Puso

Tlhaloso: Tokisetso ea ho etsa le ho phethahatsa melao. Puso e atisa ho hlopshoa ka hore na mohloli le boholo ba matla a eona li khōlō hakae. Jehova Molimo ke Morena oa Bokahohle, ea neang ba bang matla tumellanong le thato ea hae le morero oa hae. Leha ho le joalo, Satane Diabolose, lerabele le ka sehloohong khahlanong le borena ba Jehova, ke “morena oa lefatše”—hona ka nakoana e le ka tumello ea Molimo. Bibele e tšoantšetsa tsamaiso ea lefatše ea bobusi ba lipolotiki e le sebata ’me e bolela hore “drakone [Satane Diabolose] ea se fa matla a eona, le terone ea eona, le borena bo boholo.”—Joh. 14:30; Tšen. 13:2; 1 Joh. 5:19.

Na ho bonolo hore batho ba hlome puso e tla hle e tlise thabo e telele?

Tlaleho ea histori ea motho e bontša eng?

Moek. 8:9: ‘Batho ba rena holim’a ba bang ho ba etsa hampe.’ (Hona ke ’nete le hoja lipuso tse ling le babusi li ile tsa qalisa ka merero e phahameng.)

“Tsoelopele e ’ngoe le e ’ngoe e kileng ea e-ba teng e qetelletse e oele. Histori ke pale ea boiteko bo hlōlehileng, kapa litakatso tse sa kang tsa fumaneha. . . . Ka hona, joaloka ra-histori, motho o tlameha ho phela a lebelletse hore tlokotsi e ke ke ea qojoa.”—Henry Kissinger, setsebi sa mahlale a lipolotiki le setsebi sa puso, joalokaha a qotsitsoe ho The New York Times, October 13, 1974, leq. 30B.

Ke eng se thibelang boiteko ba motho lebaleng la puso?

Jer. 10:23: “Oho! Jehova, kea tseba hobane tsela ea motho ha e matleng a hae, ’me motho ea tsamaeang a ke ke a lokisa lika tsa hae.” (Molimo ha o-oa ka oa lumella libopuoa tsa oona tse batho hore li ithathamisetse tsela ea tsona e lokolohileng ho Molimo.)

Gen. 8:21: ‘Mehopolo ea pelo ea motho e mebe le bocheng ba hae.’ (Babusi hammoho le babusuoa kaofela ba tsoaletsoe sebeng, ka litšekamelo tsa boithati.)

2 Tim. 3:1-4: ‘Mehleng ea qetello ho tla hlaha linako tse bohloko. Hobane batho e tla ba baithati, ba ratang leruo [“chelete,” NW], . . . ba sa tšepeheng, . . . baikhohomosi.’ (Mathata a talimaneng le batho kajeno a ke ke a rarolloa halelele ke sechaba se le seng feela; a batla tšebelisano e feletseng ea machaba. Empa lithahasello tsa boithati tsa bochaba li thibela hoo ’me hape li nyopisa ka botebo tšebelisano leha e le efe ea sebele har’a mekhatlo e sa tšoaneng e hlophisitsoeng e lichabeng.)

Bibele e boetse e senola hore matla a phahametseng motho a laola litaba tsa batho ka mano. “Lefatše lohle le rapaletse ka tlase ho e mobe.” (1 Joh. 5:19) “Ntoa ea rōna ha e loane le nama le mali, empa e loana . . . le marena a lefifi la lefatše lena, le meea e bolotsana e sebakeng sa leholimo.” (Ba-Ef. 6:12) “Ke meea ea bademona, . . . e eang ho marena a lefatše le a linaha tsohle tseo ho ahiloeng ho tsona, ho a memela ntoa ea letsatsi le leholo la Molimo o matla ’ohle.”—Tšen. 16:14.

Batho ba ka lopoloha halelele joang tšilafalong le khatellong tsa puso?

Na ho bea batho ba bang litulong ho tla rarolla bothata?

Na hase ’nete hore, moo ho nang le likhetho tse lokolohileng, batho ba pusong ba atisa ho tlosoa litulong ka livoutu kamorao ho lilengoana tse seng kae? Hobane’ng? Bongata ha boa khotsofalla tšebetso ea bona.

Pes. 146:3, 4: “Le se ke la itšepela marena, leha e le bana ba batho ba sitoang ho pholosa motho! Phefumoloho ea bona ha e fela, ba khutlela lerōleng la bona; ka tsatsi lona leo, merero ea bona e felile.” (Kahoo, mananeo leha e le afe a ntlafatso ao babusi ba a qalisang a phakisa ho fetela matsohong a ba bang ’me hangata aa lahloa.)

Ho sa tsotellehe hore na ho busa mang, e tla ’ne e be karolo ea lefatše lena le tlas’a matla a Satane.—1 Joh. 5:19.

Na karabelo ke ho futuhelana?

Le haeba babusi ba silafetseng ba ka tlosoa litulong ’me melao e sa lokang ea lahloa, puso e ncha e tla be e entsoe ka batho ba sa phethahalang ’me e tla ’ne e be karolo ea tsamaiso ea lipolotiki eo ka ho hlakileng Bibele e reng e tlas’a taolo ea Satane.

Matt. 26:52: “Busetsa sabole ea hao selateng sa eona, hobane bohle ba tšoereng sabole, ba tla bolaoa ka sabole.” (Jesu o buile joalo ho e mong oa baapostola ba hae nakong ea ha matla a puso a ne a sebelisoa hampe khahlanong le Mora oa Molimo. Ebe ke lebaka lefe le tšoanelehang ho feta moo leo motho a neng a ka loana ka lona, haeba eo e ne e le ntho e nepahetseng e ka etsoang?)

Liprov. 24:21, 22: “Ngoan’a ka, tšaba Jehova le morena, u se ke ua itloaetsa babelaeli; hobane tlokotsi ea bona e tla tšoha e hlaha hang-hang, ’me ke mang ea ka tsebang tšenyeho ea e mong le e mong ho bona?”

Ebe joale karabelo mathateng a tšilafatso le khatello ke efe?

Dan. 2:44: “Molimo oa leholimo o tla hloma ’muso [puso] o ke keng oa senyeha ka ho sa eeng kae, ’me borena ba oona bo ke ke ba fetela ho sechaba se seng; o tla robaka o felise mebuso eo kaofela, empa oona o tla ba teng ka ho sa feleng.”

Pes. 72:12-14: “O [Jesu Kreste, morena ea khethiloeng ke Jehova] tla boloka ea lesitsi ha a hoa, le ea malimabe ea hlokang mothusi; o tla utloela ea malimabe le mohloki bohloko, a boloke bophelo ba ea lesitsi; o tla ba loela bohorohosong le botubong, mali a bona e be ntho e hlokoang mahlong a hae.” (Kameho ea hae ka batho ba joalo ha a ne a le lefatšeng—ho ba phekola hoa hae, ho fepa matšoele hoa hae, haesita le ho ba tella bophelo ba hae—li bontša hore ruri etlaba ’musi ea mosa ea profetiloeng boprofeteng.)

Bona le maqephe 337-342, tlas’a sehlooho “’Muso.”

Ke hobane’ng ha re lokela ho nahana ka botebo ka seo Bibele e se buang ka bokamoso ba puso?

Babusi ba batho ha ba fane ka seo batho ba se hlokang ka potlako

Nahana ka lintho tsena tse hlokoang ke batho hohle, tseo mebuso ea batho e sa faneng ka tsona empa li tšepisoa ke Molimo: (1) Bophelo lefatšeng le lokolohileng tšokelong ea ntoa.—Esa. 2:4; Pes. 46:9, 10. (2) Lijo tse lekanang bohle.—Pes. 72:16. (3) Matlo a tšoanelehang bakeng sa bohle.—Esa. 65:21. (4) Mosebetsi o khotsofatsang bakeng sa bohle ba o hlokang, e le hore ba ka itlhokomela le malapa a bona.—Esa. 65:22. (5) Bophelo bo sa sithabetsoang ke ho kula le boloetse.—Tšen. 21:3, 4. (6) Toka; tokoloho khethollong ea bolumeli, morabe, moruo le bochaba.—Esa. 9:7; 11:3-5. (7) Ho thabela tšireletseho, ho se kotsi ea linokoane thepeng ea motho kapa ho eena ka boeena.—Mik. 4:4; Liprov. 2:22. (8) Lefatše leo ho lona litšoaneleho tse nkoang e le tsa bohlokoa ka ho fetisisa li tla akarelletsa lerato, mosa, kameho ka motho e mong le bonnete.—Pes. 85:10, 11; Ba-Gal. 5:22, 23.

Ka likete-kete tsa lilemo, babusi ba lipolotiki ba ’nile ba tšepisa batho ba bona maemo a molemonyana. Ka liphello life? Le hoja batho ba lichabeng tse ngata ba e-na le matlotlo a mangata a bonahalang, ha baa thaba haholoanyane, ’me mathata a talimaneng le bona a rarahane ho feta neng kapa neng.

Boprofeta ba Bibele bo ipakile bo tšepahala ka ho feletseng

Lilemo tse lekholo pele, Lentsoe la Molimo la profeta boemo ba Babylona ba ho busa lefatše, le hore na puso ea eona e ne e tla qetella e lihiloe joang le ’nete ea hore, hang ha e entsoe lesupi, motse-moholo oa eona o ne o ke ke oa hlola o e-ba le baahi. (Esa. 13:17-22) Hoo e ka bang makholo a mabeli a lilemo pele, le pele Cyruse a tsoaloa, Bibele ea mo profeta ka lebitso hammoho le karolo ea hae litabeng tsa machaba. (Esa. 44:28; 45:1, 2) Pele Medo-Persia e e-ba ’muso oa lefatše, hoa profetoa hore na e tla hloella joang teroneng le hore na e tla etsoa ka mebuso e ’meli joang, le hore na e tla oa joang. Lilemo tse kaholimo ho makholo a mabeli pele, hoa boleloa tsela e tla nkoa ke ’muso oa Greece tlas’a morena oa oona oa pele, le hore kamorao ho moo ’muso o tla aroloa likoto tse ’nè.—Dan. 8:1-8, 20-22.

Bibele e profetile ka ho qaqa maemo a lefatše a mehleng ea rōna, ’me e re hlokomelisa hore puso eohle ea batho e tla fela matsohong a Molimo le hore ’Muso oa Molimo matsohong a Mora oa oona, Jesu Kreste, o tla busa batho bohle.—Dan. 2:44; 7:13, 14.

Na hase bohlale ho ela hloko mohloli oa boitsebiso o ipakileng o tšepahala ka ho tsitsitseng hakaale?

Puso ea Molimo ke eona pheko feela ea sebele mathateng a batho

Mathata a hlokang ho rarolloa a hloka matla, bohlale le litšoaneleho tseo ho seng batho ba nang le tsona. Molimo o ka lokolla batho tšusumetsong ea Diabolose le bademona ba hae ’me O tšepisitse hore o tla etsa joalo, empa ha ho motho ea ka ho etsang. Molimo o lokiselitse ho etsa seo thuto ea mahlale ho tsa meriana e neng e ke ke ea se finyella le ka mohla—ho tlosa sebe, kahoo ho felisoa ho kula le lefu ’me ho nolofaletsoa batho ho ba seo ba ithatang ba le sona. ’Mōpi o na le tsebo e hlokahalang (ea lefatše le ea mekhoa eohle ea bophelo) ho rarolla mathata a tlhahiso ea lijo le ho thibela tšilafatso e kotsi, empa boiteko ba motho bo atisa ho eketsa mathata. Lentsoe la Molimo le se le ntse le fetola bophelo e le hore ba arabelang ketello peleng ea lona e ka ba batho ba mosa le ba lerato ba nang le boitšoaro bo phahameng, mokhatlo oa batho ba hanang ho nka lihlomo khahlanong le batho ba bang le ba phelang ka khotso ea ’nete le boena ba ’nete le hoja ba e-tsoa lichabeng tsohle, merabeng le lipuong tse ngata.

’Muso oa Molimo o tla hleka tsamaiso ea hona joale ea lefatše neng? Bona lihlooho tse khōlō “Matsatsi” le “Mehla ea Qetello.”