Na u sa Hopola?

Na u fumane litokollo tsa morao-rao tsa Molula-Qhooa e le tsa bohlokoa bo sebetsang ho uena? Joale ke hobane’ng u sa hlahlobe mohopolo oa hao ka tse latelang:

◻ Ke hobane’ng ha Timothea e bile mohlala o motle o ka lateloang ke bacha?

Timothea o tetse ho boleloang e le bophelo bo tloaelehileng lapeng ea e-ba motsoalle ea tšepahalang oa Pauluse. O tiiselitse le Pauluse mathateng le manolong, a mo tšehetsa mosebetsing oa boboleli ’me a utloisisa ho sebeletsa hohle moo a romeloang teng. (Ba-Filipi 2:19, 20)—8/15, leqephe 14.

◻ Litšoaneleho tsa kolobetso ke life?

Ea tlang kolobetsong o tlameha ho utloisisa se amehang. O lokela hore kannete a batle ho sebeletsa Jehova hobane a Mo rata. O bontša sena ka ho tšoarella ho se hlokoang ke Molimo boitšoarong le ho bolella ba bang tumelo ea hae. Hape o lokela ho etsa boinehelo ba botho ho Jehova ka thapelo.—8/15, leqephe 16.

◻ Ke hobane’ng ha ho fosahetse ho batla tšebelisano le meea?

Ho batla tšebelisano le meea ho tšoana le ho rata seo Jehova a se hloileng. (Liproverbia 6:16-19) Ha e le hantle, ho tšoana le ho lahla Jehova le ho ema le sera se seholo sa Molimo le bathusi ba sona.—9/1, leqephe 5.

◻ “Buka ea khopotso” eo ho boletsoeng ka eona ho Malakia 3:16 ke efe?

Ho tloha mehleng ea Abele ho ea pele, Molimo o ’nile oa hlokomela, joaloka ha eka o ngola bukeng, batho ba lopollotsoeng ba lokelang ho hopoloa bakeng sa bophelo bo sa feleng. ‘Buka ena ea khopotso’ e ntse e le “buka ea bophelo” le “moqolo oa bophelo.” (Tšenolo 3:5; 17:8, NW; Mattheu 23:35)—9/1, leqephe 29.

◻ Ke’ng se etsang hore motsoalle oa ’nete e be oa bohlokoa?

Kamehla u ka retelehela ho motsoalle oa ’nete bakeng sa thuso, keletso, matšeliso, le setsoalle se mofuthu.—9/15, maqephe 3, 4.

◻ “Moea” o bolaeang oa lefatše lena ke eng?

Ke moea o akaretsang, kapa maikutlo a busang a boithati le ho hloka kutlo, o bonahatsoang ke batho ba ikarotseng ho Molimo. (Ba-Efese 2:2; 1 Ba-Korinthe 2:12)—9/15, leqephe 11.

◻ Hore bolumeli e be ba bohlokoa, bo tlameha ho etsa eng?

Bo lokela ho bea litholoana tse molemo. Bo tlameha ho hlahisa batho ba molemo. Bo tlameha ho hlalosa hore na ke hobane’ng ha lintho li le kamoo li leng kateng lefatšeng kajeno. ’Me bo lokela ho kenya tšepo ea sebele likelellong le lipelong tsa batho bakeng sa bokamoso. (Mattheu 7:17-20)—10/1, leqephe 7.

◻ Tokiso e hlōlehile ho finyella eng?

Balokisi ba bang ba pele ba ne ba ile ba lora ka ho khutlela litekanyetsong tsa Bibele, Bokresteng bo hloekileng. Toro eo ha ea ka ea phethahala. Ha nako e ntse e feta, lithuto tsa motheo tsa likereke tsa Boprotestanta, ebang e ne e le tsa likereke tsa bochaba kapa che, li ne li lumellana haholo le tsa Kereke ea Roma e K’hatholike.—10/1, leqephe 25.

◻ Ke eng se entseng hore Molimo o ahlole habohloko Moshe le Aarone kamor’a ketsahalo ea Kadeshe-Barnea?

Pesaleme ea 106:32, 33 e fana ka leseli etsahalong ena, e bontša hore Moshe o ile a etsa ka moea o bohloko a ‘bua ka molomo oa hae ka potlako.’ Ka mantsoe a khalefo, o ile a lebisa tlhokomelo ho eena le Aarone ho e-na le ho Jehova, eo e hlileng e leng eena ea ka fanang ka metsi ka mohlolo. Ka tsela ena Moshe o hlōlehile ho ‘tlotlisa Molimo pel’a batho.’ (Numere 27:12-14)—10/15, leqephe 31.

◻ Molao oa Molimo o neng o filoe Iseraele o sebelitse morero ofe o phahameng?

Molao o fuoe Iseraele ka morero oa ho boloka sechaba se hloekile ’meleng, moeeng, kelellong, le boitšoarong.—11/1, leqephe 12.

◻ Lithuso tse ling tsa ho boloka bosoha bo hloekile ke life?

Rapella moea oa Molimo kamehla le thuso ea oona hore o bonahatse litholoana tsa oona kamehla. Thuisa ’me ka linako tsohle o sebelise keletso ea Lentsoe la Molimo. Qoba litšoantšo tsa bootsoa le boithabiso bo sa lokang. Hlokomela bao u tloaelaneng le bona. Qoba meqoqo e litšila le mesoaso e mebe.—11/15, leqephe 20.

◻ Ke phapang efe e khōlō e teng mahareng a liphekolo tse tlalehiloeng ka Bibeleng le tse tlalehiloeng ke bafolisi ba tumelo ba kajeno?

Jesu le barutuoa ba hae ha baa ka ba lefisa motho bakeng sa liphekolo tsa bona. Pholiso tse neng li etsoa mehleng ea Bibele e ne e le tse etsahalang hang-hang kapa tse phetoang ka nako e khutšoanyane.—12/1, maqephe 4, 5.

◻ Melemo e meng ea ho bina ka lentsoe le phahameng borapeling ba ’nete ke efe?

Ho kopanela ha rōna re le batho ka bomong borapeling ba pontšeng ho ba matla haholoanyane. Ho bina ho fana ka bopaki bo boholo ho ba bang teng libokeng ka lekhetlo la pele. Habohlokoa ka ho fetisisa, thoriso e khōlō e ea ho Jehova.—12/1, leqephe 27.