Ea Febang O Siteloa Bophelo ba Hae
MONGOLI oa buka ea Liproverbia o bua joaloka ntate ea eletsang mora oa hae. Liproverbia 6:30-35 e baleha tjena: “Sholu leha e lapile, ha le tlohelloe ho utsoa, ho khorisa mpa ea Iona. Empa mohla le tšoaroang, le tšoaneloa ke ho lefa hasupa, le be le hlakoloe leruo lohle la ntlo ea Iona. Ea febang le mosali o feletsoe ke kelello; ea etsang hoo o itimetsa moea oa hae ka sebele. O tla fihleloa ke kotlo e le lihlong, ho nyeliseha ha hae ho ke ke ha ba ha hlakoloa. Hobane lefufa la monna lea mo hlantša, a be a hloke le mohau mohla a iphetetsang. A ke ke a amohela tefo, bohale ba hae u ke ke ua ba ua bo tima, leha u ka mo thoothella limpho tse ngata.”
Mona ho tšoantšoa lesholu le ea febang. Batho ba ka ’na ba e-ba le qenehelo ho lesholu le utsoang hobane le lapile. Liphetolela tse ling, leha ho le joalo, li baleha tjena: “Na batho ha ba nyelise lesholu?” Le haeba lea nyelisoa kapa che, ha le fumanoa, lesholu lea otloa. Tlas’a molao oa Moshe, lesholu le ne le tlameha ho lefa habeli, hane kapa hahlano, ho ea ka hore na le utsoitse eng le maemo. (Ex. 22:1, 4, 7) Mona ho Liproverbia 6 mohlomong ‘hasupa’ e bolela tefo e feletseng, ho ea ka se lekantsoeng ke baahloli, “supa” hangata e sebelisetsoa ho supa phetheho. Kapa e ka ’na ea bolela hore, hore a khotsofatse eo a mo sitetsoeng le ho thea khotso le eena, ho ka ’na ha nka sohle seo lesholu le nang le sona.
Ka lehlakoreng le leng, ea febang ‘o feletsoe ke kelello’—ha ho letho le mo susumetsang le neang ba bang sebaka sa ho mo utloela bohloko. Ba tla mo nyelisa ho feta lesholu. Ho feta moo, ea febang o mpa a sa tele matlotlo a hae feela, empa o timetsa moea—bophelo ba hae. Tlas’a Molao bafebi ba ne ba bolaoa. (Lev. 20:10) Empa le hoja, mehleng ea kajeno, a ke ke a otloa ka lefu, lihlong tsa hae le thohako li ke ke tsa hlakoloa—maoma ao bo mo bakelang oona, molekane oa hae, lelapa la hae, beng ka eena le metsoalle, ha ho mohla a folang ka ho phethahetseng. ’Me mohlomong a ka ’na a tšoaroa ke lefu le kotsi le tšoaetsanoang le litšila.
Ho feta moo, ea febang o tlameha ho shebana le bohale le lefufa la monna ea boulelang. Ha monna a ho fumana, bohale ba hae bo ke ke ba amohela ho beeloa mabaka kapa ho ikemela. Ha lesholu le ka bōpa khotso ka ho khutlisa, ha ho topollo e ka etsoang kapa tefo ho khotsofatsa monna ea utloileng bohloko ’me ha itšireletsoa boiphetetsong ba hae.—Bapisa Liproverbia 27:4.