Athalia ea Rapelang Litšoantšo, ea Hlanyetsang Puso
POLELO e reng ‘ngoan’a tali o tsejoa ka mereto’ e ile ea sebetsa ka matla a feletseng ho Athalia, morali oa Jezebele le Morena oa Moiseraele Akabe. Jezebele ha ka a tlohela ha tšolla mali a se nang molato hore a ntšetse pele likhahleho tsa hae, ’me ho bile joalo le ka eena Athalia. Ba ne ba qoetse ka bobeli borapeling ba litšoantšo.
Ruri e bile phoso e kotsi ha Morena Josafate ea tšepahalang oa Mojudea a thea selekane sa lenyalo le Morena Akabe, a nyalisa mora oa hae Jorame Athalia. Selekane seo sa batla se bolaea Josafate ha a ikopanya le Morena Akabe bohatong ba ntoa ho loantša Syria. Le hoja Jehova Molimo a ile a kenella ho mo pholosa, Josafate a nyatsuoa ka mantsoe ana: “Na ke tšoanelo hore u thuse e mobe, ’me u rate ba hloileng Jehova na?”—2 Likron. 18:1-3, 30, 31; 19:1, 2.
Kamor’a lefu la Josafate, litholoana tsa lenyalo leo tsa batla li felisa lesika la borena le Juda. Tšusumetso e khopo ea Athalia ea tlatsetsa hore Jorame a latele tsela e mpe ea lelapa la borena la Akabe. Hore a tiise setulo sa hae, a bolaea bana babo le mahosana a mang. Jehova a mo lahlile ka baka la ho se tšepahale, Jorame a tobana le likhathatso tse tsoang ka hare le ka ntle. Maarabe le Bafilista ba laola ’Muso oa Juda ’me, ntle ho moshemane oa ho fela Akazia (Joakaze), ba hapa bara bohle ba Jorame. Eaba lebotho la baleleri le neng le tsamaea le Maarabe le bolaea bara bohle ba baholo. Qetellong, Jorame a bolaoa ke lefu le nyonyehang haholo, leo ha le ntse le ja setsi “mala a hae a tsoa.”—2 Mar. 8:16-19; 2 Likron. 21:4, 16-19; 22:1.
Eare ha Akazia a hlahlama ntat’ae boreneng, ’m’ae ea e-ba moeletsi. Kaha e ne e hlile e le eena ea busang, puso e khutšoanyane ea selemo se le seng ea Akazia ea tšoauoa ka bokhopo bo feteletseng. Hoba Akazia a bolaoe ka taelo ea Morena Jehu oa Iseraele, Athalia a bona monyetla oa ho ikhapela terone ea ’Muso oa Juda.—2 Likron. 22:2-9.
Athalia o ne a hlanyetsa puso hoo a ileng a bolaea litloholo tsa hae tsa bashemane. Leha ho le joalo, lesea Jase la pholoha, le pholosoa ke rakhali oa lona Joshabeathe. Lilemo tse ka fihlang ho tse tšeletseng hamorao, monna oa Joshabeathe moprista e moholo Jehojada, a etsa hore ho phatlalatsoe hore Joase ke morena. Ha a bona sena, Athalia a “hahola liaparo tsa hae, a re: Jo! phetohelo! phetohelo!” Empa hona ha se ke ha thusa letho. Jehojada a laela hore a bolaoe. Ka tsela ena, setho sa ho qetela se neng se phela sa ntlo ea Akabe sa shoa ka lihlong.—2 Likron. 22:10-12; 23:11-15.
Ketso ea ho hlanyetsa puso ea Athalia e ka hlalosoa joang? O ne a qoetse ka ho feletseng borapeling ba litšoantšo. Ka baka la tšusumetso ea hae, bara ba hae ba kena ka tempeleng ea Jehova, ntle ho pelaelo e le ho ea utsoa. Lintho tse nkiloeng sehalalelong sa Jehova tsa neeloa molimo oa kemolo Baale. (2 Likron. 24:7) Joalokaha Bibele e senola, borapeli bo joalo ba litšoantšo bo isa libeng tsa mefuta eohle tse feteletseng. Rea bala:
“’Me ereka ha ba sa ka ba hlokomela ho tseba Molimo, Molimo o ba neeletse moeeng o hlokang kelello, ba tle ba etse tse sa tšoanelang. Ba tletse bokhopo bohle, le bootsoa, le lonya, le takatso ea moruo, le bolotsana, ba tletse mohono, le polao, le khang, le thetso, le manganga. Ke basebi, ke baetselletsi, ke ba hloeang Molimo, ke barohaki, ke baikhantši, ke baikhohomosi, ke ba qapang limpe.” (Ba-Roma 1:28-30)
’Nete ea hore Athalia o ile a bolaea litloholo tsa hae hore a iphumanele puso e senola kamoo borapeli ba litšoantšo bo ka beang motho boemong ba kelello bo sa amoheleheng.
Taba ea Athalia e hatisa kotsi ea ho kena borapeling ba litšoantšo. Borapeli ba bohata bo ka bula menyako e kenang bobeng ba mefuta eohle. Ka bohlale, he, re lokela ho tsoela pele ho ela hloko mantsoe a bululetsoeng: “Itšabiseng melimo ea bohata.”—1 Joh. 5:21.