January

Ha Jesu “a bona” ’mè eo ea hlokahalletsoeng o ile a mo hauhela. (Luka 7:13) Jesu o ile a mo hauhela a ba a bontša hore o mo utloela bohloko. O ile a bua le eena ka bonolo eaba o re: “U se ke oa lla.” O ile a thusa ’mè eo ka ho tsosa mora oa hae eaba “o mo isa ho ’mè oa hae.” (Luka 7:​14,15) Re ka ithuta’ng mohlolong oo Jesu a ileng a o etsa oa ho tsosa mora oa mohlolohali? Re lokela ho utloela batho ba shoetsoeng bohloko. Leha ho le joalo, haeba re ela hloko batho ba hlokahaletsoeng re ka ba utloela bohloko. Re ka bontša hore re ba utloela bohloko ka ho bua le ho etsa lintho tse tla ba tšelisa. (Liprov. 17:17; 2 Bakor. 1:​3, 4; 1 Pet. 3:8) Mantsoe le lintho tse nyenyane tseo re li etsang li ka ba khothatsa haholo. w23.04 5-6 ¶13-15

Le hoja Jesu a ne a tseba hore motsoalle oa hae Lazaro o shoele, o ile a ea Bethani ka mor’a matsatsi a mabeli. Nakong eo a fihlang Bethani, Lazaro o ne a se a e-na le matsatsi a mane a shoele. Jesu o ne a tl’o etsa ntho e ’ngoe e neng e tla thabisa metsoalle ea hae e be e tlotlise Molimo. (Joh. 11:​6, 11, 17) Re ka ithuta’ng ka botsoalle tlalehong ee? Nahana ka taba ena: Ha Maria le Maretha ba romella Jesu molaetsa, ha baa ka ba mo kopa hore a tle Bethani. Ba mo boleletse feela hore motsoalle oa hae oa kula. (Joh. 11:3) Ka mor’a hore Lazaro a shoe, Jesu o ne a ka khona ho mo tsosa a ntse a le hole. Ho ntse ho le joalo, Jesu o ile a khetha ho ea Bethani e le hore a e’o ba le metsoalle ea hae Maria le Maretha. Na u na le motsoalle ea ka u thusang leha u sa mo kopa? Haeba ho joalo, oa tseba hore o tla u thusa “linakong tsa mahlomola.” (Liprov. 17:17) E se eka re ka etsisa Jesu ’me ra ba metsoalle e joalo ho batho ba bang. w23.04 10 ¶10-11

Ha re e-na le mathata, re ka bona eka lefatše le lecha leo Jehova a le tšepisitseng le ke ke la tla. Na see se bolela hore tumelo ea rona ea fokola? Ha ho joalo. Nahana ka mohlala o latelang. Ha ho bata haholo mariha, re ka bona eka lehlabula le ke ke la e-ba teng. Empa ka mor’a nako e seng kae lehlabula le ba teng. Ka tsela e tšoanang, ha re nyahame re ka ’na ra bona eka lefatše le lecha le ke ke la e-ba teng. Leha ho le joalo, haeba tumelo ea rona e le matla, re tla kholiseha hore Molimo o tla phethahatsa litšepiso tsa hae. (Pes. 94:​3, 14, 15; Baheb. 6:​17-19) Ha re kholisehile, ho sebeletsa Jehova e tla ba eona ntho e tlang pele bophelong ba rona. Re boetse re lokela ho ba le tumelo e matla ha re etsa mosebetsi oa ho ruta batho Bibele. Batho ba bangata ba re “litaba tse monate” tsa hore Molimo o tla etsa hore ho be le lefatše le lecha, ke ntho e ke keng ea etsahala. (Mat. 24:14; Ezek. 33:32) Re se ke ra lumella maikutlo ao a bona a etse hore re belaele lintho tseo Jehova a re rutang tsona. E le hore re qobe seo, re lokela ho tsoela pele re matlafatsa tumelo ea rona. w23.04 27 ¶6-7; 30 ¶14

Na u kile oa ipotsa hore na ebe Jehova o araba lithapelo tsa hao? Haeba ho joalo, tseba hore ha u mong. Bara le barali ba bo rona ba bangata le bona ba re ba ee ba ipotse, haholo ha ba e-na le mathata. Le rona re ka thatafalloa ho bona hore na Jehova o araba lithapelo tsa rona joang ha re e-na le mathata. Ke hobane’ng ha re ka kholiseha hore Jehova o mamela lithapelo tsa bahlanka ba hae? Bibele ea re kholisa hore Jehova o re rata haholo ebile o re nka re le bohlokoa. (Hag. 2:7; 1 Joh. 4:10) Ke kahoo a reng re mo rapele ’me re mo kope hore a re thuse. (1 Pet. 5:​6, 7) O batla ho re thusa hore re lule re le haufi le eena le hore re sebetsane le mathata a rona ka katleho. Hangata ha re bala Bibele re fumana mehlala ea bahlanka ba Jehova bao a ileng a araba lithapelo tsa bona. Na u ka nahana ka o mong? w23.05 8 ¶1-4

Maria e ne e le motsoalle oa Jehova ’me o ile a lula a matlafatsa tumelo ea hae. O ne a tseba mangolo hantle. Hape o ne a ipha nako ea ho nahana ka seo a ithutileng sona. (Luka 2:​19, 51) Re ka kholiseha hore kaha Maria e ne e le motsoalle oa Jehova, seo se ile sa etsa hore e be mosali ea molemo. Mehleng ena, basali ba bangata ba leka ho etsisa Maria. Ka mohlala, Morali oa bo rona Emiko o re: “Pele ke nyaloa ke ne ke ipehetse nako ea ho etsa lintho tse matlafatsang tumelo ea ka. Ka mor’a hore ke nyaloe, monna oa ka o ne a lula a rapela le ho tšoara borapeli ba lelapa. Kahoo, ke ile ka hlokomela hore ke ne ke se ke itšetlehile ka eena ’me ke sa etse letho ho matlafatsa tumelo ea ka. Ke ile ka hlokomela hore ke boikarabelo ba ka ho etsa lintho tse tla matlafatsa tumelo ea ka. Hona joale ke behella nako ea ka le Molimo ka thoko e le hore ke rapele, ke bale Bibele le ho nahana ka seo ke ithutang sona.” (Bagal. 6:5) Basali, ha le lula le etsa lintho tse tla le thusa hore le lule le le metsoalle ea Jehova, banna ba lona ba tla le rorisa le ho le rata le ho feta.—Liprov. 31:30. w23.05 22 ¶6

Ha rea hlaha re se re ntse re tšaba Jehova. Kahoo, re lokela ho ithuta ho mo tšaba kapa ho mo hlompha. Tsela e ’ngoe eo re ka ithutang ho mo hlompha ka eona ke ka hore re hlahlobisise popo. Ha re bona bohlale ba Molimo, matla a hae le lerato la hae “linthong tseo a li bopileng,” re tla mo hlompha le ho mo rata le ho feta. (Bar. 1:20) Tsela e ’ngoe eo re ka ithutang ho hlompha Molimo ka eona ke ka ho lula re rapela. Re tseba Jehova haholoanyane nako le nako ha re mo rapela. Nako le nako ha re mo kopa matla a ho mamella mathata, re hopola kamoo a leng matla kateng. Ha re mo leboha hobane a fane ka Mora oa hae bakeng sa rona, re hopola kamoo a re ratang kateng. Ha re kopa Jehova hore a re thuse ho sebetsana le bothata bo itseng, re hopola kamoo a leng bohlale kateng. Lithapelo tse joalo li etsa hore re hlomphe Jehova le ho feta. Ebile li etsa hore re ikemisetse le ho feta ho qoba eng kapa eng e ka senyang setsoalle sa rona le eena. w23.06 15 ¶6-7

Jehova ke eena ea re fang melao ebile haesale a fana ka melao e hlakileng. Ka mohlala, sehlopha se busang sa mehleng ea baapostola se ile sa bua ka lintlha tse tharo tse ka thusang Bakreste hore ba lule ba tiile: (1) Ba se ke ba rapela melimo ea litšoantšo empa ba rapele Jehova feela, (2) ba nke mali e le a bohlokoa (3) le hore ba mamele molao oa hore ba qobe boitšoaro bo bobe bo amanang le thobalano. (Lik. 15:​28, 29) Bakreste ba ka lula ba tiile le ho mamela melao ea Jehova joang lintlheng tsee tse tharo? Ka ho rapela le ho mamela Jehova feela. O ile a laela Baiseraele hore ba lokela ho rapela eena feela. (Deut. 5:​6-10) Jesu o ile a bontša hore re lokela ho rapela Jehova feela ha Diabolose a ne a mo leka. (Mat. 4:​8-10) Kahoo, ha re rapele melimo ea litšoantšo. Hape ha re rapele batho, ho sa tsotellehe hore na ke baeta-pele ba bolumeli, bo-ralipolotiki kapa batho ba tummeng lipapaling le linthong tsa boithabiso. Re rapela eena feela kaha o “bopile lintho tsohle.”—Tšen. 4:11. w23.07 14-15 ¶3-4

Batho lefatšeng lena le laoloang ke Satane ba hlanyetsa ho etsa thobalano ka ntle ho lenyalo le ho shebella pornography. (Baef. 4:19) Kahoo re lokela ho hlompha Molimo le ho furalla bobe. Ho Liproverbia khaolo ea 9 re bala ka basali ba babeli, e mong o tšoantšetsa bohlale ’me e mong ha a na kelello. Ka bobeli ba mema “ba se nang kelello.” Ho tšoana le ha eka ba re: ‘Tloo ntlong ea ka ’me u je.’ (Liprov. 9:​1, 4-6) Empa batho ba amohelang limemo tsa basali bana ba etsahalloa ke lintho tse fapaneng. Bala ka memo ea “mosali ea se nang kelello.” (Liprov. 9:​13-18) Ha a soabele ho hoeletsa batho ba se nang tsebo hore ‘ba fapohele’ ha hae ’me ba je le eena. Ho etsahala’ng ka bona ha ba fapohela ha hae? Lengolo lena le re: “Ntlo ea hae e tletse bafu.” Litemaneng tseo re lemosoa ka “mosali oa letekatse” le “mosali ea boitšoaro bo bobe.” Re bolelloa hore “ho ea ha hae ho tšoana le ho ikisa lefung.” (Liprov. 2:​11-19) Ho Liproverbia 5:​3-10 re lemosoa ka mosali e mong “ea boitšoaro bo bobe” eo ‘maoto a hae a theohelang lefung.’ w23.06 21-22 ¶6-7

Baholo ba lokela ho beha mohlala o motle ka hore ba fetohe le maemo. (1 Tim. 3:​2, 3) Ka mohlala, moholo ha a lokela ho lebella hore maikutlo a hae a tla lula a amoheloa hobane feela a feta baholo ba bang ka lilemo. Oa hlokomela hore moea oa Jehova o ka sebelisa moholo e mong le e mong e le hore ba etse qeto e bohlale. Haeba baholo ba bangata ba lumellana ka qeto e itseng e seng khahlanong le melao-motheo ea Bibele, moholo ea fetohang le maemo o tla tšehetsa qeto eo le hoja a e-na le maikutlo a fapaneng. Ho fetoha le maemo ho etsa hore re fumane melemo e mengata. Re utloana le bara le barali ba bo rona ebile ho ba le khotso ka phuthehong. Re thabela ho ba le bara le barali ba bo rona ba nang le botho bo sa tšoaneng ebile ba tsoa litsong tse sa tšoaneng. Hape re thabela ho sebeletsa Jehova le bona re momahane. Habohlokoa le ho feta, re thabisoa ke ho tseba hore re etsisa Molimo oa rona Jehova ea fetohang le maemo. w23.07 25 ¶16-17

Daniele o ne a e-na le lebaka le utloahalang la ho ithuta boprofeta hobane o ne a batla ho bo utloisisa. Daniele o ne a ikokobelitse hape a tseba hore Jehova o ne a tla mo thusa hore a utloisise boprofeta haeba a ne a mo mamela a bile a phela ka melao ea hae. (Dan. 2:​27, 28) O ile a bontša hore o ikokobelitse ka hore a kope Jehova hore a mo thuse. (Dan. 2:18) Daniele o ne a boetse a etsa lipatlisiso. O ne a bala Mangolo a neng a le teng ka nako eo. (Jer. 25:​11, 12; Dan. 9:2) Rona re ka etsisa Daniele joang? Ke hobane’ng ha u ithuta boprofeta ba Bibele? Na ke hobane u batla ho bo utloisisa? Haeba ho joalo, Jehova o tla u thusa. (Joh. 4:​23, 24; 14:​16, 17) Batho ba bang ba ithuta boprofeta hobane ba na le tšepo ea hore ba tla fumana bopaki ba hore Bibele ha se Lentsoe la Molimo. Ba etsa sena hobane ba na le boikutlo ba hore haeba Bibele ha se Lentsoe la Molimo ba ka phela ka tsela eo ba e batlang. Leha ho le joalo, kaofela ha rona re hloka mabaka a utloahalang a hore na ke hobane’ng ha re ithuta boprofeta ba Bibele. w23.08 9 ¶7-8

Re ka ’na ra ikimetsa ka ho ipapisa le batho ba bang. (Bagal. 6:4) Ha re etsa joalo, re ka ba mona ’me ra batla ho hlolisana le bona. (Bagal. 5:26) Haeba re leka ho etsa lintho tseo batho ba bang ba li etsang le hoja re tseba hore re ke ke ra khona ho li etsa, re tla be re ikutloisa bohloko. Bibele e re: “Ha ntho eo motho a e lebeletseng e lieha ho phethahala, e kulisa pelo.” (Liprov. 13:12) Kahoo, re ka inahanela hore na re ka nyahama hakae haeba re batla ho etsa lintho tseo re ke keng ra khona ho li etsa. Re ka khathala ’me ra felloa ke matla a ho matha peisong ena ea bophelo. U se ke oa batla ho etsa lintho tse fetang tseo Jehova a lebeletseng hore u li etse. Jehova ha aa lebella hore u mo etsetse lintho tseo u ke keng oa khona ho li etsa. (2 Bakor. 8:12) Ha a bapise lintho tseo u mo etsetsang tsona le tseo batho ba bang ba li etsang. (Mat. 25:​20-23) O ananela tsela eo u mo sebeletsang ka eona ka pelo eohle, u tšepahalang ka eona le eo u mameletseng ka eona. w23.08 29 ¶10-11

Jehova o ile a arabela thapelo ea Samsone ka ho etsa hore ho be le metsi ka mohlolo. Ha Samsone a noa metsi ao, o ile “a boela a ba le matla.” (Baahl. 15:19) Ho bonahala eka seliba seo metsi ana a ileng a tsoa ho sona se ne se ntse se le teng lilemo tse ngata hamorao, ha moprofeta Samuele a susumetsoa ke moea oa Molimo hore a ngole buka ea Baahloli. E ka ’na eaba Baiseraele ba ileng ba bona metsi a hlahang selibeng seo ba ile ba hopola hore bahlanka ba Jehova ba ka tšepa hore o tla ba thusa nakong eo ba hlokang thuso. Le rona re lokela ho kopa thuso ea Jehova ho sa tsotellehe hore na re na le litalenta le bokhoni bofe kapa hore na ke lintho life tseo re li finyeletseng tšebeletsong ea Jehova. Re lokela ho ikokobetsa ’me re lumele hore re tla atleha hafeela re tšepile Jehova. Samsone o ile a fumana matla ha a ne a noa metsi ao Jehova a mo fileng ’ona. Le rona re tla ba matla tumelong ha re sebelisa lintho tsohle tseo Jehova a re fang tsona.—Mat. 11:28. w23.09 4 ¶8-10

Re ka etsa’ng haeba batho ba bang ba re halefisa, mohlomong ba senya Molimo oa rona lebitso kapa ba bua lintho tse mpe ka Bibele? Re lokela ho kopa Jehova hore a re fe moea oa hae o halalelang le hore a re fe bohlale ba ho ba araba ka tsela e bonolo. Empa re ka etsa’ng haeba re hlokomela hore ha rea ka ra ba araba hantle? Re ka rapela hape ka taba eo ’me ra nahana ka hore na re ka ba araba joang nakong e tlang. Ha re etsa joalo, Jehova o tla re fa moea oa hae o halalelang e le hore re khone ho ithiba ha re halefile le ho ba bonolo. Litemana tse ling tsa Bibele li ka re thusa ho laola tsela eo re buang ka eona ha re bua le batho ba re halefisang. Moea o halalelang oa Molimo o ka re thusa hore re hopole litemana tseo. (Joh. 14:26) Ka mohlala, re fumana likeletso bukeng ea Liproverbia tse ka re thusang hore re be bonolo. (Liprov. 15:18) Buka ena ea Bibele e boetse e bua ka melemo eo re e fumanang ha re lula re khobile matšoafo ha re bua le batho ba re halefisang.—Liprov. 10:19; 17:27; 21:23; 25:15. w23.09 15 ¶6-7

Moapostola Petrose o ne a tseba hore haufinyane o ne a tl’o hlokahala. O ile a sebeletsa Jehova ka botšepehi ka lilemo tse ngata a sebetsa le Jesu ’me a bolella batho bao e neng e se Bajuda litaba tse monate tsa ’Muso oa Molimo. Petrose o ile a boela a ba setho sa sehlopha se busang. Hoo e ka bang ka selemo sa 62 ho ea ho 64 mehleng ea baapostola, Molimo o ile a mo susumeletsa hore a ngole mangolo a mabeli a Bibele e leng Petrose oa pele le Petrose oa bobeli. (2 Pet. 1:​13-15) Petrose o ngotse mangolo a hae nakong eo Bakreste-’moho le eena ba neng ba “utloisoa bohloko ke liteko tse fapaneng.” (1 Pet. 1:6) Batho ba khopo ba ne ba leka ho tlisa lithuto tse fosahetseng le boitšoaro bo bobe ka phuthehong ea Bokreste. (2 Pet. 2:​1, 2, 14) Bakreste ba neng ba lula Jerusalema ba ne ba tla bona “qetello ea lintho tsohle” e leng nakong eo motse oa Jerusalema le tempele ea oona li neng li tla felisoa ke masole a Roma. (1 Pet. 4:7) Mangolo a Petrose a ile a thusa Bakreste hore ba lule ba tšepahala le hoja ba ne ba e-na le mathata le hore ba itokisetse mathata a neng a tla ba hlahela nakong e tlang. w23.09 26 ¶1-2

Le rona joaloka Jesu, hangata re ithuta ho mamela ha ho le thata. Ka mohlala, ha COVID-19 e sa tsoa qala, re ile ra kopuoa ho khaotsa ho kopana Liholong Tsa ’Muso le ho ruta batho Bibele ka ntlo le ntlo. Na u ile oa utloa ho le thata hore u mamele tataiso eo? Empa kaha u ile oa mamela, u ile oa sireletseha, oa etsa hore phutheho e momahane oa ba oa thabisa Jehova. Hona joale kaofela ha rona re se re itokiselitse le ho feta ho mamela litaelo leha e le life tseo re tla li fuoa nakong ea mahlomola a maholo. Re ka pholoha haeba re li mamela. (Jobo 36:11) Lebaka le ka sehloohong leo re mamelang Jehova ka lona ke hobane rea mo rata ’me re batla ho mo thabisa. (1 Joh. 5:3) Re ke ke ra khona ho patala Jehova bakeng sa lintho tsohle tseo a re etselitseng tsona. (Pes. 116:12) Empa re ka khona ho mo mamela ra ba ra mamela batho bao a ba fileng matla a ho re laola. Ha re mamela, rea bontša hore re bohlale ’me ha re le bohlale re thabisa pelo ea Jehova.—Liprov. 27:11. w23.10 11 ¶18-19

Na u ne u tla mamela lengeloi haeba le ne le ka bua le uena? Mehleng ena lengeloi le bua le batho “ba merabe eohle, lichaba tsohle, maloko ’ohle le lipuo tsohle.” Le re’ng? Le re: “Hlomphang Molimo ’me le mo tlotlise . . . le rapele ea entseng leholimo [le] lefatše.” (Tšen. 14:​6, 7) Jehova ke eena feela Molimo oa ’nete eo motho e mong le e mong a lokelang ho mo rapela. Re ananela haholo hore ebe o re file monyetla oa hore re mo rapele tempeleng ea hae e kholo ea tšoantšetso. Tempele ea tšoantšetso ke eng, hona re ka fumana lintlha tse e hlalosang hokae? Tempele ea tšoantšetso ha se mohaho. Ke borapeli ba ’nete boo Jehova a bo hlophisitseng le bo bileng teng ka lebaka la sehlabelo sa Jesu. Moapostola Pauluse o ile a hlalosa tlhophiso eo lengolong leo a ileng a le ngolla Bakreste ba Baheberu ba neng ba lula Judea. w23.10 24 ¶1-2

Ka selemo sa 522 pele ho mehla ea Jesu, lira tsa bona li ile tsa atleha ho etsa hore ’muso o ba thibele ho tsosolosa tempele ea Jehova. Empa Zakaria o ile a kholisa Bajuda hore Jehova o tla sebelisa moea oa hae o matla ho tlosa litšitiso tsohle tseo ba nang le tsona. Ka selemo sa 520 pele ho mehla ea Jesu, Morena Dariuse o ile a lokolla Bajuda hore ba tsoele pele ho tsosolosa tempele a ba a ba fa chelete. O ile a laela le babusisi hore ba ba thuse. (Esdr. 6:​1, 6-10) Jehova o ile a tšepisa batho ba hae hore o tla ba tšehetsa haeba ba ka etsa hore ho tsosolosa tempele e be eona ntho e tlang pele bophelong ba bona. (Hag. 1:​8, 13, 14; Zak. 1:​3, 16) Bajuda ba khutlileng Babilona ba ile ba khothatsoa ke mantsoe a baprofeta bao ’me ba tsoela pele ho tsosolosa tempele ka selemo sa 520 pele ho mehla ea Jesu eaba ba e qeta le pele ho feta lilemo tse hlano. Kaha ba ile ba eteletsa mosebetsi oa Molimo pele leha ba ne ba e-na le mathata a mangata, Jehova o ile a ba thusa. Ka lebaka leo, ba ile ba sebeletsa Jehova ba thabile.—Esdr. 6:​14-16, 22. w23.11 15 ¶6-7

Le hoja batho ba bangata ba kile ba utloela ka Abrahama, boholo ba bona ha ba tsebe hakaalo ka eena. Empa uena u tseba lintho tse ngata ka Abrahama. Ka mohlala, oa tseba hore Bibele e re Abrahama ke “ntate oa bohle ba nang le tumelo.” (Bar. 4:11) Leha ho le joalo, u ka ’na oa ipotsa: ‘Na nka etsisa Abrahama ’me ka ba le tumelo e tšoanang le ea hae?’ E, u ka khona. Tsela e ’ngoe eo re ka bang le tumelo e kang ea Abrahama ke ka ho ithuta mohlaleng oa hae. Abrahama o ile a mamela Molimo ’me a fallela naheng e hole, a lula litenteng ka lilemo tse mashome a ba a lumela ho etsa mora oa hae eo a mo ratang Isaka sehlabelo. O ile a etsa lintho tsena kaofela hobane a e-na le tumelo e matla. Tumelo eo Abrahama a ileng a e bontša ka liketso e ile ea etsa hore Molimo a mo rate ’me e be motsoalle oa hae. (Jak. 2:​22, 23) Jehova o batla hore kaofela ha rona, ho akareletsa le uena, re be metsoalle ea hae. Ka lebaka leo, o ile a susumeletsa Pauluse le Jakobo hore ha ba ngola Bibele ba bue ka mohlala oa Abrahama. w23.12 2 ¶1-2

Barali ba bo rona, ithuteng ho mamela le ho buisana le batho hantle. Ke habohlokoa hore Bakreste ba ithute ho bua le batho ba bang hantle. Jakobo o re file keletso e ka re thusang, e hlahang mantsoeng a ka holimo. Ha re mamela batho ba bang ka hloko ha ba bua, re bontša hore re ba ‘utloela bohloko.’ (1 Pet. 3:8) Haeba u sa utloisise hore na motho e mong o re’ng kapa o ikutloa joang, mo botse lipotso e le hore u utloisise. Inahane pele u bua. (Liprov. 15:28) Ipotse lipotso tsena: ‘Na ntho eo ke tl’o e bua ke ’nete ebile ea khothatsa? Na e bontša hore kea mo hlompha ebile e mosa?’ Ithute mohlaleng oa barali ba bo rona ba khonang ho bua hantle le batho ba bang. (Liprov. 31:26) Ela hloko tsela eo ba buang ka eona. Ha u ithuta ho bua le batho hantle, u tla phelisana le bona ka khotso. w23.12 21 ¶12

Mehleng ena, Jehova a ka sebelisa ba malapa a rona, metsoalle kapa baholo ho re tšehetsa. Leha ho le joalo, ha re utloile bohloko re ka ’na ra batla ho ikarola ho batho ba bang, ra batla ho lula re le bang. Ha ho makatse ho ikutloa joalo. Re ka etsa’ng e le hore re amohele tšehetso eo Jehova a re fang eona? Leka ka thata hore u se ke oa ikarola ho batho ba bang. Ha re ikarola ho batho ba bang, re ka ’na ra nahana ka rona feela le ka mathata ao re leng ka har’a ’ona. Ho nahana ka tsela ena ho ka etsa hore re se ke ra etsa liqeto tse nepahetseng. Ke ’nete hore kaofela ha rona re hloka ho ba bang ka linako tse ling, haholo-holo ha re hlahetsoe ke lintho tse bohloko. Empa haeba re ikarola ho batho ba bang nako e telele, re tla be re hana tsela eo Jehova a e sebelisang ho re tšehetsa. Kahoo, amohela thuso ea ba lelapa, metsoalle le baholo. Ba nke e le tsela eo Jehova a u tšehetsang ka eona.—Liprov. 17:17; Esa. 32:​1, 2. w24.01 24 ¶12-13

Banazari ba ne ba etsa boitlamo ka hore ba se ke ba kuta moriri. Ka ho etsa joalo, ba ne ba bontša hore ba mamela Jehova. Ka masoabi, ho ne ho e-na le nako eo ka eona Iseraele Banazari ba neng ba sa ananeloe le ho tšehetsoa. Ka linako tse ling Monazari o ne a hloka hore a bontše sebete e le hore a phethe boitlamo ba hae hore a phele ka tsela e fapaneng le ea batho ba bang. (Amose 2:12) Le rona ha re tšoane le batho ba bang hobane re khetha ho mamela Jehova. Re hloka ho ba sebete e le hore re ka bolella batho bao re sebetsang le bona kapa bao re kenang sekolo le bona hore re Lipaki Tsa Jehova. Ha tsela eo batho ba itšoereng ka eona e ntse e ba mpe le ho feta, ho ka ’na ha e-ba thata hore re mamele melao-motheo ea Bibele le hore re bolelle batho ba bang litaba tse monate. (2 Tim. 1:8; 3:13) Leha ho le joalo, re lokela ho lula re hopola hore re ‘thabisa pelo ea Jehova’ ha re le sebete ’me re sa tšabe ho fapana le batho ba sa mo sebeletseng.—Liprov. 27:11; Mal. 3:18. w24.02 16 ¶7; 17 ¶9

Phutheho ea Roma e ne e e-na le batho ba fapaneng haholo. E ne e e-na le Bajuda ba neng ba hotse ba rutoa ho mamela Molao oa Moshe e bile e e-na le Balichaba ba neng ba holisitsoe ka tsela e fapaneng hole le ea Bajuda. E ka ’na eaba Bakreste ba bang e ne e le makhoba, ba bang e se makhoba athe ba bang e ka ’na eaba e ne e le beng ba makhoba. Bakreste bao ba ne ba ka khona joang ho lula ba ratana le hoja ba fapane hakaalo? Moapostola Pauluse o ile a ba eletsa hore ba ‘amohelane.’ O ne a bolela’ng? Ka Segerike ho ‘amohelana’ ho bolela ho ba mosa ho motho kapa ho mo amohela ka mofuthu, joaloka ho mo amohela lelapeng la hao kapa ho mo etsa motsoalle oa hao. Ka mohlala, ha Pauluse a ne a bolella Filemone hore a amohele Onesimase e leng lekhoba la hae le neng le balehile, o ile a re: “U mo amohele ka mosa.” (Filem. 17) Prisilla le Akuila ba ile ba amohela Apolose ka hore ‘ba tsamaee le eena’ le hoja e ne e se Mokreste ea nang le boiphihlelo joaloka bona. (Lik. 18:26) Bakreste bao ha baa ka ba lumella lintho tseo ba fapanang ka tsona ho etsa hore ba se ke ba utloana empa ba ile ba amohelana ba ntse ba sa tšoane joalo. w23.07 6 ¶13

Lebaka la bohlokoa le etsang hore u batle ho inehela ho Jehova ke hobane oa mo rata. Ntho e ’ngoe e ka u susumeletsang hore u inehele ho eena ke hobane u e-na le “tsebo e ngata e nepahetseng” le “kutloisiso” ka eena. Lintho tseo u ithutileng tsona ka Jehova li entse hore u mo rate haholo. (Bakol. 1:9) Ho ithuta Bibele ho entse hore u kholisehe hore (1) Jehova o teng, (2) Bibele ke Lentsoe la hae le hore (3) o sebelisa mokhatlo oa hae ho etsa hore thato ea hae e phethahale. Batho ba inehetseng ho Jehova ba lokela ho tseba lintho tseo Bibele e li rutang ebile ba mamela melao ea Molimo. Ba leka kahohle ho bolella batho ba bang lintho tseo ba ithutileng tsona. (Mat. 28:​19, 20) Ba rata Jehova haholo ’me seo se etsa hore ba rapele eena feela. Na ke ka tsela eo u ikutloang ka eona? w24.03 4-5 ¶6-8

Abigaile o ne a nyetsoe ke Nabale, eo Bibele e reng o ne a le bohale a bile a itšoere hampe. (1 Sam. 25:3) E tlameha ebe ho ne ho le boima ho lula le monna ea joalo. Na Abigaile o ile a fumana monyetla oa hore a tsoe lenyalong leo? Ho joalo. O ile a fumana monyetla oo ha Davida, morena oa Iseraele oa nakong e tlang a ne a batla ho bolaea Nabale hobane a ne a mo rohakile le bahlanka ba hae. (1 Sam. 25:​9-13) Abigaile a ka be a ile a baleha e le hore a fe Davida monyetla oa hore a bolaee Nabale. Empa ho e-na le hoo, o ile a kopa Davida hore a se ke a mo bolaea. (1 Sam. 25:​23-27) Ke hobane’ng ha a ile a etsa joalo? Abigaile o ne a rata Jehova a bile a hlompha lenyalo joalokaha Jehova a le hlompha. O ne a tseba hore Jehova o nka lenyalo le halalela. O ne a batla ho thabisa Molimo ’me taba ena e ile ea mo susumeletsa ho sebetsa ka thata ho sireletsa lelapa la hae ho akareletsa le monna oa hae. O ile a potlakela ho thiba Davida e le hore a se ke a bolaea Nabale. w24.03 16-17 ¶9-10

Na ho na le batho ba phuthehong ea heno ba lekang ho etsa liphetoho bophelong ba bona e le hore ba tle ba khone ho sebeletsa Jehova haholoanyane? Na u tseba bacha bao ka sebete ba etsang lintho tse sa tšoaneng le tseo bacha ba bang ba li etsang sekolong le hoja ho le thata? Na ho na le batho ba tobaneng le bothata ba ho hanyetsoa ke ba malapa a bona ka lebaka la tumelo ea bona? A re sebeliseng monyetla o mong le o mong oo re o fumanang ho khothatsa Bakreste-’moho le rona bana ba ratehang, re ba bontše kamoo re ananelang hore ebe ba tela lintho tse ling e le hore ba sebeletse Jehova le kamoo ba bontšang sebete kateng. (Filem. 4, 5, 7) Jehova oa tseba hore re batla ho mo thabisa le hore re ikemiselitse ho tela lintho tse itseng e le hore re phelele boinehelo ba rona. Oa re tlotla ka ho re fa monyetla oa hore re ikhethele tsela eo re ka mo bontšang ka eona hore rea mo rata. (Liprov. 23:​15, 16) E se eka re ka ikemisetsa ho tsoela pele re sebeletsa Jehova le ho mo etsetsa sohle seo re ka se khonang. w24.02 18 ¶14; 19 ¶16

Ak’u nahane ka se ileng sa etsahala ha Jesu a qala tšebeletso ea hae ka selemo sa 29. Ka le leng Jesu le ’mè oa hae Maria ba ne ba menngoe moketeng oa lenyalo Kana. Maria o ne a thusana ka ho hlokomela baeti. Ha mokete o ntse o tsoela pele veine e ile ea fela. Hang-hang Maria o ea ho mora oa hae ’me o re: “Ha ba na veine.” (Joh. 2:​1-3) Jesu o fetola metsi “veine ea boleng bo phahameng.” (Joh. 2:​9, 10) Jesu o ile a etsa mehlolo e mengata nakong ea tšebeletso ea hae. O ile a sebelisa matla a hae a hlollang ho thusa batho ba likete-kete. Ka mohlala, o ile a fepa batho ka mohlolo ka makhetlo a mabeli. Lekhetlong la pele o ile a fepa banna ba 5 000, la bobeli a fepa ba 4 000. Ho ka etsahala hore kaofela o ile a fepa batho ba 27 000 ha ho kopanyeletsoa basali le bana. (Mat. 14:​15-21; 15:​32-38) Mohla a neng a etsa mehlolo eo, Jesu o ile a boela a folisa batho ba bangata ba neng ba kula.—Mat. 14:14; 15:​30, 31. w23.04 2 ¶1-2

Ka mor’a hore re hlaheloe ke ntho e bohloko haholo, ho na le linako tseo re ka ikutloang re se na matla re bile re imetsoe maikutlong. Re ka utloa re thatafalloa ke ho tsoha, re batla ho robala feela joaloka Elia. (1 Mar. 19:​5-7) Re ka hloka thuso e le hore re lule re sebeletsa Jehova. Linakong tse joalo, Jehova o re tiisetsa hore o tla re thusa joalokaha mantsoe a temana ea letsatsi ea kajeno a bontša. Jehova o ile a thusa Morena Davida. Ha a ne a tobane le lira tsa hae le liteko, o ile a re ho Jehova: “Letsoho la hao le letona lea ntšehetsa.” (Pes. 18:35) Hangata Jehova o re tšehetsa ka ho susumeletsa batho ba bang hore ba re thuse. Ka mohlala, ka lekhetlo le leng ha Davida a ne a nyahame, motsoalle oa hae Jonathane o ile a ea ho eena ’me a mo tšehetsa a ba a mo khothatsa. (1 Sam. 23:​16, 17) Ka tsela e tšoanang, Jehova o ile a khetha Elisha hore a thuse Elia.—1 Mar. 19:​16, 21; 2 Mar. 2:2. w24.01 23-24 ¶10-12

Jehova o seatla se bulehileng ebile o re fa lintho tse ngata. Re ithuta taba ena mohlaleng oa mosali ea tšoantšetsang “bohlale” eo Liproverbia khaolo ea borobong e buang ka eena. Litemana tsena li re mosali enoa o memela batho ha hae e le hore ba je lijo tse monate, nama le veine tseo a li hlophisitseng. (Liprov. 9:2) Temana ea bone le ea bohlano e re mosali eo o re ho ea se nang kelello: “Tloo, u je bohobe ba ka.” Ke hobane’ng ha re lokela ho amohela memo ea hae? Jehova o batla hore bana ba hae ba be bohlale ba be ba lule ba sireletsehile. Ha a batle hore re utloe ka letlalo. Kahoo, “o bolokela ba lokileng bohlale.” (Liprov. 2:7) Ha re hlompha Jehova haholo, re tla batla ho lula re mo thabisa. Re tla mamela likeletso tsa hae re be re thabele ho etsa lintho tseo a reng re li etse.—Jak. 1:25. w23.06 23 ¶14-15

Le haeba re sa khone ho etsa lintho tsohle tseo re batlang ho li etsa ha re ntse re sebeletsa Molimo, re ka kholiseha hore Jehova o ananela boiteko bohle boo re bo etsang ba ho mo khahlisa. Re tseba seo joang? Mehleng ea Zakaria, Jehova o ile a kopa Zakaria hore a etse korone ka khauta le silevera tse romeletsoeng Jerusalema ke Bajuda ba neng ba setse Babilona. (Zak. 6:11) ‘Korone eo e kholo’ e ne e tla ba “sehopotso” sa menehelo eo Bajuda bao ba faneng ka eona ka ho rata. (Zak. 6:​14, nal.) Re ka kholiseha hore Jehova a ke ke a lebala boiteko boo re bo etsang ka pelo eohle ba ho mo sebeletsa leha ho le thata. Joang kapa joang re tla lula re kopana le mathata mehleng ena ea bofelo ’me maemo a ka ’na a mpefala le ho feta nakong e tlang. (2 Tim. 3:​1, 13) Leha ho le joalo, ha rea lokela ho tšoenyeha ho tlola. Re hopole hore mehleng ea Hagai, Jehova o ile a re ho batho ba hae: “Ke na le lona . . . Le se ke la tšoha.” (Hag. 2:​4, 5) Le rona re ka kholiseha hore Jehova o tla ba le rona hafeela re etsa sohle seo re ka se khonang ho etsa thato ea hae. w23.11 19 ¶20-21

Jehova a ka be a entse hore liphoso tsa moapostola Petrose li se ke tsa ngoloa ka Bibeleng. Empa o entse hore li ngoloe e le hore re ka ithuta mohlaleng oa hae. (2 Tim. 3:​16, 17) Ho ithuta ka monna enoa ea neng a etsa liphoso joaloka rona ho tla re thusa ho bona hore Jehova ha aa lebella hore re se ke ra etsa liphoso. O batla hore re tsoele pele re mo sebeletsa ho sa tsotellehe hore na re mo fosetsa hakae. Ke hobane’ng ha re lokela ho lula re leka ho etsa lintho tse nepahetseng? Re ka hlola bothata bo itseng boo re nang le bona empa re ka iphumana re entse phoso e tšoanang hape. Leha ho le joalo, ha re nyahame empa re leka kahohle ho hlola bothata boo. Ka linako tse ling re bua le ho etsa lintho tseo hamorao re ikoahlaelang tsona empa Jehova o tla re thusa hore re ntlafatse haeba re sa nyahame empa re lula re leka ho etsa lintho tse nepahetseng. (1 Pet. 5:10) Ho nahana kamoo Jesu a ileng a utloela Petrose bohloko kateng le hoja a ne a etsa liphoso, ho ka re thusa hore re se ke ra nyahamisoa ke liphoso tsa rona ha re ntse re sebeletsa Jehova. w23.09 20-21 ¶2-3

Jesu a ka be a folisitse Lazaro joalokaha Maretha a boletse temaneng ea letsatsi ea kajeno. Empa o ne a batla ho etsa ntho e hlollang ho feta moo. O ile a re: “Khaitseli ea hao e tla tsoha.” Hape o ile a re: “Ke ’na tsoho le bophelo.” (Joh. 11:​23, 25) Molimo o file Jesu matla a ho tsosa bafu. Pejana ho moo, o ne a ile a tsosa ngoanana e mong nakoana ka mor’a hore a shoe hape o ile a tsosa mohlankana e mong letsatsing leo a shoeleng ka lona. (Luka 7:​11-15; 8:​49-55) Empa na o ne a ka khona ho tsosa motho ea nang le matsatsi a mane a shoele a bile a se a ntse a qalile ho bola? Khaitseli ea Lazaro e ’ngoe e leng Maria, o ile a ea ho Jesu. O ile a bua mantsoe a tšoanang le a ngoan’abo, a re: “Morena, hoja u ne u le teng khaitseli ea ka e ka be e sa shoa.” (Joh. 11:32) Ha Jesu a bona a ba a utloa Maria le ba bang ba lla, o ile a sareloa haholo. O ile a ba utloela bohloko eaba oa lla. O ne a utloisisa hore na ho bohloko hakae ho shoeloa ke motho eo u mo ratang. E tlameha ebe o ne a labalabela ho ba tšelisa ka hore a tsose Lazaro. w23.04 10-11 ¶12-13