Na U Kile ua Kopanela le Mokhatlo o Hlophisitsoeng oa Jehova?
MOHLANKANA o ile a ikutloa a soabile ’me a tepelletse haholo. Liaparo tsa hae, li tabohile ’me li le marantha, li bontša hore o kile a apara liaparo tse ntle. Joale ha li siee pelaelo ea hore o hlahetsoe ke linako tse thata. Ha monahano oa hae o hopola morao lelapeng la habo le hōle, a qala ho ba le lehloeo le tebileng bakeng sa bophelo bo bobe boo a bo phetseng le ka tsela eo a sentseng leruo leo a tsitlelletseng ho ba le lona pele ho nako. Mpa ea hae e lapileng e ile ea eketsa bohloko ba hae, ’me o ile a ikutloa a hlolohetsoe hae. Esita le bahlanka ba ntat’ae morao koana hae ba ne ba le molemo ho mo feta! O ne a ka rata hakaakang ho tšoana le bona!
Empa o ne a ka lebella kamohelo ea mofuta ofe ho ntat’ae haeba a khutlela hae hona joale? O ne a sa lebella ho amoheloa ka mofuthu kapa esita le ho lumelloa ho kena ka tlung kamor’a tsela e soabisang eo a sebelisitseng mosa oa ntat’ae hampe kateng. Leha ho le joalo, boikutlo bo tebileng bo ileng ba laola monahano oa hae le pelo e ne e le hore: O tlameha ho ea hae.
Mohlankana enoa o utloisisitse hanyenyane hakaakang maikutlo a ntat’ae ka eena! O ne a letetsoe ke lintho tse makatsang hakaakang ha a ntse a atamela lehae la hae la pele! Ha e le hantle, “eare ha a sa le hōle, ntat’ae a ’mona, a mo utloela bohloko, a titima, a itihela molaleng oa hae, a mo aka.”—Luka 15:20.
Joaloka mora ea lehlasoa, na u tlohetse lehae la hao? Na u suthetse hōle le Ntate oa hao, Jehova, le mokhatlo oa hae o hlophisitsoeng? Na hona joale u lakatsa ‘ho khutlela hae’?
Mabakeng a mangata, ba suthetseng hōle le mokhatlo o hlophisitsoeng oa Jehova ha ba tšoane hantle le mora ea lehlasoa. Ho ba bangata, ebile feela mokhoa o tsamaeang butle, o sa bonahaleng, oa ho suthela hōle—joaloka seketsoana se senyenyane, se suthang butle-butle ’me se sesetsa bohareng ba lebopo. Ba bang ba imetsoe haholo ke mathata a lichelete kapa mathata a lelapa, ho kula kapa esita le “ho ba ka pele” lefatšeng, hoo litaba tsa moea li ileng tsa qheleloa kathōko. Ba bang ba itlohelletse hore ba khopisoe ke batho ba bang ba kopanelang le phutheho ea Bokreste kapa ba khaolitse hobane ba sa lumellane le kutloisiso e itseng eo mokhatlo o hlophisitsoeng oa Jehova o nang le eona tabeng e itseng ea Mangolo. Ho ntse ho le joalo ba bang ba itlohelletse hore ba nyahamisoe ’me ba tlohetse kahobane tsamaiso ea joale ea lintho ha e-ea fela ka nako eo ba neng ba e lebelletse.
Haeba u e mong ea seng a sa kopanele ka mafolo-folo le mokhatlo o hlophisitsoeng oa Jehova, mohlomong lebaka le le leng kapa a eketsehileng ho ana a boletsoeng a tla lokela boemo ba hao. Empa ho sa tsotellehe hore sesosa ebile sefe, na ha se nako ea ho nahana ka ho khutla?—Mattheu 18:12-14.
Na U Khopisitsoe?
Ha re nahana kamoo batho ba haelletsoeng ke phetheho kateng, re ka lebella hore liqabang tsa botho li tla ba teng nako le nako. Sena se entse hore ba bang ba khopehe. Ba bang ba khopisitsoe ke ha motho eo ba neng ba mo hlompha haholo a itšoara hampe kapa ka tsela eo e seng ea Bokreste kapa a ameha phosong.
Na see se etsahetse ho uena? Ho sa tsotellehe hore u khopisitsoe ke eng, bonneteng hase Jehova ea u khopisitseng. (Bapisa Ba-Galata 5:7, 8.) Ka baka leo na ho na le lebaka leha e le lefe la hore re khaotse botsoalle ba rōna le eena ka lebaka la se entsoeng ke motho e mong? Ho e-na le hoo, na ha rea lokela ho tsoela pele re mo sebeletsa ka botšepehi, re kholisehile hore Jehova o tseba se etsahalang ’me o tla sebetsana le rōna ka lerato?—Ba-Kolosse 3:23-25.
Ha nako e ntse e tsamaea, ba bangata ba fumane hore ntho e ileng ea ba khopisa pele ha e sa le bohlokoa hona joale kapa mohlomong ha e eo. Kapa ka ho nahanisisa taba hantle, joale ba ka ’na ba fihlela qeto ea hore ha e le hantle ke bona ba neng ba le phoso. Hangata sena se etsahala ha motho a ne a sa lumellane le keletso kapa a khopisitsoe ke keletso kapa taeo eo a e filoeng. Ho e-na le hoo, a ka hlokomela hore taeo e joalo e fanoe ka lerato la ’nete molemong oa hae. (Ba-Heberu 12:5-11) Ho loketse hakaakang he, ho sebelisa keletso ea moapostola Pauluse! O ngotse: “Tiisang matsoho a lōna a tepeletseng le mangole a tetemang, ’me maoto a lōna a se hlotse. ’Me leoto le holofetseng le ke ke la nonyeletseha, empa le tla boela le fumane matla a lona a pele.”—Ba-Heberu 12:12, 13, The New English Bible.
Na U ne U sa Lumellane le Thuto e Itseng?
Mohlomong u khaolitse ho kopanela le mokhatlo o hlophisitsoeng oa Jehova kahobane u ne u e-na le pono e fapaneng ka taba e itseng ea Mangolo. Joaloka Baiseraele ba pholositsoeng Egepeta ba ile ba “phakisa ba lebala liketso tsa hae” molemong oa bona “ha ba ka ba tšepa merero ea hae” mohlomong u ile ua potlakela ho fihlela qeto ea hore kaha mokhatlo o hlophisitsoeng ha o lumellane le pono ea hao eo u neng u nahana hore e nepahetse, u tla khaola maqhaama le oona. (Pesaleme ea 106:13) Mohlomong ntlha eo e se e hlakisitsoe, mohlomong ka hore e fetoloe kapa e eketsoe ka lipatlisiso tsa Mangolo tsa tataiso ea moea oa Molimo. Na ho ka be ho sa ba molemo ho lula mokhatlong o hlophisitsoeng, ho letela Jehova?
Ho molemo ho hopola hore kamehla Jehova o sebelitse ka mokhatlo o le mong feela. Mehleng ea rōna, “mohlanka ea khabane, ea bohlale,” o fana ka lijo tsa moea “nakong ea teng.” Hlokomela hore mohlanka enoa o ne a tla fumanoa ‘a etsa joalo.’ (Mattheu 24:45-47) Ha e le hantle, ke mang eo kajeno a hlokomelang hore Morena o se a khutlile? ’Me ke bo-mang ba mafolo-folo mosebetsing o boletsoeng? Ke feela ba kopanelang le mokhatlo o hlophisitsoeng oa Jehova oa lipaki tsa Bakreste!
Ha ba bang ba khaotsa ho latela Jesu, moapostola Petrose o itse: “Morena, re ka ea ho mang? Ke uena ea nang le mantsoe a bophelo bo sa feleng.” Ntle ho pelaelo Petrose o ne a tseba hore Jesu ke Messia. Kahoo ha barutuoa ba bang ba tšosoa ke mantsoe a mang a Jesu, Petrose o ile a hlokomela hore e tla ba bothoto ho tlohela mohloli oa “mantsoe a bophelo bo sa feleng.” Ha nako e ntse e tsamaea pelaelo leha e le efe e ne e tla hlakisoa. (Johanne 6:51-68; bapisa Luka 24:27, 32.) Ho sa ntse ho le joalo le kajeno, hobane Jehova o tataisa ka ho tsoelang pele bahlanka ba hae tseleng ea ’nete.—Liproverbia 4:18.
Khutla hona Joale
“Re batlisise metsamao ea rōna, re e nahane, re khutlele ho Jehova,” ho kōpile moprofeta Jeremia. (Lillo 3:40) Leha ho le joalo, ba bang mohlomong ba ka ’na ba qea-qea, ba tšaba kamohelo e fokolang ea ba leng phuthehong. Empa mora ea lehlasoa o ile a amoheloa joang ha a khutlela hae? “Empa re tšoanetse ho . . . thaba,” ho hlalositse ntate, “hobane enoa, ngoan’eno, o ne a shoele, ’me o bile o pholohile; o ne a lahlehile ’me o bile o fumanoe.” (Luka 15:32) Kamohelo e tšoanang e mofuthu e emetse ba ‘khutlelang ho Jehova’ ka boikemisetso bo tšepahalang ba ho etsa thato ea hae.—Bapisa Luka 15:7.
Empa phutheho ea Bokreste e ne e sa lula feela e letetse ho amohela ba joalo haeba ba etsa qeto ea ho ‘khutlela hae.’ Setšoantšong sa Jesu, ntate o ile a matha ho khahlanyetsa mora oa hae ha “a sa le hōle.” Ka ho tšoanang Lipaki tsa Jehova li ho nka e le tlamo ea botho ho batla ba kileng ba kopanela ’me ba ba thuse ho khutlela mokhatlong o hlophisitsoeng oa Jehova.
Empa ho thoe’ng haeba motho o ile a ba molato oa boitšoaro bo bobe nakong eo a ntseng a khaohane le mokhatlo o hlophisitsoeng oa Jehova? Kapa ho thoe’ng haeba motho a ile a lokela ho khaoloa bathong ba Molimo ka lebaka la phoso e tebileng empa a se a khaolitse ho kopanela boitšoarong boo e seng ba Bokreste? Baholo ba tla tseba kamoo ba tla mo thusa kateng ka tsela e mosa le e lerato e le ho lokisa litaba mahareng a hae le Jehova. Kahoo e mong le e mong eo hona joale a lakatsang ho khutla ’me a phele tumellanong le thato ea Molimo o lokela ho tsebisa baholo ka takatso ena. “’Me le tle, re lokise litaba, ho bolela Jehova. Leha libe tsa lōna li ka ba khubelu joale ka krimsone, li tla soeufala joalo ka lehloa.”—Esaia 1:18.
Ntate oa rōna oa leholimo o mosa, ebile o lerato hakaakang! ’Me o mamella hakaakang ’me o thahasella e mong le e mong oa rōna ka bomong! Ruri, ha a rate ha re ka timetsoa le tsamaiso ena e khopo ea lintho. (2 Petrose 3:9) Ke Jehova ea ileng a kōpa batho ba hae ba boholo-holo: “Khutlelang ho ’na, ’me ke tla khutlela ho lōna.” Memo e tšoanang e ntse e le teng kajeno.—Malakia 3:7.
Nako e ntse e qepha, kahoo u se ke ua lieha. Hammoho le batho ba Jehova, thabela hape ‘khotso e khōlō ea ba ratang molao oa Molimo.’ “Ha ho khopiso ho bona,” ho boletse mopesaleme. (Pesaleme ea 119:165) Botebong ba pelo ea hao, na u rata molao oa Jehova? Haeba u mohlanka ea inehetseng oa Molimo, lena ke lona lebaka leo u inehetseng ka lona ho eena. Ha ho letho—e, ha ho letho ho hang—le ka bang molemo ho feta ho tsosolosa kamano ea hao le Jehova. U se ke ua mo furalla. Nahana taba ena ka botebo le ka thapelo. Haeba u ne u hloloheloa bonngoe le mofuthu ba bahlanka ba Jehova, nako e sa le teng ea ho khutlela mokhatlong o hlophisitsoeng oa Jehova. Etsa joalo ntle le tšenyo ea nako.