Baboleli ba ’Muso Baa Tlaleha

Bacha Italy ba Etsa Menyetla ea ho Paka

BA ANANELANG merero e hlollang ea Molimo ba thabela ho thusa ba bang ho ithuta ka tšepo e makatsang ea ’Muso. Hangata sena se kopanyeletsa ho sebelisa hamolemo menyetla e bulehang, joaloka ha tlaleho e latelang e tsoang Sardinia e bontša.

◻ “Mohoeletsi oa moshemane ea lilemo li 12 o ne a e-tsoa tšimong a khutlela hae ka bese. Beseng eo ho ne ho na le bacha ba bashemane ba babeli le ngoanana, kaofela ba ne ba ka ba lilemo li 18. Mohoeletsi e mocha a lula haufi le ngoanana eo ’me a qala ho bala makasine oa hae oa Tsoha! a tšepa hore o tla hapa khahleho ea hae. A bona makasine ’me a ’motsa hore o bala eng. A mo hlalosetsa hore o bala sehlooho se buang ka tharollo ea mathata ao bacha ba tobaneng le ’ona. A bolela hore o kotutse melemo e mengata boitsebisong boo ’me e ka mo thusa ka ho tšoanang. Ngoanana a thabela ho amohela limakasine.

“Bacha ba bang ba babeli ba neng ba mametse moqoqo ba kōpa limakasine. Ha ba lokisetsa ho ntša moneelo oa tsona, mokhanni oa bese a ba bolella hore ba se senye chelete ea bona linthong tse se nang molemo oa letho. Bacha ba arabela ka hore ha se lithoto, le hore limakasine tseo lia thahasellisa. Ha mokhanni a utloa hoo a emisa bese, thoko ho tsela, ’me a batla ho bona hore ke eng se thahasellisang ka limakasine tseo. Le eena a kōpa likopi tsa tsona.

“Paki ea mocha e boletseng phihlelo ena e itse: ‘Ke thaba haholo hore ke ile ka qala ho paka ka beseng.’”

◻ Mocha e mong oa Paki o ile a sebelisa hamolemo boemo ba sekolong. Mocha enoa o re: “Tichere ea rōna e ile ea re ruta mokhoa oa ho ithuta o batlang o fapane le o tloaelehileng. Kamor’a ho hlahloba boitsebiso, ra etsa kemiso e akaretsang lintlha tsa sehlooho le lintlha tse tšehetsang le ho fana ka moqoqo o sa rereloang.

“‘Ke tloaelane haholo le mokhoa ona,’ ho hlalosa Paki. ‘Ke mokhoa o buelloang Bukeng ea Tataiso ea Sekolo sa Boboleli sa Puso ea Leholimo.’ Kapele tichere ea hlokomela hore e ne e le ’na feela ea atlehang ho sebelisa mokhoa ona. Ea botsa lebaka le etsang phapang mosebetsing oa ka le oa ba bang. Ka e hlalosetsa hore ke ithutile mokhoa ona Sekolong sa Tšebeletso sa Puso ea Molimo, o ne a thabile haholo ’me a ’memela ho bontša le ho hlalosetsa klase sena, ke sebelisa Buka ea Tataiso ea Sekolo sa Boboleli sa Puso ea Leholimo. Ka fela ka etsa joalo.

“Ha ke fihla hae, ka phetela lapa leso se etsahetseng. Ntate, eo e seng Paki, kamehla o ne a bolela hore ho ba Paki ea Jehova ho ne ho khina tsoelopele lithutong tsa sekolo, empa kamor’a ho mamela phihlelo eo ea ka, a tlameha ho fetola mohopolo oa hae.”

Bacha, esita le lōna ba hōlileng, le na le monyetla o hlollang hakaakang oa ho phahamisa le ho tsebahatsa lebitso la Jehova!—Pesaleme ea 148:12, 13.