Seboka sa Selemo le Selemo

SEBOKA SA SELEMO LE SELEMO sa litho tsa Watch Tower Bible and Tract Society of Pennsylvania se tla tšoaroa ka la 3 Mphalane, 1987, Holong ea Kopano ea Lipaki tsa Jehova, 2932 Kennedy Boulevard, Jersey City, New Jersey. Seboka sa pele e tla ba sa litho feela ka 9:30 a.m., ’me se tla lateloa ke seboka se akareletsang sa selemo le selemo ka 10:00 a.m.

Litho tsa Mokhatlo ona li lokela ho tsebisa Ofisi ea Mongoli hona joale ka phetoho leha e le efe liatereseng tsa bona e bileng har’a selemo e le hore mangolo a kamehla a tsebiso le liforomo tsa litho li ka romeloa ho bona kapele kamor’a la 15 Phato.

Liforomo tsa litho, li tla romeloa hammoho le tsebiso ea seboka sa selemo le selemo, li lokela ho khutlisetsoa Ofising ea Mongoli ’me e se be kamor’a la 1 Loetse. Setho ka seng se lokela ho tlatsa foromo eo le ho e khutlisa kapele-pele, se bolele hore na se tla ba teng ka seqo sebokeng seo kapa che. Boitsebiso bo tlatsoang foromong eo bo tobe taba, hobane ho tla itšetlehoa ka bona mabapi le litokisetso tsa ba tla ba teng sebokeng.

Ho lebeletsoe hore lenaneo lohle, ho akareletsa le seboka sa khoebo le lipeho, le tla phethoa ka 1:00 p.m. kapa kapele kamor’a moo. Ho ke ke ha e-ba le lenaneo la motšehare oa mantsiboea. Ka baka la litulo tse lekanyelitsoeng, ho tla kena feela ba nang le litikete. Ha hoa etsoa litokisetso tsa hore seboka sena sa selemo le selemo se hokahanngoe le libaka tse ling ka likhoele tsa fono-fono.