‘Molimo O Tla Phethela Boikoetliso ba Lōna’

SEMATHI se itokisetsang ketsahalo ea bohlokoahali se lokela ho ikoetlisa ka thata. Se batla hore ’mele oa sona o be boemong bo botle e le hore ka letsatsi leo le leholo, se ka etsa tšebetso e molemo ka ho fetisisa eo se ka e khonang. Ka ho tšoanang, Bakreste le bona ba lokela ho ikoetlisa ka thata empa e le ka pakane e fapaneng. Moapostola Pauluse o itse: “Ikoetlise u habile boinehelo ba bomolimo.”—1 Timothea 4:7, NW.

Kahoo, Mokreste o lokela ho ipoloka a le boemong bo botle moeeng. Joalokaha semathi se haha ’mele oa sona, Mokreste o haha matla a hae a moea le mamello. O etsa sena ka ho ithuta Lentsoe la Molimo, Bibele, ka thapelo le ka ho kopanela kamehla le Bakreste ’moho le eena, le ka ho etsa polelo ea pontšeng ea tumelo ea hae.

Hangata semathi se na le mokoetlisi, le Bakreste le bona ba na le mokoetlisi. Ke mang? Ha ho e mong haese Jehova Molimo ka boeena! Moapostola Petrose o ile a supa kameho ea Jehova ka lenaneo la ho koetlisa Bakreste, ha a ngola: “Molimo oa mehauhelo eohle . . . o tla phethela boikoetliso ba lōna, o le tiise, o le fe matla.” (1 Petrose 5:10, NW) Ke koetliso ea mofuta ofe eo Jehova a re fang eona? Ke ea mefuta e mengata ’me kaofela ke ea bohlokoa haeba re batla ho lula re le boemong bo botle joaloka Bakreste.

Khalemelo E Tobileng

Petrose ka boeena o ile a koetlisoa ke Jehova. Re ka ithuta ho hongata phihlelong ea hae. Ka linako tse ling ho ikoetlisa ha Petrose ho ne ho le bohloko. Nahana kamoo e tlamehang e be Petrose o ile a ikutloa kateng ha a leka ho nyahamisa Jesu hore a se ke a tsoela pele ka morero oa Molimo, ebe Jesu o mo arabela ka tsela ena: “Tloha ho ’na, Satane, u khopiso ho ’na, hobane ha u utloe tsa Molimo, u utloa tsa batho feela.” (Mattheu 16:23) Nahana hape, kamoo a ileng a ikutloa kateng lilemo tse ngata hamorao ha ho tšaba batho ho mo etsa hore a sebetse ka bothoto. Moapostola Pauluse o ile a sebelisa khalemelo ea Jehova ketsahalong eo: “Mohla Kefase [Petrose] a tlileng Antioke, ka mo hanyetsa mahlong, hobane a na a tšoaneloa ke ho nyatsuoa.”—Ba-Galata 2:11-14.

Leha ho le joalo, liketsahalong tseo ka bobeli Jehova o ne a koetlisa Petrose. O ile a ithuta hore “taeo ha e hlahela motho, ha ho bonahale kamoo e ka mo thabisang kateng; ea mo llisa; empa hamorao, ba rutoang ka eona e ba kotulisa khotsong litholoana tsa ho loka.” (Ba-Heberu 12:11) Ho amohela litaeo tseo tse matla e le khalemelo e tsoang ho Jehova ho ile ha thusa Petrose ho ba le pono e nepahetseng ea litaba, ’me ha boela ha mo koetlisa litšoanelehong tsa bohlokoa tsa Bokreste e leng bonolo le boikokobetso.—Liproverbia 3:34; 15:33.

Ho Sebetsana le Maemo

Jehova a ka re koetlisa ka ho lumella hore ho hlahe maemo ao ho leng thata ho sebetsana le oona—ka linako tse ling a bile a le kahare ho phutheho ea Bokreste. Re hōla joaloka Bakreste ha re rapella tataiso, re sebelisa melao-motheo ea Bibele eo re ithutileng eona, ’me re bona kamoo ho sebelisa melao-motheo ena kamehla e leng tsela e molemohali kateng.

Petrose o ne a ameha likhohlanong tsa botho tse ileng tsa hlaha har’a baapostola ba Jesu. Hoa thahasellisa ha re bala litlaleho tsa sena ho bona kamoo J esu a ileng a sebelisa likhohlano tsena—tseo ha e le hantle e neng e le phello ea ho se phethahale le ho hloka phihlelo—e le menyetla ea ho koetlisa balateli ba hae litšoanelehong tsa bohlokoa tsa Bokreste e leng lerato, boikokobetso le tšoarelo.—Mattheu 18:15-17, 21, 22; Luka 22:24-27.

Pauluse le eena o ile a bona likhohlano tsa botho. (Liketso 15:36-40; Ba-Filippi 4:2) O ile a hlalosa kamoo mathata a joalo a fang Bakreste monyetla oa ho amohela koetliso: “Le mamellane, le rekolohelane, ’me ekare ha e mong a e-na le komang le e mong joale ka ha Kreste a le hauhetse, etsang joalo le lōna. Kaholim’a tseo tsohle le apare lerato, e leng tlamo ea phetheho.”—Ba-Kolosse 3:13, 14.

Lekholong la pele la lilemo, kotsi e mpe ka ho fetisisa e ile ea hlaha har’a Bakreste. Petrose o ile a lemosa ka eona: “Le har’ a lōna baruti ba bohata ba tla ba teng, ba kenyang ka sephiri lithuto tse senyang, ’me ka ho latola Morena ea ba lopolotseng, ba tla ikhulela tšenyeho e sehlōhō holimo. ’Me ba bangata ba tla ba latela bohloleng ba bona; ’me tsela ea ’nete e tla nyefoloa ka baka la bona.” (2 Petrose 2:1, 2) Phihlelo ena e ne e tla fella ka ho timetsoa ha “baruti ba bohata” ba sa bakeng. (2 Petrose 2:3) Empa ho thoe’ng ka bao ba ileng ba lula ba tšepahala?

Phihlelo eo e ne e tla ba koetlisa hore ba ‘tsose matla a bona a hloekileng a ho nahana.’ (2 Petrose 3:1, NW) Ho ba seli ha bona ho itebeleng khahlanong le tšusumetso e mpe ea lithuto tsa bohata ho ne ho tla ba hloka hore ba boele ba ikhopotse mabaka a tumelo ea bona. Ha ba bona liphello tse mpe tsa liketso tsa “baruti ba bohata,” tšepo ea bona ’neteng ea Bokreste e ne e tla matlafatsoa haholoanyane.—2 Petrose 3:3-7.

Ka mohlala, ha a le phuthehong e ’ngoe moapostola Johanne ea neng a se a hōlile o ile a hanyetsoa ke motho ea bitsoang Diotrefe, monna ea ratang litulo tse kapele ea neng a bile a sa natse boholo ba Johanne ’me a sa hane feela ho amohela manģosa a Johanne empa a bile a leka ho khaola le ba ba amohelang. E tlameha hore e be hona ho ile ha e-ba bohloko ho Bakreste bohle ba tšepahalang ba neng ba le phuthehong e le ’ngoe le Diotrefe. Empa ho ile ha ba fa monyetla oa ho bontša hore e ne se ‘ba etsisang bobe’ ’me kahona ba amohela koetliso e tsoetseng pele ea botšepehi ho Jehova le boholong ba boapostola.—3 Johanne 9-12.

Ho Sebetsana Le Bao E Seng Bakreste

Jesu o itse balateli ba hae e ne e se karolo ea lefatše. (Johanne 17:16) Mokreste o lokela ho tšepahala ho Jehova le ’Muso oa hae pele. O leka ho boloka litekanyetso tsa Molimo tsa boitšoaro, kahoo lithahasello tsa hae tse ka sehloohong le lintho tseo a amehileng ka tsona li fapane le tsa lefatše. Leha ho le joalo, Mokreste o tlameha ho phela lefatšeng, ’me hona ho ’makela likhatello tseo a ke keng a li qoba.

Nakong ea tšebeletso ea hae e telele, e tlameha e be Petrose o ile a bona makhetlo ao ka ’ona Bakreste ba neng ba lokela ho etsa liqeto tse thata, ba boloka ho leka-lekana pakeng tsa lithahasello tsa lefatše le seo matsoalo a bona a ba bolellang sona. Lengolong la hae la pele, Petrose o fane ka keletso e molemo le e sebetsang mabapi le hore na hona ho ka etsoa joang e le hore Mokreste a ka ba “le letsoalo le letle.”—1 Petrose 2:13-20; 3:1-6, 16.

Ha e le hantle, joaloka Bakreste re lebelletse nako eo re seng re sa tlo hlola re nahana ka se hlokoang ke tsamaiso ena ea lintho. Empa ho sa le joalo re koetlisetsoa ho ba le mamello ’me re lumelloa ho bontša botšepehi ba rōna ha re tobane le teko le tšusumetso tseo e seng tsa bomolimo. Re boetse re koetlisetsoa ho ba le bohlale bo sebetsang le sebete ha re ntse re fumana phihlelo ka ho sebelisa melao-motheo ea Bibele maemong a fapaneng le hore ka sebete re itšoara ka tsela eo re tsebang hore Jehova o batla re itšoare ka eona. Nahana hore na re tla be re fumane koetliso e kaakang kahobane re phetse tsamaisong ena le hore e be re ile ra sebetsana le mathata a mangata hakana a boima ka katleho!

Tlas’a Tlhoriso

Ha Petrose a ne a bua ka ho re koetlisa ha Molimo, o ne a hlile a bua ka tlhoriso ka ho khetheha. O ile a bontša hore Bakreste ba lokela ho lebella tlhoriso, ha a ngola: “Le tsohe masene, le falimehe; hobane Diabolose, e leng sera sa lōna, o ntse a lika-lika joale ka tau e purumang, e batlang eo e ka mo jang.”—1 Petrose 5:8; bona hape 2 Timothea 3:12.

Petrose o ne a tšoaneleha ho bua ka sena hobane eena ka boeena o ne a ile a hlorisoa. Mehleng ea pele ea phutheho ea Bokreste, eena le baapostola ba bang ba ile ba shapuoa ’me ba laeloa hore ba khaotse ho bolela. Ba ile ba itšoara joang? Ba ile “ba tloha khotla, ba thabile kahobane ba entsoe ba tšoaneloang ke ho hlabisoa lihlong ka baka la lebitso la Jesu.”—Liketso 5:41.

Kahoo Petrose o ne a bua ho tsoa phihlelong le ka baka la pululelo ha a re: “Empa ereka ha le nkile kabelo mahlomoleng a Kreste, thabang hore, mohla khanya ea hae e bonahalang, le tle le thabe ka nyakallo e fetisisang. Ha le nyefoleloa lebitso la Kreste, le lehlohonolo; hobane Moea oa khanya, Moea oa Molimo, o lutse holim’a lōna; bona ba o nyefola, empa lōna lea o tlotlisa.”—1 Petrose 4:13, 14.

E, tlhoriso e tobileng e ka sebeletsa e le mokhoa o mong oa ho koetlisa. Tlas’a eona, Mokreste o ithuta ho itšetleha haholoanyane ka moea oa Molimo. Tumelo ea hae e ba ea ‘boleng bo lekiloeng.’ (1 Petrose 1:7, NW) O koetlisetsoa ho ba le sebete se theiloeng matleng a Jehova. (2 Timothea 1:7) O ithuta mamello, ’me joaloka Jesu o ‘ithuta kutlo ka tse bohloko tse mo hlahelang.’—Ba-Heberu 5:8; 1 Petrose 2:23, 24.

Jehova O Phethela Boikoetliso ba Rōna

Ke ’nete hore mathata a boima, a akarelletsang tlhoriso, ao Bakreste ba a mamellang ha a tsoe ho Molimo. Jakobo oa lemosa: “Motho ha a lekoa, a se ke a re: ke lekoa ke Molimo. Hobane Molimo ha o lekoe ke bobe, ’me ha o leke motho ka jona.” (Jakobo 1:13) Mathata a bakoa ke lisosa tse ngata, ho akarelletsa leha batho ba etsa liphoso kapa ba etsa se fosahetseng ka boithatelo ba bona. Leha ho le joalo, kaha lintho tse joalo lia etsahala, Jehova o li sebelisa ho koetlisa bahlanka ba hae litšoanelehong tsa bohlokoa tsa Bokreste.

Jobo, Jeremia, Petrose, Pauluse le bahlanka bohle ba Molimo ba mehleng ea Bibele ba ile ba koetlisoa ka tsela ena. Le rōna, ha re talimana le maemo a fapaneng a thata, re lokela ho a talima e le mohloli oa koetliso e lumeletsoeng ke Jehova. Ha re talimana le ’ona ka matla a tsoang ho Jehova, re tla be re koetlisetsoa ho ba le kutlo, bohlale, boikokobetso, sebete, lerato, mamello, le litšoaneleho tse ling tse ngata.—Bapisa Jakobo 1:2-4.

Re boetse re khothatsoa ke ho tseba hore bohato bona ba hore re koetlisoe bo tla be bo phethiloe ka letsatsi le leng. Kahoo, Petrose o ile a tšelisa Bakreste ’moho le eena ka hore: “Molimo oa mehauhelo eohle, o re bilelitseng ho rua khanya ea oona e sa feleng kamanong le Jesu Kreste, ha le se le utlile bohloko ka litšiuana, o tla phethela boikoetliso ba lōna o le tiise, o le fe matla. (1 Petrose 5:10, NW) Mantsoe ana a sebetsa ka matla a tšoanang ho “bongata bo boholo ba batho” bo lebelletseng bophelo bo sa feleng lefatšeng la Paradeise.

Mohopolo ona ka booona o lokela ho re thusa ho ikokobetsa ka mamello liphihlelong tsena tsa ho koetlisoa, re ikemiselitse ho se sekisetse. Ka hona, re tla ikutloela bonnete ba mantsoe a khothatsang a Pauluse: “Re se ke ra khathala ke ho etsa hantle, hobane re tla kotula nakong ea teng, ha re sa tepelle.”—Ba-Galata 6:9.