Eketsa Khotso ea Hao Ka Tsebo E Nepahetseng

“Le ke le atisetsoe mohau le khotso, ka tsebo ea Molimo le ea Jesu Kreste, Morena oa rōna.”—2 PETROSE 1:2.

1, 2. (a) Ke hobane’ng ha kamano ea khotso le Molimo e ka bapisoa le lenyalo? (b) Re ka matlafatsa khotso ea rōna le Molimo joang?

KAMANO ea khotso e theiloeng le Jehova Molimo kolobetsong ea hao, ka nģ’a e ’ngoe, e tšoana le lenyalo. Le hoja letsatsi la lechato le thabisa, ke qalo feela ea kamano ea bohlokoa. Ka boiteko, nako le phihlelo, kamano ea lenyalo e tla ba e ratehang haholoanyane, le fetoha sebaka sa tširelo linakong tsa tsieleho. Kahoo, ka boikitlaetso le ka thuso ea Jehova, u ka eketsa khotso ea hao le oona.

² Moapostola Petrose o hlalositse kamoo ba ‘fumaneng tumelo’ ba neng ba ka matlafatsa khotso ea bona le Molimo. O ngotse: “Le ke le atisetsoe mohau le khotso, ka tsebo [“e nepahetseng,” NW] ea Molimo le ea Jesu Kreste, Morena oa rōna.”—2 Petrose 1:1, 2.

“Tsebo e Nepahetseng ea Molimo”

 3. Ho ba le tsebo e nepahetseng ka Jehova le Jesu ho bolela eng?

³ Lentsoe la Segerike bakeng sa “tsebo e nepahetseng” (e·piʹgno·sis) le sebelisitsoeng moelelong ona le bolela tsebo e tebileng le e haufi haholoanyane. Ha e le leetsi le ka bolela tsebo e fumanoeng ka phihlelo ea botho ’me le ngotsoe e le ‘ho tseba ka botlalo’ ho Luka 1:4 (NW). Seithuti sa Segerike Culverwel o hlalosa hore ho eena lentsoe leo le fana ka maikutlo a ho fetoha “ea tloaelaneng hamolemo le ntho eo ke neng ke e tseba pele; pono e nepahetseng haholoanyane ea ntho eo pele ke ileng ka e bonela hōle.” Ho fumana “tsebo e nepahetseng” joalo ho akarelletsa ho tseba Jehova le Jesu haholoanyane e le batho, ho tloaelana haholoanyane le litšoaneleho tsa bona.

 4. Re ka eketsa tsebo ea rōna ka Molimo joang, hona ke hobane’ng ha hoo ho matlafatsa khotso ea rōna le oona?

⁴ Litsela tse peli tsa ho fumana tsebo ena ke ka mekhoa e metle ea thuto ea botho le ho ba teng kamehla libokeng tsa batho ba Molimo. Ka litsela tsena u tla ithuta ka ho hlakileng haholoanyane hore na Molimo o itšoara joang le hore na o nahana’ng. U tla ba le setšoantšo se hlakileng sa kelello ka botho ba oona. Empa ho tseba Molimo haufi-ufi ho bolela ho etsisa le ho bontša setšoantšo sena. Ka mohlala, Jehova o hlalosa motho ea bontšang ho hloka boithati ho kang ha Molimo, ’me joale A re: “Na hoo hase ho ntseba na?” (Jeremia 22:15, 16; Ba-Efese 5:1) Ho etsisa Molimo haholoanyane ho eketsa khotso ea hao le oona hobane u ntlafatsa ho apareng motho e mocha, “ea nchafallang tsebong ka setšoantšo sa ea ’mōpileng.” U fetoha ea khahlisang Molimo haholoanyane.—Ba-Kolosse 3:10.

 5. (a) Tsebo e nepahetseng e ile ea thusa mosali e mong oa Mokreste joang? (b) Ke ka litsela life re ka etsisang Jehova haufi-ufi?

⁵ Mosali e mong oa Mokreste ea bitsoang Lynn o ile a ho fumana ho le thata ho tšoarela ka lebaka la ho qabana le Mokreste e mong oa habo. Empa thuto ea Lynn ea botho e hlokolosi ea mo etsa hore a hlahlobe boikutlo ba hae. O ile a lumela: “Ke ile ka hopola hore na Jehova ke Molimo oa mofuta ofe, kamoo a sa balleng motho phoso. Ke ile ka nahana ka lintho tsohle tse nyenyane tseo re li etsetsang Jehova letsatsi le letsatsi, empa ha a re balle molato. Taba ena le ngoan’eso oa Mokreste e ne e le nyenyane haholo ha e bapisoa. Kahoo nako le nako ha ke ’mona, ke ne ke itjoetsa hore, ‘Jehova o mo rata joalokaha a nthata.’ Hona ha nthusa hore ke hlōle bothata bona.” Na u bona moo le uena ho hlokahalang hore u etsise Jehova haholoanyane?—Pesaleme ea 18:35; 103:8, 9; Luka 6:36; Liketso 10:34, 35; 1 Petrose 1:15, 16.

Tsebo e Nepahetseng ea Kreste

 6. Jesu Kreste o ile a bontša joang hore mosebetsi oa ho bolela e ne e le oa bohlokoahali ho eena?

⁶ Hore u be le tsebo e nepahetseng ea Jesu ho hlokahala u be le “khopolo ea Kreste” le ho mo etsisa. (1 Ba-Korinthe 2:16) Jesu e ne e le ’moleli ea chesehang oa ’nete. (Johanne 18:37) Moea oa hae o matla oa ho hasa evangeli o ne o sa thibeloa ke khethollano ea metse. Le hoja Bajode ba bang ba ne ba hloile Basamaria, o ile a pakela mosali e mong oa Mosamaria selibeng. Esita le ho bua halelele le mosali ofe kapa ofe e ka ’na eaba ho ne ho nyeliseha!a Empa Jesu ha a ka a lumella maikutlo a motse hore a mo thibele ho fana ka bopaki. Mosebetsi oa Molimo o ne o khatholla. O itse: “Sejo sa ka ke ho etsa thato ea ea nthomileng, le ho phetha mosebetsi oa hae.” Thabo ea ho bona batho ba arabela, joaloka mosali oa Mosamaria le ba bangata ba motse, e ile ea boloka Jesu joaloka lijo.—Johanne 4:4-42; 8:48.

 7. (a) Ho tseba Jesu ho lokela ho re susumelletsa ho etsa eng? (b) Na Molimo o lebelletse hore bahlanka ba hae bohle ba etse boboleli bo lekanang? Hlalosa.

⁷ Na u ikutloa joaloka Jesu? Ba bangata ba thatafalloa ke ho qala moqoqo ka Bibele le motho eo ba sa mo tsebeng ’me hangata ba nyelisoa ke ba bang motseng. Empa, ho ba le boikutlo ba kelello bo kang bo bileng ho Jesu, re ke ke ra baleha ’nete ena: Re tlameha ho paka. Ha e le hantle, hase bohle ba ka etsang boboleli ka tekanyo e lekanang. Ho fapana ho ea ka matla le maemo a rōna. Kahoo u se ke ua ikutloa hore ha ho mohla Molimo o khotsofalang ke tšebeletso ea hao e halalelang. Leha ho le joalo, ho tseba ha rōna Jesu, ho lokela ho re susumelletsa ho etsa sohle se matleng a rōna. Jesu o ile a babatsa tšebeletso ea moea ’ ohle.—Mattheu 13:18-23; 22:37.

Ho Hlokahala ho Hloea Bokhopo

 8, 9. Ke lintho life tse ling tseo Molimo o li hloileng, ’me re ka bontša lehloeo le tšoanang joang?

⁸ Tsebo e nepahetseng e boetse e re thusa ho ananela hore na ke lintho life tse hloiloeng ke Jesu le Jehova. (Ba-Heberu 1:9; Esaia 61:8) “Ho na le ntho tse tšeletseng tse hloiloeng ke Jehova; nka re, li supile tseo e leng manyala ho eena: Ke mahlo a boikhohomoso, ke leleme le mano, le matsoho a tšollang mali a se nang molato; ke pelo e rerang merero e mebe, le maoto a lebelo ho mathela bobeng; ke paki e lehata, e bolelang mashano, le ea jalang liphapang bathong ba mofuta o le mong.” (Liproverbia 6:16-19) Maikutlo ana le libopeho tsena tsa boitšoaro ke “manyala ho eena.” Lentsoe la Seheberu le ngotsoeng e le “manyala” mona le tsoa lentsoeng le bolelang “ho nyonya, ho nyokholoha,” “ho nena ntho, e kang e mpe ka hohle; ho khesa, ho hloea ka matla.” Kahoo hore re tle re be le khotso le Molimo, re tlameha ho nena ka mokhoa o tšoanang.

⁹ Ka mohlala, qoba “mahlo a boikhohomoso” le pontšo efe kapa efe ea boikhantšo. Ba bang kamor’a hore ba kolobetsoe ba ’nile ba ikutloa hore ha ba sa hloka thuso ea ba ba rutileng. Empa Bakreste ba bacha ba lokela ho amohela thuso ka boikokobetso ha ba ntse ba tiea ’neteng. (Ba-Galata 6:6) Hape, qoba ho seba, ho ka ’nang ha baka “liphapang bathong ba mofuta o le mong.” Ka ho jala taba ea bo-bare e mpe, nyatso e se nang bopaki, kapa mashano, re ka ’na ra se ke ra ‘tšolla mali’ a sebele, empa ka sebele re ka senya botumo bo botle ba motho e mong. Re ke ke ra ba khotsong le Molimo haeba re se khotsong le banab’abo rōna. (Liproverbia 17:9; Mattheu 5:23, 24) Molimo Lentsoeng la oona o boetse o bolela hore o “hloile hlalo.” (Malakia 2:14, 16) Ka hona, haeba u lenyalong, na u sebeletsa ho boloka lenyalo la hao le le matla? Na u nyonya ho bapala ka litaba tsa lerato le setsoalle se feteletseng le molekane oa motho e mong? Na uena joaloka Jehova, u nyonya boitšoaro bo bobe ba ho kopanela liphate? (Deuteronoma 23:17, 18) Ho hloea mekhoa e joalo ha ho bonolo, kaha lintho tsena li ka ipiletsa nameng ea rōna ea boetsalibe, ’me lefatše lea li rata.

10. Re ka hlaolela lehloeo bakeng sa bokhopo joang?

¹⁰ E le ho u thusa ho hlaolela lehloeo bakeng sa bokhopo, qoba ho thabisoa ke libaesekopo, mananeo a thelefishene, kapa libuka tse bontšang tšebelisano le meea e khopo, boitšoaro bo bobe, kapa pefo. (Deuteronoma 18:10-12; Pesaleme ea 11:5) Ka ho etsa hore ho etsa phoso ho bonahale ‘ho se hobe hakaalo’ kapa e bile ho thabisa, boithabiso bo joalo bo senya boiteko ba ho hōlisa lehloeo la bomolimo bakeng sa bona. Ka lehlakoreng le leng, thapelo e matla e tla thusa, hobane Jesu o itse: “Falimehang, le rapele, hore le se kene molekong; hobane moea o mafolofolo, empa nama eona ea fokola.” (Mattheu 26:41) Mabapi leha a tobane le takatso e matla ea nama, Mokreste e mong o itse: “Ke iketsa hore ke rapele. Ka linako tse ling ke ikutloa ke sa tšoanelehe ho atamela Jehova, empa ka hore ke iketse hore ke ho etse, ka ho ipiletsa ho eena, ke fumana matla ao ke a hlokang.” U tla utloisisa hamolemo hore na ke hobane’ng ha Jehova a nyonya ho etsa bobe haeba u hlahloba liphello tsa hona ka kelellong ea hao.—2 Petrose 2:12, 13.

11. Ke lintho life tse ka ’nang tsa re tšoenya ka linako tse ling?

¹¹ Ho sa tsotellehe ho ba le khotso le Molimo, ka linako tse ling u tla khathatsoa ke likhatello le liteko tsa letsatsi le leng le le leng hape le ke mefokolo ea hao. Hopola, u ikentse eo Satane a mo korotseng ka ho khetheha. O loantša ba bolokang litaelo tsa Molimo ’me e le Lipaki tsa Jehova! (Tšenolo 12:17) Joale khotso ea hao e kahare e ka bolokoa joang?

Ho Thulana ka Katleho le Litsietsi tse Lukang Khotso

12. (a) Semelo sa Pesaleme ea 34 ke sefe? (b) Mangolo a hlalosa maikutlo a Davida joang nakong ea phihlelo ee?

¹² Ho Pesaleme ea 34:19, Davida o ngotse: “Mahlomola a ea lokileng a mangata.” Ho latela sehlooho sa pesaleme ena, Davida o e ngotse kamor’a hore a batle a e-shoa. Ha a ntse a baleha Morena Saule, Davida a batla tšireletso ho Akishe, morena oa Mofilista oa Gathe. Bahlanka ba morena eo ba tseba Davida ’me, ha ba hopola ho hlōlela ha hae Iseraele ntoeng nakong e fetileng, ba ipelaetsa ho Akishe. Ha Davida a utloa moqoqo oo ba sa ’mone, a qala ho “nahana taba tseo pelong ea hae, a tšaba Akishe, morena oa Gathe, haholo.” (1 Samuele 21:10-12) Ka ntle ho moo, mona e ne e le hahabo Goliathe, ’me Davida o ne a bolaile mohale oa bona—le hona joale o ntse a nkile sabole ea senatla seo! Na joale ba ne ba tla sebelisa sabole ee e khōlō ho khaola hlooho ea hae? O ile a etsa joang?—1 Samuele 17:4; 21:9.

13. Davida o ile a etsa joang tsietsing ee, hona re ka latela mohlala oa hae joang?

¹³ Davida a rapela Molimo ka mehoo e meholo bakeng sa thuso. Davida o ngotse: “Mohlomohi ha a rapela, Jehova oa utloa; o mo pholosa mahlomoleng a hae kaofela,” ho boletse Davida ‘O nkimolla matsoalong a ka kaofela.’ (Pesaleme ea 34:4, 6, 15, 17) Na le uena u se u ithutile ho rapela Jehova, u tšollela pelo ea hao ho eena nakong ea tsieleho? (Ba-Efese 6:18; Pesaleme ea 62:8) Le hoja tsietsi ea hao e ikhethang e ke ke ea e-ba e tšabehang joaloka ea Davida, u ntse u tla fumana hore Molimo o tla u thusa ka nako e nepahetseng. (Ba-Heberu 4:16) Empa Davida o ile a etsa ho hong ho feta ho rapela.

14. Davida o ile a sebelisa “kelello” ea hae joang, joale Molimo o fane ka eng ho re thusa ho etsa se tšoanang?

¹⁴ “[Davida] a ikhakanya pontšeng ea bona, a iketsa lehlanya . . . Ebile Akishe o re ho bahlanka ba hae: Bonang, monna enoa oa hlanya; le mo tliselitse’ng ho ’na?” (1 Samuele 21:13-15) Davida o ile a nahana leqheka leo a ileng a pholoha ka lona. Jehova a hlohonolofatsa boiteko ba hae. Ka ho tšoanang, ha re tobane le mathata a boima, Jehova o re lebelletse hore re sebelise matla a rōna a kelello, e seng feela ho mo lebella hore a re sebeletse oona. O re file Lentsoe la hae le bululetsoeng, le tlang “ho hlalefisa sethoto, . . . [ho se nea] tsebo le kelello.” (Liproverbia 1:4; 2 Timothea 3:16, 17) Molimo o boetse o fane ka baholo ba phutheho, ba ka re thusang ho tseba kamoo re ka bolokang litekanyetso tsa Molimo. (1 Ba-Thessalonika 4:1, 2) Ka makhetlo a mangata, banna bana ba ka u thusa ho fuputsa litokollong tsa Mokhatlo oa Watch Tower bakeng sa thuso ea ho etsa qeto e nepahetseng kapa ho tobana le bothata bo bong ka katleho.

15. Ke hobane’ng ha Pesaleme ea 34:18 e tšelisa?

¹⁵ Esita leha lipelo tsa rōna li re utloisa bohloko ka lebaka la mefokolo ea rōna kapa ho hlōleha ha rōna, haeba re e-na le boikutlo bo nepahetseng, re ka boloka khotso ea rōna le Molimo. Ho Pesaleme ea 34:18, Davida o ngotse: “Jehova o haufi le ba pelo tse robehileng, o thusa ba meea e tetelitsoeng.” Haeba re kōpa tšoarelo ’me re nka mehato efe kapa efe e hlokahalang ho lokisa litaba (haholo-holo tlōlong e tebileng), Jehova o tla lula haufi le rōna, a re tšehetsa boikutlong.—Liproverbia 28:13; Esaia 55:7; 2 Ba-Korinthe 7:9-11.

Tsebo ea Botho e Fana ka Khotso

16. (a) Tsela e ’ngoe eo ka eona re fumanang tsebo e nepahetseng ka Molimo ke efe? (b) Hlalosa polelo ea Davida: “Latsoang, le bone hoba Jehova o molemo!”

¹⁶ Tsela e ’ngoe eo re fumanang tsebo e nepahetseng ea Molimo ka eona, ntle le ho fumana boitsebiso ba moea, ke ka hore rōna ka borōna re latsoe thuso ea oona e lerato. (Pesaleme ea 41:10, 11) Hase kamehla ho lokolloa tsietsing ho bolelang qetello ea kapele kapa e feletseng ea bothata; u ka ’na ua tlameha ho tsoela pele ho bo mamella. (1 Ba-Korinthe 10:13) Le hoja bophelo ba Davida bo ile ba bolokoa Gathe, ea e-ba moleleri ka lilemo tse ’maloa, a tobana le kotsi e ’ngoe kamor’a e ’ngoe. Ho sena sohle Davida o ile a utloa hore Jehova o mo hlokometse le ho mo tšehetsa. O ile a phehella ’me a fumana khotso le Molimo, ’me a ithuta hore ba etsang joalo “ha ba haelloe ke molemo leha o le mong.” Ka ho hlokomela ka phihlelo ea botho kamoo Jehova a ileng a mo tšehetsa kateng nakong ea tsietsi, Davida o ne a ka bolela: “Latsoang, le bone hoba Jehova o molemo! Ho lehlohonolo motho ea tšabelang ho eena!”—Pesaleme ea 34:8-10, 14, 15.

17. Nakong ea tsietsi, ho tšabela ho Jehova ho bile le phello efe lelapeng le leng?

¹⁷ Le uena ho tšabela ho Jehova linakong tsa mathata ho tla u nolofaletsa ho ‘latsoa le ho bona hoba Jehova o molemo.’ Ka lebaka la ho hlaheloa ke kotsi, Mokreste e mong ka bophirimela bohareng ho United States o ile a lahleheloa ke mosebetsi o lefang hantle oo a o sebelitseng ka lilemo tse 14. Kaha ba ne ba sa amohele chelete, eena le lelapa la hae ba rapela Molimo. Ka nako e tšoanang, le hoja ba ile ba fokotsa litšenyehelo, ba khoahlapisa masimong a haufi, le ho tšoasa litlhapi bakeng sa lijo. Ka thuso e tsoang ho ba bang ka phuthehong le ka mosebetsi oa nakoana ha o le teng, lelapa lena la litho tse ’nè la ’na la tsoella hantle. Selemo kamor’a kotsi eo, ’mè oa lelapa leo a re: “Re ka ithetsa ka ho nahana hore re itšetlehile ka Jehova, ha ha e le hantle re itšetlehile ka matla a rōna, balekane ba rōna, kapa mesebetsi ea rōna. Leha ho le joalo, rōna, ka sebele re ithutile ho tšepa Eena feela. Lintho tsena tse ling li ka tlosoa, empa ha ho mohla Jehova a ileng a re siea—le ka motsotso o le mong feela. Le hoja re e-na le lintho tse seng kae feela, kamano ea rōna le Jehova re le lelapa e atamelane haholo.”

18. Ke eng e tla u nolofaletsa ho mamella le mathata a qophellang?

¹⁸ E, bothata ba lichelete bo ka ’na ba tsoela pele. Kapa e mong a ka ’na a tšoaroa ke lefu la ’mele le sa foleng; khohlano ea botho le e mong; ho ferekana boikutlong, ho kang khatello; kapa bo bong ba mathata a mang a mangata. Empa, ka ho tseba Molimo kannete, u tla ba le tumelo ea hore o tla u thusa. (Esaia 43:10) Tšepo ena e sa thekeseleng e tla u thusa ho mamella le ho ba le “khotso ea Molimo, e fetisang kutloisiso eohle.”—Ba-Filippi 4:7.

19. Re tseba joang hore Jehova ha a nke mahlomola a rōna habobebe?

¹⁹ Ha u feta tlas’a phihlelo e tšoenyang, le ka mohla u se lebale hore Jehova o tseba seo u se utloang. Pesalemeng e ileng ea boetse ea qaptjoa ha a nahana ka phihlelo ea hae Gathe, Davida o ile a kōpa Jehova: “U bokelle meokho ea ka lekukeng la hao. Ha ke re, e ngoliloe bukeng ea hao na?” (Pesaleme ea 56:8) Ka sebele, Molimo o ile oa mamela kōpo ea Davida. Ke ho tšelisang hakaakang ho tseba hore Molimo o ne o tla bokella meokho e joalo e bakoang ke ho hlomoha le pelaelo ’me ka tšoantšetso, o e tšela lekukeng la hae, feela joalokaha motho a ne a ka tšela veine ea bohlokoa kapa metsi a nooang nthong e joalo! Meokho e joalo e ne e tla hopoloa kamehla, e, e ngoloe bukeng ea Molimo. Tlhokomelo ea Jehova ke e molemo hakaakang!

20. Re ka eketsa khotso ea rōna le Molimo joang?

²⁰ Kahoo kolobetso ea hao ke qalo feela ea kamano ea khotso le Molimo. Ka ho tloaelana hamolemo le litšoaneleho tsa botho tsa Molimo le Jesu, ’me ka bouena u hla u latsoa tšehetso ea Jehova nakong ea liteko, u tla eketsa khotso ea hao le Molimo. E seng feela hore u tla ba le kamano le Jehova e fetohang sebaka sa tširelo hona joale empa hape u tla ba le tšepo ea bohlokoa ea ho phela ka ho sa feleng Paradeiseng, moo u tla fumana ho ‘iketla khotsong e kholo.’—Pesaleme ea 37:11, 29.

[Mongolo o botlaaseng ba leqephe]

Na u sa Hopola?

◻ Ke ka litsela life re ka fumanang tsebo e nepahetseng ka Molimo le Jesu?

◻ Ho etsisa Molimo le Jesu ho tla re etsa hore re etse eng?

◻ Re etsisa lehloeo la Molimo bakeng sa bokhopo joang?

◻ Re ka boloka khotso joang ho sa tsotellehe mathata?

[Setšoantšo se leqepheng la 17]

Jesu o ile a hana ho lumella hore khethollano ea metse e mo thibele ho fana ka bopaki. Na u etsisa cheseho ea hae bakeng sa boboleli?

[Litšoantšo tse leqepheng la 18]

Ha Davida a tobane le bothata bo tebileng, a rapela Jehova. . . . . ’me a iketsa ea sa nkeng hantle ho rera ho pholoha. Jehova o ile a utloa thapelo ea Davida