Khaolong ea 11
Nka Apara Eng?
Heather o mothating oa ho tsoa ka tlung, ’me batsoali ba hae ha ba kholoe seo ba se bonang.
Ntate oa hae o re: “Ke ha u se u apere ha u le tjee?”
Heather o re ka ho makala: “E, bothata bo kae? Ke mpa ke ikela mabenkeleng le metsoalle.”
’Mè oa hae o re: “Eseng u apere joalo!”
Heather oa tletleba, o re: “Empa ’Mè, bana ba bang kaofela ba apara tjena. Ebile ha u apere tjena ke hona ha u apere!”
Ntate o araba a halefile, o re: “Ha re rate tsela eo u apereng ka eona! Khutlela ka kamoreng u e’o chencha ausinyana, ho seng joalo ha ho moo u eang teng!”
TABA ea ho loanela liphahlo ha e qale hona joale. E ka ’na eaba batsoali ba hao le bona ba ne ba loanela liphahlo le batsoali ba bona ha ba ne ba lekana le uena. Mohlomong ka nako eo ba ne ba ikutloa ka tsela eo u ikutloang ka eona kajeno! Empa hona joale ba se ba fetotse maoa, ’me le lula le qabana ka liaparo.
U re: Se ntula hantle.
Ba re: Sea makatsa.
U re: Se setle!
Ba re: Se hlaha.
U re: Se chipi.
Ba re: Se hlile se tšoanetse. . . . Karolo e ’ngoe ea sona ha e eo!
Na ho na le seo le ka se etsang hore le fihlele tharollo? E, se teng! Megan ea lilemo li 23 o tseba lekunutu la seo. O re: “Ha ho hlokahale hore le phehe khang. Le ka lumellana.” Ra lumellana? Na seo se bolela hore u lokela ho apara joaloka motho ea lilemo li 40? Che! Ho lumellana ho mpa ho bolela hore uena le batsoali ba hao le buisana ka liaparo tse ling tseo u ka li khethang, tseo uena hammoho le bona le li ratang. Ho etsa seo ho tla u tsoela molemo joang?
1. U tla shebahala hantle, esita le lithakeng tsa hao.
2. Batsoali ba hao ha ba na ho nyatsa seo u se aparang hakaalo.
3. Ha batsoali ba hlokomela kamoo u bontšang boikarabelo kateng tabeng ena, ba ka ’na ba u fa bolokolohi bo eketsehileng.
Ha re oele temeng. Nahana ka seaparo se itseng seo u se “batlang matleng,” seo u se boneng Inthaneteng kapa lebenkeleng. Ntho ea pele eo u lokelang ho e etsa ke . . .
Ho Nahana ka Melao-motheo ea Bibele
Bibele ha e bue hakaalo ka moaparo. Ha e le hantle, u ka qeta metsotso e seng mekae u bala likeletso tsohle tsa Mangolo tse buang ka taba ena ka ho toba! Empa ka metsotso eo, u tla fumana tataiso ea bohlokoa le e utloahalang. Ka mohlala:
● Bibele e eletsa basali hore ba ikhabise “ka boitlhompho le ho hlaphoheloa kelellong.”a—1 Timothea 2:9, 10.
Lentsoe “boitlhompho” le ka ’na la u tšoenya. U ka ’na ua ipotsa, ‘Na ke lokela ho apara liaparo tse sa boheheng?’ Le hanyenyane! Tabeng ena, boitlhompho bo bolela hore u apara ka tsela e nang le seriti le e bontšang hore u nahanela maikutlo a ba bang. (2 Bakorinthe 6:3) Ho na le liaparo tse ngata tse joalo. Danielle ea lilemo li 23 o re: “Ho ka ’na ha e-ba thata, empa u ntse u ka apara ka tsela ea feshene le hoja e se ka tsela e feteletseng.”
● Bibele e re ha ho tluoa tabeng ea ponahalo, u lokela ho ameha ka “motho ea ka sephiring oa pelo”—kapa “seo u hlileng u leng sona” ho latela Today’s English Version.—1 Petrose 3:4.
Moaparo o se nang boitlhompho o ka ’na oa u bitsetsa mahlo ka nakoana, empa botle bo ka hare ke bona bo tla etsa hore batho ba hōlileng le lithaka tsa hao ba lule ba u hlompha. Na lithaka tsa hao li ka hla tsa u hlompha? E—esita le tsona li ka ’na tsa bona booatla ba ho apara ka tsela e makatsang. Brittany ea lilemo li 16 o re: “Hoa khopisa ho bona kamoo basali ba lekang ho hohela banna kateng ka tsela eo ba aparang ka eona!” Kay o lumellana le eena. Ha a hlalosa motsoalle e mong oa hae oa mehleng, o re: “Ntho e ’ngoe le e ’ngoe eo a neng a e apara e ne e etsa hore batho ba mo shebe. O ne a batla hore bashanyana ba mo shebe, kahoo a apara liaparo tse mo bitsetsang mahlo.”
Kōpa Keletso ho Batsoali
Ho pata liaparo tse makatsang ka mokotleng ebe u li apara ha u fihla sekolong, hase tsela e ntle ea ho etsa lintho. Batsoali ba hao ba tla u tšepa le ho feta haeba u tšepahala, esita le linthong tseo u nahanang hore u ka ba patela tsona. Ha e le hantle, e ka ba bohlale hore u ba botse hore na ba nahana’ng ka liaparo tseo u batlang ho li apara. (Liproverbia 15:22)—Sheba boitsebiso bo tlas’a “Lintlha Tse ka U Thusang ka Liaparo” bo leqepheng la 82 le la 83.
Empa ke hobane’ng ha u lokela ho ba botsa? Na hase ’nete hore mosebetsi oa batsoali ke hore ba u hanele ho apara liaparo tsa feshene? Che. Ke ’nete hore batsoali ba hao ba ka ’na ba talima lintho ka tsela e fapaneng le eo u li talimang ka eona, empa ka linako tse ling ke sona seo u se hlokang. Nataleine ea lilemo li 17, o re: “Ke ananela keletso ea batsoali ba ka, hobane ha ke batle ho itlosa seriti ha ke tsamaea tseleng kapa hore batho ba mpue hampe, ka lebaka la tsela eo ke shebahalang ka eona.”
Ntle ho moo, ’nete ke hore: Hafeela u ntse u lula le batsoali ba hao, u tlas’a taolo ea bona. (Bakolose 3:20) Empa ha u utloisisa maikutlo a bona—’me le bona ba utloisisa a hao—u ka ’na ua makatsoa ke kamoo le lumellanang linthong tse ngata kateng. Ka lebaka leo, le ka ’na la khaotsa ho loanela liphahlo!
Keletso: Ha u itekanya seaparo se itseng, u se ke ua nahana ka seo u se bonang ka seiponeng feela. Seaparo se ka ’nang sa bonahala se u lekana hantle, se ka ’na sa e ba ka tsela e ’ngoe ha u lula fatše kapa u thonaka ntho e itseng. Haeba ho khoneha, botsa motsoali kapa motsoalle e mong ea hōlileng tsebong hore na o nahana’ng ka sona.
Na ua ikhalala? U ka etsa’ng haeba u sa ithate?
[Mongolo o botlaaseng ba leqephe]
a Le hoja keletso ena ea Bibele e tobisitsoe ho basali, melao-motheo e ho eona ea sebetsa le ho banna.
LENGOLO LA SEHLOOHO
“Le se ke la lumella mokhabo oa lōna hore e be oa . . . ho apara liaparo tsa ka ntle, empa e ke e be motho ea ka sephiring oa pelo.”—1 Petrose 3:3, 4.
KELETSO
Qoba ho apara liaparo tse u bitsetsang mahlo. Li etsa hore u bonahale eka u tsietsing e khōlō ea ho batla ho bonoa ebile u inahana bouena.
NA U NE U TSEBA . . . ?
Hangata ha batho ba qala ho u bona ba ba le maikutlo a itseng ka uena ho latela seo u se apereng.
SEO KE RERANG HO SE ETSA!
Setho sa lelapa kapa motsoalle ea hōlileng tsebong eo ke tla buisana le eena ha ke batla ho reka seaparo se itseng ke ․․․․․
Nakong e tlang ha ke reka liaparo, ke tla nahana ka lintlha tse latelang: ․․․․․
Lintlha tseo ke tla rata ho li botsa motsoali kapa batsoali ba ka tabeng ena ke ․․․․․
U NAHANA’NG KA SEE?
● Ke hobane’ng ha batsoali le bacha ba atisa ho qabanela moaparo?
● U ka ithuta eng ha u buisana le batsoali ba hao ka litaba tse amanang le moaparo?
[Ntlha e Qolotsoeng e leqepheng la 81]
“Ha ke bona banana ba apereng ka tsela e makatsang, seo se etsa hore ke se ke ka hlola ke ba hlompha hakaalo. Ka lehlakoreng le leng, ha ke bona batho ba apere hantle ka tsela e nang le seriti, ke ee ke re ka pelong, ‘Ke kamoo ke batlang hore batho ba mpone ke le kateng.’”—Nataleine
[Lebokose/Litšoantšo tse maqepheng a 82, 83]
Lintlha Tseo U Li Ngotseng
Lintlha Tse ka U Thusang Ka Liaparo
Litaelo: Kopitsa maqephe ana. Kōpa batsoali ba hao hore ba tlatse leqephe le ka lehlakoreng le letona ’me uena u tlatse le ka lehlakoreng le letšehali. Ha u qeta, u fe batsoali ba hao likarabo tsa hao ’me uena u nke tsa bona, ebe le buisana ka seo le se ngotseng. Na ho na le lintho tse le makatsang? Le ithutile eng eo le neng le sa e tsebe ka e mong mabapi le tsela eo le talimang lintho ka eona?
Karolo ea Hao Nahana ka seaparo se itseng seo u batlang ho se apara kapa ho se reka.
Ke hobane’ng ha u rata seaparo seo ka ho khetheha? Thathamisa mabaka a fanoeng ka tlaase mona, ka ho latellana.
․․․․․ Leibole
․․․․․ Se khahla ba bong bo fapaneng
․․․․․ Bacha ba bang baa se rata
․․․․․ Se ntula hantle
․․․․․ Theko ea sona
․․․․․ Lebaka le leng ․․․․․
Ha batsoali ba ka ba bona seaparo seo, ba ka ’na ba re
□ “U se ke ua se reka!”
□ “U ka ’na ua se reka.”
□ “Ho lokile, u ka se reka.”
Haeba ba hana ha ke se reka, e ka ’na eaba ke hobane ba re
□ “Se hlaha.”
□ “Sea makatsa.”
□ “Se fesheneng haholo.”
□ “Se re tlosa seriti, re le batsoali.”
□ “Se turu haholo.”
□ Lebaka le leng ․․․․․
Na re ka Sebelisana Hammoho Ntlheng ee?
Tsela eo batsoali ba ka ba talimang lintho ka eona e ka nthusa joang?
․․․․․
Nka etsa’ng hore seaparo see se amohelehe, haeba ho khoneha?
․․․․․
Karolo ea Batsoali Nahanang ka seaparo se itseng seo ngoana oa lōna a batlang ho se apara kapa ho se reka.
Le nahana hore ke hobane’ng ha a rata seaparo seo? Thathamisang mabaka a fanoeng ka tlaase mona, ho latela tsela eo le nahanang hore o talima lintho ka eona.
․․․․․ Leibole
․․․․․ Se khahla ba bong bo fapaneng
․․․․․ Bacha ba bang baa se rata
․․․․․ Se mo lula hantle
․․․․․ Theko ea sona
․․․․․ Lebaka le leng ․․․․․
Ha re qala ho se bona, re ile ra re
□ “U se ke ua se reka!”
□ “U ka ’na ua se reka.”
□ “Ho lokile, u ka se reka.”
Re hanne hobane
□ “Se hlaha.”
□ “Sea makatsa.”
□ “Se fesheneng haholo.”
□ “Se re tlosa seriti, re le batsoali.”
□ “Se turu haholo.”
□ Lebaka le leng ․․․․․
Na re ka Sebelisana Hammoho Ntlheng ee?
Na re hana seaparo see hobane feela rōna re sa se rate?
□ E □ Mohlomong □ Che
Re ka re’ng haeba ho e-na le tsela ea ho etsa hore se amohelehe?
․․․․․
Qeto ․․․․․
[Lebokose le leqepheng la 84]
Ho Thoe’ng ka Bashanyana?
Melao-motheo ea Bibele e tšohliloeng sehloohong sena ea sebetsa le ho bashanyana. Aparang ka tsela e hlomphehang. Etsang hore motho ea ka sephiring—e leng seo le hlileng le leng sona—a bonahale ka ho hlaka. Ha u nahana ka seaparo se itseng, ipotse: ‘Se tla fana ka maikutlo afe ka ’na? Na se bontša seo ke hlileng ke leng sona?’ Hopola hore liaparo ke mokhoa o mong oa boitsebahatso. Tiisa hore liaparo tsa hao li bonahatsa seo u se lumelang!
[Setšoantšo se leqepheng la 80]
Tsela eo u aparang ka eona e bontša batho ba bang hore na u motho oa mofuta ofe. Liaparo tsa hao li fana ka molaetsa ofe ka uena?