Khaolo ea 12
Hanela Makhotla a Moea a Khopo
1. Jesu o ile a itšoara joang ha a tobana le meea e khopo?
Hang ka mor’a hore a kolobetsoe, Jesu Kreste o ile a ea lefeelleng la Judea ho ea rapela le ho thuisa. Ha a le moo Satane Diabolose o ile a leka hore a mo tlōlise molao oa Molimo. Leha ho le joalo, Jesu o ile a hana ho amohela seo Diabolose a neng a mo chehile ka sona ’me ha a ka a oela lerabeng la hae. Jesu o ile a tobana le meea e meng e khopo nakong ea tšebeletso ea hae lefatšeng. Empa, nako le nako, o ile a e khalemela ka matla le ho e hanela.—Luka 4:1-13; 8:26-34; 9:37-43.
2. Re tla hlahloba lipotso life?
2 Litlaleho tsa Bibele tse hlalosang seo ho thulanoeng le sona li lokela ho re kholisa hore makhotla a moea a khopo a teng. A leka ho khelosa batho. Leha ho le joalo, re ka hanela meea ena e mebe. Empa meea e khopo e tsoa hokae? Ke hobane’ng ha e leka ho thetsa batho? Hona e sebelisa mekhoa efe ho finyella lipakane tsa eona? Ho fumana likarabelo lipotsong tse joalo ho tla u thusa ho hanela makhotla a moea a khopo.
MEEA E KHOPO—HO QALEHA HA EONA LE SEPHEO SA EONA
3. Satane Diabolose o bile teng joang?
3 Jehova Molimo o ile a etsa libōpuoa tsa moea tse ngata nako e telele pele a bōpa batho. (Jobo 38:4, 7) Joalokaha ho hlalositsoe Khaolong ea 6, le leng la mangeloi ana le ile la hōlisa takatso ea hore batho ba le rapele ho e-na le ho rapela Jehova. Ka ho phehella sepheo seo, lengeloi lena le khopo le ile la hanyetsa le ho etselletsa ’Mōpi, esita le ho fa mosali oa pele maikutlo a hore Molimo o ne a le leshano. Joale, ka ho loketseng, sebōpuoa sena sa moea sa lerabele se ile sa tsejoa e le Satane (mohanyetsi) Diabolose (moetselletsi).—Genese 3:1-5; Jobo 1:6.
4. Mangeloi a itseng a ile a etsa sebe joang mehleng ea Noe?
4 Hamorao, mangeloi a mang a ile a ba ka lehlakoreng la Satane Diabolose. Mehleng ea monna ea lokileng Noe, a mang a ’ona a ile a tlohela tšebeletso ea ’ona leholimong ’me a nka ’mele ea nama ho khotsofatsa takatso ea ’ona e fetelletseng bakeng sa likamano tsa botona le botšehali le basali ba lefatšeng. Ha ho pelaelo hore Satane o ile a susumelletsa mangeloi ao hore a nke tsela ea ho se utloe. E ile ea lebisa ntlheng ea hore e be bo-ntate ba bana ba moloko o tsoakaneng ba bitsoang Banefilimi, bao e ileng ea e-ba bo-’mampoli ba mabifi. Ha Jehova a etsa hore Moroallo o moholo o be teng, o ile oa timetsa moloko o senyehileng oa batho le bana bana bao eseng ba tlhaho ba mangeloi a sa mameleng. Mangeloi a marabele a ile a phonyoha timetso ka ho lahla ’mele ea ’ona ea nama ’me a khutlela sebakeng sa moea. Empa Molimo o ile a thibella bademona bana ka ho ba tšoara joaloka melahloa lefifing la moea. (Genese 6:1-7, 17; Juda 6) Leha ho le joalo, Satane, “’musi oa bademona,” le mangeloi a hae a khopo ba ’nile ba tsoela pele ka borabele ba bona. (Luka 11:15) Pakane ea bona ke efe?
5. Satane le bademona ba hae ba na le sepheo sefe, ’me ba sebelisa eng ho tšoasa batho?
5 Sepheo se sebe sa Satane le bademona ke ho etsa hore batho ba fetohele Jehova Molimo. Kahoo, bana ba khopo ba ’nile ba khelosa, ba tšosa le ho hlasela batho ho theosa le histori ea batho. (Tšenolo 12:9) Mehlala ea kajeno e tiisa hore tlhaselo ea bademona hona joale e befile ho feta leha e le neng pele. E le ho tšoasa batho, bademona hangata ba sebelisa ho sebelisana le meea ka mefuta eohle ea hona. Bademona ba sebelisa see joang, hona u ka itšireletsa joang?
KAMOO MEEA E KHOPO E LEKANG HO U KHELOSA
6. Ho sebelisana le meea ke eng, ’me mefuta e meng ea hona ke efe?
6 Ho sebelisana le meea ke eng? Ke ho kopana le bademona kapa meea e khopo, ebang ke ka ho toba kapa ka mokena-lipakeng oa motho. Ho sebelisana le meea ke ntho ea bohlokoa ho bademona joaloka ntho e sebelisoang ke setsomi ho cheha: E hohela phofu. Feela joalokaha setsomi se sebelisa lintho tse sa tšoaneng ho hohella liphoofolo sefing sa sona, ho joalo le meea e khopo e khothalletsa mefuta e sa tšoaneng ea ho sebelisana le meea ho tlisa batho tlas’a taolo ea eona. (Bapisa le Pesaleme ea 119:110.) O mong oa mefuta ena ke bonohe, bolao, ho sheba lipontšo tse supang nako e tlang, boloi, ho betsa, ho kopana le bakena-lipakeng, le ho botsa bafu.
7. Ho sebelisana le meea ho atile hakae, hona ke hobane’ng ha ho ata le linaheng tseo ho thoeng ke tsa Bokreste?
7 Lintho tse sebelisoang ho hohela lia sebetsa, hobane ho sebelisana le meea ho hohela batho ho pota lefatše. Ba phelang metseng ea likhoeng ba ea ho bo-ngakana-ntšonyana, ’me basebetsi ba liofising metseng e meholo ba ea ho linohe tsa linaleli. Ho sebelisana le meea ho atile esita le linaheng tseo ho thoeng ke tsa Bokreste. Phuputso e bontša hore United States feela, limakasine tse ka bang 30 tseo ha li kopane kabo ea tsona e fetang 10 000 000 li inehetse mefuteng e sa tšoaneng ea ho sebelisana le meea. Batho ba Brazil ba sebelisa liranta tse fetang limilione tse likete tse 1,8 thepeng ea lintho tsa ho sebelisana le meea selemo le selemo. Leha ho le joalo, karolo ea 80 lekholong ea ba etelang litsi tsa ba sebelisanang le meea tsa borapeli khafetsa naheng eo ke Mak’hatholike a kolobelitsoeng a boetseng a bang teng ’Miseng. Feela joalokaha baruti ba bang ba sebelisana le meea, batho ba bangata ba bolumeli ba nahana hore ho sebelisana le meea hoa amoheleha ho Molimo. Empa na ho joalo?
LEBAKA LEO BIBELE E NYATSANG TŠEBELISANO LE MEEA KA LONA
8. Pono ea Mangolo ke efe ka ho sebelisana le meea?
8 Haeba u rutiloe hore mefuta e meng ea ho sebelisana le meea ke litsela tsa ho kopana le meea e molemo, u ka ’na ua makala ho ithuta seo Bibele e se buang ka ho sebelisana le meea. Batho ba Jehova ba ile ba lemosoa: “Le se ke la khelohela ho ba bitsang bafu, leha e le ho linohe; le se ke la botsa litaba ho bona, le tle le se ke la itšela litšila ka bona.” (Levitike 19:31, mongolo o tšekaletseng ke oa rōna; 20:6, 27.) Buka ea Bibele ea Tšenolo e fana ka temoso ea hore “ba etsang liketso tsa tumelo ea ho sebelisana le meea ea bafu” ba felella “letšeng le tukang mollo le sebabole. Sena se bolela lefu la bobeli [la ka ho sa feleng].” (Tšenolo 21:8; 22:15) Mefuta eohle ea ho sebelisana le meea ha e amoheloe ke Jehova Molimo. (Deuteronoma 18:10-12) Ke hobane’ng ha ho le joalo?
9. Ke hobane’ng ha re ka fihlela qeto ea hore melaetsa ea kajeno e tsoang lefatšeng la moea ha e tsoe ho Jehova?
9 Jehova o ile a romela meea e molemo, kapa mangeloi a lokileng, hore e buisane le batho ba bang pele Bibele e phethoa. Haesale e phethoa, Lentsoe la Molimo le fane ka tataiso eo batho ba e hlokang hore ba sebeletse Jehova ka tsela e amohelehang. (2 Timothea 3:16, 17; Baheberu 1:1, 2) Ha a pote Lentsoe la hae le halalelang ka thōko ka hore a fane ka melaetsa ka bakena-lipakeng. Melaetsa eohle e joalo ea kajeno e tsoang lefatšeng la moea e tsoa ho meea e khopo. Tloaelo ea ho sebelisana le meea e ka lebisa ho tšoengoeng ke bademona kapa esita le ho busoa ke meea e khopo. Ka hona, ka lerato Molimo o re lemosa hore re se amehe mekhoeng leha e le efe ea tšebelisano le meea. (Deuteronoma 18:14; Bagalata 5:19-21) Ho feta moo, haeba re tsoela pele ho sebelisana le meea ka mor’a hore re tsebe pono ea Jehova ka eona, re tla be re ema le meea e khopo ea marabele ’me re tla be re le lira tsa Molimo.—1 Samuele 15:23; 1 Likronike 10:13, 14; Pesaleme ea 5:4.
10. Bonohe ke eng, hona ke hobane’ng ha re lokela ho bo qoba?
10 Mofuta o mong o ratoang haholo oa tšebelisano le meea ke bonohe—ho leka ho tseba bokamoso kapa tse sa tsejoeng ka thuso ea meea. Mefuta e meng ea bonohe ke bonohe ba linaleli, ho sheba bolo ea kristale, ho manolla litoro, ho bala mela ea seatla, le ho noha bokamoso ka ho sebelisa likarete tsa tarot. Ba bangata ba talima bonohe e le papali e se nang kotsi, empa Bibele e bontša hore ba nohang bokamoso ba sebelisana haufi-ufi le meea e khopo. Ka mohlala, Liketso 16:16-19 e bua ka “modemona oa bonohe” ea neng a nolofalletsa ngoanana e mong ho sebelisa “tsebo ea ho bolela liketsahalo esale pele.” Leha ho le joalo, matla a hae a ho bolela nako e tlang esale pele a ile a lahleha ha modemona eo a lelekoa. Ka ho hlakileng, bonohe ke ntho e sebelisoang ke bademona ho hohella batho sefing sa bona.
11. Ho leka ho buisana le bafu ho isa lerabeng lefe?
11 Haeba u utloile bohloko ka lebaka la lefu la setho se ratoang sa lelapa kapa motsoalle ea haufi-ufi, u ka hoheloa habonolo ke ntho e ’ngoe e hokang. Mokena-lipakeng oa moea a ka ’na a u fa boitsebiso bo khethehileng kapa a ka ’na a bua ka lentsoe le utloahalang eka ke la motho ea shoeleng. Hlokomela! Ho leka ho buisana le bafu ho isa sefing. Hobane’ng? Hobane bafu ha ba tsebe ho bua. Joalokaha u ka hopola, Lentsoe la Molimo ka ho hlakileng le bolela hore lefung motho ‘o khutlela lerōleng la hae; ka tsatsi lona leo, merero ea hae e felile.’ Bafu “ha ba tsebe letho leha le le leng.” (Pesaleme ea 146:4; Moeklesia 9:5, 10) Ho feta moo, ha e le hantle bademona ba ’nile ba tsejoa ka hore ba etsisa lentsoe la mofu ebe ba fa mokena-lipakeng oa moea boitsebiso bo buang ka ea shoeleng. (1 Samuele 28:3-19) Kahoo “leha e le ea botsang balimo” o tšoasitsoe ke meea e khopo ’me o khahlanong le thato ea Jehova Molimo.—Deuteronoma 18:11, 12; Esaia 8:19.
HO TLOHA HO HOHELENG HO EA HO HLASELENG
12, 13. Ke bopaki bofe bo teng ba hore bademona ba phehella ho leka le ho tšoenya batho?
12 Ha u lumellana le keletso ea Lentsoe la Molimo mabapi le ho sebelisana le meea, u hana ntho e hohelang ea bademona. (Bapisa le Pesaleme ea 141:9, 10; Baroma 12:9.) Na hoo ho bolela hore meea e khopo e tla khaotsa ho leka ho u hapa? Le hanyenyane! Ka mor’a ho leka Jesu ka makhetlo a mararo, Satane o ile a “mo tlohela ho fihlela nakong e ’ngoe e loketseng.” (Luka 4:13) Ka ho tšoanang, meea e manganga ha e hohele batho feela empa e boetse e-ea ba hlasela.
13 Hopola ha re ne re hlahloba tlhaselo ea Satane pejana ho mohlanka oa Molimo Jobo. Diabolose o ile a etsa hore a lahleheloe ke mohlape oa hae ’me a shoeloe ke boholo ba bahlanka ba hae. Satane o bile a bolaea le bana ba Jobo. Ka mor’a moo, o ile a otla Jobo ka boeena ka lefu le bohloko. Empa Jobo o ile a boloka botšepehi ba hae ho Molimo ’me a hlohonolofatsoa haholo. (Jobo 1:7-19; 2:7, 8; 42:12) Ho tloha ka nako eo, bademona ba ’nile ba etsa hore batho ba bang e be limumu kapa ba foufale ’me ba tsoetse pele ho khotsofalla ha batho ba utloa bohloko. (Matheu 9:32, 33; 12:22; Mareka 5:2-5) Kajeno, litlaleho li bontša hore bademona ba hlōpha batho ba bang botoneng kapa botšehaling le ho hlantša ba bang. Ba boetse ba hlohlelletsa ba bang ho bolaea le ho ipolaea, e leng libe tse khahlanong le Molimo. (Deuteronoma 5:17; 1 Johanne 3:15) Leha ho le joalo, batho ba likete ba kileng ba tšoasoa ke meea ena e khopo ba ile ba khona ho itokolla. Ba khonne ho etsa see joang? Ba entse joalo ka ho nka mehato ea bohlokoa.
MOKHOA OA HO HANELA MEEA E KHOPO
14. Tumellanong le mohlala oa Bakreste ba Efese ba lekholong la pele la lilemo, u ka hanela meea e khopo joang?
14 Tsela e ’ngoe ke efe eo u ka hanelang meea e khopo le ho itšireletsa ho eona le lelapa la hao marabeng a eona? Bakreste ba lekholo la pele la lilemo Efese ba neng ba sebelisana le meea pele e e-ba balumeli ba ile ba nka mehato e nepahetseng. Rea bala hore “ba bangata ba ba neng ba sebelisa tsebo ea boselamose ba tlisa libuka tsa bona hammoho ’me ba li chesa ka pel’a e mong le e mong.” (Liketso 19:19) Esita le haeba ha u e-s’o sebelisane le meea, lahla ntho leha e le efe e nang le tšebelisano le meea kapa e amanang le eona. Hona ho akarelletsa libuka, limakasine, livideo, li-poster, lirekoto tsa ’mino, le lintho tse sebelisoang bakeng sa merero ea tšebelisano le meea. Hape ho akarelletsoa le litšoantšo tse rapeloang, lithatho kapa lintho tse ling tse roaloang bakeng sa ho itšireletsa, le limpho tse tsoang ho ba tloaetseng ho sebelisana le meea. (Deuteronoma 7:25, 26; 1 Bakorinthe 10:21) Ho etsa mohlala: Banyalani ba bang Thailand e ne e le khale ba tšoenngoa ke bademona. Eaba ba tlosa lintho tse amanang le tšebelisano le meea. Phello e bile efe? Ba ile ba lokoloha litlhaselong tsa bademona ’me ka morao ho moo ba tsoela pele hantle moeeng.
15. Ka ho hanela makhotla a moea a khopo, bohato bo bong bo hlokahalang ke bofe?
15 E le hore ho ka haneloa meea e khopo, bohato bo bong bo hlokahalang ke ho sebelisa keletso ea moapostola Pauluse ea ho apara seaparo se felletseng sa lihlomo tsa moea seo re se filoeng ke Molimo. (Baefese 6:11-17) Bakreste ba tlameha ho matlafatsa boitšireletso ba bona khahlanong le meea e khopo. Bohato boo bo akarelletsa eng? Pauluse o ile a re: “Ka holim’a lintho tsohle, le nke thebe e khōlō ea tumelo, eo ka eona le tla khona ho tima metsu eohle e tukang ea ea khopo.” Ka sebele, ha tumelo ea hao e le matla, le matla a hao a tla ba maholoanyane bakeng sa ho hanela makhotla a moea a khopo.—Matheu 17:14-20.
16. U ka matlafatsa tumelo ea hao joang?
16 U ka matlafatsa tumelo ea hao joang? Ka ho tsoela pele ho ithuta Bibele le ho sebelisa keletso ea eona bophelong ba hao. Matla a tumelo ea motho a itšetlehile haholo ka ho tiea ha motheo oa eona—tsebo ea Molimo. Na ha u lumele hore tsebo e nepahetseng eo u e fumaneng le ho e nka ka ho teba joalokaha u ithutile Bibele e hahile tumelo ea hao? (Baroma 10:10, 17) Ka hona, ha ho pelaelo hore ha u ntse u tsoela pele ho ithuta ’me u ho etsa tloaelo ea hao ho ba teng libokeng tsa Lipaki tsa Jehova, tumelo ea hao e tla matlafatsoa le ho feta. (Baroma 1:11, 12; Bakolose 2:6, 7) E tla ba tšireletso e matla khahlanong le ho hlaseloa ke bademona.—1 Johanne 5:5.
17. Ke mehato efe e tsoelang pele e ka ’nang ea hlokahala bakeng sa ho hanela makhotla a moea a khopo?
17 Ke mehato efe e tsoelang pele e ka nkoang ke motho ea ikemiselitseng ho hanela makhotla a moea a khopo? Bakreste ba Efese ba ne ba hloka tšireletso hobane ba ne ba phela motseng o neng o tletse bodemona. Ka hona, Pauluse o ile a ba bolella: ‘Le tsoele pele ho rapela ka nako e ’ngoe le e ’ngoe ka moea.’ (Baefese 6:18) Kaha re phela lefatšeng le tletseng bademona, ho rapella tšireletso ea Molimo ka matla ke habohlokoa bakeng sa ho hanela meea e khopo. (Matheu 6:13) Ho thusang ntlheng ena ke thuso ea moea le lithapelo tsa baholo ba khethiloeng ka phuthehong ea Bokreste.—Jakobo 5:13-15.
TSOELA PELE U LOANA KHAHLANONG LE MEEA E KHOPO
18, 19. Ho ka etsoa eng haeba bademona ba boetse ba khathatsa motho?
18 Leha ho le joalo, esita le ka mor’a ho nka mehato ena ea motheo, ba bang ba ’nile ba khathatsoa ke meea e khopo. Ka mohlala, monna e mong Côte d’Ivoire o ile a ithuta Bibele le Lipaki tsa Jehova ’me a senya lithatho tsohle tsa hae. Ka morao ho moo, o ile a tsoela pele hantle, a nehela bophelo ba hae ho Jehova, ’me a kolobetsoa. Empa beke ka mor’a hore a kolobetsoe, bademona ba qala ho mo khathatsa hape, ’me mantsoe a mo bolella hore a lahle tumelo ea hae eo a e fumaneng bocha. Haeba sena se u etsahalla, na ho ne ho tla bolela hore u lahlehetsoe ke tšireletso ea Jehova? Eseng joalo.
19 Le hoja monna ea phethahetseng Jesu Kreste a ne a e-na le tšireletso ea bomolimo, o ile a utloa lentsoe la sebōpuoa sa moea se khopo Satane Diabolose. Jesu o ile a bontša se lokelang ho etsoa maemong a joalo. O ile a bolella Diabolose: “Tloha, Satane!” (Matheu 4:3-10) Ka tsela e tšoanang, u lokela ho hana ho mamela mantsoe a tsoang lefatšeng la moea. Hanela meea e khopo ka ho ipiletsa ho Jehova bakeng sa thuso. E, rapela ka lentsoe le phahameng u sebelisa lebitso la Molimo. Liproverbia 18:10 e re: “Lebitso la Jehova ke qhobosheane e thata; ea lokileng o balehela ho eona, ’me o lula phahameng.” Monna oa Mokreste Côte d’Ivoire o ile a etsa sena, ’me meea e khopo ea khaotsa ho mo tšoenya.—Pesaleme ea 124:8; 145:18.
20. Ka kakaretso, u ka etsa eng ho hanela meea e khopo?
20 Jehova o lumelletse hore meea e khopo e ’ne e be teng, empa o bontša matla a hae, haholo-holo molemong oa batho ba hae, ’me lebitso la hae le boleloa lefatšeng lohle. (Exoda 9:16) Haeba u lula u le haufi le Molimo, ha ho hlokahale hore u tšabe meea e khopo. (Numere 23:21, 23; Jakobo 4:7, 8; 2 Petrose 2:9) Matla a eona a lekanyelitsoe. E ile ea fuoa kotlo mehleng ea Noe, ea lelekoa leholimong mehleng ea morao tjena, ’me hona joale e emetse kahlolo ea ho qetela. (Juda 6; Tšenolo 12:9; 20:1-3, 7-10, 14) Ha e le hantle, e tšohile timetso ea eona e tlang. (Jakobo 2:19) Kahoo ho sa tsotellehe hore na meea e khopo e leka ho u hohela ka mofuta o itseng oa ntho kapa ho u hlasela ka tsela leha e le efe, u ka e hanela. (2 Bakorinthe 2:11) Qoba mokhoa o mong le o mong oa ho sebelisana le meea, sebelisa keletso ea Lentsoe la Molimo, ’me u batle kamohelo ea Jehova. Etsa sena ntle ho tieho, hobane bophelo ba hao bo itšetlehile ka ho hanela makhotla a moea a khopo!
LEKA TSEBO EA HAO
Meea e khopo e leka ho khelosa batho joang?
Ke hobane’ng ha Bibele e nyatsa tšebelisano le meea?
Motho a ka lokoloha joang makhotleng a moea a khopo?
Ke hobane’ng ha u lokela hore u ’ne u hanele meea e khopo?
[Setšoantšo se leqepheng la 110]
U talima ho sebelisana le meea ka mefuta ea hona e mengata joang?