Thuto 20

Mangolo a Kenyelelitsoe Hantle

Ke eng seo u lokelang ho se etsa?

Lokisa likelello tsa bamameli ba hao pele u bala lengolo.

Ke Hobane’ng ha e le Habohlokoa?

Ho kenyelletsa lengolo hantle ho ka thusa bamameli ba hao ho utloisisa moelelo oa sebele oa seo temana eo e se bolelang.

MANGOLO ke ’ona motheo oa thupelo e fanoang libokeng tsa rōna tsa phutheho. Litemana tsa Bibele li boetse li phetha karolo ea bohlokoa ho seo re se buang tšebeletsong ea tšimo. Leha ho le joalo, hore na li tlatsetsa hakae puisanong ea rōna ho itšetlehile ka hore na li kenyelletsoa hantle hakae.

Ho hlokahala ho hongata ho feta feela ho bolela lengolo le ho kōpa motho e mong hore a le bale le uena. Ha u kenyelletsa lengolo, leka ho finyella lipakane tse peli: (1) Tsosa tebello ’me (2) u lebise tlhokomelo tabeng ea hore na ke hobane’ng ha u sebelisa temana eo. Lipakane tsena li ka finyelloa ka litsela tse sa tšoaneng.

Botsa Potso. Mokhoa ona o atleha haholo haeba karabo e se e ntse e sa totobala ho bamameli ba hao. Leka ho beha potso eo ka mokhoa o etsang hore batho ba nahane. Jesu o entse sena. Ha Bafarisi ba mo atamela tempeleng ’me ba leka kutloisiso ea hae ea Mangolo phatlalatsa, Jesu o ile a ba botsa: “Le nahana joang ka Kreste? Ke mora oa mang?” Ba ile ba araba ka ho re: “Oa Davida.” Eaba Jesu oa botsa: “Joale, ho tla joang hore Davida ka pululelo a mo bitse ‘Morena’?” Eaba o tsoela pele ho qotsa Pesaleme ea 110:1. Bafarisi ba ile ba thōlisoa. Leha ho le joalo, bongata bo ile ba thabela ho mamela Jesu.—Mat. 22:41-46.

Tšebeletsong ea tšimo, u ka ’na ua sebelisa lipotso tse kenyelletsang tse kang tse latelang: “’Na le uena re na le mabitso. Na Molimo o na le lebitso? Re ka fumana karabo ho Pesaleme ea 83:18.” “Na ho tla ke ho be le ’muso o le mong bakeng sa moloko oohle oa batho? Hlokomela kamoo potso ena e arabeloang kateng ho Daniele 2:44.” “Na ka sebele Bibele e bua ka maemo a leng teng mehleng ea rōna? Bapisa se boletsoeng ho 2 Timothea 3:1-5 le maemo ao u a tloaetseng.” “Na bohloko le lefu li tla ke li fele? Karabo ea Bibele e ka fumanoa ho Tšenolo 21:4, 5.”

Puong, ho sebelisa lipotso ka hloko bakeng sa ho kenyelletsa mangolo ho ka susumelletsa bamameli ba hao ho ba le pono e ncha ka litemana, esita le tseo ba li tloaetseng. Empa na ba tla etsa joalo? Seo se ka ’na sa itšetleha ka hore na lipotso tseo u li botsang li hlile lia ba ama kapa che. Esita leha taba e le e thahasellisang ho bamameli, likelello tsa bona li ka ’na tsa lelera ha u bala litemana tseo ba li utloileng ka makhetlo a mangata. Ho thibela seo, u lokela ho nahanisisa taba hantle e le hore nehelano ea hao e ipiletse.

Hlahisa Bothata. U ka ’na ua hlahisa bothata ebe u lebisa tlhokomelo lengolong le rarollang bothata boo. U se ke ua etsa hore bamameli ba lebelle se fetang seo ba tla se fumana. Hangata lengolo le fana ka karolo e itseng feela ea tharollo. Leha ho le joalo, ha u ntse u bala temana, u ka ’na ua kōpa bamameli ho nahana ka hore na temana eo e fana ka tataiso efe bakeng sa ho sebetsana le boemo boo.

Ka mokhoa o tšoanang, u ka ’na ua bolela molao-motheo oa boitšoaro ba bomolimo ’me u sebelise tlaleho ea Bibele ho bontša bohlale ba ho o latela. Haeba lengolo le fupere lintlha tse peli (kapa mohlomong tse eketsehileng) tse tobileng tse amanang le seo ho ntseng ho buisanoa ka sona, libui tse ling li kōpa bamameli hore ba li hlokomele. Haeba ho bonahala hore bothata bo boima haholo bakeng sa bamameli ba itseng, u ka susumetsa mohopolo ka ho hlahisa menyetla e ’maloa ebe u lumella temana le tlhaloso ea eona ho fana ka karabo.

Qotsa Bibele e le Mohloli o Tšepahalang oa Boitsebiso. Haeba u se u tsositse thahasello tabeng ea hao ’me u boletse khopolo e le ’ngoe kapa tse eketsehileng likarolong tse ling tsa eona, u ka ’na ua kenyelletsa lengolo ka ho re: “Hlokomela seo Lentsoe la Molimo le se bolelang ntlheng ena.” Sena se bontša hore na ke hobane’ng ha boitsebiso boo u tla bo bala e le bo tšepahalang.

Jehova o ile a sebelisa banna ba kang Johanne, Luka, Pauluse le Petrose ho ngola likarolo tse itseng tsa Bibele. Empa e ne e le bangoli feela; Jehova ke eena Moqapi. Haholo-holo ha u bua le batho bao e seng liithuti tsa Mangolo a Halalelang, ho kenyelletsa lengolo ka ho re “Petrose o ngotse hore” kapa “Pauluse o itse” ho ka ’na ha se be le matla a tšoanang le a kenyelletso e bontšang hore temana eo ke lentsoe la Molimo. Hoa hlokomeleha hore maemong a mang, Jehova o ile a laela Jeremia ho kenyelletsa liphatlalatso ka ho re: “Utloang lentsoe la Jehova.” (Jer. 7:2; 17:20; 19:3; 22:2) Ho sa tsotellehe hore na re sebelisa lebitso la Jehova ha re kenyelletsa mangolo kapa che, pele re phetha puisano ea rōna, re lokela ho leka ho bontša hore Bibele e tšoere lentsoe la hae.

Nahanela Moelelo oa Taba. U lokela ho hlokomela moelelo oa taba ha u nahana kamoo u ka kenyelletsang lengolo kateng. Maemong a mang u tla bolela moelelo oa taba ka ho toba; leha ho le joalo, moelelo oa taba o ka ’na oa ama seo u se buang ka litsela tse ling. Ka mohlala, na u ne u tla kenyelletsa mantsoe a Jobo ea tšabang Molimo ka tsela e tšoanang le kamoo u neng u tla kenyelletsa polelo e boletsoeng ke e mong oa batšelisi ba hae ba bohata? Buka ea Liketso e ngotsoe ke Luka, empa har’a batho ba bang, o qotsa Jakobo, Petrose, Pauluse, Filipi, Setefane le mangeloi, hammoho le Gamaliele le Bajuda ba bang bao e neng e se Bakreste. U tla lebisa temana eo u e qotsang ho mang? Ka mohlala, hopola hore hase lipesaleme tsohle tse qapiloeng ke Davida ’me hase buka eohle ea Liproverbia e ngotsoeng ke Solomone. Hape ho molemo ho tseba hore na mongoli oa Bibele o ne a bua ka mang le hore na ho ne ho tšohloa taba efe e akaretsang.

Sebelisa Boitsebiso bo Tšehetsang Taba. Sena se sebetsa haholo haeba u ka bontša hore maemo a nakong ea tlaleho eo ea Bibele a ne a tšoana le ao u buang ka ’ona hona joale. Maemong a mang ho hlokahala boitsebiso bo tšehetsang taba hore motho a utloisise temana e itseng. Ka mohlala, haeba u ne u ka sebelisa Baheberu 9:12, 24 puong e buang ka thekollo, ho ne ho ka ’na ha hlokahala hore ha u bala temana eo u e kenyelletse ka ho hlalosa ka bokhutšoanyane kamore e ka hare-hare ea tabernakele, eo mangolo a bontšang hore e tšoantšetsa sebaka seo Jesu a ileng a kena ho sona ha a ne a nyolohela leholimong. Empa u se ke ua akarelletsa boitsebiso bo tšehetsang taba bo bongata hoo bo ka patang temana eo u e kenyelletsang.

Hore u ntlafatse tsela eo u kenyelletsang mangolo ka eona, hlahlobisisa seo libui tse nang le phihlelo li se etsang. Hlokomela mekhoa e sa tšoaneng eo li e sebelisang. Hlahlobisisa ho sebetsa ha mekhoa ena. Ha u lokisetsa lipuo tsa hao, hlokomela mangolo a sehlooho ’me u lebise tlhokomelo e khethehileng ho seo temana ka ’ngoe e lokelang ho se finyella. Lokisetsa ka hloko kenyelletso ea lengolo ka leng e le hore le ka sebelisoa ka katleho e khōlō. Hamorao, akarelletsa le litemana tse ling kaofela tseo u li sebelisang. Ha karolo ena ea nehelano ea hao e ntse e ntlafala, u tla be u lebisa tlhokomelo e khōloanyane Lentsoeng la Molimo.

KAMOO U KA HO ETSANG KATENG

Ha u khetha mokhoa o tla tsosa thahasello, nahanela seo bamameli ba hao ba seng ba se tseba le kamoo ba ikutloang kateng ka taba eo.

Tiisa hore u tseba seo temana ka ’ngoe e tla se finyella ’me u etse hore litlhaloso tsa hao tse qalang li bontše seo.

BOITLHAKISO: Khetha lengolo leo u nahanang hore u ka le sebelisa ka katleho tšimong ea lōna. Rera (1) hore na ke potso efe kapa bothata boo u tla bo hlahisa bakeng sa ho tsosa thahasello ea mong’a ntlo le (2) kamoo u tla lebisa tlhokomelo tabeng ea hore na ke hobane’ng ha u bala temana eo.