Jesu—Bophelo le Tšebeletso tsa Hae

Jesu—“Bohobe ba ’Nete bo Tsoang Leholimong”

KA SEBELE letsatsi leo e ne e bile la liketsahalo. Jesu o ile a fepa likete ka mohlolo a ba a pholoha ha batho ba leka ho mo etsa morena. Bosiung boo o ile a tsamaea holim’a leoatle le befileng la Galilea ka maoto; a pholosa Petrose, ea ileng a qala ho teba ha a tsamaea holim’a metsi a tsokotsoang ke sefefo; ’me a khutsisa maqhubu ho pholosa barutuoa ba hae hore ba se ke ba robeheloa ke sekepe.

Letsatsing le hlahlamang batho bao Jesu a ileng a ba fepa ka mohlolo ka leboea-bochabela ho leoatle la Galilea ba mo fumana haufi le Kapernauma. Ha a ba khalemela, Jesu o re ba mo batla hobane ba lebeletse lijo tse ling tsa mahala. O ba phehella hore ba se ke ba sebeletsa lijo tse felang, empa lijo tse tla ba teng le bophelong bo sa feleng. Kahoo batho baa botsa: “Re tla etsa’ng hore re sebetse mesebetsi ea Molimo na?”

Jesu o bolela mosebetsi o le mong feela oa bohlokoa ka ho fetisisa. Oa hlalosa: “Mosebetsi oa Molimo ke hoba le lumele ho eo o mo romileng.”

Leha ho le joalo, batho ha ba lumele ho Jesu, ho sa tsotellehe mehlolo eohle eo a e entseng. Ka la maobane, o ile a fepa ka mohlolo banna ba 5 000, ’moho le basali le bana, empa joale, ka ho ke keng ha lumeloa, baa botsa: “Hleka u etsa mohlolo ofe, re tle re o bone, ’me re lumele ho uena? U sebetsa eng na? Bo-ntat’a rōna ba jele manna feelleng, joale ka ha ho ngoliloe, ho thoe: O ba file bohobe bo tsoang leholimong, ba e-ja.”

Ha a arabela kōpo ea bona bakeng sa mohlolo, Jesu o hlakisa Mohloli oa litokisetso tsa hae tsa mohlolo, ka hore: “Hase Moshe ea le neileng bohobe bo tsoang leholimong, empa ke eena Ntate ea le neang bohobe ba ’nete bo tsoang leholimong. Hobane bohobe ba Molimo ke bo theohileng leholimong, bo neang lefatše bophelo.”

Batho ba re, “Morena re fe bohobe boo ka mehla eohle.”

Jesu oa hlalosa: “Ke ’na bohobe ba bophelo; ea tlang ho ’na a ke ke a lapa, ’me ea lumelang ho ’na a ke ke a nyoroa le ka mohla o le mong. Empa ke le boleletse hore le mpone, empa ha le lumele. Hohle hoo ke ho neoang ke Ntate, ho tla fihla ho ’na; ’me ea tlang ho ’na, nke ke ka mo lahlela ntle. Hobane ke theohile leholimong, e seng ho etsa ho ratoang ke ’na, empa e le ho etsa ho ratoang ke ea nthomileng. ’Me ho rata ha Ntate ea nthomileng ke hore ke se lahle letho la tsohle tseo a ’neileng tsona, ke mpe ke li tsose ka letsatsi la bofelo. Ho ratoang ke ea nthomileng ke hore, e mong le e mong ea talimang Mora, ’me a lumela ho eena, a be le bophelo bo sa feleng.”

Ha ba utloa tsena Bajode ba qala ho korotlela Jesu hobane a itse, “Ke ’na bohobe bo theohileng leholimong.” Ba mo talima e se letho haese mora oa batsoali ba batho ’me kahoo ba hanyetsa ka tsela e kang eo batho ba Nazaretha ba ileng ba hanyetsa ka eona: “Na eo hase Jesu, mor’a Josefa, eo re tsebang ntat’ae le ’m’ae? Joale o bolela joang, ha a re: Ke theohile leholimong?”

Jesu oa arabela: “Le se ke la seba hammoho. Ha ho motho ea ka tlang ho ’na, ha a sa huloe ke Ntate ea nthomileng; ’me ’na, ke tla mo tsosa ka letsatsi la bofelo. Ho ngoliloe mangolong a baprofeta, ho thoe: Ba tla rutoa bohle ke [“Jehova,” NW] Molimo. Ka baka leo, e mong le e mong ea utloileng Ntate, ea ithutileng ho eena, o tla ho ’na. Hase hore motho o kile a bona Ntate, ha e se ea tsoang ho Molimo; eena o bone Ntate. Ka ’nete-nete ke re ho lōna: ea lumelang ho ’na o na le bophelo bo sa feleng.”

Ha a tsoela pele, Jesu oa pheta: “Ke ’na bohobe ba bophelo. Bo-ntat’a lōna ba jele manna feelleng, ’me ba shoele. Ke bona bohobe bo theohang leholimong, hore motho a bo je, ’me a se ke a shoa. Ke ’na bohobe bo phelang, bo theohileng leholimong; ekare ha motho a e-ja bohobe bona, o tla phela ka mehla.” E, ka ho lumela ho Jesu, eo Molimo o mo romileng, batho ba ka ba le bophelo bo sa feleng. Ha ho manna, kapa bohobe leha e le bofe bo joalo, bo ka fanang ka seo!

Ho bonahala puisano e mabapi le bohobe bo tsoang leholimong e qalile nakoana kamor’a hore batho ba fumane Jesu haufi le Kapernauma. Empa ea ntšetsoa pele, ho fihlela sehlohlolong hamorao ha Jesu a ntse a ruta synagogeng Kapernauma. Johanne 6:26-51, 59; Pesaleme ea 78:24; Esaia 54:13; Mattheu 13:55-57.

◆ Ke liketsahalo life tse ileng tsa etella pele ho bua ha Jesu ka bohobe bo tsoang leholimong?

◆ Ha ho talingoa seo Jesu a sa tsoa se etsa, ke hobane’ng ha kōpo ea mohlolo e le e sa lokelang hakaale?

◆ Ke hobane’ng ha Bajode ba korotlela boipolelo ba Jesu ba hore ke eena bohobe ba ’nete bo tsoang leholimong?

◆ Puisano ka bohobe bo tsoang leholimong e ile ea tšoareloa hokae?