May

Ho ile ha e-ba le tlala e kholo “lefatšeng lohle.” Bakreste ba mehleng ea baapostola le bona ba ile ba angoa ke tlala eo. E tlameha ebe lihlooho tsa malapa li ne li tšoenyehile ka hore na li tla hlokomela malapa a tsona joang. Bacha ba neng ba batla ho sebeletsa Jehova haholoanyane bona ba ile ba ameha joang? Na ba ile ba nahana hore ba ke ba eme hanyane ho fihlela tlala eo e fela? Bakreste bao ba ile ba tloaela maemo ao ho sa tsotellehe mathata ao ba neng ba e-na le ’ona. Ba ile ba tsoela pele ho etsa mosebetsi oa boboleli ’me ba ne ba thabela ho arolelana lintho tseo ba neng ba e-na le tsona le Bakreste-’moho le bona ba Judea. (Lik. 11:​29, 30) Ba ile ba bona hore Jehova oa ba thusa ha ba fumana lintho tseo ba li hlokang. (Mat. 6:​31-33) E tlameha ebe e ile ea e-ba metsoalle ea Bakreste-’moho ba ileng ba ba thusa. Batho ba ileng ba fana ka monehelo kapa ba ba thusa ka litsela tse ling ba ile ba thaba.—Lik. 20:35. w23.04 16 ¶12-13

Ka linako tse ling Jehova o araba lithapelo tsa bahlanka ba hae ka ho etsa hore batho ba sa mo sebeletseng ba ba thuse. Ka mohlala, o ile a etsa hore Morena Artaseksese a lumelle Nehemia hore a khutlele Jerusalema e le hore a ka thusa ka ho tsosolosa marako a eona. (Neh. 2:​3-6) Le mehleng ena Jehova a ka etsa hore batho ba sa mo sebeletseng ba re thuse ha ho hlokahala. Ha se kamehla lithapelo tsa rona li arajoang ka tsela e mohlolo. Empa Ntate oa rona ea leholimong o re araba ka ho re fa lintho tseo re li hlokang e le hore re lule re mo tšepahalla. Leka ho hlokomela hore na Jehova o u araba joang. U lokela ho itloaetsa ho nahana kamoo Jehova a arabang lithapelo tsa hao kateng. (Pes. 66:​19, 20) Re lokela ho bontša hore re na le tumelo ha re rapela Jehova le ha re amohela tsela leha e le efe eo a re arabang ka eona.—Baheb. 11:6. w23.05 11 ¶13; 12 ¶15-16

Ha re ne re tšepisa hore re tla sebeletsa Jehova, re ile ra ikana ka hore re tla mo rapela re be re etse thato ea hae. Re lokela ho phethahatsa tšepiso eo. Ho etsa seo re se tšepisitseng ha se ntho e thata ho e etsa. Jehova o re bopetse hore re etse thato ea hae. (Tšen. 4:11) Kaha o re bopile ka setšoantšo sa hae, re batla ho mo tseba le ho mo rapela. Kahoo, re khona ho ba metsoalle ea hae ebile rea thaba ha re etsa thato ea hae. Hape ha re etsa thato ea Molimo ’me re latela Mora oa hae re “tla khatholoha.” (Mat. 11:​28-30) Kahoo, etsa lintho tse u thusang hore u lule u rata Jehova ka hore u nahanisise ka lintho tsohle tseo Jehova a u etselitseng tsona le ka litlhohonolofatso tseo a tl’o u fa tsona. Ha u ntse u tsoela pele u rata Jehova, ho tla ba bonolo hore u mo mamele. (1 Joh. 5:3) Jesu o ile a khona ho etsa thato ea Molimo hobane o ne a kopa thuso ho Jehova ka thapelo ebile a lula a nahana ka litlhohonolofatso tseo a tl’o li fumana. (Baheb. 5:7; 12:2) Re ka etsisa Jesu ka hore re kope Jehova ka thapelo hore a re fe matla le ka ho lula re nahana ka tšepiso ea bophelo bo sa feleng. w23.08 27-28 ¶4-5

Kaofela ha rona re rata batho ba nang le mamello. Re hlompha batho ba khonang ho emela lintho ba sa fele pelo. Rea thaba ha batho ba bang ba re mamella ha re etsa liphoso. Hape re ananela hore ebe motho ea re rutileng Bibele o ile a re mamella ha re ne re thatafalloa ho utloisisa, ho lumela kapa ho etsa ntho eo re ithutileng eona Bibeleng. Empa haholo-holo re ananela hore ebe Jehova Molimo oa re mamella. Le hoja re rata ha batho ba bang ba e-na le mamello, ka linako tse ling rona re ka thatafalloa ho ba le eona. Mohlala, re ka thatafalloa ho ba le mamello ha sephethephethe se le sengata tseleng, haholo haeba re le morao nakong. Re ka halefa ha batho ba bang ba etsa lintho tse re tenang. Hape re ka thatafalloa ho emela lefatše le lecha leo Jehova a le tšepisitseng. Leha ho le joalo, re lokela ho ba le mamello lintlheng tsena kaofela. w23.08 20 ¶1-2

Jehova o ile a re Gideone a khutlisetse masole a mangata morao. E ka ’na eaba o ile a ipotsa: ‘Na kannete hoa hlokahala? Na re tla atleha?’ Leha ho le joalo, Gideone o ile a mamela. Mehleng ena baholo ba etsisa Gideone ka hore ba mamele ha mokhatlo o ba fa tataiso e ncha. (Heb. 13:17) Gideone o ile a mamela Jehova le hoja a ne a tšohile a bile a etsa mosebetsi o kotsi. (Baahl. 9:17) Gideone o ne a kholisehile hore o tla khona ho sireletsa bahlanka ba Jehova hobane Jehova o ile a mo tiisetsa hore o tla mo thusa. Baholo ba lulang libakeng tseo mosebetsi oa rona o thibetsoeng ho tsona ba ka etsisa Gideone. Ba etella pele liboka le tšebeletso ea tšimo ka sebete le hoja ba ka ’na ba tšoaroa, ba hlongoa lipotso, ba lahleheloa ke mesebetsi kapa ba loantšoa. Nakong ea mahlomola a maholo, baholo ba tla lokela ho bontša sebete ka hore ba mamele litaelo tseo ba tla li fuoa le hoja ho ka ba kotsi. w23.06 5-6 ¶12-13

Jehova o kenyelelitse pale ea Moprista ea Phahameng Jehojada ka Bibeleng e le hore re ka ithuta ho eona. (Bar. 15:4) Hape ha Jehojada a shoa, o ile a fuoa tlotla e ikhethang ea ho patoa “le marena Motseng oa Davida ka lebaka la lintho tse ntle tseo a neng a li etselitse batho ba Iseraele, Molimo oa ’nete le ntlo ea Molimo. (2 Likron. 24:​15, 16) Pale ea Jehojada e ka re thusa hore kaofela ha rona re ithute ho hlompha Molimo. Baholo ba ka etsisa Jehojada ka hore ba etse sohle seo ba ka se khonang ho sireletsa phutheho. (Lik. 20:28) Mohlala oa Jehojada o ka ruta ba holileng lilemong hore haeba ba lula ba hlompha Jehova ebile ba mo tšepahalla, a ka ba sebelisa ho phethahatsa merero ea hae. Bacha ba ka ela hloko tsela eo Jehova a ileng a sebetsana le Jehojada ka eona le ho mo etsisa ka hore ba hlomphe bara le barali ba bo rona ba holileng, haholo-holo ba sebelelitseng Jehova ka botšepehi ka lilemo tse ngata. (Liprov. 16:31) A re tšehetseng ba re “etellang pele” ka hore re ba mamele.—Baheb. 13:17. w23.06 17 ¶14-15

E-ba le temoho ha u khetha ho arabela ha u le libokeng. Ha u phahamisa letsoho hangata sena se ka etsa hore mor’abo rona ea khannang thuto a ikutloe a tlamehile ho u khetha le hoja ba bang ba e-s’o ka ba e-ba le monyetla oa ho arabela. Hape sena se ka nyahamisa ba bang hore ba phahamise matsoho. (Moek. 3:7) Ha ho e-na le batho ba bangata ba phahamisitseng matsoho nakong ea thuto, re ka ’na ra se ke ra fumana monyetla oa ho arabela hangata kamoo re ka thabelang. Ka linako tse ling thuto e ka fela re sa khethoa. Ntho eo e ka re utloisa bohloko empa ha rea lokela ho koata haeba re sa khethoa. (Moek. 7:9) Haeba ha oa khona ho araba hangata joalokaha u ne u lakalitse, sebelisa monyetla oo ho mamela likarabo tsa ba bang e le hore u ka ba babatsa ka mor’a liboka. Bakreste-’moho le uena ba ka khothatsoa ke ha u ba babatsa joalokaha ba ne ba ka khothatsoa ke likarabo tsa hao. w23.04 23-24 ¶14-16

Bala Lentsoe la Molimo u be u nahanisise ka lona. Sefate se ka ema se tiile haeba se e-na le metso e tebileng. Ka ho tšoanang, re ka lula re tiile haeba re e-na le tumelo Lentsoeng la Molimo. Ha sefate se hola, metso ea sona e teba le ho feta ebile ea nama. Ha re bala Lentsoe la Molimo le ho nahanisisa ka lona, tumelo ea rona e ba matla ebile re ba le kholiseho ea hore litsela tsa Molimo li molemo. (Bakol. 2:​6, 7) Nahana ka litaelo tseo Jehova a ileng a li fa bahlanka ba hae nakong e fetileng, tsela eo a ileng a ba tataisa ka eona le ho ba sireletsa le hore na lintho tsena li ile tsa ba thusa joang. Ka mohlala, Ezekiele o ile a shebisisa ha lengeloi le ne le metha tempele eo a e boneng. Pono ena e ile ea matlafatsa Ezekiele ebile e re bontša litsela tseo re ka hlomphang melao ea Jehova ea hore na re mo rapele joang. (Ezek. 40:​1-4; 43:​10-12) Hape ho bala le ho nahanisisa ka lintho tse tebileng tse ka Lentsoeng la Molimo ho ka re thusa. Re ka tšepahala ’me ra lula re tšepile Jehova.—Pes. 112:7. w23.07 18 ¶15-16

Bibele e na le mehlala e mengata e metle eo bara ba bo rona ba bacha ba ka e etsisang. E na le mehlala ea banna ba neng ba rata Molimo ba bile ba hlokomela batho ba Molimo ka litsela tse fapaneng. U ka boela oa fumana mehlala ea banna ba Bakreste ba nang le tumelo e matla lapeng leno le ka phuthehong. (Baheb. 13:7) U ka etsisa le mohlala oa Jesu Kreste. (1 Pet. 2:21) Ha u ntse u ithuta mehlala ea bona hantle, nahana ka makhabane a bona ao u a ratang. (Baheb. 12:​1, 2) Ka mor’a moo, u shebe hore na u ka ba etsisa joang. Monna ea nang le kelello o nahana hantle pele a etsa lintho. Kahoo, u lokela ho sebetsa ka thata e le hore u lule u etsa lintho tse nang le kelello. Qala ka ho ithuta ho tsoa ka Bibeleng hore na Jehova o nahana le ho ikutloa joang ebe oa nahana hore na ke hobane’ng ha ho le molemo ho etsa seo a reng u se etse. Ka mor’a moo, sebelisa lintho tseo u ithutileng tsona e le hore u etse liqeto tse tla thabisa Jehova. (Pes. 119:9) Ho ithuta ho nahana ka tsela ena ho tla u thusa hore qetellong u be monna oa Mokreste ea nang le tumelo e matla.—Liprov. 2:​11, 12; Baheb. 5:14. w23.12 24-25 ¶4-5

Batsoali ba ka ruta bana ba bona hore ba arabe ka tsela e bonolo ha ba botsoa lipotso ka lintho tseo ba li lumelang. (Jak. 3:13) Batsoali ba bang ba lokisetsa hammoho le bana ba bona nakong ea borapeli ba lelapa. Ba nahana ka lihlooho tseo bana ba bona ba ka botsoang ka tsona ha ba le sekolong ebe ba buisana ka tsona ’me ba ba bontša hore na ba ka araba joang. Hape ba ruta bana ba bona hore ba bue ka tsela e bonolo le e tla etsa hore batho ba batle ho ba mamela. Ho lokisetsa esale pele ho ka thusa bacha hore ba fane ka mabaka a utloahalang ha ba hlalosetsa batho ba bang ka lintho tseo ba li lumelang le hore ba kholisehe ka tsona. Sehlooho se reng “Bacha Baa Botsa” se hlahang lihloohong tse ho jw.org/st se na le karolo e nang le maqephe ao bacha ba ka ngollang lintlha ho ’ona. Karolo ena e etselitsoe ho thusa bacha hore ba kholisehe ka lintho tseo ba li lumelang le hore ba arabe ka mantsoe a bona. Ho bala lihlooho tsena le le lelapa ho ka le thusa hore le buelle lintho tseo le li lumelang ka bonolo le ka tsela e tla etsa hore batho ba batle ho le mamela. w23.09 17 ¶10; 18 ¶15-16

Na u kile oa batla ho etsetsa Jehova ntho e itseng empa oa thatafalloa ke ho e finyella? Haeba ho joalo, ha u mong. Ka mohlala, Mor’abo rona Philip o ne a batla ho ntlafatsa lithapelo tsa hae empa o ne a thatafalloa ke ho fumana nako ea ho rapela. Morali oa bo rona Erika o ne a batla ho fihla sebokeng sa tšebeletso ea tšimo ka nako empa o ne a lula a fihla ka mor’a nako. Haeba u batla ho etsa ntho e itseng empa u e-s’o ka u e finyella, u se ke oa nyahama. Re ntse re lokela ho sebetsa ka thata leha re etsa lintho tse nyenyane tseo re batlang ho li finyella. Taba ea hore u batla ho finyella seo u se rerileng ea bontša hore Jehova ke motsoalle oa hao oa bohlokoa ’me u batla ho mo fa se molemo. Jehova o ananela seo u mo etsetsang sona. Ha a lebella hore u etse lintho tseo u ke keng oa khona ho li etsa. (Pes. 103:14; Mik. 6:8) Kahoo, ha u batla ho etsa ntho e itseng, etsa bonnete ba hore u tla khona ho e finyella. w23.05 26 ¶1-2

Ho ka etsahala hore batho ba sebete ba tšohe empa ha ba lumelle hore seo se ba sitise ho etsa lintho tse nepahetseng. Daniele e ne e le mocha ea sebete. O ile a bala mangolo a baprofeta ba Molimo ho akareletsa le lengolo la moprofeta Jeremia. Ha Daniele a ntse a ithuta boprofeta boo, o ile a hlokomela hore Bajuda ba neng ba le botlamuoeng Babilona ka nako e telele ba haufi le ho lokolloa. (Dan. 9:2) Daniele o ile a bona ha boprofeta boo bo phethahala ’me seo se ile sa mo thusa hore a tšepe Jehova. Kahoo, batho ba tšepang Jehova ba ka khona ho ba sebete. (Bapisa le Baroma 8:​32, 37-39.) Ntho ea bohlokoa le ho feta ke hore Daniele o ne a lula a rapela Ntate oa hae ea leholimong. (Dan. 6:10) O ne a bolella Jehova libe tsa hae le kamoo a neng a ikutloa kateng. Daniele o ne a boetse a kopa thuso ho Jehova. (Dan. 9:​4, 5, 19) Ha aa hlaha a le sebete hobane e ne e le motho joaloka rona. Empa ho ithuta mangolo a baprofeta, ho rapela le ho tšepa Jehova ho ile ha mo thusa hore a be sebete. w23.08 3 ¶4; 4 ¶7

Ho mamela balaoli ba phahameng ho tla tsoela rona le batho ba bang molemo. Joang? Molemo o mong ke hore ha re mamela re ke ke ra fumana kotlo. (Bar. 13:​1, 4) Ho mamela balaoli ba phahameng ho ka ama tsela eo ba shebang Lipaki Tsa Jehova ka eona. Ka mohlala, lilemo tse ngata tse fetileng naheng ea Nigeria, masole a ile a kena Holong e ’ngoe ea ’Muso nakong eo ho ntseng ho tšoeroe liboka, a ntse a batla batho ba hanang ho patala lekhetho. Empa lesole le neng le a okametse la re a tsamaee eaba le re: “Lipaki Tsa Jehova li patala lekhetho.” Kamehla ha u mamela melao ea ’muso, u etsa hore batho ba Jehova ba be le lebitso le letle. Ka le leng taba eo e ka sireletsa bana beno. w23.10 9 ¶13

Bahlanka ba bang ba Jehova ba na le nako e telele ba emetse hore bofelo bo fihle. Batho ba bangata ba bona eka bofelo bo nka nako e telele ho tla. Empa Jehova o tseba kamoo bahlanka ba hae ba ikutloang kateng, ke kahoo a ileng a re ho moprofeta Habakuke: “Pono ena e sa emetse nako ea eona. E haufi le ho phethahala, e tla fela e phethahale. Leha e ka bonahala eka ea lieha, u ’ne u e lebelle. Joang kapa joang e tla phethahala. E ke ke ea siuoa ke nako.” (Hab. 2:3) Na mantsoe aa a ne a ngoletsoe Habakuke feela? Kapa na le rona a ka re thusa? Jehova o ile a laela moapostola Pauluse hore a bolelle Bakreste ba letetseng lefatše le lecha mantsoe a tšoanang le ana. (Baheb. 10:37) Kahoo, le hoja re ka bona eka tšepiso ea Jehova ea ho re pholosa e nka nako e telele ho phethahala, “joang kapa joang e tla phethahala. E ke ke ea siuoa ke nako.” w23.04 30 ¶16

Baiseraele ba bangata ba ile ba hana bopaki ba hore Jehova o ne a sebelisa Moshe hore a bue le bona. (Num. 14:​10, 11) Ka makhetlo a mangata ha baa ka ba amohela hore Moshe o sebelisoa ke Jehova hore a ba tataise. Kahoo, Jehova ha aa ka a lumella hore Baiseraele bao ba kene Naheng e Tšepisitsoeng. (Num. 14:30) Baiseraele ba bang ba ile ba latela tataiso ea Jehova. Ka mohlala, Jehova o ile a re: “Kalebe . . . o ile a ’na a ntatela ka pelo eohle.” (Num. 14:24) Molimo o ile a hlohonolofatsa Kalebe a ba a mo fa karolo ea naha eo a neng a ikhethetse eona Kanana. (Josh. 14:​12-14) Baiseraele ba ileng ba kena Naheng e Tšepisitsoeng le bona ba ile ba beha mohlala o motle ka hore ba mamele tataiso ea Jehova. Ha Joshua a khethoa hore e be moeta-pele oa Baiseraele ka mor’a Moshe, ba ile “ba mo hlompha haholo bophelo bohle ba hae.” (Josh. 4:14) Kahoo, Jehova o ile a ba hlohonolofatsa ka hore a ba ise naheng eo a neng a ba tšepisitse eona.—Josh. 21:​43, 44. w24.02 21 ¶6-7

Ngaka e khona ho bona hore na pelo e phetse hantle ka hore e hlahlobe lebelo leo pelo e otlang ka lona. Le rona re ka bona hore na re rata Molimo hakae ka hore re hlahlobe tsela eo re ratang batho ba bang ka eona. Haeba re hlokomela hore ha re sa rata Bakreste-’moho le rona joaloka pele, e ka ’na eaba taba eo ke letšoao la hore lerato leo re ratang Molimo ka lona le ntse le fokotseha. Empa haeba re lula re bontša hore re rata Bakreste-’moho le rona, rea bontša hore re rata Molimo haholo. Haeba lerato leo re ratang bana ba bo rona ka lona le ntse le fokotseha, boo ke bothata bo tebileng. Hobane’ng? Hobane haeba ho joalo, re kotsing ea ho senyeheloa ke kamano ea rona le Jehova. Moapostola Johanne o totobatsa taba ena ha a re: “Motho a ka rata Molimo eo a e-s’o mo bone joang empa a sa rate ngoan’abo eo a mo bonang?” (1 Joh. 4:20) Taba ee e re ruta’ng? Jehova o tla thaba haeba feela re “ratana.”—1 Joh. 4:​7-9, 11. w23.11 8 ¶3; 9 ¶5-6

Morena Joase o ile a etsa liqeto tse bohlale ha a sa le monyenyane. Kaha o ne a se na ntate, o ile a latela tataiso ea monna ea tšepahalang e leng Moprista ea Phahameng Jehojada. Moprista eo o ile a ruta Joase joalokaha eka ke mora oa hae. Ka lebaka leo, Joase o ile a etsa qeto e bohlale ka ho sebeletsa Jehova le ho thusa sechaba sohle hore le sona se mo sebeletse. O ile a ba a qala mosebetsi oa ho lokisa tempele ea Jehova. (2 Likron. 24:​1, 2, 4, 13, 14) Haeba batsoali ba hao kapa motho e mong a u ruta ho rata Jehova le ho mamela melao le melao-motheo ea hae, tseba hore eo ke mpho ea bohlokoa. (Liprov. 2:​1, 10-12) Batsoali ba hao ba ka sebelisa litsela tse fapaneng ho u ruta. Batsoali ba hao ba tla thaba ha u mamela likeletso tsa bona tse thehiloeng Bibeleng.Habohlokoa le ho feta ke hore u tla thabisa Molimo ’me kamano ea hao le eena e tla ba matla le ho feta. (Liprov. 22:6; 23:​15, 24) Ao ke mabaka a utloahalang a ho etsisa mohlala oa Joase ha a sa le monyenyane. w23.09 8-9 ¶3-5

Jehova o tšepisa hore o tla mamela lithapelo tsa rona. Molimo oa rona oa re rata hobane re mo sebeletsa ka botšepehi. Kahoo, o tla lula a mamela lithapelo tsa rona. (Pes. 10:17; 37:28) Leha ho le joalo, sena ha se bolele hore o tla re fa ntho e ’ngoe le e ’ngoe eo re e kopang. Re ka ’na ra tlameha ho emela lefatše le lecha pele re ka fumana tse ling tsa lintho tseo re mo kopileng tsona. Jehova o lula a nahana ka morero oa hae ha a mamela lithapelo tsa rona. (Esa. 55:​8, 9) Morero oa hae o akareletsa hore batho bohle ba mo mamele le hore ba thabele ho busoa ke eena. Empa Satane o re batho ba ka thaba ha ba ipusa. (Gen. 3:​1-5) Jehova o lumeletse hore batho ba ipuse e le ho bontša hore ntho eo Diabolose a e buileng ke leshano. Ho e-na le hoo, taba ea hore batho baa ipusa e entse hore ho be le mathata a mangata lefatšeng. (Moek. 8:9) Rea tseba hore Jehova a ke ke a felisa mathata ’ohle ao batho ba nang le ’ona hona joale. w23.11 21 ¶4-5

Jehova o ile a tšepisa Abrahama hore ka eena lichaba tse ngata li ne li tla hlohonolofatsoa. Leha ho le joalo,ha Abrahama a se a le lilemo li 100 ’me Sara eena a le lilemo li 90, ba ne ba ntse ba e-s’o be le mora. Ho ea ka pono ea motho, ho ne ho bonahala eka ho ke ke ha khoneha hore Abrahama le Sara ba be le mora. Taba ena e ne e leka tumelo ea Abrahama. Empa “o ne a e-na le tšepo le tumelo ea hore e tla ba ntate oa lichaba tse ngata.” (Bar. 4:​18, 19) Qetellong, ntho eo Abrahama a neng a e-na le tšepo ea hore e tla etsahala, e ile ea etsahala. O ile a ba le mora ea bitsoang Isaka. (Bar. 4:​20-22) Re ka khahlisa Molimo ra ba ra nkoa re lokile joaloka Abrahama. Ha e le hantle, Pauluse o ile a hatisa taba eo ha a ne a re: “Mantsoe a reng ‘o ile a nkoa’ a ne a sa ngolloa [Abrahama] feela empa a ne a ngoletsoe le rona. Le rona re tla nkoa re lokile hobane re lumela ho Molimo ea tsositseng Jesu.” (Bar. 4:​23, 24) Le rona re lokela ho ba le tumelo e nang le mesebetsi, re be re be le tšepo joaloka Abrahama. w23.12 7 ¶16-17

Ha u hlaheloa ke mathata a etsang hore u tšohe, u lokela ho hopola hore Jehova o hlokomela mathata a u hlahelang ebile oa tseba hore na a etsa hore u ikutloe joang. Ka mohlala, Jehova ha aa ka a hlokomela feela tsela e mpe eo Baiseraele ba neng ba tšoeroe ka eona Egepeta empa o ile a hlokomela le ‘bohloko boo ba neng ba bo utloa.’ (Ex. 3:7) U ka ’na oa ipotsa hore na Jehova o u thusa joang ha u e-na le bothata bo etsang hore u tšohe. Kahoo, mo kope hore a u bontše tsela eo a u thusang ka eona. (2 Mar. 6:​15-17) Ka mor’a moo, nahana ka lipotso tsena: Na ho na le puo kapa karabo eo u ileng oa e utloa libokeng e ileng ea u matlafatsa? Na ho na le sengoloa, video kapa pina ea Broadcasting e u khothalitseng? Na ho na le motho ea ileng a bua mantsoe a u khothatsang kapa a u balla lengolo le u khothatsang? Re ka ’na ra lebala kamoo Bakreste-’moho le rona ba re ratang kateng le kamoo Lentsoe la Molimo le re khothatsang kateng. Leha ho le joalo, lintho tsena ke limpho tsa bohlokoa tse tsoang ho Jehova. (Esa. 65:13; Mar. 10:​29, 30) Lia re kholisa hore Jehova oa re khathalla. (Esa. 49:​14-16) Hape lia re kholisa hore re ka mo tšepa. w24.01 4-5 ¶9-10

Nakoana pele Jesu a khutlela leholimong, o ile a hopotsa barutuoa ba hae ka mosebetsi oa ho mo pakela “Jerusalema, libakeng tsohle tsa Judea le Samaria le karolong e hole-hole ea lefatše.” (Lik. 1:8; Luka 24:​46-48) Ka mor’a moo, baeta-pele ba Bajuda ba ile ba tšoara moapostola Petrose le Johanne eaba ba ba isa Lekhotleng le Phahameng la Bajuda. Ba ile ba tšosa banna bao ba tšepahalang le ho ba laela hore ba khaotse ho paka. (Lik. 4:​18, 21) Petrose le Johanne ba ile ba re: “Lona iketsetseng qeto hore na ho nepahetse mahlong a Molimo hore re mamele lona ho e-na le ho mamela eena. Empa rona re ke ke ra khaotsa ho bua ka lintho tseo re li boneng le tseo re li utloileng.” (Lik. 4:​19, 20) Ka mor’a hore Petrose le Johanne ba lokolloe, barutuoa ba ile ba rapela Jehova hore thato ea hae e etsahale. Jehova o ile a araba thapelo eo ea bona e tsoang pelong.—Lik. 4:31. w23.05 5 ¶11-12

Jehova le Mora oa hae ba qetile nako e ngata ka ho fetisisa ba le ’moho. Ka lilemo tse ngata tseo ba li qetileng ba le ’moho leholimong, ba ile ba utloana le ho ratana haholo. Joalokaha temaneng ea letsatsi ea kajeno e bontša, Jehova o ile a bontša ka ho hlaka hore o rata Jesu. Jehova a ka be a ile a re feela, ‘Enoa ke Mora oa ka ea nkhahlisang.’ Empa o ne a batla hore re tsebe hore na o rata Jesu hakae, ke kahoo a ileng a mo bitsa “Mora oa ka eo ke mo ratang.” Jehova o ne a le motlotlo ka Jesu, haholo-holo hobane a ne a ikemiselitse ho tela bophelo ba hae. (Baef. 1:7) Jesu le eena o ne a sa belaelle hore Ntate oa hae oa mo rata. O ne a kholisehile ho tsoa botebong ba pelo ea hae hore Jehova oa mo rata. O ile a bua ka makhetlo hore Ntate oa hae oa mo rata.—Joh. 3:35; 10:17; 17:24. w24.01 28 ¶8

Nahana ha motho eo u mo tsotellang a bua ntho e mpe ka uena. Oa tseba hore ntho eo a e buang ha se ’nete, ho ntse ho le joalo, batho ba bang baa mo kholoa. U sa re u sa utloile, ba hasa leshano leo ’me batho ba bang ba bangata baa ba kholoa. U ne u ka ikutloa joang? Mohlomong ho senngoa lebitso ka tsela eo ho ne ho tla u utloisa bohloko. Boemo bona bo ka re thusa ho utloisisa hore na Jehova o ile a ikutloa joang ha botumo ba hae bo botle bo ne bo senngoa. Lengeloi la hae le leng le ile la bua leshano ka eena ho mosali oa pele e leng Eva. Eva o ile a kholoa leshano leo eaba eena le Adama ba fetohela Jehova ka lebaka la lona. Ka lebaka leo, batho bohle ba etsa sebe ’me qetellong baa shoa. (Gen. 3:​1-6; Bar. 5:12) Mathata ’ohle a teng lefatšeng kajeno a akareletsang lefu, lintoa le lintho tse bohloko, a teng ka lebaka la mashano ao Satane a ileng a a jala. Na Jehova o utloisoa bohloko ke ho senngoa lebitso le litla-morao tse tlisoang ke hona? E tlameha ebe ho joalo. Leha ho le joalo, Jehova ha aa tlala lehloeo. Ho e-na le hoo, e ntse e le “Molimo ea thabileng.”—1 Tim. 1:11. w24.02 8 ¶1-2

U ka etsisa Josefa joang ka hore u etse se nepahetseng ha u tobana le teko e itseng? U ka etsa qeto hona joale ea hore na u tla etsa’ng ha u tobana le teko ea hore u etse lintho tse fosahetseng. Ithute ho hana hang-hang ho etsa lintho tseo Jehova a li hloileng ’me u qobe ho nahana ka tsona. (Pes. 97:10; 119:165) Ha u etsa joalo, u ke ke oa etsa sebe ha u tobana le teko. Mohlomong u se u ithutile ka Jehova ’me u batla ho mo sebeletsa ka pelo ea hao eohle empa ho ntse ho e-na le ntho e etsang hore u se ke oa inehela le ho kolobetsoa. U ka thusoa ke ho etsa seo Morena Davida a ileng a se etsa. U ka kopa Jehova oa re: “Ntlhahlobe Molimo ’me u bone se ka pelong ea ka. Ntlhahlobe ’me u tsebe lintho tse ntšoenyang tseo ke li nahanang. Sheba hore na ho na le ntho leha e le efe e mpe ka pelong ea ka. U ntsamaise tseleng e tla lula e le teng ka ho sa feleng.” (Pes. 139:​23, 24) Jehova o hlohonolofatsa batho bohle ba “mo batlang e le kannete.” Ha u ntse u sebetsa ka thata hore u inehele ho eena le ho kolobetsoa, oa mo bontša hore u mo batla e le kannete.—Baheb. 11:6. w24.03 6 ¶13-15

Moprista ea phahameng o ne a emela batho ka pel’a Molimo. Moprista ea phahameng oa pele Iseraele e ne e le Arone ’me Jehova o ile a mo khetha ha tabernakele e ne e khakoloa. Leha ho le joalo, moapostola Pauluse o ile a re “baprista ba ile ba hloleha ho tsoela pele ka mosebetsi oa bona oa boprista hobane ba ile ba shoa eaba ba nkeloa sebaka ke baprista ba bang.” (Baheb. 7:​23-26) Kaha baprista bao ba phahameng ba ne ba sa phethahala, ba ne ba lokela ho etsa mahlabelo bakeng sa libe tsa bona. Tabeng ena re bona phapang e kholo pakeng tsa baprista ba phahameng ba Iseraele le Moprista ea Phahameng ka ho fetisisa e leng Jesu Kreste. Moprista oa rona ea Phahameng e leng Jesu Kreste ke “mohlanka ea sebeletsang sechaba . . . tenteng ea ’nete e hlonngoeng ke Jehova eseng motho.” (Baheb. 8:​1, 2) Pauluse o ile a re “kaha Jesu o tla phela ka ho sa feleng, ha ho na motho ea tla mo hlahlama bopristeng.” Pauluse o ile a boela a re Jesu ke moprista “ea sa silafalang, ea fapaneng hole le baetsalibe” le hore ho fapana le baprista ba phahameng ba Iseraele, “ha a hloke ho etsa mahlabelo letsatsi le leng le le leng” bakeng sa libe tsa hae. w23.10 26 ¶8-9

“Leholimo la pele” ke mebuso ea lipolotiki e susumetsoang ke Satane le bademona ba hae. (Mat. 4:​8, 9; 1 Joh. 5:19) Ka Bibeleng lentsoe “lefatše” le ka bolela batho ba lulang lefatšeng. (Gen. 11:1; Pes. 96:1) Kahoo, “lefatše la pele” ke batho ba khopo ba phelang mehleng ena. Jehova a ke ke a lokisa “leholimo” le “lefatše” tse teng hona joale feela empa o tla li felisa ka ho feletseng. O tla felisa leholimo le lefatše tsa hona joale ’me a etse hore ho be le “leholimo le lecha le lefatše le lecha” e leng ’muso o mocha o tla busa batho ba lokileng. Jehova o tla lokisa lefatše a be a etse hore batho ba phethahale. Joalokaha Esaia a ile a bua nakong e fetileng, lefatše lohle e tla ba serapa se setle sa Edene. Hape o tla etsa hore batho ba fole ka ho feletseng. Batho ba holofetseng, ba foufetseng le ba sa utloeng litsebeng ba tla fola ’me le bafu ba tla tsosoa.—Esa. 25:8; 35:​1-7. w23.11 4 ¶9-10

“Mahlomola a maholo” a tla fihla ka tšohanyetso. (Mat. 24:21) Empa a fapana le likoluoa tse ling ka hore a ke ke a tsometsa motho e mong le e mong. Lilemo tse ka bang 2 000 tse fetileng, Jesu o ile a eletsa barutuoa ba hae hore ba itokisetse nako eo. Haeba re itokisitse, ho tla ba bonolo hore re mamelle nako eo e boima le hore re thuse batho ba bang hore ba mamelle. (Luka 21:36) Re tla hloka ho ba le mamello e le hore re mamele Jehova ’me re tšepe hore o tla re sireletsa. Re tla etsa’ng ha bana ba bo rona ba lahleheloa ke tse ling tsa lintho tsa bona kapa ba lahleheloa ke thepa ea bona kaofela? (Hab. 3:​17, 18) Ho ba le qenehelo ho tla re susumeletsa ho ba thusa ka lintho tseo ba li hlokang. Nakong eo lichaba tse ikopantseng li re hlaselang, re tla etsa’ng haeba re ka tlameha ho qeta nako re lula sebakeng se le seng le bana ba bo rona? (Ezek. 38:​10-12) Haeba re ba rata haholo, re tla khona ho mamella nakong eo e boima. w23.07 2 ¶2-3

Banyalani ba ka ithuta mohlaleng oa Akuila le Prisilla e leng banyalani ba neng ba ratoa ke Bakreste ba bangata mehleng ea bona. (Bar. 16:​3, 4) Ba sebetsa hammoho, ba etsa mosebetsi oa boboleli le ho thusa batho ba bang hammoho. (Lik. 18:​2, 3, 24-26) Ha e le hantle ha Bibele e bua ka Aquila le Priscilla, e lula e bua ka bona ba le hammoho. Banyalani ba ka ba etsisa joang? Nahana ka lintho tse ngata tseo uena le molekane oa hao le lokelang ho li etsa. Na le ka etsa mesebetsi e meng hammoho ho e-na le ho e etsa le le bang? Ka mohlala, Akuila le Prisilla ba ne ba etsa mosebetsi oa boboleli hammoho. Na le lona le ka etsa se tšoanang kamehla? Akuila le Prisilla ba ne ba boetse ba etsa mosebetsi oa boipheliso hammoho. Ho ka etsahala hore uena le molekane oa hao ha le etse mosebetsi oa boipheliso o tšoanang empa na le ka etsa mesebetsi ea ka tlung hammoho? (Moek. 4:9) Ho sebetsa hammoho ho tla le thusa hore le be thimi le hore le be le monyetla oa ho qoqa. w23.05 22-23 ¶10-12

Kaofela ha rona rea tšoha ka linako tse ling. Ka mohlala, ha Morena Saule a ne a mo lelekisa ebile a batla ho mo bolaea, Davida o ile a balehela motseng oa Bafilista oa Gathe. Morena oa Gathe e leng Akishe o ile a tseba hore Davida ke mohlabani ea ileng a bolaea Bafilista ba “likete tse mashome.” Davida o ile a tšoha haholo. (1 Sam. 21:​10-12) O ne a tšoenyehile ka hore na Akishe o tla mo etsa’ng. Ke’ng e ileng ea thusa Davida hore a be sebete? Ho Pesaleme ea 56, Davida o hlalosa kamoo a neng a ikutloa kateng ha a ne a le Gathe. Pesaleme ena e fana ka mabaka a hore na ke hobane’ng ha Davida a ne a tšohile le hore na ke’ng e ileng ea mo thusa hore a se ke a tšoha. Davida o ile a tšepa Jehova ha a ne a tšohile. (Pes. 56:​1-3, 11) O ne a e-na le mabaka a utloahalang a hore a mo tšepe. Jehova o ile a thusa Davida hore a etse ntho e neng e sa tloaeleha. Davida o ile a etsa eka oa hlanya ’me ho etsa joalo ho ile ha mo sebeletsa. Akishe o ne a se a sa batle ho bolaea Davida empa o ne a batla hore a tsamaee motseng oa hae. Kahoo, Davida o ile a khona ho baleha.—1 Sam. 21:13–22:1. w24.01 2 ¶1-3

Ke bo-mang bao ho buuoang ka bona temaneng ea letsatsi ea kajeno? Ke batlotsuoa ba tsositsoeng. Kahoo, ha batlotsuoa kaofela ba se ba ile leholimong ho elella qetellong ea mahlomola a maholo, o mong oa mesebetsi ea pele oo ba tla o fuoa ke ho loana. Ka mor’a hore ba tsosetsoe leholimong, ba tla sebetsa le Kreste le mangeloi a hae a halalelang ba loantše lira tsa Molimo ntoeng ea ho qetela. Nahana ka taba ena. Bakreste ba bang ba tlotsitsoeng ba ntseng ba le lefatšeng mona, ba holile ebile ba fokolloa ke bophelo. Empa ka mor’a hore ba tsosetsoe ho ea phela leholimong, e tla ba libopuoa tsa moea tse matla le tse ke keng tsa shoa ’me ba tla fuoa mosebetsi oa ho loana hammoho le Morena oa Mohlabani, e leng Jesu Kreste. Ka mor’a ntoa ea Armagedone, ba tla sebetsa le Jesu ho etsa hore batho ba phethahale. Ho hlakile hore ba tla tsoela bara le barali ba bo rona ba lefatšeng mona molemo o moholo ha ba le leholimong ho feta ha ba ne ba le mona lefatšeng ba sa phethahala. w24.02 6-7 ¶15-16

Batho ba bang ba se ba loketse hore ba ka inehela ho Jehova le hore ba kolobetsoe empa baa tšaba. Mohlomong ke hobane ba tšohile hore ka mor’a hore ba kolobetsoe ba ka ’na ba etsa sebe se tebileng ebe baa khaoloa. Haeba u tšaba ho inehela ho Jehova le ho kolobetsoa, kholiseha hore Jehova o tla u thusa hore ‘tsela eo u phelang ka eona e mo thabise.’ (Bakol. 1:10) O tla boela a u fe matla a hore u khone ho etsa se nepahetseng. Jehova o se a thusitse batho ba bangata hore ba etse lintho tse nepahetseng, kahoo le uena o tla u thusa. (1 Bakor. 10:13) Kaha Jehova oa re thusa, ke batho ba ’maloa feela ba khaoloang ka phuthehong. Jehova o thusa batho ba hae hore ba lule ba tšepahala. Motho e mong le e mong o tobana le teko ea hore a etse ntho e mpe. (Jak. 1:14) Leha ho le joalo, u ka khetha hore na u tla etsa’ng haeba u tobana le teko ea hore u etse ntho e fosahetseng. Ha e le hantle, ke uena ea khonang ho laola tsela eo u batlang ho phela ka eona. Empa batho ba bang ba re ho ke ke ha khoneha hore u laole tsela eo u ikutloang ka eona le tsela eo u etsang lintho ka eona. w24.03 5 ¶11-12