Likerubime Borapeling ba Iseraele—Ke Eng ha e ne e se Borapeli ba Litšoantšo?
MELAO e Leshome ea Iseraele e fanoe har’a boemo bo kenyelletsang tšabo ba matla a Molimo le khanya ha Molimo ‘o ne o theohetse ho eona [thaba ea Sinai] o le mollong; mosi oa eona oa lopallela holimo joale ka mosi oa sebopi, ’me thaba kaofela ea reketla haholo.’ Ka nako eo Molimo oa re: “U se ke ua iketsetsa setšoantšo se betliloeng, leha e le setšoantšo se le seng sa tse holimo maholimong, leha e le sa tse tlase lefatšeng, leha e le sa tse metsing ka tlase ho lefatše. U se ke ua li khumamela, u se ke ua li sebeletsa; hobane ’na Jehova, Molimo oa hao, ke Molimo o boulelang.” Joalokaha Moshe a ile a hlalosa, Molimo oa ’nete o ne o tlile ka boholo boo “hore le ’ne le o tšabe, le tle le se ke la etsa sebe.”—Ex. 19:18; 20:4, 5, 20.
Ka molao ona oa borapeli ba litšoantšo ba o hatiselitsoe ka matla hakana, ba bang ba ka ’na ba botsa hore na ke hobane’ng ha Iseraele e ile ea boela ea laeloa hore e etse likerubime tse peli tsa gauda tse tla beoa holim’a sekoahelo sa areka ea selekane e ka Sehalalelisisong sa tabernakele. Ntle ho mona, mosebetsi ’ohle oa mohaho o ne o koahetsoe ka masela a line, a khabisitsoeng kahare ka libopeho tse ’mala e metle tsa likerubime.—Ex. 25:18; 26:1.
Ha hamorao tabernakele ena e nkeloa sebaka ke tempele ea Salomone, “a . . . betlela maboteng ’ohle a ntlo litšoantšo tsa likerubime,” ’me “ka hare sehalalelisisong, a etsa likerubime tse peli tsa mohloare; bolelele ba e ’ngoe le e ’ngoe e le litsoe tse leshome.” Hape, menyakong ea tempele le maboteng a ka thōko a liluloana tsa koporo tse sebelisoang tempeleng li ne li khabisitsoe ka likerubime le lintho tse ling.—1 Mar. 6:29, 32, 23; 7:27-29.
Na ho etsoa ha likerubime le litšoantšo tse ling tse betliloeng ho ne ho sa bope borapeli ba litšoantšo?
Ha se Litšoantšo Tsohle tse Rapeloang
Setšoantšo se entsoeng molimo ke ntho efe kapa efe e entsoeng ho emela kapa ho tšoantšetsa ntho eo ho ineetsoeng ho eona, le haeba ke e bonahalang kapa e inahaneloang. Borapeli ba litšoantšo ho sebelisoa liemahale le lintho tse tšoantšetsang bo tletse hohle. Le hona ’musong oa Iseraele oa meloko e 10 ho ne ho emisitsoe manamane a mabeli a gauda bakeng sa borapeli ba litšoantšo, ’me pusong ea morena e mong oa moraonyana, ha hlongoa borapeli ba Baale, ka aletare le lithupa tse halalelang tse neng li emisitsoe.—1 Mar. 12:28; 16:29, 31-33.
Leha ho le joalo, molao oa Molimo oa hore ho se ke ha etsoa litšoantšo tse betliloeng o ne o sa hlakole hore ho ka etsoa liemahale life kapa life. Joalokaha ho hlokomelehile ka holimo, libopeho tsa likerubime li ne li sebelisitsoe ho khabisa tabernakele lefeelleng le tempeleng ea Salomone e Jerusalema. Ho latela neano ea boholo-holo ea Bajode, likerubime tsena li ne li e-na le sebopeho sa motho. Li ne li emela libopuoa tsa mangeloi. Tse neng li le sekoahelong sa areka ea selekane li ne li hlalosoa e le “likerubime tse khanyang.” (Ba-Heb. 9:5) Li ne li entsoe kahohle ka “tekanyetso ea . . . mesebetsi eohle ea eona” eo Moshe a e fumaneng ho Jehova.—Ex. 25:9.
Likerubime tsena li ne li bontša boteng ba borena ba Jehova ea neng a itse: “Ke hona moo ke tla teana le uena, ke bue le uena ke le holim’a sekoahelo, pakeng tsa likerubime tse holim’a areka ea bopaki.” (Ex. 25:22) Kahoo, ka tsela ea boemeli, ho ne ho boleloa Jehova a ‘lutse holim’a [kapa, “pakeng tsa”] likerubime.’ (1 Sam. 4:4; 2 Mar. 19:15) Kahoo Jehova a hatisa holim’a moprista e moholo oa sechaba, eo e leng eena feela ea neng a lumelletsoe ho kena ka Sehalalelisisong hang ka selemo, hore ke Eena Molimo oo e leng Morena oa Iseraele.—Ba-Heb. 9:7; Esa. 33:22.
Litšoantšo tse ling tsa likerubime, ka tabernakeleng le ka bohareng ba tempele, li ne li bonoa le ke baprista ba tlase ba sebeletsang. Kahoo, le bona ba ne ba khahloa ke boteng bo halalelang ba Jehova ka ho teba.
Joalokaha re bone, litšoantšo tsena tsa likerubime li ne li sa iqapeloa ke motho. Jehova ka boeena a laela hore li beoe ka tempeleng ka morero oa hore boprista bo hlokomele ka botlalo hore o teng. Hape, li ne li ke ke tsa rapeloa ke batho, hobane batho ka kakaretso ba ne ba sa bone likerubime ’me kahoo ba ke ke ba thetseha hore ba li rapele. (Num. 4:4-6, 17-20) Ho e-na le ho khothalletsa borapeli ba litšoantšo, likerubime li ne li hopotsa baprista ba Iseraele nako le nako ka kamano ea bona le Ea Holimo-limo, Morena ea busang oa Iseraele, Ea hlokang boineelo bo khethehileng.—Deut. 6:13-15.
Moo batho ba ileng ba kopana ka lekhetlo la pele le likerubime tse phelang ke ka ntle ho tšimo ea Edene, ha Adama le Eva ba sitetsoe Jehova Molimo ’me a ba leleka tšimong “’me a bea likerubime ka nqa bochabela ho tšimo ea Edene, tse nang le lerumo le benyang le ōmang ka nqa tsohle, ho thiba tsela ea sefate sa bophelo.” Motho o ne a nyelisitse boemo ba Molimo e le Morena ea Phahameng, ’me likerubime e le tse phahamisang terone ea Jehova tsa thibela tsela e khutlelang kamanong e haufi le Jehova paradeiseng ea lefatšeng.—Gen. 3:23, 24.
Leha ho le joalo, likerubime tse ileng tsa koahela sekoahelo sa topollo sa Areka ea selekane hamorao li ne li bontša hore Jehova o boetse o har’a batho ba hae ba Iseraele. Molimo o ne o lutse lipakeng tsa likerubime, ho bontša hore o butse tsela e kenang kamanong e loketseng le eena.
Baprista ba Iseraeleng ba ne ba jere boikarabelo bo boholo haholo, ho boloka batho kamanong e loketseng le Jehova, “melomo ea moprista e tšoanetse ho boloka tsebo, molao o tle o batloe molomong oa hae.” (Mal. 2:7) ‘Ho tšaba Jehova,’ e le “motheo oa tsebo” ’me ke “qalo ea bohlale,” li ne li tlameha ho kenyelletsoa thutong ea bona. (Liprov. 1:7; 9:10) Tšebeletso ea bona tabernakeleng, ’me hamorao tempeleng, e ne e ba hopotsa nako le nako ka boteng ba Jehova le ho hloma tšabo e loketseng ea Jehova lipelong tsa bona e le hore bona, ka baka leo, ba ka kenya tšabo ena ho batho.
Leha ho le joalo, ho ile ha etsahala joang mehleng ea moprofeta Ezekiele? Jo, batho, tlas’a tataiso ea baholo ba bona, ba furalla boteng ba Jehova. Ponong, Ezekiele a isoa lebaleng le ka hare la tempele ho bona banna ba 70 ba baholo ba ntlo ea Iseraele ba rapela litšoantšo ho e ’ngoe ea likamore tse ka hare tsa tempele. Ba re: “Jehova ha a re bone, Jehova o furaletse naha ena.” (Ezek. 8:9-12) Hona ha etsahala hona ka tempeleng baprista ba sa re letho. Ka baka la borapeli bona ba litšoantšo, Molimo oa timetsa Jerusalema le tempele ea eona, ho akarelletsa mekhabiso ea eona ea likerubime, ka selemo sa 607 B.C.E. Timetso ha e ka ea tla ka baka la borapeli ba litšoantšo bo amanang le mekhabiso ea likerubime empa ka baka la hobane Iseraele e ile ea lebala eona ntho eo likerubime li neng li lokela ho ba hlokomelisa eona, e leng, boteng ba Jehova e leng Molimo o hlokang boineelo bo khethehileng.
Kahoo, e le ho tšoana le Bakreste mehleng ena, a re ke re tšoarelleng ka matla tumelong ea rōna, ‘re ntse re hopola ho tla ha letsatsi la Jehova.’ Re etse ka tumelo joalokaha eka re bona ea sa Bonoeng, Jehova.—Ba-Heb. 11:27; 2 Pet. 3:12.