January

Ke eng e ileng ea thusa Timothea hore Jehova a mo sebelise? O ile a thusoa ke makhabane a Bokreste ao a neng a e-na le ’ona. (Bafil. 2:​19-22) Ho ea kamoo moapostola Pauluse a mo hlalositseng kateng, re ka bona hore Timothea e ne e le motho ea ikokobelitseng, ea tšepahalang le ea mahlaha-hlaha. O ne a tsotella bara babo haholo. Ke ka lebaka leo Pauluse a neng a rata Timothea ’me a mo tšepela ho phetha boikarabelo bo boima. Ka tsela e tšoanang, le rona Jehova o tla re rata ebile re tla thusa phutheho haholo haeba re sebeletsa ho ba le makhabane ao a Bokreste. (Pes. 25:9; 138:6) Nahanisisa hore na u hloka ho ntlafatsa hokae, u be u rapelle taba eo. U ka ’na oa etsa qeto ea hore u batla ho ithuta ho qenehela batho ba bang. Mohlomong u ka ntlafatsa hore u be motho ea nang le khotso le ea tšoarelang batho ba bang. Kopa motho eo u mo tšepang ho u eletsa hore na u ka ntlafatsa hokae.—Liprov. 27:6. w22.04 23 ¶4-5

Jehova o batla hore re thabe. Re tseba sena hobane thabo ke e ’ngoe ea litholoana tsa moea oa hae o halalelang. (Bagal. 5:22) Kaha ho fana ho tlisa thabo e kholo ho feta ho amohela, re thaba haholo ha re sebetsa ka thata mosebetsing oa boboleli le ha re thusa Bakreste-’moho ka litsela tse sa tšoaneng. (Lik. 20:35) Temaneng ea kajeno ea letsatsi, moapostola Pauluse o bua ka lintho tse peli tse ka re thusang hore re lule re thabile. Ea pele, re lokela ho etsetsa Jehova sohle seo re ka se khonang ’me re tla thaba ha re etsa joalo. (Mat. 22:​36-38) Ea bobeli, ha rea lokela ho ipapisa le batho ba bang. Re lokela ho leboha Jehova ka koetliso eo re e fumaneng, litalenta tseo re nang le tsona le ka lintho tseo maemo a rona a bophelo a re lumellang ho li etsa. Ha batho ba bang ba atlehile ho re feta likarolong tse itseng tsa tšebeletso, re lokela ho thabela hore ba sebelisa bokhoni ba bona ho rorisa Jehova. w22.04 10 ¶1-2

Bolumeli ba bohata bo tla timetsoa ka tšohanyetso e leng ho tla makatsa lefatše lohle. (Tšen. 18:​8-10) Ho felisoa ha Babylona e Moholo ho tla sisinya lefatše lohle ho be ho bake mathata a mangata empa batho ba Molimo ba tla be ba e-na le bonyane mabaka a mabeli a ho lula ba thabile. Bolumeli ba bohata boo esale e e-ba sera sa Jehova Molimo ka nako e telele, bo tla be bo felisitsoe ’me re tla be re le haufi le ho lokolloa lefatšeng lena le khopo. Daniele o ile a bolela esale pele hore “tsebo ea ’nete” e ne “e tla ba ngata.” Ho ile ha fela ha etsahala joalo. Hona joale re utloisisa boprofeta bo mabapi le mehla ea rona. (Dan. 12:​4, 9, 10) Ho nepahala ha boprofeta bona ho etsa hore re hlomphe Jehova le Lentsoe la hae ka ho tebileng. (Esa. 46:10; 55:11) Kahoo, tsoela pele ho matlafatsa tumelo ea hao ka ho ithuta Mangolo ka hloko le ho thusa ba bang ho ba le setsoalle le Jehova. O tla sireletsa bohle ba mo tšepang ka ho feletseng ’me o tla ba fa “khotso e sa khaotseng.”—Esa. 26:3. w22.07 6-7 ¶16-17

Buka ea Tšenolo e hlalosa hore ’Muso oa Molimo o hlonngoe leholimong ha Satane eena a lelekiloe leholimong. (Tšen. 12:​1-9) Ka lebaka lena, ho na le mathata lefatšeng empa leholimong ho ile ha sala ho e-na le khotso. Hobane’ng? Hobane Satane o halefile ’me o hlasela batho ba sebeletsang Jehova ka botšepehi lefatšeng. (Tšen. 12:​12, 15, 17) Ke joang re ka lulang re tšepahalla Molimo le hoja Satane a re hlasela? (Tšen. 13:10) Ntho e ka re thusang ke ho tseba hore na ho tla etsahala eng ka moso. Ka mohlala, ho Tšenolo moapostola Johanne o hlalosa tse ling tsa litlhohonolofatso tseo re tla li thabela haufinyane. E ’ngoe ea litlhohonolofatso tseo ke hore lira tsa Molimo li tla felisoa. Temaneng ea pele feela, lengolo la Tšenolo le re bolella hore lintho tseo re tl’o li bala li hlalosoa ka “lipontšo” kapa puo ea tšoantšetso.—Tšen. 1:1. w22.05 8 ¶1-3

Kaha bahlanka ba Jehova ba tla lula ba tšepahala, ba tla halefisa bahanyetsi ba hae haholo. Ka lebaka leo, lichaba tse ikopantseng li tla hlasela batho ba Molimo lefatšeng lohle. Bibele e hlalosa tlhaselo ena e le tlhaselo ea Gogo oa Magogo. (Ezek. 38:​14, 15) Jehova o tla etsa’ng ha batho ba hae ba hlaseloa ka mabifi? O re: “Khalefo ea ka e tla hlaha linkong tsa ka.” (Ezek. 38:​18, 21-23) Tšenolo khaolo ea 19 ea hlalosa hore na ho tla etsahala’ng ka mor’a moo. Jehova o tla romela Mora oa hae hore a sireletse batho ba hae le ho hlola lira tsa bona. Jesu a e-na le “mabotho a . . . leholimong” a entsoeng ka mangeloi le ba 144 000, ba tla loantša Gogo oa Magogo. (Tšen. 17:14; 19:​11-15) Ntoa ee e tla fella ka eng? Mekhatlo eohle le batho bohle ba hanyetsang Jehova ba tla felisoa ka ho feletseng.—Tšen. 19:​19-21. w22.05 17 ¶9-10

Hang feela ka mor’a hore Adama le Eva ba etse sebe, Jehova o ile a bua ka boprofeta ba bohlokoa bo neng bo tla fa bana ba bona tšepo. Boprofeta boo bo hlaha ho Genese 3:​15, bo re: “Ke tla etsa hore uena le mosali le hloeane le hore bana ba hao le ngoana oa hae ba hloeane. Ngoana eo o tla u khoba hlooho ’me uena u tla mo loma serethe.” Boprofeta bona bo hlaha bukeng ea pele ea Bibele. Libuka tse ling tsa Bibele li amana le boprofeta bona ka tsela e itseng. Feela joalokaha re sebelisa khareng ho kopanya masela hore e be seaparo, ka ho tšoanang boprofeta bo ho Genese 3:15 bo kopanya seo ho buuoang ka sona bukeng e ’ngoe le e ’ngoe ea Bibele hore e be molaetsa o le mong. Molaetsa oo ke o bontšang hore Jehova o ne a tla romela Mopholosi ea tla felisa Diabolose le batho bohle ba khopo ba mo tšehetsang. Ena e tla ba ntho e thabisang haholo ho batho ba ratang Jehova. Ha re ithuta Bibele re tla bona hore na boprofeta bona bo phethala joang le hore re na bo re tsoela molemo joang. w22.07 14 ¶1-3

Kopa Jehova hore a u fe bohlale e le hore u rute bana ba hao ho mo rata. (Jak. 1:5) Ke eena ea ka u fang keletso e bohlale ka ho fetisisa. Ho na le mabaka a mabeli a tiisang taba ena. Lebaka la pele, Jehova ke motsoali ea bohlale ka ho fetisisa. (Pes. 36:9) Lebaka la bobeli, o lula a re fa keletso e re tsoelang molemo. (Esa. 48:17) Jehova o sebelisa Lentsoe la hae Bibele le mokhatlo oa hae ho fana ka lingoloa le livideo tse thusang batsoali ho ruta bana ba bona ho mo rata. (Mat. 24:45) Ka mohlala, batsoali ba ka fumana keletso e ka ba thusang lihloohong tsa “Se ka Thusang Lelapa,” tseo pele li neng li hatisoa ho Tsoha! ’me hona joale li se li fumaneha le websaeteng ea rona. Ho boetse ho na le livideo tse ngata tsa lipuisano le litšoantšiso tse fumanehang ho jw.org tse ka thusang batsoali hore ba sebelise keletso ea Jehova ha ba ntse ba holisa bana.—Liprov. 2:​4, 5. w22.05 27 ¶4-5

Ha ho na motho ea tšoarelang joaloka Jehova. Ntlha ea pele, o lula a batla ho re tšoarela. Ntlha ea bobeli, Jehova o re tseba hantle. O tseba ntho e ’ngoe le e ’ngoe ka rona ebile ke eena ea ka bonang hore na re bakile e le kannete. Ntlha ea boraro, ha Jehova a re tšoarela, o re tšoarela ka ho felletseng joalokaha eka ha re e-s’o etse sebe ho hang. Taba ena e re thusa hore re be le letsoalo le se nang molato le hore re be metsoalle ea hae. Re tla lula re etsa libe hobane ha rea phethahala. Leha ho le joalo, re ka khothatsoa ke mantsoe a hlahang ho Insight on the Scriptures, Volume 2, leqephe la 771 a reng: “Jehova o mohau ebile oa tseba hore bahlanka ba hae ha baa phethahala. Kahoo, ha baa lokela ho lula ba utloisitsoe bohloko ke liphoso tseo ba li etsang hobane ba sa phethahala. (Pes 103:​8-14; 130:3) Haeba ba leka kahohle ho phela ka melao ea Molimo ba tla thaba. (Fil 4:​4-6; 1Jo 3:​19-22).” w22.06 6 ¶18; 7 ¶19

Ho tšaba hore re tla hlorisoa ke mebuso ha se lona feela leraba leo Satane a le sebelisang. Batho ba bang ba tšosoa ke hore na ha e e-ba Lipaki Tsa Jehova, ba malapa a bona ba tla ikutloa joang. Ka linako tse ling ntho ena e ba tšosa haholo ho feta ho tšoha hore ba tla tšoaroa hampe. Ba rata litho tsa malapa a bona haholo ’me ba batla hore ba ithute ka Jehova ba be ba mo rate. Ba utloisoa bohloko ke ha litho tsa malapa a bona li bua hampe ka Molimo oa ’nete le ka barapeli ba hae. Maemong a mang litho tsa malapa tseo pele li neng li hanyetsa, li ile tsa qetella li ithutile Bibele. Empa ho thoe’ng haeba litho tsa malapa li se li sa batle ho ikamahanya le rona ho hang ka lebaka la tumelo ea rona? Re tla etsa’ng? Re ka tšelisoa ke mantsoe a monate ao re a balang ho Pesaleme ea 27:10. Ha re hopola kamoo Jehova a re ratang kateng, re ke ke ra tšosoa ke ntho leha e le efe e ka re etsahallang. Hape re kholisehile hore Jehova o tla re hlohonolofatsa haeba re mamella. O tla re fa lintho tsohle tseo re li hlokang hore re phele, a re thuse ho lula re sa tšoenyeha ebile re thabile. Hape o tla re thusa hore re lule re le haufi le eena. O tla etsa joalo ka tsela e molemo ho feta eo ntate leha e le ofe a ka etsang ka eona. w22.06 16-17 ¶11-13

Ha Jesu a ne a le lefatšeng batho ba ne ba re ke letahoa, o ja haholo, o sebeletsa Diabolose, ha a boloke Sabatha ebile ha a hlomphe Molimo. (Mat. 11:19; 26:65; Luka 11:15; Joh. 9:16) Ho ntse ho le joalo, Jesu o ile a bua le bona ka mosa. Ha batho ba bang ba bua le rona hampe, re lokela ho etsisa Jesu ka hore re bue le bona ka mosa. (1 Pet. 2:​22, 23) Ha ho bonolo hore re be mosa ha batho ba bang ba bua le rona hampe. (Jak. 3:2) Joale re ka thusoa ke’ng? Leka hore u se ke oa halefa ha mong’a ntlo a u buisa hampe. Mor’abo rona Sam o re: “Ke leka ho nahana kamoo motho eo ke buang le eena a hlokang ho tseba ’nete ka Molimo le ho hopola hore a ka khona ho fetoha.” Ka linako tse ling mong’a ntlo a ka halefisoa ke hore re fihlile ka nako e mpe. Haeba re bua le motho ea koatileng, re ka etsa thapelo e khutšoanyane ’me ra kopa Jehova hore a re thuse re khobe matšoafo e le hore re bue ka tsela e mosa le e nang le tlhompho. w22.04 6 ¶8-9

Tsela ea bohlokoa ea ho thusa bana hore e be metsoalle ea Jehova ke ka ho ithuta Bibele le bona. (2 Tim. 3:​14-17) Bibele e boetse e bontša hore ho na le mokhoa o mong oo bana ba ka ithutang hore na Jehova ke Molimo ea joang. Bukeng ea Liproverbia ntate o hopotsa mora oa hae hore a se ke a lebala makhabane a Jehova a bonahalang linthong tseo a li bopileng. (Liprov. 3:​19-21) Batsoali, e ka ’na eaba le thabela ho qeta nako le bana ba lona le le ka ntle. Sebelisang nako eo ho thusa bana ba lona ho bona hore na ‘lintho tseo Jehova a li bopileng’ li re ruta’ng ka makhabane a hae. (Bar. 1:20) Hlokomelang kamoo Jesu a ileng a ruta a sebelisa lintho tseo Jehova a li bopileng. Ho na le nako eo a ileng a re barutuoa ba hae ba shebe makhoaba le lipalesa. (Luka 12:​24, 27-30) O ile a ruta barutuoa ba hae hore Jehova oa fana ebile o mosa le hore o tla fa bahlanka ba hae lijo le liaparo joalokaha a hlokomela makhoaba le lipalesa. w23.03 20-21 ¶1-4

Re leboha Jehova hore ebe re khona ho mo rapela ka Mora oa hae. Jehova o sebelisa Jesu ho re fa lintho tseo re mo kopileng tsona. Jehova o mamela le ho arabela lithapelo tsa rona haeba re sebelisa lebitso la Jesu. Hape o re tšoarela libe tsa rona motheong oa sehlabelo sa Jesu sa thekollo. (Bar. 5:1) Mangolo a hlalosa Jesu e le ‘moprista ea phahameng ea lutseng ka letsohong le letona la terone ea Ea Boholo bo Hlomphehang maholimong.’ (Baheb. 8:1) Jesu ke “mothusi [oa rona] ho Ntate.” (1 Joh. 2:1) Re leboha Jehova hore ebe o re file Moprista ea Phahameng ea utloisisang hore re baetsalibe le ea re “kopelang ka tieo.” (Bar. 8:34; Baheb. 4:15) Kantle ho sehlabelo sa Jesu re ne re ke ke ra khona ho bua le Jehova ka thapelo. Ha ho pelaelo hore re ke ke ra khona ho leboha Jehova ka ho felletseng ka mpho ea bohlokoa eo a re fileng eona e leng Mora oa hae ea ratoang. w22.07 23 ¶10-12

Motho ea tšepahalang o loanela ho phetha litšepiso tsa hae hape o bua ’nete. (Pes. 15:4) Batho baa tseba hore ba ka mo tšepa. Re batla hore bara le barali ba bo rona ba ikutloe joalo ka rona. Re ke ke ra qobella batho bang hore ba re tšepe. Ha ho itlele feela hore batho ba re tšepe. Re lokela ho etsa ho hong. Botšepehi bo tšoana le ho batla chelete. Ho thata ho e fumana empa ho bonolo ho lahleheloa ke eona. Jehova o entse hore re mo tšepe. “Mosebetsi oohle oa hae o na le botšepehi.” (Pes. 33:4) Kahoo, o lebeletse hore re mo etsise. (Baef. 5:1) Re leboha Jehova hore ebe o re huletse ka har’a mokhatlo oa hae oa batho ba ratanang le ba tšepahalang. Kaofela ha rona re na le boikarabello ba ho etsa hore bara le barali ba bo rona ba re tšepe. Haeba kaofela ha rona re ratana, re ikokobelitse, re e-na le temoho, re bua ’nete hape re e-na le boitšoaro, re etsa hore ho be le botšepehi ka phuthehong. Re lokela ho lula re sebetsa ka thata e le hore batho ba bang ba ka re tšepa. E se eka re ka etsisa Jehova Molimo oa rona ’me re lule re bontša hore rea tšepahala. w22.09 8 ¶1-2; 13 ¶17

Ka linako tse ling re ka ikutloa eka re bang le hoja re e-na le bara le barali ba bo rona ba bangata ka phuthehong ’me re ka ’na ra utloa bohloko kapa ra nyahama, ra nahana hore re lokela ho mamella lintho tsena ka borona. Jehova ha a batle hore re ikutloe ka tsela eo. Nahana kamoo a ileng a sebetsana le moprofeta Elia kateng. Jehova o ile a mo khothaletsa ho ntša maikutlo a hae. Ka makhetlo a mabeli o ile a mo botsa a re: “U batla’ng mona?” (1 Mar. 19:​9, 13) Jehova o ne a lula a mamela ha Elia a mo bolella hore na o ikutloa joang. O ile a ba a tiisetsa Elia hore ho ntse ho e-na le batho ba bangata ba mo sebeletsang. (1 Mar. 19:​11, 12, 18) Re ka kholiseha hore Elia o ile a ikutloa a imolohile ka mor’a ho bua le Jehova le ho bona kamoo a ileng a mo araba kateng. Jehova o ile a fa Elia mesebetsi e mengata ea bohlokoa. O ile a re a tlotse Hazaele hore e be morena oa Syria, Jehu hore e be morena oa Iseraele le Elisha hore e be moprofeta. (1 Mar. 19:​15, 16) Ka ho mo fa mesebetsi ena Jehova o ile a thusa Elia hore a lule a nahana ka lintho tsa bohlokoa. O ile a ba a mo fa motsoalle e leng Elisha. w22.08 8 ¶3; 9 ¶5

Na phutheho ea heno e kile ea haha Holo ea ’Muso kapa ea e lokisa? Haeba ho joalo, e tlameha ebe u hopola liboka tsa pele tseo le bileng le tsona mohahong oo o mocha. U ile oa leboha Jehova haholo. Ha e le hantle, e ka ’na eaba u ne u thabile hoo u neng u batla ho lla ebile u sa khone le ho bina pina e qalang. Liholo tsa rona tsa ’Muso tse hahiloeng hantle li etsa hore batho ba rorise Jehova. Empa re rorisa Jehova le ho feta ha re etsa mosebetsi o mong oa ho haha. Mosebetsi oo o akareletsa ntho ea bohlokoa ho feta mehaho, e leng ho haha batho ba tlang mehahong ea rona ea borapeli. Moapostola Pauluse o ne a nahanne ka taba ena ha a ne a ngola mantsoe a hlahang temaneng ea letsatsi ea kajeno. Moapostola Pauluse o re behetse mohlala o motle oa ho haha Bakreste-’moho le eena. O ne a qenehela batho ba bang. Re ka etsisa mohlala oa hae kajeno ka hore re hahe Bakreste-’moho le rona.—1 Bakor. 11:1. w22.08 20 ¶1-2

Mokreste ea batlang ho etsa lintho tseo Molimo a reng li lokile o tla tšepahala linthong tsohle tse amanang le khoebo. Motho ea ratang ho loka o boetse o rata toka ebile ha a batle ho bona motho e mong a tšoaroa hampe. E le hore motho ea lokileng a “khahlise [Jehova] ka botlalo,” o nahana ka hore na Jehova o tla ikutloa joang ka liqeto tseo a li etsang. Bibele e re ho loka ho tsoa ho Jehova. Ke kahoo a bitsoang “sebaka sa bolulo sa ho loka.” (Jer. 50:7) Kaha Jehova ke ’Mopi, ke eena feela ea ka behang melao ea se nepahetseng le se fosahetseng. Kaha re baetsalibe ebile ha rea phethahala, hangata ha re tsebe hore na lintho tse nepahetseng le tse fosahetseng ke life. Jehova o tseba hantle hore na lintho tse nepahetseng le tse fosahetseng ke life. (Liprov. 14:12; Esa. 55:​8, 9) Leha ho le joalo, kaha re bopiloe ka setšoantšo sa Molimo, re ka khona ho etsa lintho tseo a reng li nepahetse. (Gen. 1:27) Re rata ho mamela melao ea Jehova. Kaha re rata Ntate oa rona, re batla ho mo etsisa kahohle kamoo re ka khonang.—Baef. 5:1. w22.08 27 ¶5-6

Ha re ikutloa re nyahame kapa re tšoenyehile, re ka ’na ra batla ho etsa ntho e itseng e tla re thusa hore re khaotse ho tšoenyeha ka mathata a rona. Sena sea utloahala empa re lokela ho hlokomela hore re se ke ra etsa lintho tseo Jehova a li hloileng. (Baef. 5:​10-12, 15,16) Lengolong leo moapostola Pauluse a ileng a le ngolla Bakreste ba Filipi, o ile a ba khothaletsa ho tsoela pele ba nahana ka lintho ‘tse lokileng, tse hloekileng, tse ratehang, . . .le tse molemo.’ (Bafil. 4:8) Le hoja Pauluse a ne a sa bue ka ho toba ka boithabiso, seo a se ngotseng se lokela ho susumetsa tsela eo re khethang boithabiso ka eona. U ka leka sena: Moo u bonang lentsoe “lintho” le hlaha temaneng ena u ka kenya lentsoe “lipina,” “li-movie,” “lipale” kapa “lipapali tsa livideo.” Ho etsa sena ho tla u thusa hore u bone hore na ke’ng e amohelehang ho Molimo. Re batla ho mamela melao ea Jehova e phahameng.—Pes. 119:​1-3. w22.10 9 ¶11-12

Pele batho “ba sa lokang” ba hlokahala, ba bang ba bona ba ile ba etsa lintho tse mpe haholo. Ba tla hloka ho rutoa hore na ba lokela ho etsa’ng e le hore ba phele ka melao ea Jehova e lokileng. ’Muso oa Molimo o tla fana ka taelo ea hore ho be le mosebetsi oa ho ruta o e-s’o ka o e-ba teng lefatšeng, hore batho bana ba rutoe ho phela ka melao e lokileng ea Jehova. Ke bo-mang ba tla ruta batho ba sa lokang? Ke bongata bo boholo le batho ba lokileng ba tla tsosoa. Batho ba sa lokang ba lokela ho ba le kamano e ntle le Jehova le hore ba inehele ho eena e le hore mabitso a bona a ngoloe bukeng ea bophelo. Jesu Kreste le batlotsuoa ba tla sheba batho bana ba sa lokang ba le leholimong, ho bona hore na ebe ba mamela lintho tseo ba li rutoang. (Tšen. 20:4) Ba hanang ho mamela ha ba rutoa ba tla felisoa le hoja mohlomong ba tla be ba se ba le lilemo li lekholo. (Esa. 65:20) Jehova le Jesu ba khona ho bona se ka pelong ea motho ’me ba ke ke ba lumella motho leha e le ofe hore a senye lefatše le lecha.—Esa. 11:9; 60:18; 65:25. w22.09 17 ¶11-12

Temaneng ena mantsoe “balaoli ba phahameng” a bua ka babusi. Bakreste ba lokela ho ba mamela. Balaoli bana ba etsa hore ho be le taolo naheng ebile ba etsa bonnete ba hore batho ba mamela molao ’me ka linako tse ling ba sireletsa bahlanka ba Jehova. (Tšen. 12:16) Kahoo, re lokela ho lefa lekhetho re be re ba fe tlhompho e ba loketseng. (Bar. 13:7) Balaoli bana ba na le matla hobane Jehova ke eena ea ba lumelletseng hore ba be le ’ona. Jesu o ile a hlakisa ntlha ena hantle ha ’Musisi oa Roma e leng Ponse Pilato a ne a mo botsa lipotso tse ngata. Ha Pilato a ne a re a ka pholosa Jesu kapa a ka mo bolaea, Jesu o ile a re ho eena: “U ka be u se na matla holim’a ka hoja ha oa a fuoa ke Molimo.” (Joh. 19:11) Ho na le moo matla a babusi le a bo-ralipolotiki a fellang teng joalokaha matla a Pilato le ’ona a ne a lekanyelitsoe. w22.10 13 ¶6

Molimo o ile a susumeletsa Morena Davida ho ngola hore na bophelo bo tla ba joang ka moso ha ho se ho busa morena ea bohlale le ea tšepahalang. (Pes. 37:​10, 11, 29) Hangata ha re bua le batho ka Paradeise, re bala Pesaleme ea 37:11. Re na le lebaka le letle la ho etsa joalo kaha Jesu le eena o ile a qotsa temana e tšoanang Thutong ea hae ea Thabeng, a bontša hore mantsoe ao a tla phethahala ka moso. (Mat. 5:5) Empa mantsoe a Davida a ne a boetse a bontša hore na bophelo bo tla ba joang pusong ea Morena Solomone. Ha Solomone e le morena Iseraele, batho ba Molimo ba ile ba thabela ho phela ka khotso ba bile ba hafa ka nkatana naheng “e phallang lebese le mahe a linotši.” Molimo o ile a re: “Haeba le tsoela pele ho latela litaelo tsa ka . . . , ke tla etsa hore ho be le khotso naheng ea lona ’me ha ho na motho ea tla le tšosa ha le robetse.” (Lev. 20:24; 26:​3, 6) Litšepiso tseo li ile tsa phethahala nakong eo Solomone e neng e le morena Iseraele. (1 Likron. 22:9; 29:​26-28) Mantsoe a fumanoang ho Pesaleme ea 37:​10, 11, 29 a ile a phethahala nakong e fetileng ’me a tla boela a phethahale ka moso. w22.12 10 ¶8

Re lokela ho latela tataiso eo mokhatlo o fanang ka eona joalokaha re le Bakreste ba ’nete. Bibele e fana ka keletso ena ea bohlokoa: “Ka tataiso e bohlale u tla loana ntoa ea hao, ka baeletsi ba bangata u tla hlola.” (Liprov. 24:6) Nahana kamoo temana ena e ka u thusang kateng mosebetsing oa ho bolela le ho ruta batho Bibele. Ho e-na le ho etsa mosebetsi oa ho bolela le ho ruta batho Bibele ka tsela ea rona, re latela litlhahiso tseo re li fuoang. Re fumana tataiso e bohlale ha re le libokeng tsa rona tsa Bokreste, e leng moo baeletsi ba nang le boiphihlelo ba fanang ka lipuo tse thehiloeng Bibeleng tse re koetlisang. Hape mokhatlo oa Jehova o fana ka lingoloa le livideo tse thusang batho ho utloisisa Bibele. Kannete re motlotlo haholo ka lebaka la likeletso tseo re li fumanang ka Lentsoeng la Molimo. Re ka be re phela bophelo bo joang haeba e ne e se ka tsona? E se eka kamehla re ka lula re ikemiselitse ho latela bohlale boo Jehova a re fang bona.—Liprov. 3:​13-17. w22.10 22 ¶18; 23 ¶19

Ha re ithuta Lentsoe la Molimo re bile re nahanisisa ka lona tumelo ea rona ea matlafala feela joalokaha ho ja lijo ho re matlafatsa ’meleng. Jehova o batla hore re utloisise Lentsoe la hae hantle. Re ka etsa seo ka ho rapela, ho bala le ho nahanisisa. Pele re bala Lentsoe la Molimo, re lokela ho rapela ’me re lokise lipelo tsa rona. Ka mor’a moo, re lokela ho bala karolo e itseng ka Bibeleng ebe re ema hanyane re nahanisisa ka seo re se balileng. Ke’ng e tla etsahala ka mor’a moo? Ha re ntse re nahanisisa ka Lentsoe la Molimo, re tla khona ho le utloisisa ’me seo se tla matlafatsa tumelo ea rona. Ke hobane’ng ha e le habohlokoa hore re bale Bibele ’me re nahanisise ka eona? Ho etsa joalo ho re fa matla ao re a hlokang hona joale ho bolella batho molaetsa oa ’Muso. Ho boetse ho re thusa hore re itokisetse ho bolela molaetsa oa kahlolo oo re ka ’nang ra fana ka oona nakong e tlang. Hape, ha re nahanisisa ka makhabane a Jehova re ba metsoalle ea hae e haufi-ufi. w22.11 6-7 ¶16-17.

Jesu o ile a bontša hore ha se balateli ba hae feela ba neng ba tla tseba hore ke Bakreste ba ’nete empa le batho ba bang ba ne ba tla tseba ha ba bona kamoo ba ratanang kateng. Hape tsela eo bahlanka ba Molimo ba ratanang ka eona ea ikhetha. Lipaki Tsa Jehova ha lia phethahala. (1 Joh. 1:8) Kahoo, ha re ntse re tseba Bakreste-’moho haholoanyane, re tla bona tse ling tsa liphoso tsa bona. (Bar. 3:23) Ka masoabi, ba bang ba lumeletse hore liphoso tsa batho ba bang li etse hore ba tlohele ho sebeletsa Jehova. Jesu o ile a bontša joang hore o rata baapostola ba hae? Hona re ka etsisa mohlala oa Jesu joang mehleng ee?’ Lipaki Tsa Jehova le tsona li tla be li etsa hantle haeba li nahana ka likarabo tsa lipotso tsena. Ho etsa joalo ho tla re thusa hore re rate batho ba bang haholoanyane, haholo-holo ha ba etsa liphoso.—Baef. 5:2. w23.03 26-27 ¶2-4

Ha lefatše lena le ntse le e-ea bofelong, re ka lebella ho kopana le mathata ka phuthehong. Mathata ao a ka etsa hore re thatafalloe ho lula re tšepahalla Jehova. Kahoo, re lokela ho sebelisa likelello tsa rona hantle. Haeba u utloa eka Mokreste-’moho le uena o u tšoere hampe, u se ke oa mo jara ka pelo. Haeba u khalemeloa, u se ke oa nahana kamoo u tlotlolotsoeng kateng empa u amohele khalemelo ’me u etse liphetoho moo ho hlokahalang teng. Hape ha mokhatlo oa Jehova o etsa liphetoho tse u amang, li amohele ’me u mamele tataiso e fanoang. Lula u tšepa Jehova le mokhatlo oa hae le ha botšepehi ba hao bo lekoa. Khoba matšoafo, u nahane hantle ’me u shebe lintho kamoo Jehova a li shebang kateng. Rapela Jehova e le hore a u thuse ’me u se ke oa ikarola ho phutheho. Joale ho sa tsotellehe hore na ho tla etsahala’ng, Satane a ke ke a khona ho u arola le Jehova kapa mokhatlo oa hae.—Jak. 4:7. w22.11 24-25 ¶14-16

Baholo ba thusa bara ba bo rona hore ba lule ba itokisitse pele koluoa e hlaha. Ba etsa bonnete ba hore batho bohle ka phuthehong baa tseba hore na ba lokela ho etsa’ng ho lula ba sireletsehile le hore na ba tla fumana baholo joang ha ba ba hloka. Uena u ka etsa’ng? Haeba ho e-ba le koluoa pel’a moo u lulang teng, botsa baholo hore na u ka thusetsa joang. Mohlomong u ka amohela Bakreste-’moho ba lahlehetsoeng ke matlo lelapeng la hao kapa oa amohela batho ba thusang ha ho e-na le likoluoa. U ka isetsa bahoeletsi lijo le lintho tse ling tseo ba li hlokang. U ntse u ka khona ho thusa le ha ho hlahile koluoa sebakeng se hole. Joang? Ka ho rapella batho ba anngoeng ke koluoa. (2 Bakor. 1:​8-11) U ka khona ho thusetsa mosebetsing oa liphallelo ka ho fana ka monehelo mosebetsing oa lefatše lohle. (2 Bakor. 8:​2-5) Haeba u khona ho ea sebakeng seo koluoa e hlahileng ho sona, botsa baholo hore na u ka thusetsa joang. Haeba u mengoa hore u e’o thusetsa, u tla fumana koetliso e le hore u tle u khone ho thusa moo ho hlokehang teng. w22.12 24 ¶8; 25 ¶11-12

Phetolelo e ’ngoe ea Bibele ha e fetolela temana ea letsatsi ea kajeno e re: “Ha ho moleko o le hlahetseng o sa tloaelehang ho batho.” Mantsoe ao a ne a lebisitsoe ho banna le basali ba Bakreste phuthehong ea Korinthe. Ba bang pele e e-ba Bakreste ba ne ba phela ka boitšoaro bo bobe bo amanang le thobalano, ba tahoa hape banna ba robala le banna ba bang. (1 Bakor. 6:​9-11) Na u nahana hore ka mor’a hore ba kolobetsoe ba ne ba se ba se na litakatso tse fosahetseng tseo ba lokelang ho li loantša? E ke ke ea ba ho joalo. Ke ’nete hore kaofela ha bona e ne e le Bakreste ba tlotsitsoeng empa le bona ba ne ba sa phethahala. Ha ho pelaelo hore ba ile ba tlameha ho lula ba ntse ba loantšana le litakatso tse fosahetseng. Taba eo e lokela ho u khothatsa. Hobane’ng? Hobane e bontša hore takatso efe kapa efe e fosahetseng eo u loantšanang le eona, motho e mong o khonne ho e hlola. Ho hlakile hore u ka khona ho lula u e-na le ‘tumelo e matla, u tseba hore lintho tse bohloko tse u hlahelang li ntse li hlahela bana beno bohle lefatšeng.’—1 Pet. 5:9. w23.01 12 ¶15

Jesu o ile a kopa hore Jehova a sireletse balateli ba hae. (Joh. 17:11) Ke hobane’ng ha taba ee e etsa hore re be sebete? Ke hobane Jehova o matla ho feta lira tsohle tsa rona. (1 Joh. 4:4) Jehova o bona lintho tsohle. Re kholisehile hore haeba re tšepa Jehova, o tla re thusa hore re se ke ra tšoha le hore re be sebete. Na ka linako tse ling ha u le sekolong kapa mosebetsing u soabela ho bolella batho ba bang hore u Paki ea Jehova? Na u tšaba ho ba mohoeletsi kapa ho kolobetsoa hobane u tšoenyeha ka hore na ba bang ba tla nahana’ng ka uena? U se ke oa lumella maikutlo ao hore a u thibele ho etsa ntho e nepahetseng. Rapela Jehova ka matla, mo kope hore a u fe sebete sa ho etsa thato ea hae. Ha u bona Jehova a araba lithapelo tsa hao, u tla ba sebete le ho feta.—Esa. 41:​10,13. w23.01 29 ¶12; 30 ¶14

Jesu o ile a re ho Bafarisi: “Na ha lea ka la bala?” ho bontša hore ba ne ba e-na le maikutlo a fosahetseng ka seo ba se balang Mangolong. (Mat. 12:​1-7) Ketsahalong eo, Bafarisi ba ile ba re barutuoa ba Jesu ba tlotse molao oa Sabatha. Ha Jesu a ba araba, o ile a bua ka mehlala e ’meli e hlahang ka Mangolong, a ba a qotsa temana e hlahang lengolong la Hosea ho bontša hore Bafarisi ba ne ba sa utloisise hore na ke hobane’ng ha molao oa Sabatha o ne o entsoe le hore ba hlolehile ho bontša mohau. Ke hobane’ng ha banna bana ba sa fetoloa ke seo ba se balang Lentsoeng la Molimo? Hobane ba ne ba ikhohomosa ’me seo se ne se etsa hore ba se ke ba utloisisa seo ba se balang. (Mat. 23:23; Joh. 5:​39, 40) Hlokomela le Matheu 19:​4-6, moo Jesu a ileng a botsa Bafarisi potso e tšoanang ha a re: “Na ha le e-s’o bale?” Le hoja ba ile ba bala tlaleho e buang ka popo, ba ile ba iphapanyetsa seo e se rutang ka tsela eo Molimo a talimang lenyalo ka eona. Mantsoeng a Jesu re ithuta hore re lokela ho ba le maikutlo a nepahetseng ha re bala Bibele. Ho fapana le Bafarisi, re lokela ho ikokobetsa le ho ikemisetsa ho ithuta. w23.02 11 ¶12; 12 ¶13

Jehova o ile a fa Baiseraele melao e ba thusang hore ba lule ba sireletsehile ha ba le mosebetsing le ha ba le hae. (Ex. 21:​28, 29; Deut. 22:8) Motho o ne a tla fumana liphello tse bohloko haeba a ne a ka bolaea motho e mong ka phoso. (Deut. 19:​4, 5) Molao o ne o re le haeba motho a ne a ka hlahisa ngoana ea e-s’o hlahe kotsi ka phoso, o ne a lokela ho fuoa kotlo. (Ex. 21:​22, 23) Bibele e bontša ka ho hlakileng hore Jehova o batla hore re leke kahohle ho qoba likotsi. Re bontša hore re ananela mpho ea bophelo eo Molimo a re fileng eona ha re leka kahohle ho qoba likotsi ha re le mosebetsing le ha re le hae. Re ba hlokolosi ha re lahla lintho tse ka hlabang, lik’hemik’hale tse kotsi le meriana e le hore li se ke tsa ntša batho ba bang kotsi. Hape re beha lintho tsena moo bana ba ke keng ba li fihlela. Ha re besitse mollo, re belisitse metsi kapa re sebelisa mechini, ha re li siee feela. Re qoba ho khanna re noele joala kapa meriana e ka re sitisang ho khanna hantle. Hape re qoba ho khanna ha re khathetse haholo ebile re qoba ho tobetsa lifono ha re ntse re khanna. w23.02 21-22 ¶7-9

Jehova ke Tichere e mosa, e nang le mamello le e utloisisang. O sheba lintho tse ntle tseo baithuti ba hae ba li etsang. (Pes. 130:3) Hape ha ho na mohla a lebellang hore re etse lintho tseo re ke keng ra khona ho li etsa. Hopola hore ke eena ea entseng boko ba hao bo babatsehang. (Pes. 139:14) ’Mopi oa rona o batla hore re ithute ka ho sa feleng re be re natefeloe ke ho ithuta. Kahoo, re tla be re le bohlale haeba re labalabela ho ithuta molaetsa oa Bibele hona joale. (1 Pet. 2:2) Ipehele lintho tseo u batlang ho li fihlela u be u iketsetse lenaneo la ho bala le ho ithuta Bibele ’me u le tšepahalle. (Josh. 1:8) Jehova o tla u thusa hore u thabele ho bala le ho ithuta ka eena haholoanyane. Ha hoa lekana ho ba le tsebo feela. E na le molemo haeba e re thusa ho tseba Jehova haholoanyane le haeba e re thusa hore re mo rate le ho ba le tumelo ho eena. (1 Bakor. 8:​1-3) Ha u ntse u tsoela pele ho ithuta, u ’ne u kope Jehova hore a u fe tumelo e matla. (Luka 17:5) O ikemiselitse ho araba lithapelo tse joalo. w23.03 10 ¶11, 13

Barutuoa ba Jesu ba ne ba lokela ho phathahana ha ba ntse ba emetse hore bofelo bo fihle. O ile a ba fa mosebetsi oo ba lokelang ho o etsa. O ile a ba laela hore ba bolele litaba tse monate “Jerusalema, libakeng tsohle tsa Judea le Samaria le karolong e hole-hole ea lefatše.” (Lik. 1:​6-8) Kannete oo e ne e le mosebetsi o mongata. Ba ne ba sebelisa nako ea bona hantle ha ba ne ba etsa sohle ho bolela litaba tse monate. E le hore re itlhokomele, re lokela ho nahana ka ho teba hore na re sebelisa nako ea rona joang. E mong le e mong oa rona a ka “hlaheloa ke lintho ka tšohanyetso.” (Moek. 9:11) Re ka shoa ka tšohanyetso. Re ka sebelisa nako ea rona hantle ka hore re etse thato ea Jehova le ho matlafatsa setsoalle sa rona le eena. (Joh. 14:21) Re lokela ho ‘ema re tiile, re sa sisinyehe. Re lule re phathahane ka mosebetsi oa Morena.’ (1 Bakor. 15:58) Ho sa tsotellehe hore na bofelo boa fihla kapa re khaoletsoa ke lefu, re tla be re tseba hore re entse sohle ho sebeletsa Jehova.—Mat. 24:13; Bar. 14:8. w23.02 18 ¶12-14