) Kahoo, Ba-Heberu 13:17 e re re lokela ho ba le boikutlo bofe ka bona?
22 Botšepehi bo joalo ho Jehova bo lokela ho bonahatsoa boikutlong ba rōna mabapi le phutheho ea hae ea Bokreste le bao e leng tlhokomelong ea bona. Jehova o fane ka balebeli ho alosa “mohlape.” Ha ba lefuoe empa ba itetse ka lebaka la kameho ea ’nete bakeng sa baena ba bona le bo-khaitseli ba bona ba Bakreste. (1 Petrose 5:2; 1 Ba-Thessalonika 2:7-9) Ba thusa phutheho hore e phethahatse mosebetsi oa ho bolela litaba tse molemo tsa ’Muso oa Molimo. Hape ka kameho bakeng sa setho se seng le se seng sa phutheho, ba li thusa hore li ithute kamoo li ka sebelisang melao-metheo ea Bibele bophelong ba tsona. Hape, haeba setho leha e le sefe sa phutheho se nka bohato bo fosahetseng se sa hlokomela ho hang, ho etsoa boiteko ba ho se khutlisa. (Ba-Galata 6:1) Haeba setho se hlokomoloha keletso ea Mangolo ’me se phehella phoso e tebileng, balebeli ba hlokomela hore sea lelekoa. Ka hona phutheho e sireletsoa tšusumetsong e silafatsang ea sona.—1 Ba-Korinthe 5:12, 13.
23 Kananelong ea tokisetso ena e lerato ea Jehova ea ho tiisa hore ho tla ba le khotso har’a batho ba hae, re lokela ho ela hloko khothatso e fumanoang ho Ba-Heberu 13:17: “Utloang balisa ba lōna, ’me le ipee ka tlase ho bona, hobane bona ba falimehela meea ea lōna, etsoe ba tla e botsoa; ba utloeng, hore ba etse hona ka thabo, e seng ka hlomoho; hobane hoo ho ke ke ha le hlahisetsa molemo.”
24, 25. (a) Seo baholo ba se rutang se lokela ho susumetsa tsela eo re ba talimang ka eona joang? (b) Ke neng hona hokae moo re lokelang ho sebelisa seo re ithutang sona ka Bibeleng? Hobane’ng?
24 Bibele e hatisa hore lebaka le ka sehloohong la hore balebeli bana kapa baholo bana ba lokeloe ke tlhompho ke hobane ba ruta “lentsoe la Molimo.” (Ba-Heberu 13:7; 1 Timothea 5:17, TLP) ’Me ka matla a “lentsoe” leo, Ba-Heberu 4:12, 13 e re: “Lentsoe la Molimo ke lentsoe le phelang, le matla, ’me le fetisa ka bohale lisabole tsohle tse leolitsoeng ka nģa tse peli, ’me lea hlaba le ee ho kena le likhaohanong tsa pelo le tsa moea, le manonyellong le mokong; ’me le ahlola maikutlo le mehopolo ea pelo. Ha ho sebopuoa se seng pepeneneng ho oona; empa tsohle li hlobotse, li senohile mahlong a eo re nang le litaba le eena.”
25 Kahoo linnete tse Lentsoeng la Jehova li senola phapang pakeng tsa seo motho a ka ’nang a bonahala a le sona le seo a hlileng a leng sona. Haeba a e-na le tumelo ea ’nete ho Molimo le takatso ea ’nete ea ho khahlisa ’Mōpi oa hae, sepheo sa hae se tla bonahatsa hantle “khanya ea Molimo” leha a le moo baholo ba phutheho ba sa ’moneng. (Ba-Roma 3:23) A ke ke a kopanela boitšoarong boo e seng ba Mangolo hobane feela bo sa balelloe har’a liphoso tse tebileng tseo motho a ka li lelekeloang ka phuthehong. Kahoo, haeba e mong a sekamela ho nka habobebe keletso leha e le efe e fumanoang Lentsoeng la Molimo, o lokela ho hlahloba ka hloko hore na hantle-ntle boikutlo ba hae mabapi le Molimo ke bofe. Na o fetoha ea tšoanang le motho eo Pesaleme ea 14:1 (TLP) e reng ka eena: “Sethoto se re”—che, e seng phatlalatsa—empa “ka pelong . . . ‘ha ho na Molimo’ ”?
26, 27. (a) Ke hobane’ng ha e le hoa bohlokoa ho nka ka botebo “polelo tsohle” tsa Jehova? (b) Bophelo ba rōna bo ameha joang ha re bontša ho hlompha borena ka tsela eo?
26 Ha Jesu a ne a lekoa ke Diabolose, o itse: “Motho . . . o tla phela le ke polelo tsohle tse tsoang molomong oa Molimo.” (Mattheu 4:4) Na u lumela hore “polelo tsohle” tsa Jehova ke tsa bohlokoa, hore ha ho le e ’ngoe e lokelang ho hlokomolohuoa? Ho utloa litlhokahalo tse ling tsa Jehova, ha re nka tse ling e se tsa bohlokoa, ha hoa lekana ho hang. Re phahamisa ho lokela hoa borena ba Jehova kapa re ema ka lehlakoreng la Diabolose tsekong ka ho ipeela tekanyetso ea se setle le se sebe. Thabo ke ea ba bontšang hore ba rata molao oa Jehova kannete.—Pesaleme ea 119:165.
27 Batho ba joalo ha baa tšoasoa ke leraba la moea o arolang oa lefatše. Leha e le hore ba kenella boitšoarong bo lihlong ba ba sa ikhalemeleng ho hang. Tlhompho e tebileng bakeng sa Jehova le litsela tsa hae tse lokileng e tsitsisa bophelo ba bona. Tlhompho e joalo bakeng sa Jehova le litsela tsa hae e ba nolofaletsa ho ba le tlhompho e loketseng bakeng sa marena a lefatše, e leng eona e hlokahalang bakeng sa ho phela ka khotso.
[Setšoantšo se leqepheng la 134]
Baapostola ba Jesu ba ile ba bolella lekhotla le phahameng: “E ka khona re utloe Molimo [e le Morena] ho e-na le batho”