Ho Batla Metsoalle ea ’Nete

MOHLANKANA e mong o ile a tsoa kotsi e mpe kotsing ea sethuthuthu. O ile a qeta libeke a akhehile eaba joale o qala ho hlaphoheloa butle-butle. “Hoja ke ne ke e-na le metsoalle e molemo e mengata joaloka batho bao ke tloaelaneng le bona ke ne ke tla hlaphoheloa kapele haholo,” o boletse joalo. ‘Metsoalle e mengata eo ke neng ke e-na le eona pele ho kotsi e ntahlile. Empa metsoalle e molemo e ka ba e phekolang haholo.’

Boemo bona bo senola hantle se teng lefatšeng la kajeno le se nang setsoalle. Ba boleloang e le metsoalle ba ka ba bangata ha tsohle li tsamaea hantle. Empa ha bomalimabe bo hlaha, baa nyamela. Hangata ho thata ho fumana metsoalle ea ’nete.

Empa ho ba le motsoalle a le mong feela kapa e ’meli ea ’nete le e mofuthu, ho etsa phapang e khōlō bophelong. Litsebi tabeng ena li re: “Ho laba-labela tlamahano e haufi haholoanyane ke taba ea sehlooho linakong tsa rōna.” Joalokaha polelo ea khale e e beha tjena: ‘Metsoalle ha ho hlokoa ke metsoalle ea sebele.’

Ka nako e ’ngoe, batho ba ne ba amehile haholo ka ba bang ’me ba ne ba ithaopela ho thusa metsoalle ea bona kapa baahisane. Empa nako ea phetoho ea Ntoa ea I ea Lefatše e ile ea tlisa ho senyeha ho akaretsang ha likamano tsa batho. Boikutlo ba ho hloka teboho, ba ho thatafala pelo, ba ’na pele ke bona bo tloaelehileng hona joale.

Boemo bona bo bohloko ba litaba bo ile ba profetoa makholo a lilemo a 19 a fetileng ka mantsoe ana: “Matsatsing a ho qetela ho tla ba thata haholo ho ba Mokreste. Hobane batho e tla ba ba ithatang bobona le chelete ea bona feela; e tla ba ba ikhohomosang le ba ikakasang, ba somang Molimo, ba sa utloeng batsoali ba bona, ba hlokang teboho ho bona, ’me ba le babe ka ho feletseng. E tla ba ba melala e sataletseng bao ho seng mohla ba ikobelang ba bang; e tla ba bo-raleshano ba sa khaotseng le ba bakang likhathatso le ba sa nahaneng letho ka boitšoaro bo bobe. Ba tla ba hlaha ba be khopo, ’me ba tla soma ba lekang ho etsa botle. Ba tla lahla metsoalle ea bona.”—2 Timothea 3:1-4, The Living Bible.

Ke setšoantšo se lefifi hakaakang empa e le se nepahetseng sa lefatše kajeno! ’Me hoa bonahala hore se re fa tšepo e nyenyane ea ho fumana metsoalle ea ’nete. Leha ho le joalo, le hona joale ho ka etsahala hore u fumane metsoalle ea ’nete. ’Me ke ea bohlokoa hakaakang! Kamehla u ka retelehela ho eona bakeng sa thuso, keletso, matšeliso, le setsoalle se mofuthu. Empa ke habohlokoa ho khetholla pakeng tsa metsoalle ea ’nete le metsoalle ea bohata.

Hase “Metsoalle” Eohle Eo e Leng Metsoalle ea ’Nete

Mohlankana ea ileng a tsoa kotsi kotsing e boletsoeng qalong e ne e le setho sa sehlopha sa papali ea bolo ea maoto ’me o ne a e-na le “metsoalle” e mengata. Litho tsa lihlopha kapa mekhatlo e menyenyane hangata li thea likamano tse mofuthu. Empa “setsoalle” se joalo e ka ’na ea e-ba se sa tsitsang hakaalo. ’Me ho ba le “metsoalle” e mengata ebe e u lahlehela kaofela ha eona ke ho nyahamisang haholo, joalokaha mohlankana eo a ile a hlokomela. Ho fumana batho bao u tloaelanang le bona ho bonolo; ho etsa metsoalle ea ’nete ha ho joalo.

Batho ba ruileng kapa ba maemong a phahameng ba ka etsa “metsoalle” e mengata habonolo. Joalokaha Bibele e re: “Barui ba na le metsoalle e mengata.” “E mong le e mong o leka ho amoheloa ke batho ba bohlokoa; e mong le e mong o batla setsoalle sa ba fanang ka melemo.” (Liproverbia 14:20; 19:6, Today’s English Version) Empa ke ba bakae ho bona ba nang le lintho tseo ba li habileng ka lekunutung? Hape haeba batho bao ba entsoeng metsoalle ba lahleheloa ke leruo kapa boemo, kapele e ka ’na ea e ba ba se nang setsoalle ho hang.

Batho ba bohehang le bona hangata ba na le “metsoalle” e mengata—boholo ba eona bo susumelitsoe ke litšobotsi tsa ’mele. Empa “setsoalle” se joalo se ka ba kotsi haholo ’me se ka nyamela joaloka moholi ha koluoa e hlaha. Kahoo ho na le tlhokahalo ea . . .

Ho ba Ea Hloaeang

E, ho bohlale ho hloaea mabapi le metsoalle. Hangata metsoalle ea bohata ke baikaketsi ba etsang setsoalle ho e-na le ntho e ’ngoe eo ba e habileng ka ’nģane. “Motho ea rorisang moahisane oa hae ho tlolisa o chehela maoto a hae leraba.”—Liproverbia 29:5, The Jerusalem Bible.

Ka hona, nahana ka hloko ka metsoalle eo u nang le eona hona joale. Na e u susumelletsa botleng kapa bobeng? Na ke e ichebileng boeona, e itšoarelletseng likhopolong tsa eona feela, kapa e ikhotšeng moea? Na e etsa lintho ka lepotla-potla ’me e thabela ho ipea kotsing? Boikutlo ba eona ke bofe ka ba batona kapa ba batšehali ho fapana le bona? Na ke e mekhoa e metle le e hlomphang kapa e lokolohileng ho tlolisa, mohlomong e hlileng e itšoereng hampe? Na bao e leng bo-mphato oa hao kamehla ba ipakile e le batho ba sa tšepahaleng, ba ke keng ba tšeptjoa? Na ba sebelisa lithethefatsi? Na ke ba noang haholo? Haeba ho joalo, u kotsing. U ka ’na ua ba ea tšepahalang, ea hloekileng, le ea ikokobelitseng, empa hopola: “Litloaelano tse mpe li bolisa mekhoa e metle.”—1 Ba-Korinthe 15:33.

Kotsi e khōlō ea ho ba le metsoalle e mebe ke hore u tla e etsisa. Butle-butle, mohlomong ho sa hlokomeloe, litsela tsa eona le boitšoaro li tla hlakoletsoa ho uena. Joalokaha Bibele e re: “Tsamaea le ba bohlale ’me u tla hlalefa. Haeba u etsa setsoalle le batho ba lithoto, u tla senyeha.”—Liproverbia 13:20, TEV.

Ho bonolo ho nka mohato o fosahetseng ha u etsa metsoalle. Empa u se ke ua nyahama. Ho ntse ho e-na le limillione tsa batho ba ratehang, ba nang le botsoalle lefatšeng lena. Kahoo ke joang u ka fumanang metsoalle e joalo ea ’nete?

[Setšoantšo se leqepheng la 4]

Metsoalle ea hao e ka ba le tšusumetso e matla holim’a hao