“Tloha Naheng ea Heno le ho Bang ka Uena”
KA Pulungoana 1981, Tony le mosali oa hae, Margaret, hammoho le bana ba bona ba babeli, ba neng ba le lilemo li 9 le 11, ba ile ba falla Engelane ho ea ka bophirimela ho Ireland. Hobane’ng? Ho thusa mosebetsing oa ho bolela oa Lipaki tsa Jehova. Libeke tse seng kae feela hamorao, ba ne ba thulane le mathata. E ne e le mariha a batang haholo. Litebello tsa mosebetsi li ne li sa atleha, ka hona Tony o ne a qalile khoebo ea ho hlatsoa lichomela. A e-s’o be le tsebo e ntle haholo, o ile a khutlela lapeng a koahetsoe hohle ke mooa kamor’a mosebetsi o boima oa letsatsi. Nahana ho nyahama ha hae ha a fumana hore lipompo tsa metsi li thibane ke ho hoama ha metsi, ’me o na le ketlele e nyenyane feela ea metsi ao a ka hlapang ka ’ona! O ile a lumela, “Ka motsotsoana feela ka qala ho ipotsa hore na ke hobane’ng ha re ile ra tloha hahabo rōna le ho bang ka rōna.”
Ho tloha ho lelapa le metsoalle ho ea sebeletsa Molimo ka botlalo haholoanyane, le ho tsoela pele ho sa tsotellehe mathata, ho hloka tumelo ea sebele. E mong ea ileng a bontša tumelo e joalo e ne e le mopatriareka Abrahama, hoo e ka bang lilemong tse fetileng tse 4 000. Morutuoa Setefane o ile a re ka eena: “Molimo ea tlōtlehang o ile a iponahatsa ho ntat’a rōna Abrahama ha a sa le Mesopotamia, a e-s’o ahe Kharane; a re ho eena: ‘Tloha naheng ea heno le ho bang ka uena, u ee naheng eo ke tla u supisa eona.’”—Liketso 7:2, 3, TLP.
Ha e le hantle, ha ho lea mong kajeno ea nang le thōmo e joalo e tobileng e tsoang ho Molimo hore a falle naheng ea habo. Leha ho le joalo, Bakreste ba likete-kete lekholong lena la lilemo la bo20, ba lokisitse litaba tsa bona hore ba etse se ileng sa etsoa ke Abrahama—ho fallela libakeng tse ncha ho ntšetsa pele lithahasello tsa Molimo. (Mattheu 24:14; 28:19, 20; Ba-Roma 10:13-15) Ba hlokometse hore “tšimo ke lefatše” le hore libaka tse ngata li hloka thuso e khōlō haholoanyane. (Mattheu 13:38) Ho tšoana le Esaia, ba arabetse ka cheseho mantsoeng a Jehova, “Ke tla roma mang? Ho tla ea mang bakeng sa rōna?” Kaha ba bona tlhokahalo, le bona ba arabetse, “Ke ’na enoa, roma ’na!”—Esaia 6:8.
Ba ho Etsa ka Lebaka Lefe?
Ke batho ba mofuta ofe ba fallang joalo? Ha ba tsoe sehlopheng leha e le sefe sa lilemo tse itseng kapa semelo se itseng, leha e le hore ba bolela hore ba na le mahlale a ikhethang. Ke batho feela bao, ka ntho e le ’ngoe, ba utloisisang ho hatella litakatso tsa botho le melemo ea botho molemong oa ’Muso oa Molimo. Ho tšoana le ha Abrahama a ne a falla motseng o atlehileng linthong tse bonahalang le o mabotho-botho oa Ure ho ea phela litenteng naheng ea bojaki.—Ba-Heberu 11:8-10.
Banyalani ba bang ba ileng ba falla le bara ba bona ba babeli ba lilemong tsa bocha ka 1983 ba itse, “Kamehla re ne re bona tlhokahalo ea ho etsa ho hongata haholo kamoo ho ka khonehang tšebeletsong ea Jehova. Re ile ra ikutloa joaloka moapostola Pauluse ha a ne a re, ‘Nako e setseng e khutšoanyane’; ka baka leo ra etsa qeto ea ho ‘tšelela Ireland’ le ho thusa ka mosebetsi moo.” (1 Ba-Korinthe 7:29; bapisa Liketso 16:9.) Ho ea ka phetolelo e ’ngoe e lokolohileng, kutloisiso ea mantsoe a moapostola Pauluse ho 1 Ba-Korinthe 7:29 ke hore: “Ntho ea bohlokoa e lokelang hore e hopoloe ke hore nako ea rōna e setseng e khutšoanyane haholo,” ’me ho joalo le ka menyetla ea rōna ea ho etsa mosebetsi oa Morena. (The Living Bible) Bakreste ba bangata ba tšepahalang ba ’nile ba fallela kae kapa kae moo ba hlokahalang e le hore ba ka sebelisa menyetla ena pele e nyamela le ho sebelisa nako ea bohlokoa e saletseng hamolemohali.
“Re ile ra bona ona e le monyetla o motle oa hore kamehla ‘re be le mosebetsi o mongata Moreneng.’” (1 Ba-Korinthe 15:58) “Re ne re batla ho sebeletsa Jehova moo re neng re ka etsa molemo o fetisisang.” “Re ile ra ikutloa hore re ne re eme hantle licheleteng hore re ka falla le hore haeba re ne re ka khona ho koala sekheo kae-kae, e ne e ka ba phoso ho rōna hore re se ke ra ho etsa.” Lipolelo tse joalo li hlalosa boikutlo ba ba bangata ba nkileng mehato ea ho sebeletsa moo ba hlokahalang haholoanyane. Bakreste bana ba nkile ka botebo khothatso e fumanoang ho Liproverbia 3:9, 27: “Tlotlisa Jehova ka moruo oa hao, le ka lilopotsiea tsa tsohle tse u atetseng. Ea nang le tokelo, u se ke ua lesa ho mo etsa ka molemo, ha ho le matleng a hao.” Ba hlahlobile maemo a bona ka hloko, ba ile ba etsa qeto ea hore ‘ho matleng a bona ho etsa’ molemo oa kamehla bakeng sa bahabo bona ba likarolong tse ling tsa lefatše.—Bona le Ba-Roma 1:14, 15; Luka 10:27-37.
U ka ’na ua ba boemong ba ho falla joalo. Haeba ho joalo, u tla thahasella tsela eo ka eona ba bang ba seng ba faletse ba arabelang lipotso tse latelang.
Ke Eng e Lokelang ho Nahaneloa Pele ho Falloa?
Pele u falla, bonana le baholo phuthehong ea heno. Fumana hore na ba nahana joang ka litokisetso tsa hao. (Liproverbia 24:6) Ho ka ’na ha e-ba le mabaka ao ka ’ona ho falla ho joalo ho ke keng ha e-ba molemo tabeng ea hao, ’me ba tla u thusa ho seka-seka boemo ba hao ka nepo. Ka mohlala, ho hlokahala hore motho ea fallang e be ea matla moeeng haeba a batla ho fetoha thuso eseng moroalo sebakeng se secha.
Sebetsa ka ofisi ea lekala ea Lipaki tsa Jehova naheng eo u lakatsang ho fallela ho eona—kapa ka ofisi ea lekala ea heno haeba u lakatsa ho fallela hona kahare ho naha ea heno. Haeba ho ka khoneha, etela sebaka seo u rerang ho ea ho sona ho tseba ho hong ka naha eo le batho pele u etsa qeto ea ho qetela.
Hlahloba sepheo sa hao pele u falla. Abrahama o ile a falla hobane a ne a e-na le takatso e tebileng ea ho phethahatsa thato ea Molimo, e seng ka lebaka la moea oa ho fumana monyaka o mong oa mohlolo kapa ka cheseho ea nakoana kapa ho nkeha maikutlo ka nakoana. Lekanyetsa ka hloko mabaka ’ohle a amehang. Na ho ka ba le bothata ba puo? Na u ka fetohela mokhoeng oa bophelo o fapaneng le boemong bo fapaneng ba mohatsela le mofuthu? Na u na le litlhoko tse khethehileng tsa bophelo? Na litho tsohle tsa lelapa tse amehang li tšehelitse ho falla hoo ka pelo eohle? Na u lokisitse litaba tsa hao tsa lichelete e le hore u ka falla joalo ka katleho? (Bapisa Luka 14:28.) Ho hlokahala hore mabaka ana le a mang a mangata a nahanoe ka hloko le ka thapelo.—Ba-Efese 6:18.
Ho ka ’Na ha Thulanoa le Mathata Afe?
Le pele u falla, u ka ’na ua thulana le mathata. Hase e mong le e mong ea tla bona lintho joaloka uena. U ka ’na ua utloa lipolelo tse sa nahaneleng kapa tse nyahamisang. Leha ho le joalo, hopola hore le moapostola Petrose o ile a itšoara ka mokhoa o nyahamisang ha a utloa se tla etsahalla Jesu. Ho e-na le ho khothatsa Jesu hore a tiee ho etseng thato ea Jehova, Petrose a re: “Morena, u ikutloele bohloko: tse joalo li ke ke tsa u hlahela.” Joaloka Jesu, etsa qeto ea ho hanela puo leha e le efe e joalo e nyahamisang.—Mattheu 16:22, 23.
Hoba u tsitse sebakeng se secha, ho hloloheloa hae e ka ’na ea e-ba bothata bo boholo. Lerato bakeng sa Jehova le batho ba hlokang ho utloa litaba tse molemo tsa ’Muso oa hae le tla u thusa ho loana ka katleho le sena. Mathata a mangata a ka fokotsoa haeba kannete u hlile u etsa sebaka sa hao se secha lehae la hao. Qoba ho le bapisa ka mokhoa o nyahamisang le lehae leo u tlohang ho lona, kaha ho etsa joalo ho ka baka ho se khotsofale le lehloeo. Ha u thulane le mathata, hopola memo ea Jehova ho Malakia 3:10: “Le nteke ka hoo, . . . le bone ha nke ke ka le thibollela liphororo tsa leholimo, ke be ke le tšollele hlohonolofatso ka tekanyo e fetisisang.”
Ke Mahlohonolo Afe a Ka Thabeloang?
Ha ho kenella ha hao mosebetsing oa ho bolela litaba tse molemo ho hōla, ho tla hōla joalo le tšoaneleho ea tšebeletso ea hao. U tla eketsa mahlale joaloka moruti oa Lentsoe la Molimo. Hona ho ke ke ha tlisetsa uena feela melemo empa ho tla e tlisetsa le bohle ba u mamelang. (1 Timothea 4:15, 16) Ke tokelo e kaakang ho tšoara lithuto tsa lehae tsa Bibele le ho lokolla batho ba lipelo li tšepahalang lithutong tsa bohata tsa Babylona! U ka ba le thabo e hlalositsoeng ke moapostola Pauluse ha a ngolla ba bang bao a neng a ile a ba thusa hore e be Bakreste: “Hobane tšepo ea rōna ke mang, kapa thabo ea rōna, kapa moqhaka oo re ithorisang ka oona ke’ng? na hase lōna?” (1 Ba-Thessalonika 2:19) E, ke thabo le tlhohonolofatso ho ba le kabelo ho thuseng batho ka bomong le liphutheho ho ena moeeng.
Abrahama o ne a bitsoa “motsoalle oa Jehova” hobane o ile a utloa taelo ea Molimo habonolo. (Jakobo 2:21-23; Esaia 41:8, NW) Le uena u ka tebisa kamano ea hao ea botho le Molimo. Ha u etsa ka matla tšebeletsong ea hae, u tla latsoa tlhokomelo ea hae le tšehetso ea hae tse lerato. U tla utloisisa ka botlalo haholoanyane seo mopesaleme a neng a se bolela ha a re: “Latsoang, le bone hoba Jehova o molemo.”—Pesaleme ea 34:8.
Tony, Margaret, le bana ba bona ba ile ba thulana le mathata ha ba fallela ho ea sebeletsa Jehova ka botlalo haholoanyane. Empa ka thuso ea Jehova, ba a sebetsa ka katleho. Ba itse, “Ha rea ka ra lumella mathata hore a re amohe thabo ea rōna. Maemong a kang ao re ileng ra talimana le ’ona, re ile ra ithuta ho itšetleha ka Jehova haholoanyane, ’me re ile ra bona letsoho la hae nthong e ’ngoe le e ’ngoe ha bothata ka bong bo ntse bo tloha.” Bahlanka ba Jehova ba likete-kete ba kajeno ba bontšitse tumelo e tšoanang ka ho fallela kae le kae moo ho nang le tlhokahalo e kholoanyane. Na u ka etsa ho tšoanang?
[Setšoantšo se leqepheng la 23]
Puisano ea lelapa e ka bula tsela bakeng sa ho falla ho atlehileng haholoanyane