Thuto ea Thabeng ‘Phetheha’ Rata Lira Tsa Hao
KAMOR’A ho bolela hore bamameli ba hae ba ‘se ke ba mo hanela e mobe,’ Jesu a phaella ka ho re: ‘Le utloile hoba ho boletsoe, ha thoe: Rata oa heno, u hloee eo e leng sera ho uena.’—Matt. 5:39, 43.
Ba neng ba le teng bakeng sa Thuto ea Thabeng e ne e le Bajode ba neng ba “utloile” molao oa Molimo, o reng: “U se ke ua iphetetsa, ’me u se ke ua bolokela bana ba sechaba sa heno lonya. Rata oa heno joale ka ha u ithata.”—Lev. 19:18.
Leha ho le joalo, baeta-pele ba bolumeli ba Iseraele ba ne ba hatisa ’nete ea hore “bana ba sechaba sa heno” le “oa heno” li ne li bolela Bajode feela. Hape ba ne ba hatisa hore molao o mong oa Molimo o ne o hloka hore Baiseraele ba ikarole ho batho ba bang. (Deut. 7:1-4) Le hoja ona o ne o supa hore Iseraele e le sechaba e ikarole lihlopheng tse ling tsa bochaba, qetellong ho ile ha hlaha maikutlo a hore bohle bao e seng Bajode ke ‘lira,’ tseo ho lokelang hore li hlouoe e le motho ka mong. Mohlala oa boikutlo bona o ka bonoa polelong e latelang ea The Mishnah:
“Likhomo li ke ke tsa tloheloa polokelong tsa balichaba kaha ba belaelloa ka ho robala le liphoofolo; leha e le hore mosali a ka sala a le mong le bona kaha ba belaelloa ka boitšoaro bo bobe; leha e le hore monna a ka sala le bona a le mong kaha ba belaelloa ka ho tšolla mali. Morali oa Moiseraele a ke ke a thusa mosali oa molichaba ha a beleha kaha o tla be a thusa hore ho hlahe ngoana oa borapeli ba litšoantšo, empa mosali oa molichaba a ka thusa morali oa Iseraele. Morali oa Iseraele a ke ke a antša ngoana oa mosali oa molichaba, empa mosali oa molichaba a ka antša ngoana oa morali oa Moiseraele moo enoa a lulang.”—Tractate Abodah Zarah (borapeli ba litšoantšo”) 2:1.
“Empa ’na ke, re ho lōna, Ratang bao e leng lira ho lōna, le hlohonolofatse ba le rohakang,” kamoo ho boletseng Jesu ha a bapisa ka mokhoa o khathollang. (Matt. 5:44) Mona re bona bopaki bo eketsehileng ba hore Mora oa Molimo o ne a tlile, ‘e seng ho tla felisa, empa ho tla phetha’ Molao oa Molimo o ngoliloeng, hobane Molao o ne o laela hore balichaba ba tšoaroe hantle le ka mokhoa o mosa.—Matt. 5:17; Ex. 22:21; 23:4, 5; Lev 19:33, 34; Deut. 10:19.
Empa Jesu ha a ka a rera ho lekanyetsa mothèo ona ho lira tsa Balichaba tsa Iseraele. Takatso ea hae e bile hore balateli ba hae ba etse batho bohle ka lerato ba neng ba tla bontša bora ho bona. A hlile a ngolla bao e seng Bajode, Luka o tlaleha mantsoe a Jesu ka tsela ena: “Empa ke re ho lōna ba mamelang; Ratang bao e leng lira ho lōna; ba le hloeang le ba etse hantle. Hlohonolofatsang le ba le rohakang, ’me le rapelle ba le tsohelang matla.”—Luka 6:27, 28.
Ho ea ka Jesu, ba neng ba ‘mametse,’ ke hore, ba hlile ba tebisa lipolelo tsa hae pelong, ba lokela ho thulanya lehloeo le mennoeng hararo ka pontšo e mennoeng hararo ea lerato: (1) ‘Ho etsa hantle ba ba hloileng,’ ba fetola boikutlo ba bohale ba sera ka liketso tsa mosa. (2) Haeba lehloeo le fella ka mahlapa, ‘ba hlohonolofatse ba ba rohakang.’ Ho e-na le ho busetsa hlapa ka hlapa, balateli ba Jesu ba lokela ho bua ka mosa le ka ho nahanela bahanyetsi ba bona. (3) Haeba bora bo nka bohato bo ka holingoana ho mahlapa bo fetoha ‘mahloriso’ a barutuoa ba Kreste ka ho hlekefetsoa ’meleng kapa ‘ho tsohela matla ho hong ba lokela ho ‘rapella’ bahlorisi, ka lerato ba kōpa Molimo hore bahanyetsi ba bona ba fetole lipelo tsa bona ba kene mohaung oa Molimo.—Bapisa Ba-Roma 12:14-21; 1 Ba-Korinthe 4:12; 1 Petrose 3:8, 9.
Joale Jesu a fana ka lebaka le matla la ho bontša lira tsa motho lerato: “Le tle le be bana ba Ntat’a lōna ea maholimong.” (Matt. 5:45a) Molemong oa babali ba hae ba Balichaba, Luka o nka sebaka sa “Ntat’a lōna ea maholimong,” ka “Ea holimolimo.”—Luka 6:35a.
Batho ba utloang keletso ea Jesu e ba “bana” ba Molimo ka kutloisiso ea hore ba mo etsisa ka lerato la hae le sa eeng ka tšobotsi ho motsoalle le sera ka mokhoa o tšoanang. (Bapisa Mattheu 5:9; Ba-Efese 4:31-5:2; 1 Joh. 3:9-12.) Molimo o bea mohlala o phethahetseng ka hore “o chabisetsa ba babe le ba batle letsatsi la hae, ’me o nesetsa ba lokileng le ba khopo” (Matt. 5:45b); “o mohau ho ba sa leboheng le ho ba lonya.”—Luka 6:35b.
A hatisa hore na ke habohlokoa hakae ho bamameli ba hae ‘hore ba ’ne ba rate lira tsa bona,’ Jesu o ile a phaella ka ho re: “Hobane ha le rata ba le ratang, le ka ba le moputso ofe? Na ba-lekhetho ha ba etse joalo le bona na? ’Me ha le lumelisa banab’abo lōna feela, le etsa ho fetisang hofe? Ba-lekhetho le bona ha ba etse joalo na?’—Matt. 5:46, 47.
Batho ba lakatsang ho etsisa Molimo ba se ke ba lekanyetsa lipontšo tsa bona tsa lerato ho batho ka bomong ba ba etsang joalo le bona. Hona ho ke ke ha tšoanela “moputso” o khethehileng kapa mohau oa Molimo. Le bona “ba-lekhetho” ba ne ba tloaetse ho bontša lerato ho ba ba ratang, le hoja Bajode ba ne ba ba nka e le ba bang ba batho ba tellehang ka ho fetisisa.—Luka 5:30; 7:34.
Tumeliso e tloaelehileng har’a Baiseraele e ne e kenyelletsa lentsoe shalom (“khotso”), e leng le neng le akarelletsa ho lakaletsa bophelo bo botle, boiketlo le nala tsa ea lumelisoang. Ho lekanyetsa tumeliso e joalo ho batho ba nkoang e le “banab’abo” motho e ne e ke ke ea e-ba ‘ntho e fetisang ho hong,’ hobane ntho e joalo e ne e ka ’na ea bonoa har’a “bahedene,” bao Bajode ba neng ba ba talima ba se na Molimo, ba sa hloeka ba bile ba lokela ho qojoa.
Molaetsa oa Luka, o ngotsoeng ho hopotsoe bao e seng Bajode, o nka sebaka sa lipolelo “balekhetho” le “bahedene” (e leng tseo litemaneng tse potileng taba mona li neng li tla ba le seo li se bolelang ho Bajode feela) ka lentsoe le batlang le akaretsa haholo la “baetsalibe.” Rea bala: “Hobane ekare ha le rata ba le ratang, ho bokoa ha lōna ke hofe na? Athe baetsalibe le bona ba rata ba ba ratang. Ekare ha le etsa hantle ba le etsang hantle, ho bokoa ha lōna ke hofe na? Athe baetsalibe le bona ba etsa joalo. Ha le alimana le bao le tšepang hoba le tla boela le nke ho bona, ho bokoa ha lōna ke hofe na? Athe baetsalibe le bona ba alimana le baetsalibe, ba tle ba boele ba nke ho lekanang le ha bona.”—Luka 6:32-34.
Jesu o ile a phetha karolo ena ea Thuto ea Thabeng ka polelo ena: “Phethehang, joale ka ha Ntat’a lōna ea maholimong a phethehile.”—Matt. 5:48.
Hona hase molao ho barutuoa ba Jesu hore ba hloke sekoli ’meleng le boitšoarong, kaha hoo ho sa le thata ka baka la sebe se futsitsoeng. (Ba-Roma 3:23; 5:12) Ho e-na le hoo, mantsoe ana a khothalletsa batho ba Molimo hore ba etsise “Ntate oa leholimo,” Jehova, ka ho phethahatsa lerato la bona, ba le etsa hore le felelle le ho le etsa le tletseng ka ho akarelletsa lira tsa bona ho lona. Tumellanong le sena, tlaleho e tšoanang ea Luka e baleha tjena: “E-bang lereko, joale ka ha Ntat’a lōna le eena a le lereko.”—Luka 6:36.