Lipaki, Tsoelang Pele!
“Bohle ba tiile nakong ea bofelo./Bahlanka ba Jah, ho bolela ka ’muso./Le haeba Satane a hanyetsa./Ke Molimo o tlang ho ba tšehetsa.”
Ena ke mela e qalang ea pina ea 29 bukeng ea lipina ea Lipaki tsa Jehova, Binelang Jehova Lithoriso. Kananelo ea hao bakeng sa pina ena e ka ’na ea tebisoa ke ho tseba hore pina e ile ea qaptjoa kampong ea mahloriso ea Jeremane ea Bonazi. Haufinyane, basebetsi ba ka bang 500 ba lelapa la Bethele Jeremane Selters ba ile ba mamela puisano e rekotiloeng le moqapi oa pina, Erich Frost, ea ileng a tlaleha se latelang:
“‘Lipaki, tsoelang pele!’—ena e ne e le takatso ea lipelo tsa rōna esita le ka nako eo, le hoja re ne re etsa mosebetsi o thata kampong ea mahloriso. Kelello ea moqapi oa lipina kamehla e luma lipina tse ngata tse fapaneng, ka hona ’mino oa pina o bile ka hloohong ea ka ka nako e telele. Sehlopha seo ke neng ke sebetsa le sona, se neng se e-na le Lipaki tse 40, se ne se na le nako ea lihora tse 4 se tsamaea joaloka masole letsatsi le leng le le leng ho ea sebakeng sa moo ho qhalloang lithōle le litšila kantle ho kampo. Ha se le tseleng hoseng ho hong, ka tleloa ke mohopolo ona: ‘Ke nako ea ho bea mantsoe a loketseng pineng ena, e le hore e ka binoa.’ ’Me kapele temana e qalang ea qala ho ba le sebopeho ka kelellong ea ka.
“Mosebetsi oa ka e ne e le ho thōtha qubu ea mobu ka kiribae sebaka se ka bang bohōle ba limithara tse 30. Ho bua nakong ea mosebetsi ho ne ho hanetsoe ka thata. Leha ho le joalo, ke khethile nako e loketseng, ka lekunutu ka botsa moena ea sebetsang haufinyane hore na o khona ho hopola lintho hantle ka hlooho. O ile a re e, ka hona ka mo fa temana ea pele ka tšepo. Kamor’a hora, ka botsa moena e mong, hamorao oa boraro, le oa bone. E mong le e mong o ile a kōptjoa ho ithuta temana e le ’ngoe ka hlooho.
“Mantsiboeeng ao ha re khutletse kampong, bao ba bane ba mphetela litemana, e mong kamor’a e mong. Ka hona, ke ne nka eketsa mantsoe ‘linotong.’ Ba maSS ba ne ba ke ke ba re tlohela halelele re phela haeba feela linoto li ne li ka oela matsohong a bona. Empa joale boemo bo ne bo le kotsi ka ho fetisisa. Haeba ba ne ba ka mphumana ka mantsoe a pina, ba ne ba ka mphanyeha. Ke ne nka pata pina ee joang?
“Moena e mong ea hōlileng o ne a hlokomela setala kantle ho kampo moo ba bang ba maSS ba neng ba bolokile mebutlanyana ea bona teng. Setaleng sena, a fumana sebaka sa ho pata mabenyane a sebele a moea—litokollo tse feletseng tsa Molula-Qhooa le e le ’ngoe kapa tse peli tsa libuka tsa Mokhatlo. Moena enoa o ne a leketlisitse bophelo ba hae selomong ka ho kenya ka sekhukhu lintho tse joalo ka kampong, ka hona, a re hlomella ka thepa ea ho ithuta. O ile a pata pina ea ka mona. Ka letsatsi le leng a re: ‘Erich, pina ea hao e tseleng. Ke fumane motho e mong ea e romeletseng Switzerland.’ Ha ba ha re kokololo!
“Baena ba Switzerland ba e romela Brooklyn, moo e ileng ea fihla matsohong a Sehlopha se Busang sa Lipaki tsa Jehova. Mantsoe a ka a neng a ngotsoe hampe feela a ile a fetoloa ho etsoa litemana tse tharo tse babatsehang. Ke ile ka thaba ka ho fetisisa ha hamorao ke fumana pina ena ka bukeng e ncha ea lipina ea Lipaki tsa Jehova.a Kajeno, joale e le pina ea 29, e ntse e susumetsa Lipaki tsohle ho emela Jehova le ’nete li tiile.”
[Mongolo o botlaaseng ba leqephe]
a E ile ea binoa ka lekhetlo la pele United States ke sehlopha sa ’mino sa liithuti tsa sehlopha sa bo11 sa Sekolo sa Bibele sa Watchtower sa Gileade e le tšobotsi ea lenaneo la bona la likapeso ka la 1 Phato, 1948.
[Lebokose le leqepheng la 21]
Erich Frost o qetile bophelo ba hae ba lefatšeng ka la 30 Mphalane, 1987, a le lilemo li 86. O hlahile ka la 22 Tšitoe, 1900, a kolobetsoa ka la 4 Tlhakubele, 1923, ’me a kenela tšebeletso ea nako e tletseng ka 1928. Ka 1936 o ile a fuoa boikarabelo ba mosebetsi oa sekhukhu oa Lipaki tsa Jehova tse hlorisoang Jeremane, ’me a hlokomela mosebetsi oo oa hae hantle ka likhoeli tse robeli ho fihlela a kenngoa chankaneng kampong ea mahloriso. Kamor’a ntoa, ho tloha ka 1945 ho ea ho 1955, o ile a sebeletsa e le molebeli oa ofisi ea lekala ea Mokhatlo oa Watch Tower Jeremane. (Bona The Watchtower, April 15, 1961, maqephe 244-9) Kamorao ho moo, o ile a tsoela pele ho sebeletsa Jehova ka botšepehi. Molimo ha o lebale mosebetsi oa Bakreste ba joalo ba batlotsuoa kapa lerato leo ba le bontšang bakeng sa lebitso la oona.—Ba-Heberu 6:10.