Ho Tsoaloa la Bobeli

Tlhaloso: Ho tsoaloa la bobeli ho ama ho kolobetsoa metsing (‘ho tsoaloa ka metsi’) le ho tsoaloa ka moea oa Molimo (‘ho tsoaloa ka moea’), ka hona motho a fetoha mora oa Molimo ea lebelletseng ho kopanela ’Musong oa Molimo. (Joh. 3:3-5) Jesu o bile le phihlelo ena, joalokaha ho le joalo ka ba 144 000 bao e leng majalefa a ’Muso oa leholimo le eena.

Ke hobane’ng ha ho hlokahala hore Bakreste ba bang ba “tsoaloe la bobeli”?

Molimo o rerile ho kopanya palo eitseng ea batho ba khabane le Jesu Kreste ’Musong oa leholimo

Luka 12:32: “Mohlatsoana, se tšabe, hobane ho khahlile Ntat’a lōna ho le fa ’muso.”

Tšen. 14:1-3: “Joale, ka talima, ’me ka bona Konyana [Jesu Kreste] e eme thabeng ea Sione, e e-na le ba . . . likete tse lekholo le nang le mashome a mane a metso e mene. . . . ba lopolotsoeng lefatšeng.” (Bona maqephe 228, 229, tlas’a sehlooho “Leholimo.”)

Batho ba ke ke ba ea leholimong ka ’mele ea nama le mali

1 Ba-Kor. 15:50: “Seo ke mpang ke se bolela, banab’eso, ke hoba nama le mali li ke ke tsa e-ja lefa la ’muso oa Molimo, ’me ho bola ho ke ke ha e-ja lefa la ho sa boleng.”

Joh. 3:6: “Se tsoetsoeng ke nama, ke nama; ’me se tsoetsoeng ke Moea, ke moea.”

Ke batho ba ‘tsoetsoeng la bobeli’ feela, kahoo ba fetoha bara ba Molimo, ba ka kopanelang ’Musong oa leholimo

Joh. 1:12, 13: “Empa bohle ba le [Jesu Kreste] amohetseng, le ba neile tokelo ea ho ba bana ba Molimo, e leng ba lumelang lebitso la lona; ba sa kang ba tsoaloa ke mali, leha e le ka ho rata ha nama, leha e le ka ho rata ha monna, ba mpa ba tsoetsoe ke Molimo.” (“Bohle ba le amohetseng” ha e bolele batho bohle ba lumetseng ho Kreste. Hlokomela hore na ho boleloa bo-mang, joalokaha ho bontšitsoe temaneng ea 11 [“bahabo lona,” Bajode]. Tokelo eona eo e atoloselitsoe ho batho ba bang, empa ho “mohlatsoana” feela.)

Ba-Roma 8:16, 17: “Le oona Moea o emelana le moea oa rōna, hore re bana ba Molimo. ’Me ha re le bana, re majalefa: majalefa a Molimo, le majalefa hammoho le Kreste, ha re fela re utloa bohloko le eena, re tle re neoe khanya le eena.”

1 Pet. 1:3, 4: “Ho bokoe Molimo, Ntat’a Morena oa rōna Jesu Kreste, kahobane ka boholo ba mohau oa oona o boetse o re tsoaletse tšepong e phelisang ka ho tsoha ha Jesu Kreste bafung, re tle re fuoe lefa le sa boleng, le se nang sekoli, le sa omelleng, le boloketsoeng lōna leholimong.”

Ba tla etsa’ng leholimong?

Tšen. 20:6: “E tla ba baprista ba Molimo le ba Kreste, ’me ba tla busa le eena lilemo tse sekete.”

1 Ba-Kor. 6:2: “Na ha le tsebe hoba bahalaleli ba tla ahlola lefatše?”

Na motho ea sa ‘tsoaloang la bobeli’ a ka bolokoa?

Tšen. 7:9, 10, 17: “Ka mora’ tseo [hoba moapostola Johanne a utloe palo ea ba tla ‘tsoaloa la bobeli,’ ba neng ba tla bōpa Iseraele oa moea ’me ba be le Kreste leholimong; bapisa Ba-Roma 2:28, 29 le Ba-Galata 3:26-29], ka talima, ’me ka bona bongata bo boholo ba batho, bao ho seng motho ea ka tsebang ho bo bala, ba lichaba tsohle, le ba mefuta eohle, le ba merabe eohle, le ba lipuo tsohle, ba eme pel’a terone le pel’a Konyana, ba apere liaparo tse telele tse tšoeu, ba tšoere lipalema matsohong a bona, ba ntse ba hoa ka mantsoe a phahamileng, ba re: Poloko ke ea Molimo oa rōna, o lutseng teroneng, le ea Konyana. . . . Konyana [Jesu Kreste] e har’a terone e tla ba alosa, ’me e tla ba isa lilibeng tsa metsi a bophelo.”

Hoba e thathamise batho ba bangata ba tumelo ba pele ho Bokreste, Ba-Heberu 11:39, 40 e re: “Bao bohle, ba emetsoeng ka baka la tumelo ea bona, ha ba ka ba neoa seo ba se baletsoeng; hobane Molimo o re bonetse ho hong ho fetisang, ba tle ba se ke ba phetheha, rōna re le sieo.” (Mona ho boleloa bo-mang ka “rōna”? Ba-Heberu 3:1 e bontša hore ke “ba nang le kabelo pitsong ea leholimo.” Batho ba pele ho Bokreste ba neng ba e-na le tumelo, ba tlameha e be ba na le tšepo ea bophelo bo phethahetseng kae-kae ntle ho leholimong.)

Pes. 37:29: “Ba lokileng ba tla ja lefa la lefatše, ’me ba tla hlola ho lona ka ho sa feleng.”

Tšen. 21:3, 4: “Bonang tabernakele ea Molimo e har’a batho; o tla aha le bona; e tla ba lichaba tsa oona, ’me Molimo o tla ba le bona ka sebele sa oona, e be Molimo oa bona. Molimo o tla hlakola meokho eohle mahlong a bona: lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko; hobane tsa pele li fetile.”

Na ho ka etsahala hore motho a be le moea oa Molimo empa a se ke a ‘tsoaloa la bobeli’?

Ka Johanne mokolobetsi, lengeloi la Jehova le itse: “O tla tlala moea o halalelang a sa le popelong ea ’m’ae.” (Luka 1:15) ’Me hamorao Jesu a re: “Har’a ba tsoetsoeng ke basali, ha ho e moholo ho Johanne Mokolobetsi; empa e monyenyane ’musong oa maholimo o moholo ho eena [Hobane’ng? Hobane Johanne a ke ke a ba maholimong ’me kahoo ho ne ho sa hlokahale hore a “tsoaloe la bobeli”]. Ho tloha mehleng ea Johanne Mokolobetsi, ho fihlela joale [ha Jesu a bua sena], ’muso oa maholimo o kenoa ka matla.”—Matt. 11:11, 12.

Moea oa Jehova o ne o ‘tšoere’ Davida ’me o “bua” ka eena (1 Sam. 16:13; 2 Sam. 23:2), empa ha ho moo Bibele e reng o ne a ‘tsoetsoe la bobeli.’ Ho ne ho sa hlokahale hore a “tsoaloe la bobeli,” hobane, joalokaha Liketso 2:34 e bolela: “Davida ha a ka a nyolohela maholimong.”

Ke eng e tsebahatsang batho ba nang le moea oa Molimo kajeno?

Bona maqephe 318, 319, tlas’a sehlooho se seholo “Moea (Spirit).”

Haeba e Mong a Re—

‘Ke tsoetsoe la bobeli’

U ka ’na ua arabela: ‘Hoo ho bolela hore ka letsatsi le leng u lebelletse ho ba le Kreste leholimong, na ha ho joalo? . . . Na u kile ua ipotsa hore na ba eang leholimong ba il’o etsa joang teng?’ ’Me mohlomong u ka eketsa: (1) ‘Etlaba marena le baprista, ba busa le Kreste. (Tšen. 20:6; 5:9, 10) Jesu o itse bana etlaba “mohlatsoana” feela. (Luka 12:32)’ (2) ‘Haeba e le marena, ho tlameha ho be le bafo bao ba tla ba busa. Bafo baa etlaba bo-mang? . . . Lintlha tse ling tseo ke ileng ka fumana e le tsa bohlokoa ha ke li hlokomelisoa ke tsena. (Pes. 37:11, 29; Liprov. 2:21, 22)’

‘Na u tsoetsoe la bobeli?’

U ka ’na ua arabela: ‘Ke fumane hore seo batho ba se bolelang ka ho “tsoaloa la bobeli” ha se kamehla se tšoanang. Na u ka mpolella hore na ho uena ho bolela eng?’

Kapa u ka re: ‘U batla ho tseba hore na ke amohetse Jesu e le ’Moloki oa ka le hore na ke amohetse moea o halalelang, ho joalo? Ke u tiisetsa hore karabelo ke E; ho seng joalo nka be ke sa bue le uena ka Jesu.’ ’Me mohlomong u ka eketsa: (1) ‘Empa ha ke nahana ka ho ba le moea o halalelang, ke fumana hore bopaki ba moea oo bo haella ka ho soabisang ho ba bangata ba ipolelang hore ke Bakreste. (Ba-Gal. 5:22, 23)’ (2) ‘Na u ne u ka thabela ho phela lefatšeng lee haeba e mong le e mong a bonahatsa litšobotsi tseo tsa bomolimo? (Pes. 37:10, 11)’

Monyetla o mong: ‘Haeba ka hoo u bolela hore, “Na ke amohetse Kreste e le ’Moloki oa ka?” karabelo ke E. Lipaki tsa Jehova kaofela li entse joalo. Empa, ho rōna, ho tsoaloa la bobeli ho ama ho fetang moo.’ ’Me mohlomong u ka eketsa: (1) ‘Ha Jesu a ne a bua ka ho tsoaloa la bobeli o boletse hore hoa hlokahala hore motho a kene ’Musong oa Molimo, ke hore, ho ba karolo ea ’Muso oa Molimo, puso ea oona ea leholimo. (Joh. 3:5)’ (2) ‘Bibele e boetse e bontša hore batho ba bangata ba etsang thato ea Molimo ba tla phela mona lefatšeng, e le bafo ba thabileng ba ’Muso oo. (Matt. 6:10; Pes. 37:29)’

Tlhahiso e eketsehileng: Bao e leng ba sehlopha sa leholimo ba ka arabela: ‘E, ke tsoetsoe la bobeli. Empa Bibele e re hlokomelisa kaofela hore re se ke ra itšepisa haholo ka boemo ba rōna. Ho hlokahala re ’ne re itlhahlobe ho tiisa hore re hlile re etsa seo Molimo le Kreste ba se hlokang ho rōna. (1 Ba-Kor. 10:12)’ ’Me mohlomong u ka eketsa: ‘Jesu o jarisitse barutuoa ba hae ba ’nete boikarabelo bofe? (Matt. 28:19, 20; 1 Ba-Kor. 9:16)’