Thuto 19
Ho Sebelisoa ha Bibele ho Khothalelitsoe
Ke eng seo u lokelang ho se etsa?
Khothalletsa bamameli ba hao ho tsamaisana le uena ha u ntse u bala mangolo Bibeleng.
Ke Hobane’ng ha e le Habohlokoa?
Seo motho a se bonang ka mahlo a hae, haholo-holo Bibeleng ea hae, ha a se lebale habonolo.
RE LAKATSA ho lebisa tlhokomelo ea motho e mong le e mong Lentsoeng la Molimo, Bibele. Buka eo e halalelang ke eona motheo oa molaetsa oo re o bolelang ’me re batla hore ba hlokomele hore seo re se buang ha re iqalle sona, empa se tsoa ho Molimo. Batho ba lokela ho tšepa Bibele.
Tšebeletsong ea Tšimo. Ha u lokisetsa tšebeletso ea tšimo, kamehla khetha lengolo le le leng kapa a mabeli ao u ka a arolelanang le batho ba ratang ho mamela. Esita leha u rerile ho fana ka nehelano e khutšoanyane ea sengoliloeng sa Bibele, hangata ho molemo hore u bale temana e loketseng ea Bibele. Bibele e na le matla a maholoanyane a ho tataisa batho ba kang linku ho feta ntho leha e le efe eo rōna ka borōna re ka e buang. Haeba ho sa khonehe hore u bale Bibele ka ho toba, u ka ’na ua khetha ho e qotsa. Lekholong la pele la lilemo, likopi tsa meqolo ea Mangolo li ne li sa fumanehe ka bongata. Leha ho le joalo, Jesu le baapostola ba hae ba ne ba qotsa Mangolo haholo. Le rōna re lokela ho etsa boiteko ba ho hopola mangolo ’me re a sebelise ka nepo tšebeletsong ea rōna, ka linako tse ling re a qotse feela.
Ha ho khoneha hore u bale Bibele, e tšoare ka tsela eo ka eona mong’a ntlo a ka khonang ho tsamaisana le uena ha u ntse u bala. Haeba mong’a ntlo a tsamaisana le uena Bibeleng ea hae, karabelo ea hae ho seo a se balang e ka ’na ea e-ba molemo haholoanyane.
Leha ho le joalo, u lokela ho hlokomela hore bafetoleli ba bang ba Bibele ba ile ba iketsetsa borata ka Lentsoe la Molimo. Ho ka etsahala hore ebe liphetolelo tsa bona ha li lumellane ka hohle-hohle le se neng se ngotsoe lipuong tsa pele tsa Bibele. Liphetolelo tse ngata tsa kajeno li tlositse lebitso la Molimo, li sothile seo taba e ngotsoeng lipuong tsa pele e se bolelang ka boemo ba bafu ’me li patile seo Bibele e se bolelang ka morero oa Molimo ka lefatše. Bakeng sa ho bontša motho hore na ho entsoe eng, ho ka ’na ha hlokahala hore u bapise litemana tsa sehlooho ho tsoa Libibeleng tse sa tšoaneng kapa liphetolelong tsa pejana tsa puo e tšoanang. Litabeng tse ngata, buka ea Ho Bea Mabaka ka Mangolo e bapisa kamoo liphetolelo tse sa tšoaneng li fetolelang lipolelo tsa sehlooho tse hlahang litemaneng tse sebelisoang hangata kateng. Mang le mang ea ratang ’nete o tla thahasella ho tseba linnete tseo.
Libokeng Tsa Phutheho. Bohle ba lokela ho khothalletsoa ho sebelisa Libibele tsa bona libokeng tsa phutheho. Sena se molemo ka litsela tse ngata. Se thusa ho boloka tlhokomelo ea bamameli ho seo ho buisanoang ka sona. Se thusa motho hore a khone ho iponela ka boeena thuto eo sebui se fanang ka eona. ’Me se hatisa likelellong tsa batho ba sa tsoa thahasella hore ka sebele litumelo tsa rōna li thehiloe Bibeleng.
Hore na bamameli ba hao ba hlile ba tsamaisana le uena ha u bala litemana tsa Mangolo Libibeleng tsa bona kapa che ho tla itšetleha haholo ka khothalletso eo u fanang ka eona. O mong oa mekhoa e molemohali ke ho ba kōpa ka ho toba ho tsamaisana le uena ha u bala.
Ho tsoa ho uena sebui hore na ke litemana life tseo u batlang ho li hatisa ka ho re bamameli ba li shebe. Ho molemo haholo hore u bale mangolo a tla u thusa ho hōlisa lintlha tsa hao tse khōlō. Joale, ha nako e lumela, u eketse a seng makae a tšehetsang taba ea hao.
Ho hlakile hore hangata ha hoa lekana ho bolela feela hore na temana e tsoa hokae kapa ho kōpa bamameli ho sheba lengolo le itseng. Haeba u bala temana e le ’ngoe ebe u fetela ho e ’ngoe le pele bamameli ba hao ba fumana ea pele, ba tla nyahama kapele ’me ba tla khaotsa ho leka ho tsamaisana le uena ha u bala Bibele. E-ba seli. Ha bongata bo se bo fumane temana, e bale.
Nahanela pele. Bolela lengolo la hao nako esale teng pele u le bala. Sena se tla fokotsa ho senyeha ha nako ho bakoang ke ho letela bamameli hore ba fumane temana. Le hoja ho lumella bamameli ho fumana mangolo ho tla etsa hore u akaretse boitsebiso bo fokolang, melemo ea ho etsa joalo e tla tšoanela boiteko boo.
KAMOO U KA HO ETSANG KATENG
Bontša mong’a ntlo temana ha u ntse u e bala Bibeleng, kapa u mo kōpe ho tsamaisana le uena Bibeleng ea hae.
Ha u bua phuthehong, kōpa bamameli ka ho toba hore ba phetle mangolo a sehlooho ’me u ba fe nako e lekaneng ea ho etsa sena.
BOITLHAKISO: Ha u etsa maeto a ho boela, leka ho etsa se latelang: (1) Neha mong’a ntlo Bibele ea hao ’me u mo botse hore na a ka lakatsa ho bala temana e itseng eo u seng u e phetlile. (2) Botsa mong’a ntlo hore na a ka lakatsa ho tla le Bibele ea hae ’me a bale lengolo la sehlooho.