Lipotso Tse Tsoang ho Babali
■ Mora oa ka ea kolobelitsoeng a le lilemong tsa bocha, hona joale o nyetse ’me o na le bana. Ka baka la khatello ea ho fumana tsa bophelo o se a tapile moeeng ’me ha a kopanele le phutheho. Na a ka talingoa e le motho “ea ikhaotseng”?
Ha ho letho tlhalosong ea hao le hlokang pono e joalo. Mohlomong potso e tsoaloa ke ho se utloisise hore na ba ka talingoang ba “ikhaotse” ke bafe.
Molula-qhooa oa March 1, 1982, leqephe la 21, o bontšitse hore ho na le phapang pakeng tsa (a) Mokreste ea fokolang moeeng ’me a sa sebetse, le (b) motho eo ka ho hlakileng a latolang hore ke e mong oa Lipaki tsa Jehova, a khannela baholo ba phutheho hore ba bolele hore ‘o ikhaotse’ ka boeena. Ho bonahala eka mora oa hao o lokeloa ke tlhaloso ea pele.
Molula-qhooa o bolela hore Mokreste e mong o fokola moeeng le tumelong. Hona ho etsahetse le lekholong la pele la lilemo (Ba-Roma 14:1, 2; 1 Ba-Korinthe 11:30) Ha ho bolele hore ha e sa le Bakreste. Le haeba ba fokola hoo ba seng ba sa abe “litaba tse molemo” har’a ba bang ’me ba khaolitse ho ea libōkeng, ’me ba sa tlisetse phutheho ea Bokreste thohako, ba sa ntsane ba lokela ho nkoa e le baena le likhaitseli ho rōna moeeng. Re lokela ho rata ho ba thusa ka lerato, re latela keletso ea moapostola Pauluse: “Banab’eso, rea le rapela, hore le ke le lokise ba sa eeng ka molao, le tšelise ba pelo li tepeletseng, le tiise ba fokolang, ’me le be le mamello ho bohle.” Leha baholo e le bona ba atisang ho etella pele ho sena, ho ke ho hlokomeloe hore keletso ena e ne e tobisitsoe ho bohle ‘kerekeng ea ba-Thessalonika.’ (1 Ba-Thessalonika 1:1; 5:14) Kahoo baholo le ba bang ba ka fana ka thuso le khothatso e lerato, ba hopotse keletso: “A le ke le tiiseng ke hona matsoho a tepeletseng le mangole a tetemang; ’me le etsetse maoto a lōna litsela tse lokileng, hore se hlōtsang se se ke sa nonyetsehela ruri, se mpe se fole.”—Ba-Heberu 12:12, 14; Tšenolo 3:1-3.
Ho fapane haholo le eo e neng e le Mokreste ea “ikhaotseng.” Lentsoe lena le sebelisoa haholo maemong a mabeli:
Pele, le hoja ho sa tloaeleha, motho a ka qeta hore ho hang ha a sa batla ho ba Paki. Ha re bolele motho ea tšoanang le ea hlalositsoeng ka holimo, ea fokolang moeeng kapa Mokreste ea nyahameng ea ka ’nang a bontša lipelaelo tse itseng. Ho e-na le hoo, re bolela ea entseng qeto eo a e bolelang hore ha e sa le e mong oa Lipaki tsa Jehova. Kaha nakong e fetileng ka boithatelo e bile setho se kolobelitsoeng sa phutheho, joale ho ka ba hotle hore a tsebise phutheho hore o khaola kamano ena. Ho ka ba hotle haholo ha hona a ho etsa lengolong le lekhutšoanyane ho baholo, empa le haeba a ikhethela ho ho bolela ka molomo hore o latola boemo ba hae e le Paki, baholo ba ka sebetsa taba.—1 Johanne 2:19.
Boemo ba bobeli ke bo amang motho ea latolang boemo ba hae ka phuthehong ka ho kopanela le mokhatlo oa lefatše oo morero oa oona o hananang le keletso e kang e ho Esaia 2:4, moo re balang ka bahlanka ba Molimo: “Ba tla tea liphehla tsa bona tsa ntoa mehoma, le marumo a bona ba a tee lisekele; sechaba se seng ha se sa tla hlola se futuhela sechaba se seng ka lerumo, ha ba sa tla hlola ba ithuta ho loana.” Hape, joalokaha ho boletsoe ho Johanne 17:16, “Hase ba lefatše, joale ka ha le ’na [Jesu] ke se oa lefatše.”—Bapisa Tšenolo 19:17-21.
Boemong bo bong le bo bong ho ana a mabeli, motho ka ketso mohlomong le ka polelo ka ho hlakileng o khaotse boemo ba hae e le e mong oa Lipaki tsa Jehova, o ikhaotse setsoalleng. Kahoo, baholo ba tla etsa tseblso e khutšoanyane ho phutheho hore motho enoa o ikhaotse. Ba ka phuthehong ba tla amohela qeto ea motho ’me kamorao ho moo ba tla mo talima joaloka eo e neng e le ngoan’abo bona eo ba ke keng ba thabela botsoalle le eena, tumellanong le seo re se balang ho 1 Ba-Korinthe 5:11 le 2 Johanne 9-11.
Joalokaha re ka ho ananela, mora ea fokolang moeeng le ea sa etseng letho eo ho botsoang potso ka eena hase motho ea “Ikhaotseng” ka kutloisiso ea Iitlhaloso tsena tse peli ’me ha ho tsebiso e joalo e entsoeng ka phuthehong. Mohlomong ho sa ntsane ho ka etsahala ho mo thusa ka moea oa Ba-Roma 15:1: “Rōna ba matla, re tšoanetse ho jara mefokolo ea ba fokolang.”—Bona hape Esaia 35:3.