Lihlooho Lipontšong Tsa TV—Babali Baa Arabela

Keletso e tobileng e theiloeng Bibeleng e ile ea kopanyelletsoa puisanong ea lipale tse tsoelang pele tsa TV tokollong ea Molula-Qhooa oa June 15, 1983. Babali ba bangata ba ile ba ngola kamoo ba fumaneng molemo keletsong e fanoeng.

Paki e ’ngoe ea California e ngotse, “Ntho e ’ngoe le e ’ngoe eo le e boletseng le eo le e qotsitseng liphihlelong tsa ba bang tsa botho e ne e otla botsekeng!” “Ke bile lekhoba la lipale tse tsoelang pele tsa TV ka lilemo tse 13. Ke ne ke nahana hore ke sireletsehile feela ka ho ea libokeng tsa Bokreste le ho ba ea batlang a tsoa kamehla tšebeletsong ea tšimo. Empa ka nka boikutlo ba lefatše ba lipale tse tsoelang pele tsa TV ba hore haeba monna oa hao a u tšoara hampe kapa u ikutloa u sa ratoe, bofebe bo na le lebaka—kahobane monna ke eena a bo bakileng. ’Me eare ha ke ikutloa ke ‘e-na le lebaka’ ka nka tsela e mpe ’me ka siteloa Jehova le molekane oa ka. Qetellong ha bonahala ho hlokahala hore ke khaoloe phuthehong ea Bokreste.” Leha ho le joalo, a hlaphoheloa ketsong ea hae ’me a khutlisetsoa. Lihlooho tsena tsa matlafatsa qeto ea hae ea hore le ka mohla a ke ke a shebella lipale tsena tse tsoelang pele. A qetella ka hore: “Joale ke ithuta le ho bala Bibele le libuka tsa Bokreste ka khotso.”

Kotsi e ’ngoe e khukhunelang e ileng ea hlahisoa lihloohong tsena e ne e le tsela eo lipale tse tsoelang pele li hapang babohi maikutlo ka libapali tse pontšong. Mosali e mong oa Mokreste United States o ngotse: “Ke hōtse ke shebella pale ena e le ’ngoe e tsoelang pele ’me sebapali ‘Julie’ se tšoana le ‘motsoalle.’ . . . Ka letsatsi le leng ‘Julie’ a hlaheloa ke kotsi e ileng ea siea sefahleho sa hae se setle se le mengoapo e mebe. Letsatsi le leng le le leng ke ne ke lula ka pel’a TV ho tiisa hore o tla fola. Hona bosiung boo ha ke ntse ke rapela, le pele ke nahana seo ke se buang, ka rapela, ‘Jehova, ke kōpa u hlohonolofatse Julie.’ Ka tšoha! Thapelo ena e eang ho Jehova bakeng sa Julie e ne e tsoa pelong ea ka!” Ha a hlokomela hore o ne a kene ka setotsoana lipaleng tsena tse tsoelang pele a khaotsa ho shebella mananeo ana. A ngola: “Haeba babali bohle ba tla tebisa pelong sehlooho sa lōna se buang ka lipale tse tsoelang pele tsa TV, ba tla utloa likelello tsa bona li phomotse ka sebele, ka ha re lekanoe ke ho loana le mathata a rōna a letsatsi ka leng.”

Hoba a bolele kananelo bakeng sa lihlooho tsena, mosali e mong oa Mokreste Texas a ngola ka tsa hae tse fetileng: “Ka hlokomela hore ke ‘lekhoba’ la lipale tse tsoelang pele, le hore ke tlameha ho etsa ho hong ka hona. Ka ipotsa hape, haeba kamano ea ka le Jehova e ka ameha. Nka ba motsoalle oa ‘libapali tsa lipale tsena’ joang hape ka ba motsoalle oa Jehova? Ka tlameha ho li lahla kaofela hang—e ne e le eona tsela feela, ’me e ne e le thata hakaakang!”

Mosali eo oa Mokreste o ile a tlameha ho etsa eng hore a tle a lokolohe? A phaella: “Ka tlameha ho ntša TV plakeng. Ke ne ke tsoela kantle ’me ke batle seo nka se etsang tšingoaneng ea ka, ke etele e mong, ke etse ntho efe le efe e le hore ke tšoarehe hore ke se ke ka inehela. Kamor’a likhoeli tse ka bang tšelela ke e sheba letsatsi le leng le le leng ka nako e loketseng, ka ikutloa hore nka lula ka tlung; ka qala ho sebelisa nako eo bakeng sa boithuto ba botho ba Bibele, ho lokisetsa liboka le lintho tse ling tsa moea. Ka ikutloa hamolemo hakaakang! Ke nako e fetang lilemo tse peli joale ke sa bone metsoalle-’motoana eo. Ke tlameha ho lumela hore ka linako tse ling ke ntse ke ipotsa hore na ho etsahala’ng ka eona, empa kea ho loantša. . . . Mohlomong ba bang ba bangata ba e-song ho lokolohe ba tla lokoloha joale. Ke leboha Jehova le lōna baena ka ho pepesa lefeela lena la mafelane!’—Pesaleme ea 101:3.

E mong eo bophelo ba hae bo amiloeng ke lihlooho tsena ke Paki e Canada: “Ke ile ka lla ha ke bala lihlooho tsena, hobane ke ile ka fihlela hore pelo ea ka ha e sa feletse ho Jehova. Ka tšepisa Molimo oa ka hore ha ke sa tla ba lekhoba la lipale tsena ’me ka mo kōpa ho nthusa hore ke tsoe ha ka ha e le letsatsi la lenaneo.”

Mosali enoa oa Mokreste, ea neng a be a tlose thelefono ea hae plakeng ho qoba ho sitisoa nakong ea lenaneo la “hae,” o tsoela pele: “Matsatsi a mabeli hamorao, ke ile ka memeloa ho ea thutong ea Bibele hona letsatsing leo le nakong eo pale ‘ea ka’ e tsoelang pele. Ka e amohela ka thabo. . . . Hona joale ke ikutloa ke le haufi le Jehova, le kamano ea ka le eena e atamelane haholo. Jehova o molemo hakaakang ka ho re khalemela ka Lentsoe la hae!”

Jehova o re: “Ke tla u lemosa ke ntse ke u talimile ka mahlo.” (Pesaleme ea 32:8) O tseba lipelo tsa rōna tse mano ’me o rata ho re sireletsa hore re se senyehe moeeng. Ho molemo hakaakang ha re mamela keletso e bohlale joalo!