KHAOLO EA 53

Khetha ho Ithabisa ka Tsela e Tla Khahlisa Jehova

E Hatisitsoeng

Jehova ke “Molimo ea thabileng.” (1 Timothea 1:11) O batla hore re thabe re be re thabele bophelo. Oa thaba ha re ipha nako ea ho phomola mesebetsing eo re e etsang. Khaolong ena re tl’o bona hore na ke joang re ka sebelisang nako ea ho phomola ka tsela e monate, e khotsofatsang le e thabisang Jehova.

1. Ha re khetha lintho tseo re tla ithabisa ka tsona re lokela ho hopola’ng?

U rata ho etsa’ng ha u phomotse? Batho ba bang ba rata ho lula hae moo ho thotseng ba ipalle libuka, ba mamele ’mino, ba shebelle lifilimi kapa ba kene Inthaneteng. Ba bang ba rata ho hloa lithaba, ho sesa kapa ho bapala lipapali tse itseng le metsoalle ea bona. Ho sa tsotellehe hore na re khetha ho ithabisa joang, re lokela ho etsa bonnete ba hore tsela eo re ithabisang ka eona ke e “amohelehang ho Morena.” (Baefese 5:10) Taba ena ke ea bohlokoa hobane hangata batho ba ithabisa ka lintho tseo Jehova a li hloileng. Ka mohlala, ba mamela le ho shebella lintho tse nang le ntoa, boitšoaro bo bobe le bodemona ebile baa li etsa. (Bala Pesaleme ea 11:5.) Ke’ng e tla re thusa hore re khethe lintho tseo re ithabisang ka tsona ka tsela e bohlale?

Haeba re khetha metsoalle e ratang Jehova, e tla re susumetsa hore re etse lintho tse ntle re be re khethe boithabiso bo molemo. Joalokaha re ithutile khaolong e fetileng, motho “ea tsamaeang le batho ba bohlale o tla hlalefa.” Empa haeba re tloaelane le batho ba sa rateng melao ea Molimo, ‘lintho li tla re tsamaela hampe.’—Liproverbia 13:20.

2. Ke hobane’ng ha ho le bohlokoa hore re lekanyetse nako eo re e qetang re ithabisa?

Esita le haeba lintho tseo re ithabisang ka tsona li se mpe, ha rea lokela ho qeta nako e ngata haholo re le ho tsona. Ho seng joalo re ke ke ra ba le nako e lekaneng ea ho etsa lintho tsa bohlokoa. Bibele e re khothaletsa hore “[re] ithekele nako e loketseng.”—Bala Baefese 5:15, 16.

ITHUTE LINTLHA TSE LING

Ithute hore na u ka etsa liqeto tse nepahetseng joang ha u khetha boithabiso.

3. Qoba ho ithabisa ka lintho tse fosahetseng

Ke hobane’ng ha re lokela ho khetha boithabiso ka hloko? Bapala VIDEO ebe le buisana ka lipotso tse latelang.

VIDEO: Ke Lokela ho Khetha Boithabiso bo Joang? (4:39)

Lipapali tsa ntoa tsa Roma ea boholo-holo li tšoana joang le boithabiso bo bong ba mehleng ee?
Videong ee, Thibos o ithutile’ng ka boithabiso?

Bala Baroma 12:9 ebe le buisana ka potso ena:

Temana ee e u thusa joang hore u khethe boithabiso bo nepahetseng?

Ke lintho life tseo Jehova a li hloileng? Bala Liproverbia 6:16, 17 le Bagalata 5:19-21. Ka mor’a ho bala lengolo ka leng, buisanang ka potso ena:

Ke lintho life tseo ho builoeng ka tsona litemaneng tsee, tse tloaelehileng boithabisong ba batho kajeno?

Lipotso tse ka u thusang ho khetha boithabiso ka bohlale

Ipotse:

Ke’ng? Na bo na le lintho tseo Jehova a li hloileng?
Neng? Na bo ntšitisa ho etsa lintho tsa bohlokoa?
Le mang? Na bo etsa hore ke qete nako e ngata le batho ba sa rateng Jehova?

Ho molemo ho tsamaella hole le kotsi. Ka tsela e tšoanang re lokela ho qoba boithabiso bo fosahetseng

Koloi e tsamaea qetellong ea tsela e lithaba. Bokamorao ba koloi bo se bo ntse bo tl’o oela selomong.

4. Sebelisa nako ea hao hantle

Bapala VIDEO ebe le buisana ka potso e latelang.

VIDEO: Ke’ng e U Jellang Nako? (2:45)

Le hoja abuti ea hlahang videong ee a ne a sa etse letho le lebe, bothata ba hae e ne e le bofe tseleng eo a sebelisang nako ka eona?

Bala Bafilipi 1:10 ebe le buisana ka potso ena:

Temana ee e ka re thusa joang ha re etsa qeto ea hore na re tla qeta nako e kae re ithabisa?

5. Khetha boithabiso bo tla u tsoela molemo

Le hoja ho e-na le boithabiso bo sa thabiseng Jehova, ho ntse ho e-na le lintho tse ngata tse monate tse mo thabisang. Bala Moeklesia 8:15 le Bafilipi 4:8 ebe le buisana ka potso ena:

Ke boithabiso ba mofuta ofe boo u bo thabelang?

Litšoantšo: Batho ba lilemo tse sa tšoaneng ba ithabisa le ho ikhatholla ka tsela e ba tsoelang molemo. 1. Ngoanana o mametse ’mino ebile oa toroea. 2. Bashemane ba bararo ba bapala basketball. 3. Bashemane ba babeli ba palame libaesekele. 4. Moshemane o iketsetsa koloi e bapalang. 5. Ntate o letsa sekupu. 6. Moshanyana o bapala video game le ntate oa hae. 7. ’Mè o nka lifoto. — U ka khona ho ithabisa ka lintho tse tla u tsoela molemo

BATHO BA BANG BA RE: “Ha ho na letho le phoso ka ho ithabisa ka lintho tse nang le ntoa, boitšoaro bo bobe kapa bodemona, hafeela ’na ke sa li etse.”

Uena u ka re’ng?

KAKARETSO

Jehova o batla hore re ithabise ka tsela e tla re tsoela molemo.

Re Ithutile’ng?

Bakreste ba lokela ho qoba ho ithabisa ka lintho tse joang?
Ke hobane’ng ha re sa lokela ho qeta nako e ngata haholo re ithabisa?
Ke hobane’ng ha u batla ho ithabisa ka tsela e khahlisang Jehova?

Re qetile khaolo ka la:

Seo U ka se Etsang

Sebelisa lebokose le reng “Lipotso Tse ka U Thusang ho Khetha Boithabiso ka Bohlale,” ho hlahloba lintho tseo u ithabisang ka tsona.

Ntho e ’ngoe:

Ntho e ’ngoe

BATLA

Hlokomela hore na ke mang ea lokelang ho u khethela lintho tseo u ithabisang ka tsona.

“Na ho na le Lifilimi, Libuka Kapa Lipina Tseo le li Hanelang?” (Sehlooho se websaeteng)

Ithute hore na u ka etsa liqeto tse nepahetseng joang tabeng ea ho khetha boithabiso.

“Na Boithabiso ba Hao bo U Tsoela Molemo?” (Molula-Qhooa, October 15, 2011)

Paleng ea bophelo e nang le sehlooho se reng “Ke Ile ka Khaotsa le ho Hloea Makhooa,” bona hore na ke hobane’ng ha ntate e mong a ile a fetola lintho tseo a neng a ithabisa ka tsona.

“Bibele e Fetola Batho” (Molula-Qhooa, February 1, 2010)

Shebella ha ’mè e mong a etsa qeto e ntle ea ho se shebelle lintho tse nang le bodemona.

Qoba Boithabiso bo Nang le Bodemona (2:02)