February

Kaha e ne e le lekhetlo la pele Noe a haha areka, o ne a lokela ho itšetleha ka Jehova. Bibele e re o ile “a fela a etsa joalo,” a etsa feela joalokaha Jehova a mo laetse. Ho ile ha etsahala’ng? Areka e ile ea pholosa bophelo ba hae le ba lelapa la hae. Hobane’ng? Hobane o ne a tšepile bohlale ba Molimo. Noe o ile a ruta bana ba hae tsela e nepahetseng ’me a ba behela mohlala o motle. Ho ne ho le thata ho etsa joalo kaha batho ba mehleng ea pele ho moroallo ba ne ba le khopo. (Gen. 6:5) Haeba u motsoali, u ka etsisa Noe joang? Ka hore u mamele Jehova. Mo lumelle hore a holise bana ba hao. Mamela keletso e tsoang Lentsoeng la hae le mokhatlong oa hae. Ka linako tse ling leha batsoali ba sebetsa ka thata ho ruta ngoana, a ka ’na a furalla Jehova. Empa motsoali ea sebetsang ka thata ho ruta ngoan’a hae, o lokela ho ba le letsoalo le hloekileng ’me a be le tšepo ea hore ka letsatsi le leng ngoana o tla khutlela ho Jehova. w18.03 30 ¶10-11

Na u kile oa lakatsa ho amohela baeti empa oa nahana hore u ke ke oa atleha? Batho ba lihlong ba ka ’na ba nahana hore baeti ba bona ba tla jeoa ke bolutu. Ba bang ba nahana hore kaha ha ba na chelete e ngata, ba ke ke ba hlokomela baeti ka tsela eo Bakreste-’moho le bona ba ba hlokomelang ka eona. Empa taba ea bohlokoa ha se hore na ntlo ke ea boleng bo phahameng hakae. Ntho ea bohlokoa ke hore e be e hloekileng eo motho a ka thabelang ho lula ka ho eona. U lokela ho amohela baeti hobane u rata batho. Hape, ha oa lokela ho tšaba ho ba amohela. Kamehla ho bohlokoa ho bontša hore u rata baeti. (Bafil. 2:4) Ba bangata ba thabela ho bua ka lintho tse kileng tsa ba etsahalla. Nako e ntle ea ho li utloa ke ha batho ba kopane ’moho. Moholo e mong o re: “Ha ke mema batho, ke ba utloisisa hamolemo, ke ba tseba haholoanyane ke be ke tsebe hore na ho tlile joang hore e be Lipaki.” Ha u bontša hore u thahasella baeti, kaofela le tla thabela ho ba ’moho. w18.03 17 ¶15-17

Batsoali ba Bakreste ba ntse ba rata ho thusa bana ba bona hore ba etse liqeto tse nepahetseng. Ho liehisa bana ho kolobetsoa kapa ho ba khothalletsa hore ba kolobetsoe ka mor’a nako e telele ho ka ’na ha thefula kamano eo bana ba nang le eona le Jehova. (Jak. 4:17) Batsoali ba etsa bonnete ba hore pele bana ba bona ba kolobetsoa, ba ka khona ho jara boikarabelo ba ho ba Bakreste. Balebeli ba bang ba potoloho ba ile ba tšoenyeha haholo ka mor’a ho kopana le bacha ba ka bang lilemo li 20 ba holisitsoeng ke batsoali ba Bakreste empa ba e-s’o kolobetsoe. Hangata bacha bana ba ba teng libokeng le tšimong ’me ba nahana hore e se e le Lipaki tsa Jehova le hoja ba sa inehela ho Jehova ka hore ba kolobetsoe. Maemong a mang batsoali ke bona ba khothalletsang bana hore ba se ke ba potlakela ho kolobetsoa. w18.03 8 ¶1-2

E le hore re tšoane le Kreste, re lokela ho tseba hantle hore na o nahana joang le hore na makhabane a hae ke afe. Ebe rea mo etsisa. Kamano ea hae le Molimo e ne e le eona ntho ea bohlokoa bophelong. Joale ha re etsisa Jesu, re tla etsa lintho joaloka Jehova. Kahoo, ho bohlokoa hore re nahane le ho etsa lintho joaloka Jesu. Re ka nahana joaloka Jesu joang? Barutuoa ba Jesu ba ile ba bona ha a etsa mehlolo, ba mo mamela ha a ruta batho ba bangata, ba bona ha a folisa ba kulang eaba ba hlokomela hore o tataisoa ke monahano oa Jehova. (Lik. 10:39) Mehleng ena ha re phele le Jesu. Empa Jehova o re file tlaleho ea bophelo ba Jesu ka Bibeleng. Tlaleho ena e re thusa ho mo tseba haholoanyane. Ha re bala le ho nahanisisa ka Mangolo a kang Matheu, Mareka, Luka le Johanne re ithuta haholoanyane kamoo Jesu a nahanang kateng. Kahoo, re ka ‘latela mehato ea hae haufi-ufi’ hape re “itlhomelle ka boikutlo bo tšoanang ba kelello” joaloka Kreste.—1 Pet. 2:21; 4:1. w18.02 22 ¶15-16

Ho tloha ha Adama le Eva ba e-ba le bana, batho ba ile ba ithuta ka Molimo ka mekhoa e meraro: ka popo, ho bahlanka ba hae ba tšepahalang le ho bona kamoo a ileng a ba hlohonolofatsa kateng ha ba mo mamela. (Esa. 48:18) Ha Noe a ithuta ka popo, o ile a kholiseha hore Molimo o teng ’me ho ka etsahala hore ebe o ile a boela a ithuta ka makhabane a hae a kang “matla le Bomolimo ba hae ba ka ho sa feleng.” Kahoo, o ne a utloisisa hore Jehova o matla le hore ke eena feela Molimo oa ’nete. (Bar. 1:20) Noe o ne a sa lumele ho Molimo feela, ho e-na le hoo, o ne a e-na le tumelo e matla ho eena. E tlameha ebe Noe o ile a utloela ka Jehova ho beng ka eena. Ntate oa hae Lameke o ne a e-na le tumelo ho Molimo ’me o phetse mehleng ea Adama. Ho ne ho boetse ho e-na le Methusela ntate-moholo oa hae le Jarede e leng ntate-moholo oa Methusela. Methusela o ile a hlokahala lilemo tse 366 ka mor’a hore Noe a be teng. (Luka 3:36, 37) Kaha Noe o ne a rata lintho tseo a ithutang tsona, o ile a susumelletseha hore a rate Jehova.—Gen. 6:9. w18.02 9 ¶4-5

Re ka nyahama haeba Mokreste-’moho le rona kapa mong ka rona a re utloisa bohloko. Haeba ntho eo ba re entseng eona e sa lebalehe, na re tla lula re ba jere ka pelo? Kapa na re tla mamela keletso ea Bibele ea hore re lokise litaba kapele? Haeba re nka nako e telele re sa lokise liqabang, ho tla ba thata le ho feta hore re bope khotso le Bakreste-’moho le rona. U ka etsa’ng hore u bope khotso? Ntlha ea pele, rapela Jehova ho tloha pelong. Mo kope hore a u thuse hore u khone ho bua hantle le Mokreste-’moho le uena. Hopola hore le eena ke motsoalle oa Jehova. (Pes. 25:14) Kaha Jehova o tšoara metsoalle ea hae ka mosa, o batla hore le rona re tšoare batho joaloka eena. (Liprov. 15:23; Mat. 7:12; Bakol. 4:6) Ea bobeli, nahana hore na u tla re’ng ha u bua le Mokreste-’moho le uena. U se ke oa nka hore Mokreste-’moho le uena o ne a ikemiselitse ho u utloisa bohloko. Hape, u lokela ho nahana hore ho ka etsahala hore ebe le uena u kentse letsoho hore qabang e be teng. w18.01 10 ¶15-16

Ho tloha khale bahlanka ba Jehova ba fapane le batho ba bang hobane bona ba rata batho e le kannete. Ha e le hantle, Jesu o ile a re molaong oa Moshe, molao oa bohlokoa ka ho fetisisa ke lerato, e leng la hore motho a rate Jehova ’me oona o lateloa ke oa ho rata batho ba bang. (Mat. 22:38, 39) Jesu o ile a boela a re Bakreste ba ’nete ba tla tsebahala ka ho ratana. (Joh. 13:35) Bakreste ba ’nete ba lokela ho rata esita le lira tsa bona. (Mat. 5:43, 44) Kaha Jesu o ne a rata batho, o ne a tloha motseng o mong a e-ea ho o mong e le hore a ba rute ka ’Muso oa Molimo. O ne a bile a folisa ba foufetseng, ba kooafetseng, balepera le ba sa utloeng litsebeng. O ne a boetse a tsosa bafu. (Luka 7:22) Jesu o ile a ba a tela bophelo ba hae molemong oa batho. Tsela eo a neng a rata batho ka eona ke tsela eo Jehova a ratang batho ka eona. Lipaki Tsa Jehova lefatšeng lohle li etsisa Jesu ka hore li rate batho ba bang. w18.01 29-30 ¶11-12

E ka ’na eaba u kolobelitsoe u le monyenyane, leha ho le joalo ha u tsebe hore na u tla kopana le mathata afe kamoso. Kahoo ele hore u lule u tšepahalla Jehova ho sa tsotellehe mathata ao u ka bang le ’ona lula u hopola seo u se tšepisitseng Jehova. U ile oa re u tla mo sebeletsa bophelo bohle ba hao, esita leha metsoalle kapa batsoali ba hao ba ka khaotsa ho mo sebeletsa. (Pes. 27:10) Ha u le mathateng, Jehova a ka u fa matla a hore u lule u phela tumellanong le kano eo u e entseng. (Bafil. 4:11,12). Jehova o batla hore u be motsoalle oa hae. Empa u lokela ho sebetsa ka thata hore u lule u e-na le kamano e ntle le eena. Bafilipi 2:12 e re: “Le ’ne le sebeletse poloko ea lōna ka tšabo le thothomelo.” Kahoo u lokela ho sebetsa ka thata e le hore u lule u tšepahalla Jehova mathateng ’ohle. U se ke oa itšepa ho tlola hobane esita le bahlanka ba Molimo ba qetileng lilemo ba mo sebeletsa ba ile ba hloleha ho mo tšepahalla. w17.12 24 ¶4, 6-7

Jehova o re fa monyetla oa hore re tšehetse mosebetsi oa boboleli. O re tšepisa hore ha re etsa joalo o tla re hlohonolofatsa. (Mal. 3:10) Jehova o re ea fanang ka seatla se bulehileng, lintho li tla mo tsamaela hantle. (Liprov. 11:24, 25) Ha re fana re tla thaba hobane Bibele e re “ho fana ho tlisa thabo e khōlō ho feta ho amohela.” (Lik. 20:35) Ka lipuo le liketso tsa rona, re ka ruta bana le bahoeletsi ba bacha ho fana ka menehelo ’me ba bone ha Jehova a ba hlohonolofatsa. Ntho e ’ngoe le e ’ngoe eo re nang le eona e tsoa ho Jehova. Ha re mo fa lintho tseo re nang le tsona, re bontša hore rea mo rata ebile re ananela lintho tseo a re etselitseng tsona. Ha ho ne ho hahuoa tempele mehleng ea Morena Davida, ‘batho ba ile ba thaba ka lebaka la ho etsa linyehelo tsa boithaopo.’ (1 Likron. 29:9) E se eka le rona re ka fa Jehova lintho tseo re nang le tsona kaha li tsoa ho eena. Ha re etsa joalo, re tla thaba. w18.01 21 ¶18-19

Motho oa pele o ne a tla tsosoa nakoana ka mor’a “ho ba teng” ha Kreste. Batlotsuoa ba tla be ba ntse ba phela nakong ea matšoenyeho a maholo ba tla “nkeloa marung.” (1 Bathes. 4:13-17; Mat. 24:31) Ba “tla fetoloa, ka motsotsoana, ka ho panya ha leihlo, nakong ea terompeta ea ho qetela.” (1 Bakor. 15:51, 52) Boholo ba Bakreste ba mehleng ena ha se batlotsuoa ’me ha baa bitsetsoa ho ea busa le Kreste leholimong. Ho e-na le hoo, ba letetse “letsatsi la Jehova,” e leng nako eo Molimo a tla felisa lefatše lena. Le hoja ho se motho ea tsebang letsatsi leo, ho na le bopaki bo bontšang hore le haufi. (1 Bathes. 5:1-3) Ka mor’a moo, ho tla tsosoa batho ba tla phela paradeiseng lefatšeng. Qetellong e tla ba batho ba phethahetseng ba ke keng ba hlola ba e-shoa. w17.12 11 ¶15; 12 ¶18-19

Ho ke ke ha e-ba bonolo hore re be mona haeba re le lerato re bile re le mosa. Bibele e re: “Lerato lea tiisetsa ’me le mosa. Lerato ha le boulele.” (1 Bakor. 13:4) Re lokela ho ba le maikutlo a tšoanang le ao Jehova a nang le ’ona ka Bakreste-’moho le rona. Re ba nke e le litho tsa bohlokoa tsa phutheho. Ho etsa joalo ho tla re thusa hore re ba rate ’me re mamele keletso ena e reng: “Haeba setho se seng se tlotlisoa, litho tse ling tsohle li thaba le sona.” (1 Bakor. 12:16-18, 26) Kahoo, re tla thaba le Bakreste-’moho le rona ha ho e-na le lintho tse ntle tseo ba li fumaneng, ho e-na le ho ba mona. Nahana ka mohlala oa Jonathane, mora oa Morena Saule. Ho e-na le hore a monele Davida ha a khethoa hore e be morena ea tla hlahlama Saule, o ile a mo khothatsa. (1 Sam. 23:16-18) Le rona re ka ba mosa le ho ba lerato joaloka Jonathane. w17.11 27 ¶10-11

Jehova o batla hore re utloisise Molao oa hae ’me re mamele melao-motheo. (Mat. 23:23) Molao oa Moshe o na le “moralo oa tsebo le oa ’nete.” Kahoo, o re ruta ka Jehova le melao-motheo ea hae. (Bar. 2:20) Mohlala, metse ea setšabelo e ruta baholo kamoo ba lokelang ho ‘etsa kahlolo ea bona ka toka ea ’nete’ kateng. Empa kaofela ha rona e re ruta hore re “etsetsane mosa o lerato le mehauhelo.” (Zak. 7:9) Le hoja re se re se tlas’a Molao oa Moshe, Jehova eena ha aa fetoha. Toka le mohau e ntse e le lintho tsa bohlokoa ho eena. Re lokela ho nka e le tlotla ho sebeletsa Molimo ea joalo. Kahoo, a re mo etsiseng ka hore re sebetse litaba ka toka, re hauhele batho ba bang ’me re mo etse setšabelo sa rona. w17.11 13-14 ¶2-3; 17 ¶18-19

Ha barab’abo rona ba fana ka lipuo, ba lokela ho etsa bonnete ba hore Mangolo ke mokokotlo oa lipuo tsa bona. (Joh. 7:16) Taba ee e akarelletsa’ng? E akarelletsa ho ba hlokolosi hore tsela eo u fanang lipuo ka eona, mehlala le lipapiso ha li hape tlhokomelo ea bamameli ba hao ho feta hore na Bibele e re’ng. Hape u lokela ho hopola hore ho balla bamameli litemana tse itseng feela, ha ho bolele hore ehlile u ruta ho tsoa Bibeleng. Ha e le hantle, ha u bala Mangolo a mangata haholo, bamameli ba ke ke ba a hopola. Kahoo khetha Mangolo ka hloko ebe u nka nako ho a bala, ho a hlalosa, ho etsa lipapiso ’me u a sebelise hantle. (Neh. 8:8) Leka ho utloisisa hore na Mangolo a hlahang kemisong a lumellana joang le puo ea hao. Ka holimo ho tsohle kopa Jehova a u thuse hore u fetise mohopolo oa hae o tsoang ka Bibeleng.​—Esdr. 7:10. w17.09 26 ¶11-12

Selemo sa 537 mehleng ea Zakaria e ile ea e-ba selemo se monate haholo ho batho ba Jehova. Ba ile ba ba botlamuoeng ka lilemo tse 70 Babylona, empa joale ba ne ba lokolotsoe. Ba ne ba thabile kaha joale ba ne tl’o khutlela Jerusalema ’me ba tsosolose tempele e le hore ba sebeletse Jehova. Ba ile ba qala ho tsosolosa tempele selemong se latelang. Lilemo tse 16 hamorao tempele ea Jehova e ne e ntse e-s’o qetoe. Baiseraele ba ne ba lokela ho hopotsoa hore ba lokela ho khutlela ho Molimo ’me ba tlohele ho inahana bo bona. Selemong sa 520 mehleng ea Zakaria, Jehova o ile a romela moprofeta oa hae Zakaria hore a thuse Baiseraele ho hopola hore na ke hobane’ng ha a ne a ba lopolotse Babylona. Lebitso la Zakaria le bolelang “Jehova O Hopotse,” le ne le tl’o hopotsa Baiseraele hore le hoja ba ne ba lebetse seo Jehova a ba etselitseng sona, Jehova eena o ne a ntse a ba hopola. (Zakaria 1:3, 4.) Jehova o ne a ba tšepisitse ho ba thusa ho tsosolosa tempele ea hae. Empa o ile a boela a ba lemosa hore o ne a ke ke a amohela borapeli ba bona haeba feela ba ne ba sa mo rapele ka lipelo tsa bona tsohle. w17.10 21-22 ¶2-3

Litsebi tsa kelello li re ha u utloela batho ba bang bohloko u tla ba le bophelo bo botle ’me u be le likamano tse ntle le batho. Ha u thusa batho u tla rua molemo kaha u tla thaba, u be le maikutlo a nepahetseng hape u tla lula u e-na le metsoalle. Ha u leka ho thusa batho, u tla ba le letsoalo le khutsitseng hobane oa tseba hore u etsa lintho tse lumellanang le melao ea Jehova. Haeba u etsa joalo, u tla ba motsoali, molekane kapa motsoalle ea molemo. Hape, ha u potlakela ho thusa batho ba bang, le bona ba tla potlakela ho u thusa ha u e-na le mathata. (Mat. 5:7; Luka 6:38) Ha oa lokela ho utloela batho ba bang bohloko hobane feela u tseba hore le uena u tla rua molemo. Lebaka le ka sehloohong e lokela ho ba hore u batla ho etsisa Jehova ebile u batla ho mo thabisa.​—Liprov. 14:31. w17.09 12 ¶16-17

Jesu ke Morena le Moprista ’me o fuoe mosebetsi oa ho “haha tempele ea Jehova.” Ka 1919, o ile a haha tempele ka hore a lokolle batho ba Molimo tlas’a Babylona e Moholo. Ka ho etsa joalo, o ne a tsosolosa phutheho ea Bokreste. Jesu o ile a ba a khetha bao e tla ba “lekhoba le tšepahalang le le masene.” Sehlopha sena sa Bakreste ba tlotsitsoeng se tsamaisa mosebetsi o etsoang mabaleng a lefatšeng a tempele e kholo ea moea. (Mat. 24:45) Hape Jesu o hloekisa batho ba Molimo e le ho ba thusa hore ba sebeletse Jehova ka tsela e hloekileng. (Mal. 3:1-3) Kreste o tla busa le ba 144 000 e le marena le baprista ka lilemo tse sekete. Nakong eo ea lilemo tse sekete, ba tla be ba thusa batho ba tšepahalang hore ba phethahale. Ha ba se ba phethile mosebetsi oo, ke barapeli ba ’nete feela ba tla sala lefatšeng. Kahoo, borapeli ba ’nete bo tla be bo tsosolositsoe ka ho feletseng. w17.10 29 ¶15-16

E le hore ’molai a tšoareloe, o ne a lokela ho balehela ho o mong oa metse e haufi ea setšabelo. (Josh. 20:4.) E le hore a se ke a bolaoa, ’molai o ne a lokela ho lula moo ho fihlela moprista e moholo a e-shoa. Ho lula moo e ne e le sehlabelo seo a lokelang ho se etsa ho pholosa bophelo ba hae. O ne a lokela ho tlohela mosebetsi oa hae le ntlo ea hae. A bile a se na bolokolohi ba ho ea hohle moo a batlang. Ho ne ho le bohlokoa hore ’molai a etse joalo bakeng sa bophelo ba hae. Le mehleng ena Mokreste ea baketseng sebe sa hae o lokela ho bontša ka liketso hore o bakile e le hore Jehova a mo tšoarele. O lokela ho tlohela sebe seo a neng a se etsa ’me ho akarelletsa ho qoba eng kapa eng e ka amang kamano ea hae le Jehova. Haeba re etsa sohle se matleng a rona ho tlohela lintho tseo Jehova a sa li rateng re tla be re bontša hore re soabile ebile re ananela mohau oa hae.—2 Bakor. 7:10, 11. w17.11 10-11 ¶10-11

Jehova o re laela hore re tšoare bara le barali babo rona ka mosa ’me re amohele le baeti. (1 Joh. 3:17) Leha ho le joalo, re lokela ho ba amohela ka sepheo se setle re sa ikaketse. Re ka ipotsa: ‘Na ke mema batho bao ke ba tloaetseng feela le bao ke nkang e le ba bohlokoa ka phuthehong? Kapa na ke itloaetsa ho mema bara le barali babo rona ba se nang letho le bao ke sa ba tloaelang?’ (Luka 14:12-14) Mohlomong Mokreste-’moho le uena o hloka thuso ea hao ka lebaka la qeto e booatla eo a entseng kapa ha aa ka a bontša teboho ha u ne u mo memme lijong. Maemong a joalo re lokela ho latela keletso e hlahang temaneng ea kajeno ea letsatsi. Re tla thaba haeba re latela keletso eo.—Lik. 20:35. w17.10 9 ¶12

Mosali oa Potifaro o ile a khahloa ke Josefa eo e neng e le tjaka ea mohlankana, eaba oa mo eka hore a robale le eena. Josefa ha aa ka a inehela le hoja mosali eo a ne a lula a mo phehella. Empa ea re ha a bona boemo bo sa ee moriting, a khetha ho mo baleha. Mohlala oa Josefa o re ruta’ng? O re ruta hore re lokela ho qoba eng kapa eng e ka etsang hore re tlole molao oa Jehova. (Liprov. 1:10) Nakong e fetileng ba bang bao hona joale e seng e le Lipaki, ba ile ba sebetsana le bothata ba ho ba pelo e khutšoanyane, ho noa haholo, ho tsuba, ho sebelisa lithethefatsi, thobalano kantle ho lenyalo le mathata a mang. Le ka mor’a hore ba kolobetsoe, ka linako tse ling ba ka ’na ba e-ba le takatso ea ho khutlela linthong tseo. Leha ho le joalo, haeba u iphumana u le boemong ba ho batla ho tlola e meng ea melao ea Jehova, nahanisisa ka litla-morao tsa ho hloleha ho itšoara. U ka leka ho sheba esale pele maemo ao ho ’ona u ka ’nang oa oela kotsing ’me u a qobe. (Pes. 26:4, 5; Liprov. 22:3) Kopa Jehova hore a u fe bohlale e le hore u itšoare ha u kopana le bothata bo behang botšepehi ba hao kotsing. w17.09 4-5 ¶8-9

Tsela e ’ngoe ea ho ba metsoalle le Jehova ke ka ho qeta nako ea rona re sebeletsa Jehova ho e-na le ho qeta nako e ngata re sehlela ho ba le maruo. Abrahama o ile a mamela taelo ea Jehova ea hore a tlohe motseng oa Ure moo ho neng ho hafshoa ka nkatana hore a e’o phela litenteng hobane o ne a e-na le tumelo ’me a batla ho lula e le motsoalle oa Jehova. (Baheb. 11:8-10) Kamehla o ne a tšepile hore Jehova o tla mo hlohonolofatsa ho e-na le hore a ipatlele maruo. (Gen. 14:22, 23) Jesu o ile a re khothalletsa hore re be le tumelo e joalo. O ile a re ho mohlankana e mong: “Haeba u batla ho phethahala, e-ea u rekise lintho tsa hao u fe mafutsana ’me u tla ba le letlotlo leholimong, u tle ’me u be molateli oa ka.” (Mat. 19:21) Le hoja mohlankana eo a ile a hloleha ho ba le tumelo e tšoanang le ea Abrahama, ba bangata ba bontšitse hore ba tšepa Molimo joaloka Abrahama. w17.07 10 ¶12

Ka mor’a lilemo tse 430 ha Abrahama a qeta ho tšela Eufrate e ile ea e-ba hona litloholo tsa hae e bang sechaba se tla rua naha eo. (Ex. 12:40-42; Bagal. 3:17) Abrahama o ne a ikemiselitse ho leta hobane o ne a e-na le tumelo ho Jehova. (Baheberu 11:8-12) Le hoja a sa bona ha tšepiso eo e phethahala, o ile a leta a thabile. Empa nahana hore na o tla ikutloa joang ha a tsosoa ’me a fumana lefatše e le paradeise. O tla makala ha a bala Bibele ’me a fumana hore e bua ka eena le ka lintho tse ileng tsa mo etsahalla le ba lelapa la hae. Nahana feela hore na o tla thaba hakaakang ha a bona kamoo a bapetseng karolo ea bohlokoa kateng hore morero oa Jehova o phethahale. O tla bona hore ha aa ka a emela ntat’a selala. w17.08 5-6 ¶10-11

Ho ea ka Bibele, motho ea sa hloekang ha se ea etsang bohlola feela. Le motho ea tsubang kapa ea soasoang ka lintho tse litšila ha a hloeka. (2 Bakor. 7:1; Baef. 5:3) Hape, motho ea etsang lintho tse kang ho bala libuka tse buang ka thobalano, ho shebella litšoantšo tse litšila kapa ho ipholla litho tsa botona kapa tsa botšehali le eena ha a hloeka. (Bakol. 3:5) Batho ba shebellang litšoantšo tse litšila ba ipitsetsa “takatso ea botona kapa ea botšehali” ’me qetellong ba lemalla ho etsa thobalano. Ho latela lipatlisiso tse entsoeng, batho ba qetella ba lemaletse ho shebella litšoantšo tse litšila joaloka batho ba lemaletseng lithethefatsi haeba ba itloaetsa ho li shebella. Ke kahoo batho ba lemaletseng ho shebella litšoantšo tse litšila le bona ba hlaheloang ke lintho tse bohloko. Ka mohlala, ba lula ba ikutloa ba soabile, ha ba sebetse hantle mosebetsing, malapa a bona ha a thaba ebile ba bang ba hlalane, athe ba bang bona ba bile ba ipolaile. w17.08 19 ¶8-9

Ha mopesaleme a nahana kamoo Jehova a ileng a tsosolosa Jerusalema kateng, o ile a binela Jehova mantsoe a temana ea letsatsi ea kajeno. Mopesaleme o ne a khobile matšoafo hobane a kholisehile hore Jehova o tla koala liheke ka thata e le hore barapeli ba hae ba sireletsehe. U ka ’na oa hlaheloa ke mathata a etsang hore u lule u tšoenyehile. Empa Jehova a ka u fa bohlale hore u mamelle. Mopesaleme o ile a re Molimo oa hae “o romela polelo ea hae lefatšeng. Lentsoe la hae le matha ka lebelo.” A re Jehova ‘o fana ka lehloa, o hasanya serame ’me o lahla leqhoa.’ Ka mor’a moo mopesaleme o ile a re: “Ke mang ea ka emang ka pel’a serame sa hae?” A boela a re Jehova “o romela lentsoe la hae ’me oa li qhibilihisa.” (Pes. 147:15-18) Molimo oa rona ea bohlale, ea matla ’ohle, ea laolang sefako le lehloa, a ka u thusa hore u hlole bothata bofe kapa bofe boo u ka bang le bona. w17.07 20 ¶14-15

Jehova ke eena feela ea lokelang ho busa batho. Re lokela ho tšehetsa bobusi ba hae ka lipelo tsohle hobane o bopile lintho tsohle. Kahoo, ke eena ea lokelang ho busa batho hammoho le mangeloi. Ha ho letho leo Satane a le bopileng. Kahoo, ha a na tokelo ea ho busa eng kapa eng. Eena hammoho le Adama le Eva, ba ile ba ikhohomosa eaba ba hana ho tšehetsa bobusi ba Jehova. (Jer. 10:23) Ke ’nete hore ba ne ba fuoe bolokolohi ba ho iketsetsa liqeto, kahoo ba ne ba ka khetha ho ipusa. Empa na ba ne ba lokela ho ipusa? Che. Le hoja batho ba ka iketsetsa liqeto, seo ha se bolele hore ba na le tokelo ea ho hana ho busoa ke Molimo ea ba bopileng. Kahoo, re tla be re sebelisa bolokolohi ba rona hampe haeba re hana ho busoa ke Jehova. Re lokela ho busoa ke eena kaha re hloka tataiso ea hae. w17.06 27-28 ¶2-4

Haeba re rata mosebetsi oa boboleli, re tla tsoela pele re bolela litaba tse molemo esita leha re hlorisoa, feela joalokaha moapostola Pauluse a ile a etsa. (Lik 14:19-22) Lilemong tsa bo-1930 le 1940, Bakreste-’moho le rona ba Amerika ba ile ba hlorisoa ka sehloho. Leha ho le joalo, ba ile ba ’na ba bolela litaba tse molemo. ’Muso o ne o leka ho ba thiba o bile o ba isa makhotleng, empa barab’abo rona ba ile ba hlola linyeoe tse ngata. Ka 1943 mor’abo rona Nathan H. Knorr o ile a bua ka e ’ngoe ea linyeoe tseo re ileng ra li hlola Lekhotleng le Phahameng ka ho fetisisa la United States. O ile a re: “Ntho e entseng hore re hlole linyeoe tsohle tseo re fetileng ho tsona ke hore ebe Bakreste-’moho le rona ba ile ba ema ba tiile.” Kahoo, haeba re rata mosebetsi oa boboleli, mahloriso a ke ke a re nyahamisa. Hape, haeba re hlile re rata mosebetsi oa boboleli, re ke ke ra ea tšimong hore feela re be le lihora tse ngata. Empa re tla etsa sohle se matleng a rona “ho pakela ka ho phethahetseng litaba tse molemo.”​—2 Tim. 4:5. w17.06 11-12 ¶11-12

Haeba re hlile re rata Jehova, re tla mamela melao ea hae, re mamelle eng kapa eng ’me re hloee se sebe. (Pesaleme ea 97:10.) Leha ho le joalo, Satane le batho ba hae ba leka ka matla ho re sitisa ho rata Molimo. Batho ba mehleng ena ke “baithati” ’me ha ba rate Jehova e leng eena ’Mopi oa bona. (2 Tim. 3:2) Satane o entse hore “takatso ea nama le takatso ea mahlo le pontšo ea mponeng ea mokhoa oa motho oa boipheliso” li ate lefatšeng. (1 Joh. 2:16) Moapostola Pauluse o ile a eletsa Bakreste a re: “Ho beha kelello nameng ho bolela lefu, . . . hobane ho beha kelello nameng ho bolela bora ho Molimo.” (Bar. 8:6, 7) Ha e le hantle, batho ba qetang nako e ngata ba batla maruo kapa ba phelela boitšoaro bo bobe ba qetella ba sa thaba ba bile ba soetsehile.—1 Bakor. 6:18; 1 Tim. 6:9, 10. w17.05 18 ¶5-6

Ha barab’abo rona ba baphaphathehi ba bontša kananelo ebile ba sa batle se fetang seo ba se fuoang, ba tla nolofalletsa batho ba ba thusang hore ba ba thuse ba thabile. Ha baa lokela ho itšetleha ka thuso ea balumeli-’moho le bona ho ea ho ile, hobane seo se ka etsa hore ba se ke ba hlomphuoa ebile ba ka senya kamano ea bona le barab’abo rona ba bang. (2 Bathes. 3:7-9) Leha ho le joalo ba hloka ho thusoa. Ha ho hlokahale chelete e ngata hore re thuse bara le barali babo rona empa ntho ea bohlokoa ke hore re ba fe nako ea rona. Re ka ba thusa ka lintho tse bonolo tse kang ho ba bontša moo lipalangoang li fumanehang teng, re be re ba bontše moo ba ka rekang lijo ka theko e tlaase. Hape re ka ba bontša moo ba ka fumanang mechine e ka ba thusang hore ba fumane chelete ea ho iphelisa. Habohlokoa le ho feta, re ka ba thusa hore ba momahane le phutheho. Haeba ho khoneha, re ka ea le bona libokeng. Re ka boela ra tsamaea le bona tšimong re be re ba bontše hore na ba ka bua le batho ba tšimo ea sebaka seo joang. w17.05 5 ¶11-12

Batho ba bangata ba sehlela ho ba le maruo hoo qetellong ba sitoang ho ba le maikutlo a nepahetseng ka ’ona. Hobane’ng? Hobane ha ba na kamano e ntle le Jehova. (1 Bakor. 2:14) Ka lebaka leo, ho thata hore ba lemohe se nepahetseng le se fosahetseng. (Baheb. 5:11-14) Ba lula ba batla maruo. Empa leha ba se ba a fumane, ha ba a khotsofalle ’me ba tsoela pele ho batla a eketsehileng. (Moek. 5:10) Ho na le ntho eo re ka e etsang ho qoba mokhoa ona o kotsi. Letsatsi le letsatsi re lokela ho ithuta Bibele ’me re thuise ka lintho tseo re ithutileng tsona. Kaha Jesu o ne a thuisa ka lintho tseo a ithutileng tsona ho Jehova, o ile a atleha ho hlola liteko. Kahoo, haeba re thuisa le ho kenya tšebetsong lintho tseo re ithutileng tsona Bibeleng, re tla atleha ho hlola takatso ea ho ba le maruo. (Mat. 4:8-10) Ha re etsa joalo, re tla bontša hore re rata Jesu ho feta ho rata maruo. w17.05 26 ¶17