Ho Nyarela ka Litabeng
Ho Profeta Bokamoso
“Ka sebele bokamoso ha bo seo bo neng bo le sona!” ho boletse mohlophisi oa khatiso ea morao ea Compressed Air Magazine. E bua ka maemo a neng a profetiloe ka bo-1930 ho ea ho bo-1950, ha “batho ba nahanang ba mehleng eo ba ne ba beile tumelo e foufetseng ’musong le mahlaleng, ’me ba profeta tsamaiso e phethahetseng ea ’muso le sechaba pele ho selemo sa 2000.” Hlaloso ea mohlophisi oa makasine e bolela hore “boholo ba lipono tseo tse ntle ha bo e-s’o ka bo phethahala.” Hobane’ng ho se joalo? Kahobane ho ne ho nahanoa hore kamor’a Ntoa ea II ea Lefatše “mathata ’ohle a tla fela,” ’me ke ’nete hore “mahlale a hlahisitse tsoelopele e khōlō.” Empa leha ho le joalo lilemo tse latetseng ntoa li hlahisitse “mefere-fere har’a batho, lipolotiking, tikolohong le moruong.” Sehlooho se tsoela pele hore “re bohlale haholo, ha re sa khomarela ’muso le mahlale e le pheko mafung ’ohle a sechaba.”
‘Tumelo e joalo e foufetseng’ mesebetsing e finyelletsoeng ke batho e ile ea qojoa ke liithuti tse tiileng tsa Bibele tse ileng tsa ela temoso ena hloko: “Le se ke la itšepela marena, leha e le bana ba batho ba sitoang ho pholosa motho.” (Pesaleme ea 146:3) Liithuti tsena tsa Bibele li thea taba ea tsona boprofeteng bo phethahalang ba Bibele ’me li tsebahatsa hore maemo a mehleng ena a tla senyehela pele, ho fihlela Molimo o kenella ’me o hleka mebuso eohle ea batho bakeng sa ’muso oa oona.—Daniele 2:44; Mattheu 24:6-8, 14.
Le hoja bahlanka ba Molimo ba thulana le mefere-fere ea sechaba, ha ba “inehele” kamoo mongoli a boletseng kateng. Ho e-na le hoo, ba mamela keletso ea Jesu: “Emisang lihloho, ’me le lelale holimo, hobane topollo ea lōna e tla be e atametse.”—Luka 21:28.
Ho na le Sebaka sa ba Eketsehileng
Baahi ba lefatše, bao morao tjena ba lekanyetsoang ho libillione tse 4,5, ho lebelletsoe hore ba fihle ho libillione tse 6 selemong sa 2000, le ho libillione tse 10,5 selemong sa 2110. “Na batho ba libillione tse 4,5 ba bangata? Ba bangata haholo? Na ho tla ba thata hore ho be le ba libillione tse 10 kapa na lefatše le ka khona ho ba hlokomela kaofela?” ho botsa Hans W. Jürgens, moprofesara thutong ea lipalo-palo tse amang keketseho ea batho le kabo Univesithing ea Kiel, Rephabliking e Kopaneng ea Jeremane. Ha a ngola makasineng Geo, o boletse hore lefatše le na le “sebaka se lekaneng batho ba libillione tse ngata,” ba ka tsebang ho phela hammoho haeba ho etsoa liphetoho tse hlokahalang maemong a bophelo le a moruo. Empa o boletse hore bochaba ke bona bo sitisang. “Ha feela re ntse re lumella esita le ho ntšetsa pele boikhohomoso ba bochaba—’me Mokhatlo oa Machaba a Kopaneng o kentse letsoho ka tsela e kotsi tabeng ena empa o sa hlokomele—re tla hlōleha ho sebelisa lefatše la rōna ka botlalo.”
Ka baka leo, motho ha a lokela ho belaela haeba lefatše le ka tšehetsa palo e khōlō hakaalo ea batho ba tla ntšuoa mabitleng a tloaelehileng ka nako ea Molimo. (Johanne 5:28, 29; Tšenolo 20:12, 13) Ba ke ke ba khutlisetsoa lefatšeng le arotsoeng ka lithahasello tsa boithati, tsa bochaba, empa lefatšeng le lokileng, le nang le khotso, le le ka fepang bohle ka ho eketsehileng.—Pesaleme ea 72:7, 8, 16.
“Nahathote ea Bolumeli”
Batho ba leng litšoantšisong tsa thelevishene ba talimane le “mathata a tšoanang le litsietsi tsa batho bohle.” Ho bolela mongoli oa libuka tsa ho itlosa bolutu Benjamin J. Stein, tlas’a sehlooho se ngotsoeng ka holimo ho The Wall Street Journal. “Empa lebaka le leng le leholo ha ho etsuoa liqeto tsa sebele lea haella thelevisheneng: bolumeli.” Le hoja bolumeli bo tšoha bo le teng litšoantšong, Monghali Stein o hlokometse hore “nakong eo mananeo a thelevishene a shebuoang haholo ka eona, ha ho bolumeli le bo bonyenyane. Ha ho hlaha bothata bo hlokang kahlolo ea boitšoaro—e hlokahalang tšoantšisong e ’ngoe le e ’ngoe—karabelo e fanoa motheong oa tsebo e inahaneloang ea ho molemo le ho hobe, keletso ea motsoalle, keletso e hopoloang, kapa thuso e sa bonahaleng ea maemo.”
Batsoali ka ho khethehileng ba lokela ho belaela mocha oa litaba oo “ho seng motho le a mong . . . ea buang ka bolumeli e le tataiso bophelong ba hae,” kamoo ho boletseng Monghali Stein. Likelello tsa bacha li amohela ntho e ’ngoe le e ’ngoe ’me ba rata ho etsisa liketso le lipono tsa bahlomphehi bao ba ba bonang. E ka ba bohlale ho laola seo ba se shebang ho TV. Ha bohlokoa haholo, batsoali ba etsa hantle ho hlakisa bana ba bona hore ba sebelise Bibele e le tataiso ea bona. Bana ba lokela ho hōlisoa ka ‘taeo le ka thuto ea Jehova.’—Ba-Efese 6:4; Ba-Filippi 4:8.