August

Hlokomela lintlha tse peli tsa bohlokoa tse hlahang pesalemeng ena e ka holimo: (1) Batho ba lokileng ba hlaheloa ke mathata. (2) Jehova oa re pholosa mathateng a rona. Jehova o re pholosa joang? O re thusa hore re utloisise hore re tla hlaheloa ke mathata.Le hoja Jehova a re tšepisa hore re tla thaba ha re mo sebeletsa, ha a re tšepise hore re ke ke ra ba le mathata hona joale. (Esa. 66:14) O re khothaletsa hore re nahane ka bokamoso boo a re tšepisang bona, moo re tla phela re thabile ka ho sa feleng. (2 Bakor. 4:​16-18) Hona joale o re thusa hore re tsoele pele ho mo sebeletsa. (Lillo 3:​22-24) Re ka ithuta’ng mehlaleng ea bahlanka ba Jehova bao Bibele e buang ka bona le ba mehleng ee? Re ka ’na ra hlaheloa ke mathata ao re sa a lebellang empa ha re tšepile Jehova, o tla lula a re thusa.—Pes. 55:22. w23.04 14-15 ¶3-4

Re ka ithuta ho mamela mohlaleng oa Josefa le Maria. Ba ne ba ikemiselitse ho mamela balaoli ba phahameng leha ho ne ho se bonolo ho etsa joalo. (Luka 2:​1-6) Ha Maria a e-na le likhoeli tse ka bang robong e le moimana, ’muso o ile oa fana ka taelo e neng e tla tlama eena le Josefa hore ba etse ntho e boima haholo. Augustus ea neng a laola libaka tsohle tse tlas’a ’Muso ea Roma, o ile a laela hore batho bohle ba ngolisoe. Josefa le Maria ba ne ba lokela ho ea Bethlehema. Ba ne ba tl’o tsamaea leeto la lik’hilomithara tse 150 libakeng tse maralla. E ne e tl’o ba leeto le boima, haholo-holo bakeng sa Maria. E ka ’na eaba Josefa le Maria ba ne ba tšoenyehile ka hore na Maria le lesea la bona le e-s’o hlahe ba tla sireletseha. Ho ne ho tla etsahala’ng ha ngoana a ne a ka hlaha ba ntse ba le tseleng? Ngoana eo e ne e le Mesia eo esale ba mo lebeletse. Na ba ne ba tla nka taba eo e le lebaka la ho se mamele taelo ea ’muso? Le hoja Josefa le Maria ba ne ba e-na le mabaka a ho tšoenyeha, ba ile ba mamela ho ntse ho le joalo. Kaha ba ile ba mamela, Jehova o ile a ba hlohonolofatsa. Maria o ile a fihla Bethlehema a bolokehile, lesea la hae la hlaha le phetse hantle a ba a kenya letsoho hore boprofeta ba Bibele bo phethahale.—Mik. 5:2. w23.10 8 ¶9; 9 ¶11-12

U ka etsa’ng haeba u utloa u tšoha pele u arabela libokeng? U ka thusoa ke ho lokisetsa hantle. (Liprov. 21:5) Ha u utloisisa hantle hore na sehlooho se bua ka eng, u ke ke oa tšoha haholo ha u arabela. Lokisetsa hore u fane ka likarabo tse khutšoanyane. (Liprov. 15:23; 17:27) Ha u fana ka likarabo tse khutšoanyane, u ke ke oa tšoha haholo ho feta ha u fana ka tse telele. Ha karabo ea hao e le khutšoanyane ebile u e beha ka mantsoe a hao, u tla be u bontša hore u lokiselitse hantle ebile u utloisisa seo ho buuoang ka sona. U ka etsa’ng haeba ka mor’a ho sebelisa litlhahiso tsena u ntse u tšoha ha u batla ho arabela hangata? Kholiseha hore Jehova o ananela boiteko boo u bo etsa’ng ba ho arabela. (Luka 21:​1-4) Jehova ha a lebella hore re etse lintho tseo re ke keng ra khona ho li etsa. (Bafil. 4:5) Nahana ka seo u batlang ho se finyella le hore na u tla se finyella joang ’me u kope Jehova hore a u thuse ho khoba matšoafo. Mohlomong u ka qala ka ho lokisetsa hore u fane ka karabo e le ’ngoe e khutšoanyane. w23.04 21 ¶6-8

Moapostola Pauluse o re bapisa le masole a apereng liaparo tsa ntoa. Lesole le lokela ho lula le itokiselitse ho loana ka linako tsohle. Ho joalo le ka rona. Re lula re itokiselitse letsatsi la Jehova ka ho apara tšireletso ea sefuba ea tumelo le lerato le helmete ea tšepo. Tšireletso ea sefuba e ne e sireletsa pelo ea lesole. Ka ho tšoanang, ho ba le tumelo le lerato ho sireletsa lipelo tsa rona tsa tšoantšetso. Makhabane ana a tla re thusa hore re tsoele pele ho sebeletsa Molimo le ho latela Jesu. Ho ba le tumelo ho re fa kholiseho ea hore Jehova o tla re putsa haeba re mo batla e le kannete. (Baheb. 11:6) Ho tla re thusa hore re lule re tšepahalla Moeta-pele oa rona Jesu leha re e-na le mathata. Re ka matlafatsa tumelo ea rona e le hore re mamelle mathata ka hore re ithute mehlaleng ea bara le barali ba bo rona ba mehleng ena, ba ileng ba tšepahala leha ba hlorisoa kapa ba e-na le mathata a lichelete. Re ka boela ra qoba kotsi ea ho rata chelete le ho ba le lintho tse ngata ka hore re etsise batho ba ileng ba fokotsa lintho tseo ba neng ba e-na le tsona e le hore ba behe ’Muso pele. w23.06 10 ¶8-9

Re hloka ho ba le boitšoaro e le hore re etse lintho tseo re ipehetseng tsona, haholo-holo haeba ho le thata ho li etsa kapa re se na tabatabelo ea ho li etsa. Hopola hore boitšoaro ke tholoana ea moea o halalelang. Kahoo, kopa hore Jehova a u thuse a sebelisa moea oa hae o halalelang hore u be le boitšoaro. (Luka 11:13; Bagal. 5:​22, 23) U se ke oa emela hore maemo a fetohe. Maemo a rona a ka ’na a se ke a fetoha. Haeba re emela hore a fetohe, re ka ’na ra se ke ra finyella lintho tseo re li rerileng. Re ka nyahama ha re bona eka ho thata ho finyella lintho tseo re neng re li rerile. Ha u nyahame, ntho e ka u thusang ke hore u qale hanyane. Haeba u batla ho ba le makhabane a itseng, u ka qala ho a bontša ka litsela tse nyenyane. Ha u batla ho bala Bibele kaofela, u ka qala ka ho ipehela nako e khutšoanyane ea ho e bala. w23.05 29 ¶11-13

Matsatsing ana a ho qetela Jehova o sebelisa mokhatlo oa hae ho re fa tataiso e tsoang Lentsoeng la hae e le hore re lule re tsamaea ‘Tseleng ea Khalalelo.’ (Esa. 35:8; 48:17; 60:17) Ha motho a lumela ho ithuta Bibele, o ba le monyetla oa ho tsamaea ‘Tseleng ea Khalalelo.’ Ba bang ba tsamaea nako e khutšoanyane ebe baa tsoa. Ba bang bona ba ikemiselitse ho tsamaea ho eona ho fihlela ba fihla moo ba eang. Ba ea hokae? Batho ba nang le tšepo ea ho phela leholimong ba ea “paradeiseng ea Molimo” e leholimong. (Tšen. 2:7) Ba nang le tšepo ea ho phela lefatšeng ba tla phethahala ka mor’a Puso ea Kreste ea Lilemo Tse Sekete. Haeba u se u ntse u tsamaea tseleng ena e kholo, u se ke oa hetla. Hape u se ke oa e tlohela ho fihlela u fihlile lefatšeng le lecha. w23.05 17 ¶15; 19 ¶16-18

Ha u nahana ka lintho tsohle tseo Jehova a u etselitseng tsona, u tla li ananela ’me u tla batla ho nehela bophelo ba hao ho eena. (Pes. 116:​12-14) Bibele e re Jehova o fana ka “mpho e ’ngoe le e ’ngoe e molemo le ntho e ’ngoe le e ’ngoe e phethahetseng.” (Jak. 1:17) Mpho e kholo eo Jehova a re fileng eona ke sehlabelo sa Mora oa hae Jesu. Nahana ka hore na mpho ena ke ea bohlokoa hakae. Sehlabelo sa Jesu se entse hore u khone ho ba motsoalle oa Jehova ebile se entse hore u be le tšepo ea ho phela ka ho sa feleng. (1 Joh. 4:​9, 10) Ha u inehela ho Jehova, u mo bontša hore u ananela lerato leo a u bontšitseng lona le litlhohonolofatso tseo a u fileng tsona.—Deut. 16:17; 2 Bakor. 5:15. w24.03 5 ¶8

Re ikutloa ka tsela e tšoanang le eo Lota a ileng a ikutloa ka eona ha re bona tsela eo boitšoaro ba batho bo leng bobe kateng mehleng ena. Kaha o ne a tseba hore Ntate oa rona ea leholimong o hloile boitšoaro bo bobe, o ne “a utloisitsoe bohloko ke batho ba sa mameleng ba neng ba etsa boitšoaro bo bobe ba sa soabe.” (2 Pet. 2:​7, 8) Kaha Lota o ne a hlompha Jehova haholo a bile a mo rata, o ne a hloile boitšoaro bo bobe boo batho ba phelang le eena ba neng ba bo etsa. Le rona re phela le batho ba sa mameleng melao ea Jehova ea boitšoaro. Leha ho le joalo, re ka itšoara hantle haeba re ithuta ho rata Jehova le ho mo hlompha haholo. Jehova o re thusa ka likeletso tseo re li fumanang bukeng ea Liproverbia. Kaofela ha rona re ka rua molemo o moholo ha re bala likeletso tse fumanehang lengolong leo ho sa tsotellehe hore na re banna kapa basali, re banyenyane kapa re baholo. Haeba re hlompha Jehova, re tla qoba ho ba le metsoalle e etsang lintho tse fosahetseng. w23.06 20 ¶1-2; 21 ¶5

Mohlomong u kile oa hanyetsoa ke ba lelapa kapa u khethile ho etsa hore ’Muso oa Molimo e be eona ntho ea bohlokoa bophelong ba hao ho e-na le hore u be le chelete e ngata le lintho tse ngata. (Mat. 6:33) Haeba ho joalo, Jehova o tseba lintho tsohle tseo u mo etselitseng tsona. (Baheb. 6:10) E ka ’na eaba u utloisisa hantle mantsoe a Jesu a reng: “E mong le e mong ea siileng ntlo, bana babo, ’mè, ntate, bana kapa masimo ka lebaka la ka le ka lebaka la litaba tse monate tsa ’Muso oa Molimo o tla fumana matlo, bana babo, bo-’mè, bana le masimo halekholo hona joale, a boele a fumane mahloriso. Lefatšeng le lecha le tlang, o tla fumana bophelo bo sa feleng.” (Mar. 10:​29, 30) Litlhohonolofatso tseo u seng u li fumane li ngata ho feta lintho tseo u li tetseng.—Pes. 37:4. w24.03 9 ¶5

Ha ho e-ba le tlala e kholo Judea e ileng ea ama Bakreste, Bakreste ba phutheho ea Antioke ba ile “ba lumellana hore ba romele liphallelo ho barutuoa ba Judea ho ea kamoo e mong le e mong a ka khonang.” (Lik. 11:​27-30) Le hoja Bakreste ba anngoeng ke tlala ba ne ba lula hole, phutheho ea Antioke e ne e ikemiselitse ho ba thusa. (1 Joh. 3:​17, 18) Le rona re ka bontša hore re na le qenehelo ha re utloa hore ho na le bana ba bo rona ba anngoeng ke koluoa. Re ka ba thusa hang-hang, mohlomong ka ho botsa baholo hore na ho na le mosebetsi o hlokang ho etsoa oo re ka thusang ka oona, ka ho ntša monehelo oa mosebetsi oa lefatše lohle kapa ka ho rapella bana ba bo rona ba anngoeng ke koluoa eo. Bana ba bo rona ba ka boela ba hloka hore re ba thuse ka litlhoko tsa bona tsa mantlha. Ha Morena oa rona Kreste Jesu a tla ho tla ahlola batho, e se eka a ka fumana re ntse re bontša qenehelo ebe o re memela hore re “je lefa la ’Muso.”—Mat. 25:​34-40. w23.07 4 ¶9-10; 6 ¶12

Jesu o ile a etsisa Jehova ka hore a fetohe le maemo. O ne a rometsoe lefatšeng hore a tl’o ruta “linku tse lahlehileng tsa ntlo ea Iseraele.” Empa o ile a bontša hore o fetoha le maemo ha a ntse a etsa mosebetsi ona. Ka nako e ’ngoe, mosali e mong eo e seng Moiseraele o ile a mo kopa hore a folise morali oa hae ea neng a “kenoe ke modemona ea mo sotlang hampe.” Jesu o ile a hauhela mosali eo ka hore a folise morali oa hae. (Mat. 15:​21-28) Nahana ka mohlala ona o mong. Qalong ea tšebeletso ea hae, Jesu o ile a re: “Mang kapa mang ea ntatolang . . . , le ’na ke tla mo latola.” (Mat. 10:33) Empa na o ile a latola Petrose, ea ileng a mo latola ka makhetlo a mararo? Che, ha aa ka a mo latola. Jesu o ne a tseba hore Petrose o bakile le hore ke monna ea nang le tumelo. Ka mor’a hore Jesu a tsosoe bafung, o ile a hlaha ho Petrose ’me e ka ’na eaba o ile a mo kholisa hore o mo tšoaretse le hore oa mo rata. (Luka 24:​33, 34) Jehova Molimo le Jesu Kreste ba fetoha le maemo. Empa rona re batho ba joang? Jehova o lebeletse hore re be batho ba fetohang le maemo. w23.07 21 ¶6-7

Ke lintho life tseo re ka li bolellang batho ba bang tse re kholisang hore tšepiso ea Molimo ea hore ho tla ba le Paradeise e tla phethahala? Ntho ea pele, Jehova ke eena ea etsang tšepiso eo. Buka ea Tšenolo e re: “Ea lutseng teroneng a re: ‘Bona, ke etsa hore lintho tsohle li be ncha.’” Jehova o bohlale, o matla ebile o batla hore tšepiso ea hae e phethahale. Ea bobeli, ho latela tsela eo Jehova a shebang lintho ka eona, tšepiso ea hae e se e phethahetse. Ke kahoo a reng: “Mantsoe ana . . . aa tšepahala ’me ke a ’nete. . . . Mantsoe ana a se a phethahetse.” Ea boraro, ha Jehova a qala ho etsa ntho e itseng, o etsa bonnete ba hore oa e qeta ’me sena se tiisoa ke mantsoe a reng: “Ke ’na Alfa le Omega.” (Tšen. 21:6) Jehova o tla bontša hore Satane o leshano le hore o hlolehile ho etsa hore morero oa Jehova o se ke oa phethahala. Kahoo, ha motho e mong a re: “Kea li utloa litaba tsena empa ha ke bone eka ke ntho e ka etsahalang.” U ka mo balla le ho mo hlalosetsa Tšenolo 21:​5, 6. Mo bontše kamoo Jehova a re kholisitseng kateng hore tšepiso ea hae e tla phethahala joalokaha eka o saenne.—Esa. 65:16. w23.11 7 ¶18-19

Jehova o ile a tšepisa Abrahama taba eo ha Abrahama a ne a le lilemo li 75 ’me a se na bana. Na Abrahama o ile a bona ha tšepiso eo e phethahala? O ile a bona ha ho phethahala karoloana ea eona feela. Ka mor’a hore a tšele Noka ea Eufrate, o ile a ema lilemo tse 25 eaba o bona ha mora oa hae Isaka a tsoaloa ka mohlolo. Ka mor’a lilemo tse ling tse 60, o ile a ba le litloholo tse peli e leng Esau le Jakobo. (Baheb. 6:15) Empa Abrahama ha aa ka a bona ha bana ba hae ba fetoha sechaba se seholo ’me ba fumana naha eo Molimo a neng a ba tšepisitse eona. Leha ho le joalo, e ne e le motsoalle ea haufi oa ’Mopi oa hae. (Jak. 2:23) Ha Abrahama a se a tsositsoe bafung, o tl’o thaba haholo ha a utloa hore lichaba tsohle li ile tsa hlohonolofatsoa ka lebaka la tumelo le mamello ea hae. (Gen. 22:18) Re ithuta’ng tabeng ee? Le rona hona joale re ka ’na ra se ke ra bona ha lintho tsohle tseo Jehova a li tšepisitseng li phethahala. Empa haeba re e-na le mamello joaloka Abrahama, re ka kholiseha hore Jehova o tla re putsa hona joale a be a re putse le ho feta lefatšeng le lecha leo a re tšepisitseng lona.—Mar. 10:​29, 30. w23.08 24 ¶14

Morena Uzia o ne a ikokobelitse ha a sa le mocha. O ile a ithuta “ho hlompha Molimo oa ’nete.” O phetse lilemo tse 68 ’me boholo ba nako eo a e phetseng, Jehova o ile a mo hlohonolofatsa. (2 Likron. 26:​1-4) Morena Uzia o ile a hlola lichaba tse ngata tseo e neng e le lira tsa sechaba sa hae a ba a etsa hore lebotho la Jerusalema le be matla. (2 Likron. 26:​6-15) Re kholisehile hore Morena Uzia o ne a thabile ka lebaka la lintho tseo Molimo a ileng a mo thusa ho li etsa. (Moek. 3:​12, 13) Morena Uzia o ne a tloaetse ho laela ’me ho ka etsahala hore ebe sena se ile sa etsa hore a nahane hore a ka etsa eng kapa eng eo a e batlang. Ka letsatsi le leng, Morena Uzia o ile a ea tempeleng ea Jehova ’me ka boikhohomoso a leka ho chesa libano aletareng e leng seo marena a neng a sa lokela ho se etsa. (2 Likron. 26:​16-18) Moprista ea Phahameng Azaria o ile a leka ho mo khalemela empa sena se ile sa halefisa Uzia haholo. Ka masoabi, Uzia o ile a hloleha ho lula a tšepahala ’me Jehova o ile a mo otla ka lepera. (2 Likron. 26:​19-21) Lintho li ka be li mo tsamaetse hantle hoja o ile a tsoela pele a ikokobelitse. w23.09 10 ¶9-10

Moapostola Petrose o ne a ntse a etsa liphoso le ka mor’a hore a tlotsoe ka moea o halalelang. Ka selemo sa 36 o ne a le teng ha Korneliase oa Molichaba ea neng a sa bolla a tlotsoa ka moea o halalelang. Ketsahalo eo e ne e bontša hore “Molimo ha a leeme” le hore Balichaba ba ne ba ka khona ho ba litho tsa phutheho ea Bokreste. (Lik. 10:​34, 44, 45) Ka mor’a ketsahalo eo, Petrose o ile a ikutloa a lokolohile hore a ka ja le Balichaba e leng ntho eo a neng a ke ke a e etsa pele ho moo. Leha ho le joalo, Bakreste ba bang ba Bajuda ba ne ba re Bajuda le Balichaba ha baa lokela ho ja hammoho. Ha Bajuda ba bang ba Bakreste ba fihla Antioke, Petrose o ile a khaotsa ho ja le bana babo ba Balichaba, mohlomong hobane a ne a tšaba ho khopisa Bakreste bao ba Bajuda. Ha moapostola Pauluse a bona ketso ena e bontšang boikaketsi, o ile a mo khalemela ka pel’a batho ba bang. (Bagal. 2:​13, 14) Petrose ha aa ka a nyahamisoa ke phoso eo. w23.09 22 ¶8

Ha u itlhahloba ka botšepehi, u ka ’na oa hlokomela hore ho na le moo u lokelang ho lokisa teng empa u se ke oa nyahama. “Morena o mosa” ’me o tla u thusa hore u ntlafatse. (1 Pet. 2:3) Moapostola Petrose o ile a re: “Molimo . . . o tla qetela koetliso ea lona. O tla le tiisa.” Ho na le nako eo ka eona Petrose a kileng a utloa a sa tšoanelehe hore e be molateli oa Jesu. (Luka 5:8) Empa Jehova le Jesu ba ile ba mo tšehetsa ’me o ile a latela Kreste ka botšepehi. Kahoo, Jehova o ile a fa Petrose monyetla oa hore a “kene ’Musong o sa feleng oa Morena le Mopholosi oa rona Jesu Kreste.” (2 Pet. 1:11) Kannete oo e ne e le moputso o moholo. Haeba u tšepahala joaloka Petrose ebile u lumella hore Jehova a u koetlise, le uena u tla fumana moputso oa bophelo bo sa feleng. U tla ‘pholosoa ka lebaka la tumelo ea hao.’—1 Pet. 1:9. w23.09 31 ¶16-17

Tabernakele e ne e e-na le lebala le le leng. Lebala leo le ne le le leholo ebile le kampetsoe ’me baprista ba ne ba etsetsa mesebetsi ea bona moo. Aletare e kholo ea koporo ea nyehelo ea secheso e ne e le lebaleng le beisine ea metsi e entsoeng ka koporo, eo baprista ba neng ba e sebelisetsa ho itlhoekisa pele ba etsa mosebetsi o halalelang. (Ex. 30:​17-20; 40:​6-8) Mehleng ena batlotsuoa ba sebetsa ka botšepehi lebaleng le ka hare la tempele ea tšoantšetso. Beisine e kholo ea metsi e neng e le tabernakeleng e hopotsa Bakreste bohle hore ba lokela ho phela ka tsela e thabisang Molimo le ho mamela melao ea hae. “Bongata bo boholo ba batho” bona ba rapela Molimo hokae? Moapostola Johanne o ile a ba bona ba “eme ka pel’a terone . . . ba sebeletsa [Molimo] bosiu le motšehare ka tempeleng ea hae.” Bongata bo boholo bo sebeletsa Molimo lebaleng le ka ntle la tempele ea tšoantšetso. (Tšen. 7:​9, 13-15) Kannete re ananela ho sebeletsa Jehova borapeling ba ’nete boo a bo hlophisitseng. w23.10 28 ¶15-16

Jehova o boetse o sebelisa baholo ho re fa matla. (Esa. 32:​1, 2) Kahoo, ha u utloa u tšoenyehile, bua le baholo ka lintho tse u tšoenyang. U se ke oa tsila-tsila ho amohela thuso eo ba u fang eona. Jehova a ka ba sebelisa ho u matlafatsa. Litšepiso tse hlahang Bibeleng tsa hore re tla phela ka ho sa feleng lefatšeng la paradeise kapa leholimong li re fa matla. (Bar. 4:​3, 18, 19) Tšepo eo re nang le eona e re fa matla a ho mamella mathata, a ho bolella batho litaba tse monate le ho etsa mesebetsi e fapaneng eo re e fuoang ka phuthehong. (1 Bathes. 1:3) Moapostola Pauluse le eena o ile a matlafatsoa ke tšepo eo. O ne a “petelitsoe,” a “tsielehile,” a “hlorisoa” a bile a “imetsoe ke mathata.” Le bophelo ba hae bo ne bo le kotsing ka linako tse ling. (2 Bakor. 4:​8-10) Pauluse o ile a lula a nahana ka bokamoso ba hae. (2 Bakor. 4:​16-18) O ile a nahanisisa ka tšepo eo a neng a e-na le eona ea ho phela ka ho sa feleng leholimong ’me e ile ea etsa hore a ikutloe a ‘nchafetse letsatsi le letsatsi.’ w23.10 15-16 ¶14-17

Ha u rapela, nahana hore na ke nako e loketseng ea hore Jehova a arabe kopo ea hao. Re ka ’na ra ikutloa re hloka hore lithapelo tsa rona li arajoe hang-hang. Empa Jehova oa tseba hore ke nako efe e nepahetseng ea hore a re thuse. (Baheb. 4:16) Haeba re sa fumane ntho eo re e kopang hang-hang, re ka ’na ra nahana hore karabo ea Jehova ke ‘Che.’ Empa karabo ea Jehova e ka boela ea bolela hore ‘Ha e-s’o be nako e nepahetseng ea hore a re etsetse ntho eo re e kopileng.’ Ka mohlala, mor’abo rona e mocha o ile a rapella hore Jehova a mo folise. Empa ha aa ka fola. Haeba Jehova a ne a ka mo folisa ka mohlolo, Satane o ne a ka re mor’abo rona eo o sebeletsa Jehova hobane a mo folisitse. (Jobo 1:​9-11; 2:4) Hape Jehova o se a ntse a behile nako eo ka eona a tla folisa maloetse ’ohle. (Esa. 33:24; Tšen. 21:​3, 4) Kahoo, ho fihlela nako eo e fihla, re ke ke ra lebella hore Jehova a re folise ka mohlolo. Mor’abo rona o ne a ka ’na a kopa Jehova hore a mo fe matla le khotso ea kelello hore a khone ho mamella ho kula le hore a tsoele pele ho mo sebeletsa ka botšepehi. w23.11 24 ¶13

Samsone o ne a entse phoso e kholo empa ha aa ka a tela. O ile a batla monyetla oa ho phetha thomo eo Molimo a neng a mo file eona ea ho loantša Bafilista. (Baahl. 16:​28-30) Samsone o ile a rapela Jehova a re: “Ke kopa u nthuse . . . hore ke iphetetse ho Bafilista.” Molimo oa ’nete o ile a araba kopo ea Samsone eaba o mo fa matla a sa tloaelehang hape. Ka lebaka leo, Samsone o ile a atleha ho bolaea Bafilista ba bangata ho feta bao a neng a kile a ba bolaea pele ho moo. Le hoja Samsone a ile a fumana litholoana tse bosula ka lebaka la phoso ea hae, ha aa ka a khaotsa ho leka ho etsa thato ea Jehova. Le haeba re ka etsa phoso eaba rea khalemeloa kapa re lahleheloa ke mosebetsi o itseng ka mokhatlong oa Jehova, ha rea lokela ho tela. Re lokela ho hopola hore Jehova o lula a ikemiselitse ho re tšoarela. (Pes. 103:​8, 9) Leha re entse liphoso, Jehova a ka tsoela pele a re sebelisa feela joalokaha a ile a sebelisa Samsone. w23.09 6 ¶15-16

Kahoo, ha u mamella, Jehova oa u amohela. Ha se hore Jehova oa thaba ha u hlaheloa ke mathata. Empa o thabisoa ke hore ebe oa mamella. Ke ntho e khothatsang haholo ho tseba hore Jehova oa thaba ha re mamella mathata. (Pes. 5:12) Hopola hore Abrahama o ile a ba le mathata ’me Jehova o ile a mo amohela hobane a ile a a mamella. Jehova o ile a mo nka e le motsoalle oa hae a ba a mo nka e le motho ea lokileng. (Gen. 15:6; Bar. 4:​13, 22) Le rona Jehova a ka re nka joalo. Molimo ha a re amohele a ipapisitse le hore na re etsa mosebetsi o mokae kapa hore na re mo sebeletsa ka litsela life. O re amohela a ipapisitse le mamello le botšepehi ba rona. Ho sa tsotellehe hore na re lilemo li kae, maemo a rona ke afe kapa re na le bokhoni bofe, kaofela ha rona re ka khona ho mamella. Na hona joale u mameletse mathata ka botšepehi? Haeba ho joalo, hopola hore u thabisa Molimo. Ha re elelloa hore re thabisa Molimo, tšepo ea rona e ba matla le ho feta. w23.12 11 ¶13-14

Monna oa Mokreste o lokela ho ithuta ho mamela le ho buisana le batho hantle. Sena se bolela hore o lokela ho mamela le ho utloisisa hore na batho ba bang ba nahana’ng le hore ba ikutloa joang. (Liprov. 20:5) A ka ithuta ho bona hore na motho o ikutloa joang ka ho mamela tsela eo a buang ka eona, ka ho mo sheba sefahlehong le boitšisinyo ba ’mele. U ke ke oa khona ho etsa lintho tsena haeba u sa qete nako u e-na le batho. Haeba hangata u bua le batho ka e-mail kapa u ba ngolla melaetsa ka founu, sena se ka etsa hore u se ke oa khona ho buisana le batho ba bang hantle kapa ho utloisisa maikutlo a bona. Kahoo, etsa menyetla ea hore u buisane le batho ba bang le shebane mahlong. (2 Joh. 12) Monna oa mokreste ea nang le tumelo e matla o lokela ho khona ho itlhokomela le ho hlokomela lelapa la hae. (1 Tim. 5:8) Ntho ea bohlokoa ke hore u ithute ho etsa lintho tse tla u thusa hore u fumane mosebetsi. (Lik. 18:​2, 3; 20:34; Baef. 4:28) Qeta mosebetsi oo u o etsang, u se ke oa o siea hare. Sena se tla etsa hore batho ba u tsebe u le motho ea sebetsang ka thata. Ha u etsa joalo, ho tla ba bonolo hore u fumane mosebetsi le hore u tšoarelle ho oona. w23.12 27 ¶12-13

Ha Bibele e bua ka “letsatsi la Jehova,” e bua ka nako eo Jehova a tla felisa lira tsa hae le ho pholosa batho ba hae. Nakong e fetileng Jehova o ile a fana ka likahlolo. (Esa. 13:​1, 6; Ezek. 13:5; Sof. 1:8) Mehleng ena “letsatsi la Jehova” le tla qala ha baeta-pele ba lipolotiki ba hlasela Babilona e Moholo ’me le fele ka ntoa ea Armagedone. Re lokela ho itokisa hona joale e le hore re pholohe “letsatsi” leo. Jesu o ile a re ha rea lokela ho itokisetsa “mahlomola a maholo” feela empa re boetse re lokela ho ‘lula re itokisitse. (Mat. 24:21; Luka 12:40) Lengolong la pele leo moapostola Pauluse a ileng a le ngolla Bathesalonika, o ile a etsa lipapiso tse ngata ho thusa Bakreste hore ba itokisetse letsatsi le leholo la Jehova la kahlolo. Pauluse o ne a tseba hore letsatsi la Jehova le ne le ke ke la fihla ka eona nako eo. (2 Bathes. 2:​1-3) Leha ho le joalo, o ile a ba khothaletsa hore ba itokisetse letsatsi leo joalokaha eka le ne le tla fihla letsatsing le hlahlamang ’me le rona re ka sebelisa keletso ea hae. w23.06 8 ¶1-2

Ka selemo sa 1978, ho ile ha hahoa mohaho o molelele haholo Tokyo, Japane. Batho ba ne ba lula ba ipotsa hore na mohaho oo o tla lula o eme ho fihlela neng kaha ho ne ho e-ba le litšisinyeho tse ngata tsa lefatše toropong eo. Lienjiniere li ile tsa etsa’ng e le hore mohaho oo o lule o eme? Li entse hore mohaho oo o be matla le hore o lule o tsitsitse ha ho e-ba le litšisinyeho tsa lefatše. Ke ka tsela efe Bakreste ba tšoanang le mohaho oo o molelele? Mokreste o lokela ho lula a tiile empa hape o lokela ho fetoha le maemo. O lokela ho lula a tiile le ho ikemisetsa ho mamela melao ea Jehova. “O itokiselitse ho mamela” ebile ha a inehele hore a etse lintho tse fosahetseng. Leha ho le joalo, o fetoha le maemo ha ho hlokahala ebile “ha a manganga.” (Jak. 3:17) Mokreste ea nang le teka-tekano ha a tsitlelle hore lintho li etsoe ka tsela ea hae ebile ha a lumele ntho e ’ngoe le e ’ngoe ho akareletsa le lintho tse fosahetseng. w23.07 14 ¶1-2

Jesu o ile a hana ho etsa lintho tseo Satane Diabolose a neng a re a li etse, ho akareletsa le ea hore a se ke a tšepahalla Molimo. (Mat. 4:​1-11) Satane o ne a batla hore Jesu a etse sebe e le hore a se ke a lopolla batho sebeng. Ha Jesu a ne a le lefatšeng a etsa mosebetsi oa boboleli, o ile a tlameha ho mamella mathata. Batho ba ile ba mo hlorisa ’me ba leka ho mo bolaea. (Luka 4:​28, 29; 13:31) O ile a tlameha ho mamella liphoso tsa balateli ba hae. (Mar. 9:​33, 34) Pele Jesu a bolaoa, o ile a hlorisoa haholo a ba a tlotlolloa. Ka mor’a moo, o ile a bolaoa joaloka lesholu le ka tsela e sehloho. (Baheb. 12:​1-3) O ile a tlameha ho mamella mathata ao a le mong Jehova a sa mo sireletse. (Mat. 27:46) Jesu o ile a mamella lintho tse bohloko e le hore a ka lopolla batho sebeng le lefung. Ho nahana ka mathata a mangata ao Jesu a ileng a a mamella e le hore re ka lopolloa, ho etsa hore re mo rate le ho feta. w24.01 10-11 ¶7-9

Ho ba le mamello ho re thusa ho sebelisana hantle le batho ba bang. Ho re thusa ho mamela ka hloko ha batho ba bang ba bua. (Jak. 1:19) Hape ho re thusa ho ba le khotso le batho ba bang. Ho re thusa hore re se ke ra etsa lintho re sa nahana le hore re se ke ra buisa batho ba bang hampe ha re imetsoe kelellong. Hape haeba re e-na le mamello, re ke ke ra halefa kapele ha motho e mong a re utloisitse bohloko. Ho e-na le ho iphetetsa, re tla ‘tsoela pele ho mamellana le ho tšoarelana.’ (Bakol. 3:​12, 13) Ha re e-na le mamello re tla etsa liqeto tse bohlale. Ho e-na le ho etsa liqeto ka lepotlapotla, re tla ipha nako ea ho etsa lipatlisiso le ho etsa khetho e molemo. Mohlala, haeba re ntse re batla mosebetsi, re ka ’na ra batla ho amohela mosebetsi o mong le o mong feela o hlahang. Leha ho le joalo, haeba re e-na le mamello, re tla ipha nako ea ho nahanisisa ka lintho tse kang hore na re tla nka nako e kae re ea mosebetsing, re tl’o qeta nako e kae re sebetsa le hore na mosebetsi oo o tla ama lelapa la rona le kamano ea rona le Jehova joang. Haeba re e-na le mamello, re tla qoba ho etsa qeto e fosahetseng. w23.08 22 ¶8-9

Haeba u ikutloa u nyahame ha u ntse u leka ho qoba ho etsa lintho tse fosahetseng, ho nahana ka tšepiso eo u e etselitseng Jehova ha u ne u inehela ho eena ho tla u thusa hore u khone ho qoba ho etsa ntho e fosahetseng. Ho tla u thusa joang? Ha u inehela ho Jehova ha u sa iphelela. Taba ena e bolela hore u tla qoba ho etsa lintho tse batloang ke uena le tseo u batlang ho li finyella. (Mat. 16:24) Kahoo, ha u hlaheloa ke bothata bo itseng u ke ke oa ipotsa hore na u etse’ng boemong boo hobane u tla be u entse qeto ea hore u tla tšepahalla Jehova. U tla lula u ikemiselitse ho thabisa Jehova. Haeba u etsa joalo u tla be u etsisa Jobo. Le hoja a ile a hlaheloa ke mathata a boima, o ile a bua ka kholiseho a re: “Ke tla lula ke tšepahala.”—Jobo 27:5. w24.03 9 ¶6-7

Jehova, “Molimo ea lerato,” o na le rona. (2 Bakor. 13:11) O re tsotella re le batho ka bomong. Re kholisehile hore o re “sireletsa . . . ka lerato la hae.” (Pes. 32:10) Ha re tsoela pele re nahanisisa kamoo Jehova a re bontšang hore oa re rata, re bona haholoanyane hore oa re tsotella ’me seo se etsa hore re atamele haufi le eena. Re ka mo rapela ka bolokolohi ’me ra mo bolella kamoo re hlokang hore a re rate. Re ka mo bolella lintho tsohle tse re tšoenyang hobane re kholisehile hore oa utloisisa le hore o ikemiselitse ho re thusa. (Pes. 145:19) Feela joalokaha re atamela haufi le mollo ha ho bata, re atamela haufi le Jehova hobane a re rata. Jehova o re rata haholo ebile o bonolo. Kahoo, thaba hobane Jehova oa u rata. E se eka re ka arabela leratong leo Jehova a re bontšang lona ka ho re: “Ke rata Jehova.”—Pes. 116:1. w24.01 31 ¶19-20

Jesu o ile a ruta batho hore lebitso la Molimo ke Jehova empa ha aa ka a fella moo. Bajuda bao a neng a ba ruta ba ne ba se ba ntse ba tseba lebitso la Molimo. Empa Jesu o ile a etella pele ho ‘hlalosa hore na Molimo ke mang.’ (Joh. 1:​17, 18) Ka mohlala, Mangolo a Seheberu a re Jehova o mohau ebile o na le kutloelo-bohloko. (Ex. 34:​5-7) Jesu o ile a hlalosa taba ena ka ho pharaletseng ha a ne a etsa papiso ea mora ea lehlasoa le ntate oa hae. Ha re bala ka ntate enoa ’me re utloa hore o ile a bona mora oa hae ea bakileng “a sa le hole,” a mo mathela, a mo haka a ba a mo tšoarela ho tsoa pelong, re bona ka ho hlakileng hore na Jehova o na le kutloelo-bohloko le mohau hakae. (Luka 15:​11-32) Jesu o thusitse batho hore ba utloisise hore na hantle-ntle Ntate oa hae ke Molimo ea joang. w24.02 10 ¶8-9

Jehova o khatholla le ho tšelisa ba imetsoeng, feela joalokaha metsi a hloekileng a seliba a khatholla ba nyoriloeng. Re ka etsisa Jehova joang ka ho utloela batho bohloko le ho ba tšelisa? Tsela e ’ngoe ke ka hore re loanele ho ba le makhabane a tla re thusa hore re utloele batho ba bang bohloko le ho ba tšelisa. Makhabane ao ke afe? Ke eng e tla re thusa hore re lule re ratana e le hore ‘re ’ne re tšelisane’ letsatsi le letsatsi? (1 Bathes. 4:18) Re lokela ho ba le makhabane a kang kutloelo-bohloko, lerato le mosa. (Bakol. 3:12; 1 Pet. 3:8) Makhabane aa a tla re thusa joang? Ha re utloela bana ba bo rona bohloko ebile re ba tsotella e le kannete, re tla ba le takatso e matla ea ho ba tšelisa ha ba e-na le mathata. Joalokaha Jesu a ile a cho, “motho o bua ntho e tletseng ka pelong ea hae. Motho ea lokileng o bua lintho tse ntle hobane ho tletse tsona ka pelong ea hae.” (Mat. 12:​34, 35) Ho tšelisa bana ba bo rona ha ba e-na le mathata ke tsela ea bohlokoa ea ho bontša hore rea ba rata. w23.11 10 ¶10-11

Re lokela ho kopa thuso haeba re batla ho utloisisa boprofeta ba Bibele. Nahana ka mohlala ona. A re re u etetse sebaka seo u sa se tsebeng empa motsoalle oa hao eo u tsamaeang le eena o se tseba hantle. O tseba hantle hore na le hokae le hore tsela e ’ngoe le e ’ngoe e ea hokae. U ne u tla thaba hore ebe motsoalle oa hao o lumetse ho tsamaea le uena. Ka tsela e tšoanang, Jehova o tšoana le motsoalle eo ’me o tseba bokamoso ba rona hantle. Kahoo, e le hore re utloisise boprofeta ba Bibele, re lokela ho ikokobetsa ’me re kope thuso ho Jehova. (Dan. 2:28; 2 Pet. 1:​19, 20) Jehova o joaloka motsoali ea molemo, o batla hore re thabele bophelo nakong e tlang. (Jer. 29:11) Ha a tšoane le batho hobane ke motsoali ea khonang ho re bolella hantle hore na ho tl’o etsahala’ng nakong e tlang ebile o lula a nepile. Jehova o khethile batho hore ba ngole boprofeta ka Lentsoeng la hae e le hore re ka tseba ka liketsahalo tsa bohlokoa pele li etsahala.—Esa. 46:10. w23.08 8 ¶3-4