’Muso
Tlhaloso: ’Muso oa Molimo ke pontšo ea borena ba Jehova ba bokahohle ho libopuoa tsa hae, kapa mokhoa oo a o sebelisang ho bontša borena boo. Lentsoe lena le sebelisitsoe ka ho khetheha ho hlalosa pontšo ea borena ba Molimo ka puso ea borena e etelletsoeng pele ke Mora oa oona, Jesu Kreste. “’Muso” o ka ’na oa bolela bobusi ba ea tlotselitsoeng ho ba Morena kapa sebaka sa lefatšeng se busoang ke puso eo ea leholimo.
Na ’Muso oa Molimo ke puso ea sebele?
Kapa, ho e-na le hoo, ke boemo bo ka lipelong tsa batho?
Luka 17:21: “Ho ke ke ha thoe: Bonang, o mona; kapa: Bonang, o mane; hobane ’muso oa Molimo o se o le ka hare ho lōna [le TEV, Dy; empa “ho lōna,” KJ ka thoko ho leqephe, NE, JB; “har’a lōna,” RS, NW].” (Hlokomela hore, joalokaha ho bontšitsoe temaneng ea 20, Jesu o ne a bua le Bafarisi, bao a neng a se a ba latotse hore ke baikaketsi, kahoo o ne a ke ke a be a bolela hore ’Muso o ka lipelong tsa bona. Empa ’Muso, joalokaha o ne o emeloa ke Kreste o ne o le har’a bona. Ke kahoo The Emphatic Diaglott e reng: “Boholo ba borena ba Molimo bo ho lōna.”)
Na Bibele e hlile e bua ka ’Muso oa Molimo e le puso?
Esa. 9:6, 7: “Re tsoaletsoe ngoana, re neiloe mora; borena [“puso,” RS, KJ, AT, Dy; “borena ba khanya,” JB, NE; “puso ea bohosana,” NW] bo beiloe lehetleng la hae, ’me o tla bitsoa Moeletsi ea makatsang, Molimo o matla, Ra-bo-sa-feleng, Morena oa khotso; hore a holise ’muso, le ho tlisa khotso e sa feleng . . . ’musong oa hae.”
Babusi ke bo-mang ’Musong?
Tšen. 15:3: “E meholo, ea babatseha, mesebetsi ea hao, Morena Molimo o matla ’ohle! . . . Morena oa lichaba [“bo sa feleng,” NW].”
Dan. 7:13, 14: “E mong ea kang mor’a motho [Jesu Kreste; bona Mareka 14:61, 62] a hlaha ka maru a leholimo, a fihla ho Moholo oa matsatsi [Jehova Molimo], a atametsoa ho eena a [Jesu Kreste] neoa ’muso, le hlompho, le borena, hore ba mefuta eohle, le ba lichaba tsohle, le ba lipuo tsohle, ba tle ba mo sebeletse.”
Tšen. 5:9, 10: “U [Jesu Kreste] no u hlajoe, ’me ua lopollela Molimo, ka mali a hao, batho ba mefuta eohle, le ba lipuo tsohle, le ba merabe eohle, le ba lichaba tsohle; ’me u ba beile marena le baprista ho Molimo oa rōna, ’me ba tla busa holim’a lefatše.” (Ho Tšenolo 14:1-3 bana ba ‘lopolotsoeng lefatšeng’ hore e be babusi le Konyana Thabeng ea Sione ea leholimo ho boleloa hore palo ea bona ke 144 000.)
’Muso ona o tla ba le phello efe mebusong ea batho?
Dan. 2:44: “Mehleng ea marena ao, Molimo oa leholimo o tla hloma ’muso o ke keng oa senyeha ka ho sa eeng kae, ’me borena ba oona bo ke ke ba fetela ho sechaba se seng; o tla robaka o felise mebuso eo kaofela, empa oona o tla ba teng ka ho sa feleng.”
Pes. 2:8, 9: “Kōpa ho ’na, ’me ke tla u fa lichaba e be lefa la hao, le lipheletso tsa lefatše e tle e be leruo la hao. U tla li thumakanya ka molamu oa tšepe, u li silakanye joale ka pitsa ea letsopa.”
’Muso oa Molimo o tla finyella eng?
O tla halaletsa lebitso la Jehova le ho phahamisa borena ba hae
Matt. 6:9, 10: “Joale lōna, rapelang joalo, le re: Ntat’a rōna ea maholimong, lebitso la hao a le ke le khethehe; ho tle ’muso oa hao.” (Mona ho halaletsoa hoa lebitso la Molimo ho amana haufi-ufi le ho tla hoa ’Muso oa oona.)
Ezek. 38:23: “Ke tla itlotlisa, ke be ke ikhalaletse, ke itsebahatse mahlong a lichaba tse ngata; ’me ba tla tseba hoba ke ’na Jehova.” (Lebitso la Molimo le tla hloekisoa thohako eohle; le tla tšoaroa le halalela ’me le lokeloa ke hlompho, ’me bohle ba phelang e tla be e le batho ba phahamisang borena ba Jehova ka boithatelo, ba thabela ho etsa thato ea hae. Khotso le katleho tsa bokahohleng bohle li itšetlehile ka ho halaletsoa ho joalo hoa lebitso la Jehova.)
O tla felisa bobusi ba Satane bo mamelletsoeng holim’a lefatše
Tšen. 20:2, 3: “La [Morena oa leholimo, Jesu Kreste] tšoara drakone, noha ea khale, e leng Diabolose le Satane, ’me la e holehela lilemo tse sekete. La e akhela sekoting, la e koalla teng, ’me la tiisa holim’a sona, hore e se ke ea hlola e khelosa lichaba, lilemo tse sekete li e-so ho phethehe. Ka mora’ tseo, e ka khona e lokolleloe motsotso o se mokae.” (Kahoo batho ba tla lokolloa tšusumetsong ea bosatane e thatafalitseng bophelo hakana bakeng sa batho ba batlang ho etsa ho lokileng. Ho tla beng ho ile ke tšusumetso ea bodiabolose e bakileng liketso tsa bobatana bo feteletseng le tšusumetso ea bodemona e tlatsitseng bophelo ba batho ba bangata ka tšabo.)
O tla kopanya pōpo eohle borapeling ba Molimo o le mong oa ’nete
Tšen. 5:13; 15:3, 4: “’Me ka utloa libopuoa tsohle tse leholimong, le tse lefatšeng, le tse ka tlase ho lefatše, le tse leoatleng, le tse ho tsona kaofela, li re: Ho ea lutseng teroneng [Jehova Molimo] le ho Konyana [Jesu Kreste], e be teboho, le hlompho, le khanya, le matla, mehleng le mehla!” “E meholo, ea babatseha, mesebetsi ea hao, Morena Molimo o matla ’ohle! Oho, Morena oa lichaba, litsela tsa hao li lokile hakakang, ke ’nete feela! Ea sa tl’o u tšaba ke ha e le mang, Morena? Ea sa tl’o tlotlisa lebitso la hao ke mang? Hobane ea halalelang ke uena u ’notši. ’Me lichaba tsohle li tla tla, li khumame maotong a hao, kahobane likahlolo tsa hao li beiloe pepeneneng.”
O tla busetsa batho kamanong e lumellanang le Molimo
Ba-Roma 8:19-21: “Tse bōpiloeng [batho] kaofela li lebeletse ponahalo ea bana ba Molimo [bopaki ba hore ba tsoselitsoeng bophelong ba leholimo le Jesu Kreste ba kene tšebetsong e le babusi] ka hlolohelo e kholo. Hobane tse bōpiloeng li ne li beoe tlas’a ’muso oa bosaoana, e seng ka ho rata ha tsona, empa e le ka baka la ea li beileng ka tlas’a oona; tšepo e ntse e le teng ea hore le tsona tse bōpiloeng [batho ka kakaretso] li tla holloa bohlankeng ba tšenyeho, li tle li be tokollong ea khanya ea bana ba Molimo.”
O tla lokolla batho matsoalong ’ohle a ntoa
Pes. 46:8, 9: “Tlong, le bohe liketso tsa Jehova, kamoo a sentseng lefatše kateng. O felisitse lintoa le ho isa pheletsong ea lefatše.”
Esa. 2:4: “Ba tla tea liphehla tsa bona tsa ntoa mehoma, le marumo a bona ba a tee lisekele; sechaba se seng ha se sa tla hlola se futuhela sechaba se seng ka lerumo, ha ba sa tla hlola ba ithuta ho loana.”
O tla felisa babusi ba silafetseng le khatello lefatšeng
Pes. 110:5: “Morena [Jehova], ea leng letsohong la hao le letona, o thumakanya marena ka letsatsi la khalefo ea hae.”
Pes. 72:12-14: “O [Morena oa Jehova oa Messia] tla boloka ea lesitsi ha a hoa, le ea malimabe ea hlokang mothusi; o tla utloela ea malimabe le mohloki bohloko, a boloke bophelo ba ea lesitsi; o tla ba loela bohorohosong le botubong, mali a bona e be ntho e hlokoang mahlong a hae.”
O tla lokisetsa nala ea lijo bakeng sa batho bohle
Pes. 72:16: “Nala ea mabele e tla ba teng lefatšeng holim’a lithaba, liqoapi tsa ’ona li hoase.”
Esa. 25:6: “Thabeng ena [Thabeng ea Sione ea leholimo, teroneng ea ’Muso oa Molimo, ho tla etsoa tokisetso bakeng sa bafo ba oona ba lefatšeng], Jehova oa makhotla o tla etsetsa lichaba kaofela mokete oa lijo tse hlabosang, mokete oa liveine tse monate tse nkiloeng holim’a litšifa, mokete oa lijo tse hlabosang, tsa moko, oa liveine tse nkiloeng holim’a litšifa, tse hloekileng.”
O tla tlosa ho kula le kholofalo ea mefuta eohle
Luka 7:22; 9:11: “E-eang, le tsebise Johanne tseo le li boneng, le tseo le li utloileng: lifofu lia bona, lihlotsa lia tsamaea, ba-lepera ba ntlafala, ba thibaneng litsebe ba utloa, bafu ba tsoha, ’me Evangeli e bolelloa mafutsana.” “Jesu [Kreste] a ba amohela, a ba bolella taba tsa ’muso oa Molimo, ’me a folisa ba batlang pholiso.” (Kahoo Jesu o bontšitse seo eena joaloka Morena oa leholimo a tlang ho se etsetsa batho.)
O tla lokisetsa bohle matlo a tšoanelehang
Esa. 65:21, 22: “Ba tla haha matlo, ba lule ho ’ona; ba tla hloma merara, ba je litholoana tsa eona. Ba ke ke ba haha matlo, osele a lula teng, leha e le ho hloma merara, osele a je tholoana tsa eona.”
O tla tiisetsa bohle mosebetsi o khotsofatsang
Esa. 65:23: “Ba ke ke ba sebeletsa lefeela, ba ke ke ba tsoala bana ’me ba lahleheloa ke bona kapele; hobane e tla ba leloko le hlohonolofalitsoeng ke Jehova, ’me bana ba bona ba tla ’ne ba lule le bona.”
O tla tiisa hore ho na le tšireletseho, bolokolohi kotsing ho se ka hlahelang motho kapa thepa ea hae
Mik. 4:4: “Ba tla lula e mong le e mong ka tlas’a feiga ea hae le ka tlas’a morara oa hae, ho se ea ba tšosang, hobane molomo oa Jehova oa makhotla o boletse.”
Pes. 37:10, 11: “Ho se ho se hokae, ’me molotsana o tla ba sieo; u tla qamaka tulo tsa hae, empa o tla be a setse a le sieo; empa ba bonolo ba tla rua lefatše, ba iketle khotsong e kholo.”
O tla etsa hore toka le ho loka li rene
2 Pet. 3:13: “Re lebeletse, ka pallo ea oona, maholimo a macha le lefatše le lecha moo ho loka ho ikahetseng teng.”
Esa. 11:3-5: “A [Morena oa Messia] ke se ke a ahlola ka chalimo ea mahlo, leha e le ho tsoa ka ho utloa taba ea ba re. Empa o tla ahlola mafutsana ka ho loka, a bue taba tsa ba banyenyane ba lefatše ka ’nete; . . . Ho loka e tla ba senyepa thekeng la hae, ’nete e be leqhama maphakong a hae.”
O tla sireletsa batho kotsing efe kapa efe e bakoang ke matla a tlhaho
Mar. 4:37-41: “Joale, ha tsoha sefefo se seholo sa moea; maqhubu a metsi a kena sekepaneng, ’me se ne se se se batla se tlala. . . . A [Jesu] tsoha, a khalemela moea, a re ho leoatle: Khutsa, u re tu! Eaba moea oa khutsa, ’me khutso e kholo ea e-ba teng. . . . ’Me ba tšaba ka tšabo e kholo, ba bolellana, ba re: Na enoa ke mang na, ha a utluoa ke moea le ke leoatle?” (Ka hona Kreste a bontša matla ao eena joaloka Morena oa leholimo a tlang ho a sebelisa holim’a lintho tse joalo tsa tlhaho.)
O tla tsosa bafu
Joh. 5:28, 29: “Se makaleng ke hoo; hobane nako ea tla, eo bohle ba mabitleng ba tla utloa lentsoe la hae [lentsoe la Kreste Morena]; ’me ba tla tsoa ho ’ona.”
Tšen. 20:12: “Ka ntoo bona bafu ba banyenyane le ba baholo ba eme pel’a terone; ha phetloa libuka; ha phetloa le buka e ’ngoe, e leng buka ea bophelo; ’me bafu ba ahloloa ka tse ngoliloeng libukeng tseo, e leng ka mesebetsi ea bona [eo ba e entseng kamorao ho tsoho ea bona; bapisa Ba-Roma 6:7].”
O tla tlosa lefu lohle le bakoang ke ho futsa sebe sa Adama
Esa. 25:8: “O tla felisa lefu ka ho sa eeng kae; Morena Jehova o tla felisa meokho lifahlehong tsohle.”
Tšen. 21:4: “O tla hlakola meokho eohle mahlong a bona; lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko; hobane tsa pele li fetile.”
O tla lokisetsa lefatše leo ho lona batho ba ratanang ka ’nete
Joh. 13:35: “Seo bohle ba tla tseba hobane le barutuoa ba ka [ka hona le mocheng oa ho ba le Jesu ’Musong oa leholimo kapa ho ba bafo ba oona ba lefatšeng] ka sona, ke ha le ratana.”
O tla tlisa liphoofolo le batho kutloanong
Esa. 11:6-9: “Phiri e tla lula le konyana, lengau le bothe le potsanyane; namane le taoana le khomo e nontšitsoeng li tla ba hammoho, li sotetsoe ke moshanyana. Sethole sa khomo le sa bere li tla fula hammoho, manamane a tsona a robale hammoho; tau e tla fula joang joale ka khomo. Lesea le anyang le tla ipapalla mosimeng oa marabe, ngoana ea khoesoang a kenye letsoho lefarung la qooane. ’Me ha ho sa tla etsoa hampe, ha ho sa tla hlola ho senngoa thabeng eohle e halalelang ea ka.” (Le Esaia 65:25)
Hos. 2:18: “Ka tsatsi leo, ke tla ba etsetsa selekane le liphoofolo tsa naha, le linonyana tsa leholimo, le tse hahabang lefatšeng; . . . ’me ke tla ba ahisa ka khotso.”
O tla etsa lefatše paradeise
Luka 23:43, NW: “Kannete ke re ho uena kajeno, U tla ba le ’na Paradeiseng.”
Pes. 98:7-9: “Leoatle a le lume le tsohle tse ho lona, lefatše le ba ahileng ho lona. Linōka a li ke li ope ka liatla, le lithaba li ntše mehoo ea thabo pel’a Jehova, hobane o ea tla ho ahlola lefatše. O tla ahlola lefatše ka ho loka, le lichaba ka ’nete ea hae.”
Bapisa Genese 1:28; 2:15; Esaia 55:11.
’Muso oa Molimo o ne o tla qala ho busa neng?
Na ke lekholong la pele la lilemo?
Ba-Kol. 1:1, 2, 13: “Ke le Pauluse, moapostola oa Jesu Kreste ka thato ea Molimo, ke e-na le Timothea, ngoan’eso, ke ngolla . . . bahalaleli [bao e neng e le majalefa a ’Muso oa leholimo] . . . o [Molimo] re ntšitse matleng a lefifi, oa re falletsa ’musong oa Mora oa oona ea ratoang.” (Kahoo, ka sebele Kreste o ne a qalile ho busa holim’a phutheho ea Bokreste lekholong la pele la lilemo pele ho ngoloa sena, empa ho hlongoa hoa ’Muso hore o buse lefatše lohle e ne e le hona ho tla tla.)
1 Ba-Kor. 4:8: “Le se le khotše, le se le enne, le se le busitse ka ntle ho rōna; hoja le ka fela la busa, le rōna re tle re buse hammoho le lōna!” (Ho hlakile hore moapostola Pauluse o ba khalemella ho ba le pono e fosahetseng.)
Tšen. 12:10, 12: “Joale, ho hlahile poloko, le matla, le ’muso oa Molimo oa rōna, le matla a Kreste oa oona; hobane monģosi oa banab’abo rōna, ea neng a ba nģosa pel’a sefahleho sa Molimo motšehare le bosiu, o lihetsoe. Thabang ke hona, maholimo, le lōna ba ahileng teng. Ho malimabe lōna ba ahileng lefatšeng le leoatleng; hobane Diabolose o theohetse ho lōna a halefile hampe, ka ho tseba hobane nako ea hae ha e sa le ekae.” (Mona ho hlongoa hoa ’Muso oa Molimo ho amahanngoa le ho liheloa hoa Satane a e-tsoa leholimong. Hona ho ne ho e-so ho etsahale nakong ea bofetoheli Edeneng, joalokaha ho bontšoa ho Jobo likhaolo 1 le 2. Tšenolo e ngotsoe ka 96 C.E., ’me Tšenolo 1:1 e bontša hore e sebetsana le liketsahalo tseo e neng e le hona li tla tla.)
Na ho tla hoa ’Muso oa Molimo pusong ho tlameha ho emela ho sokoloha hoa lefatše?
Pes. 110:1, 2: “Jehova o itse ho Morena [Jesu Kreste] oa ka: Lula letsohong la ka le letona, ke tle ke be ke bee bao e leng lira ho uena bonamelo ba maoto a hao. Jehova o ea otlolla Sione molamu oa matla a hao: hloma ’muso oa hao har’a lira tsa hao.” (Kahoo o ne a tla ba le lira tseo a tla li hlōla; hase bohle ba neng ba tla ikokobeletsa puso ea hae.)
Matt. 25:31-46: “Mohla Mor’a motho [Jesu Kreste] a tlang a teetsoe hare ke khanya ea hae, mangeloi a e-na le eena kaofela, ke moo a tla lula teroneng ea khanya ea hae. Lichaba tsohle li tla bokelloa pel’a hae; ’me o tla khetha ba bang ho ba bang, joale ka molisa ha a khetha linku ho lipōli. . . . ’Me bona bao [ba bontšitseng ho se rate baena ba hae ba tlotsitsoeng] ba tla ea bohlokong bo sa feleng, empa ba lokileng ba tla ea bophelong bo sa feleng.” (Ka ho hlakileng, hase batho bohle ba neng ba tla sokoloha pele Kreste a amohela terone ea hae; hase bohle ba neng ba tla ipaka e le ba lokileng.)
Na Bibele e bontša hore na ’Muso o tla qala puso ea oona neng?
Bona maqephe 283-285, tlas’a sehlooho se seholo “Matsatsi” le maqephe 293-298, tlas’a “Mehla ea Qetello.”
Haeba e Mong a Re—
‘O ke ke oa tla bophelong ba ka’
U ka ’na ua arabela: ‘Empa o tla tla bophelong ba e mong, na ha ho joalo? . . . Na ho na le ba neng ba tla tseba hore moloko oa bona ke oona o tla o bona? Baapostola ba Jesu ba batlile ho tseba seo, ’me karabelo eo a ba fileng eona ke ea bohlokoa haholo bakeng sa rōna kajeno. (Matt. 24:3-14; Luka 21:29-32)’
Kapa u ka re: ‘Pono eo ke e tloaelehileng haholo. Empa Lipaki tsa Jehova li lumela ka tieo, motheong oa Bibele, hore ’Muso oa Molimo o se o ntse o busa maholimong le hore ho ho rōna ho bontša hore na re batla ho tsoela pele ho phela lefatšeng tlas’a puso e lokileng ea Molimo kapa che. Ke ka lebaka leo ke tlileng ha hao mona kajeno. Hlokomela se boletsoeng mona ho Mattheu 25:31-33.’