Ha Lipelo Tsa Rōna li Re Susumelletsa ho Ikitlaetsa
KE LA 12 Nisane, 33 C.E. Bethania, haufi le Jerusalema ke Jesu Kreste ea natefetsoeng ke lijo le ba bang lapeng ha Simone molepera. Har’a bamemuoa ho na le morutuoa ea khabane ea bitsoang Maria. O choatla nkho ea Albastera ’me o tšela oli e monko o monate e theko e boima haholo hloohong ea Jesu.
Bang baa ipelaetsa, ‘Na ho ka etsoa tšenyo e kaale? Oli ena e ka be e rekisitsoe ’me chelete ea teng ea neoa bafumanehi!’ Empa Jesu o-oa arabela: ‘Mo tloheleng, hobane bafumanehi bona le tla ’ne le be le bona ’me le ka ba etsa hantle. Empa ’na le ke ke la ba le ’na kamehla. O entse sohle se matleng a hae, a ntlotsa ka oli e nkhang hamonate ho ntokisetsa ho epeloa.’—Mattheu 26:6-13; Mareka 14:3-9; Johanne 12:1-8.
Ha ho letho leo Maria oa Bethania a neng a ka le etsa ho fokotsa bohloko ba Jesu ha a khokhotheloa matsatsi a mabeli hamorao—ka la 14 Nisane, 33 C.E. Empa ka nako eo o ne a ka mo tlotsa ka oli e monko o monate. Kahoo, joalokaha Jesu a boletse: “O entse seo a neng a ka se etsa.” (Mareka 14:8) Ruri pelo ea Maria e ne e mo susumelletsa hore a ikitlaetse.
Ho Susumelletsoa ho Ikitlaetsa
Re le Lipaki tsa Jehova, kapa re le batho ka bomong ba ithutang ’nete ea Molimo, mohlomong re chesehela ho hasa litaba tse molemo tsa ’Muso ‘mehleng ena ea qetello.’ (Mattheu 24:14; 2 Timothea 3:1-5) Ha e le hantle, mohlomong re na le kabelo e ntle mosebetsing oo.
Leha ho le joalo, boikarabelo ba lelapa, mathata a bophelo le mabaka a mang li ka ’na tsa re sitisa ho sebeletsa re le baromuoa linaheng tse hole. Mohlomong re sitoa ho ba litho tsa basebeletsi ba ntlo-khōlō kapa makala a mokhatlo oa Watch Tower. Mohlomong ho ke ke ha etsahala hore re sebeletse re le balebeli ba tsamaeang, joalo-joalo. Leha ho le joalo, re ke ke ra haneloa ho sebelisa seo re nang le sona ka tsela e tla ntšetsa pele lithahasello tsa ’Muso. (Mattheu 6:33) Ruri re ka nolofalloa ho ‘tlotlisa Jehova ka maruo a rōna.’ Ke moo lehlohonolo le leng teng hobane ‘meliko ea rōna e tla tlala e phanya-phanye.’—Liproverbia 3:9, 10.
Ba ile ba Ikitlaetsa
E, re ka ba le moea o tšoanang le oa Maria oa Bethania le batho ba bang ba barapeli ba mehleng e fetileng. Mohlala ke ona: Baiseraele ba mehleng ea Moshe ba ile ba neoa tokelo ea ho tlotlisa Jehova ha ho hahuoa tabernakele ea borapeli ba Hae. Batho ba ne ba sa lekane ka matla, empa lipelo tsa bona tsa ba susumelletsa ho ikitlaetsa. Ka mohlala, basali ba bang ba ohla boea ba lipōli bo ileng ba sebelisoa. Banna ba itseng ba sebeletsa e le litsebi tsa mesebetsi eitseng ea matsoho. Batho ba bang bona? Ba tlotlisa Jehova ka ho fana ka gauda, silevera, koporo, boea ba nku, line le lintho tse ling hore tabernakele e phethoe. Bao lipelo tsa bona li neng li ba susumetsa ka thabo ba “tlisetsa Jehova likabelo tsa bona,” ’me e ne e le “likabelo tsa boithatelo.” (Exoda 35:4-35) Ba ile ba fana ka ho hokae? Lintho tseo ba faneng ka tsona “li ne li lekane; le ho sala li ne li tla sala.” (Exoda 36:4-7) E, ba ikitlaetsa.
Lilemo-lemo hamorao Morena Davida a ntša ho hongata bakeng sa tempele e neng e tla hahuoa ke mora oa hae Salomone. Davida a ba a fana ka gauda le silevera ‘tsee e leng tsa hae’ bakeng sa morero oo. Eaba o botsa batho ba Iseraele: ‘Ke mang ea ratang hore kajeno a tlatse letsoho la hae a fe Jehova?’ Ha ba arabela, lihlooho tsa matlo le lihlooho tsa meloko lia fana, ’me “ba neng ba na le mahakoe a bohlokoa, ba a neela polokelo ea ntlo ea Jehova.” Hona ha hoa etsoa ka ho korotla, hobane re bolelloa hore: “Sechaba sa thabela tseo bao ba li ntšitseng ka ho rata; hobane efela e ne e le ka pelo eohle ba neng ba neela Jehova limpho tsa bona tsa ho rata; le eena morena Davida a li thabela ka thabo e kholo.” (1 Likronike 29:3-9) Bohle ba etsa sohle se matleng a bona.
Bakreste ba bangata ba pele ba ne ba fana ka limpho e le motho ka mong ho ntšetsa pele boboleli ba ’Muso. Ka mohlala, moapostola ea seng a tsofetse Johanne, o ile a bontša litho tsa phutheho ea Bokreste hore li tlamehile ho thusa baemeli ba tsamaeang ba rōmetsoeng ho tsona, ‘hore ba sebelisane ’neteng.’ Johanne a ba a babatsa Gaiuse ka kamohelo eo a e etsetsang “baeti,” ke hore, batho bao Gaiuse a neng a sa ba tsebe pele ho moo empa a ile a ba etsa ka mofuthu ka lebaka la tšebeletso ea bona eo ba neng ba e etsetsa liphutheho. (3 Johanne 5-8) Lipaki tse ngata tsa Jehova sebakeng se seng li ne li sitoa ho tsamaea libaka tse hole ka lebaka la ‘litaba tse molemo,’ empa tsa ikitlaetsa.
Liphutheho le tsona li ne li sebelisa seo li nang le sona se bonahalang ho phahamisa mosebetsi oa ’Muso. Ka mohlala, moapostola Pauluse o ne a ka re ho balumeli ba Bafilippi: “Esitile leha ke le Thessalonika, le nthometse hang le habeli seo ke neng ke se hloka. Hase hoba ke batla limpho, empa ke batla litholoana tse ka le atelang ho le ruisa.” (Ba-Filippi 4:15-17) Hase phutheho kaofela e neng e ka tsamaea le moapostola, empa ba ikitlaetsa.
Boikutlo ba ba Bang
Jesu Kreste o itse: “Ho nea ke leseho le fetisang la ho fuoa.” Ke kahoo e seng mohlolo hore e be batho ba Molimo ba ile ba thaba haholo ha ba etselitse Jehova ‘likabelo tsa boithatelo’ mehleng ea Morena Davida. (1 Likronike 29:9; Liketso 20:35) Moea o joalo o teng kajeno.
Paki e ’ngoe ea Jehova ea ngolla Mokhatlo oa Watch Tower, e re: “Ke lilemo li 81 ’me ha ke sa khona ho tsoela tšebeletsong haholo [tšebeletsong ea tšimo) ka lebaka la serame sa masapo, empa ke batla ho etsa ho hong ho ntšetsa pele tšebeletso. Ke tla le rōmella mpho khoeli le khoeli ha ke sa ntse ke khona ’me haholo-holo ke rata ho thusa ba fumaneng mangolo [Sekolong sa Bibele sa Gileade sa Watchtower] ba eang linaheng lisele.” Mosali-moholo enoa o ne a ke ke a sebeletsa e le moromuoa, empa pelo ea hae e ne e mo susumelletsa ho ikitlaetsa.
Malapa a mang a sebelisana hore a kopanele ho etsa moneelo oa ho hong bakeng sa seo Mokhatlo o se hlokang ho hatisa le ho atolosa. Lelapa le leng la ngola: “Re ile ra ikutloa re susumeletseha re le lelapa ho kopanela ho sena. . . . Re ile ra thaba haholo ha bara ba rōna ba babeli ba lilemong tsa bocha ba re atamela ’me ba bolela hore ba lakatsa hore le bona ba kopanele moneelong oa lelapa la rōna ho Mokhatlo. Karolo ea bona e tsoa cheleteng eo ba e bolokang ha ba ntse ba iketsetsa mesebetsi ea nakoana. Re thabisoa ke libuka tse ngata tse ntle le lijo tsa moea tse ngata tseo re fepuoang ka tsona nako le nako li tsoa tafoleng ea Jehova.”
Kamoo ho ka Khonehang
Barui ba ’maloa har’a Lipaki tsa Jehova, ’me ba bangata ba tlameha ho loantšana le mathata a kajeno a moruo. Empa ha ba fana ka ho lekaneng bakeng sa ho ntšetsa pele lithahasello tsa ’Muso ha ba lokela ho ikutloa hore moneelo oa bona hase oa bohlokoa. Ha Jesu a bona mohlolohali ea hlokang a akhela licheletana tse peli tse nyenyane ka polokelong ea letlotlo, ha a ka a mo nyelisa. Ho e-na le hoo, a re: “Ka ’nete ke re ho lōna: Mohlolohali eo ea fumanehileng, o noketse ho feta ba bang bohle; hobane bao kaofela ba noketse likabelong tsa Molimo, ba nkile ho tlalloeng ha bona; kanthe enoa seo a se noketseng o se nkile bofumanehing ba hae, o noketse hohle hoo a neng a phela ka hona.” (Luka 21:1-4) Le hoja chelete ea hae e ne e le nyenyane, a etsa sohle seo a neng a ka se khona.
Hore ho tle ho fanoe ka ho hong, hangata ho hlokahala tokisetso ka lehlakoreng la motho ka mong le malapa kapa phutheho. Kahoo, eitse ha ho hlokahala har’a Bakreste ba Judea, balumeli bahabo bona ba Korinthe ba neng ba batla ho ba thusa ba fumana tlhahiso e thusang e tsoang ho moapostola Pauluse. A ngola: “Ha e le ka lithuso tse bokelleloang bahalaleli, le etse joale ka ha ke laetse likereke tsa Galatia. Ka tsatsi le qalang veke, e mong le e mong oa lōna a bee kathoko ha hae see a ka se bokellang, a lekanye ka see a sitsitsoeng ka sona, ho se ke ha lebelloa ho tla ha ka ho etsa likabelo.”—1 Ba-Korinthe 16:1, 2.
Joalokaha motho a ka boloka chelete bakeng sa tsietsi e ka hlahang, ka tsela eo Lipaki ka bomong, malapa kapa liphutheho kamehla li ka ’na tsa bea ho hong bakeng sa moneelo oa ho ntšetsa pele borapeli ba ’nete. Ha e le hantle, hangata liphutheho li atisa ho fana ka meneelo e ka thoko bakeng sa ho ntšetsa pele mosebetsi oa ’Muso. Li etsa joalo ka ho lokisetsa le ho fetisa liqeto tse amang taba ena. Ka pel’a bohle batho ka bomong bao lipelo tsa bona li ithatelang ba ho fumana ho le bonolo ho kopanela ho tšehetseng mesebetsi ea boboleli ba Bokreste lefatšeng lohle ka ho fana ka morero oo. Ho fana ka nepo tjena ho atisa thabo ea bona le ho ba khotsofatsa ka ho tseba hore ba ikitlaelitse.
Limpho tse amoheloang ke Mokhatlo oa Watch Tower li amoheloa ka hore ho ngoloe lengolo la hore li fihlile. Batho ka bomong, malapa kapa liphutheho tse lakatsang ho fana ka tsela e joalo li ka romela meneelo ho Watch Tower Bible and Tract Society of Pennsylvania, 25 Columbia Heights, Brooklyn, New York 11201, kapa ofising ea lekala ea Mokhatlo e haufi.
Meneelo eohle e fumanoang ke Mokhatlo e ananeloa haholo ’me e sebelisoa ho hasa litaba tse molemo tsa ’muso oa Molimo. Ka mohlala, ka mokhoa o joalo ho tšehetsoa mahae a baromuoa le mesebetsi linaheng tse ngata. Hape, likhatiso tseo e leng tsa bohlokoa ho abeng libuka tsa Bibele, li bolokoa li ntse li sebetsa le ho atolosoa moo ho hlokahalang. Ka lebaka la meneelo e joalo balebeli ba tsamaeang ba potoloho le ba setereke ba tseba ho etela liphutheho tsa Bakreste lefatšeng lohle le ho thusa balumeli bahabo bona moeeng. (Ba-Roma 1:11, 12) Ba bang ba mosebetsing oa nako e tletseng oa tšebeletso le bona ba thusoa ka oona mokhoa oo.
Babuelli ba pele ba borapeli ba ’nete ba ile ba hlohonolofatsoa ke leholimo ka lebaka la ho tlotlisa Jehova ka maruo a bona. ’Me thabo ea bona e ne e le kholo hakaakang! Le rōna re hlohonolofatsoa haholo ha re tšehetsa lithahasello tsa ’Muso kajeno. Ka baka leo, e se eka re ka nka bohato bo tiileng ha lipelo tsa rōna li re susumelletsa ho ikitlaetsa.