Sehlooho se Ananeloang—“Lentsoe la Molimo Lea Phela”
KA LILEMO tse fetang bobeli joale Molula-Qhooa, litokollong tsa oona tse ngata tsa la leshome le metso e mehlano khoeling, o ’nile oa tsoela pele ka sehlooho se khethehileng se maqephe a mabeli se nang le litšoantšo tse ikhethang “Lentsoe la Molimo Lea Phela.” Lihlooho tsena li ngotsoe ka mokhoa o bonolo le o utloisisoang habonolo o hlophiselitsoeng ho ipiletsa ho batho ba banyenyane, hammoho le batho ba s’o tloaelane hantle le lithuto tsa Bibele. Na u ’nile ua thabela sehlooho see? Na u se sebelisa ha u ruta ba bang? Ba bangata ba etsa joalo. ’Mali e mong o ngola hore:
“Mona ke melanyana e ananelang letoto le letle la Molula-Qhooa ‘Lentsoe la Molimo Lea Phela.’ ’Nete ea hore lihlooho li khutšoanyane, li etselitsoe litšoantšo tse ngata ’me li theiloe lithutong tsa motheo tsa Bibele e li etsa hore li be ntle bakeng sa ho ithuta tsona le bana ba ka. Lihlooho li boetse li bonolo ha u li hlahloba ka baka la ho baleha ha tsona ho bonolo, ho etsa hore ho be bonolo ho tiisa taba e phelisang e rutoang moo.
“Ho phaella moo ke atisa ho sia Molula-Qhooa ke e phetlile lihloohong tsena tšebeletsong ea tšimo, ke ikutloa hore litšoantšo le mantsoe a matla a lihlooho tsa lipotso tsa taba li tla ruta mong’a ntlo ho hong le haeba a ka habanya sehlooho sena feela.”
Babali ba bangata ba ngotse ho re bolella ka molemo o motle oo lihlooho li ba tliselitseng oona. ’Mè oa Olympia, Washington, o re:
“Morali oa ka o lilemo li leshome le metso e mene feela empa o rata ho balloa, haholo limakasineng tsa ‘batho ba baholo.’ U ka inahanela hore na lihlooho tsena li mo thabisa hakaakang. O rata buka ea hae ea “lipale,” empa ho bonahala tsena li khethehile hobane li ncha kamehla li bile li fapane. Li khutšoanyane ka ho lekaneng bakeng sa tlhokomelo ea hae e khutšoanyane ’me litšoantšo li hapa le ho tšoara thahasello ea hae.
“Se ngotsoeng e boetse ke khopotso e ntle ho ’na le monna oa ka, hangata li re hopotsa lintlha tseo re li lebetseng. Re tla boloka buka eo re li manamisang ho eona e le hore re ka khutlela ho tsona nako le nako. . . . Ke li sebelisa tšebeletsong ha ke bona hore mong’a ntlo o na le bana, ’me batho ba bangata bao ke ba bontšang tsona ba li amohela ka teboho.”
Ho ile ha amoheloa lengolo le batlang le tšoana le leo le e-tsoa Cologne, Jeremane. ’Mali o qala ka hore: “E se e le nako ke batla ho ngola, ho bolela kamoo ke lebohang le ho ananela lihlooho tsa maqephe a mabeli ‘Lentsoe la Molimo Lea Phela,’ tse sa nthuseng ’na joale ka motho e moholo feela, empa haholo bana ba ka.” Motho enoa o hlokomela ho ea pele:
“Buka ea ka ea Lipale tsa Bibele e bile thabo e khōlō ho rōna, empa seo e fanang ka sona sea fokola. Kaha rōna batho ba baholo re batla lijo tsa kamehla tsa moea, ho joalo le ka bana ba rōna. . . . Ntlheng ena ke ile ka ananela lihlooho tse boletsoeng kaholimo tseo le li qalileng ngohola. Li bua ka taba eitseng, empa hangata li ngotsoe ka bonolo li tobile taba. Kamehla li tšoantšetsa pono e ’ngoe le e ’ngoe. Bana ba rata buka ea Lipale tsa Bibele haholo, empa hangata ho na le lintlha tse sa bontšoeng litšoantšong, ’me hangata ke pale. Kahoo, lihlooho tse ho ‘Lentsoe la Molimo Lea Phela’ bonyane le tsona ba li ananela, mohlomong le ho feta moo.”
Babali ba bang ba hlalosa kamoo ho fihla ha limakasine tse nang le sehlooho sena se khethehileng li emeloang ke litho tsa malapa. ’Mè oa Ogdensburg, New York, o bolela hore “Ngoana oa hae ea lilemo li tšeletseng o li emela ka cheseho khoeli e ’ngoe le e ’ngoe eo li tsoang ka eona.” O hlokomela hore:
“Monna oa ka o kenyellelitse hona e le karolo ea kamehla ea thuto ea mora oa rōna ea Bibele. Monna oa ka o re ho tšoana le ho phaella buka ea Lipale tsa Bibele khoeli e ’ngoe le e ’ngoe! Taba e ncha ruri e hlasimolla thahasello ea mora oa rōna. Le hoja a rata buka ea hae ea Lipale tsa Bibele, o se a tseba pale e ’ngoe le e ’ngoe e ho eona hantle haholo, empa ha a tsebe hore na o tla lebella taba efe e ncha khoeli e ’ngoe le e ’ngoe, ’me ruri o hlile o tlala thabo ka eona. Haeba a ntša poso ka lebokoseng, ke eena oa pele ea tla tšoara limakasine ’me a li ntše ka mokotlaneng oa tsona a tšepile hore o tla fumana taba e ncha kahare! Re na le tšepo ea hore sehlooho sena se tla tsoela pele halelele.”
’Mè oa Seattle, Washington, o ile a leboha sehlooho se secha sa Molula-Qhooa, ’me a hlalosa:
“Lilemong tse fetileng tse leshome le motso o mong ke ile ka rapela Molimo hore o mpontše tsela ea ’nete hobane ke ne ke sa tsoa fumana ngoana oa ka oa pele ’me ke sa tsebe hore na nka mo hōlisa ka nepo joang lefatšeng lena le khopo. Ka libeke tse peli ka atameloa ke Lipaki tsa Jehova ’me tsa qala ho ithuta le ’na. Hona joale, lilemo hamorao, ke na le banana ba batle ba Bakreste ba babeli ba tlang lapeng lijong tsa motšehare tsatsi le leng le le leng ho utloa ka mehlala ea sebele ea Bakreste ba ’nete e tlalehiloeng limakasineng le ho utloa lihlooho tse kang ‘Lentsoe la Molimo Lea Phela.’ Ke leboha haholo hore e be Jehova o ile a utloa le ho arabela thapelo ea ka ea thuso le hore o ntse a e arabela ka limakasine.”
Ntate oa Duluth, Georgia, o hlokomela bohlokoa ba kamehla ba lihlooho tsena:
“Ke ’nile ka bokella ‘Lentsoe la Molimo Lea Phela’ ’me ke fumane hore [ke lihlooho] tse ntle haholo bakeng sa ho khutlela ho tsona nako le nako. Li khutšoanyane empa leha ho le joalo li na le ho hongata. Ke ho fetotse papali ea ho khaola [sehlooho] se seng le se seng e be ke se kenya bukeng ea litšoantšo. Ke na le ‘Lentsoe la Molimo Lea Phela’ kaofela bakeng sa 1981 bukeng ea ka ea litšoantšo. Ke li fumane li thahasellisa ka sebele ho li kopanela le ba bang ’me haholo le bana ba ka, ’me ke sebelisitse taba e ka ho tsona mosebetsing oa ka oa tšebeletso ea tšimo.”
Kamor’a ho bolela kananelo e joalo bakeng sa lihlooho tsena, ntate enoa a liela litema ka hore: “Ke ile ka soaba haholo ha ke fumana hore ‘Lentsoe la Molimo Lea Phela’ e ne e le sieo ho Molula-Qhooa (oa Senyesemane) oa January 15, 1982 ’me ke na le tšepo ea hore ha hoa khaotsoa. Ke lebeletse tokollo ea khoeli e tlang ea Molula-Qhooa ka cheseho.”
“Lentsoe la Molimo Lea Phela” e qalehile ka tokollong ea August 15, ’me e tokollong e ’ngoe le e ’ngoe ea la 15 ho tloha ka nako eo. ’Me ho na le litokisetso tsa ho tsoela pele ka sehlooho sena ka nakoana e tlang. Re tšepa hore u tla thabela ho se bala ka bouena e be u tseba ho thusa ba bang ba bangata ho ithuta lithuto tsa motheo tsa Lentsoe la Molimo.