Lefatše le Lecha—Paradeise e Tsosolositsoeng!

BANYALANI ba neng ba sa tsoa nyalana ba ne ba e-na le lehae le letlehali—serapa se seholo se tletseng lipalesa, lifate, linonyana, le liphoofolo. E ne e le Paradeise, mpho e mosa e tsoang ho Ntate oa bona ea lerato. Na ba kile ba ‘phela ka thabo haesale kamor’a moo’? Che. Kamorao ho nakoana, ba ile ba lahleheloa ke lehae la bona. Hobane’ng?

Lehae leo la Paradeise le ile la lahleha hobane banyalani bao ha baa ka ba ananela seo Ntate oa bona a neng a ba etselitse sona. Ho hobe le ho feta, ba ne ba sa utloe. E le ho leka botšepehi ba bona, Ntate oa bona o ne a ile a ba bolella hore ba ka ja tholoana ea sefate sefe kapa sefe haese tholoana ea sefate se le seng, empa ka borabele ba se ke ba utloa ’me ba e ja.—Genese 2:15-17; 3:6, 7.

Ho entsoe kotlo e joalo hobane’ng bakeng sa se bonahalang eka ke tlōlo ea molao e fokolang? Mohlomong papiso e tla thusa ho arabela potso eo. Mong’a lebenkele o hira mookameli ea nang le mangolo a hlokahalang. Ho ikholisa hore mohiruoa enoa e mocha o fela a ka tšeptjoa, mong’a lebenkele o mo nea linotlolo empa o re tlas’a maemo leha e le afe a se ke a ba a notlolla laee e ’ngoe eitseng. Haeba mohiruoa a ka e notlolla, o tla lelekoa. Ha a setse a le mong, bohelehele bo hlōla mookameli ’me o bula laee. Mong’a lebenkele o mo fumana a sa e butse ’me oa mo leleka.

Ho Lahleha ha Paradeise

See se amana joang le banyalani bale ba bacha? Hobane ba ile ba e-ja tholoana e neng e thibetsoe, Ntat’a bona a ba lelekela ka ntle ho lehae la bona le letle. Ka ntle ho Paradeise ea Edene, litšehlo le meutloa li ne li tjametse banyalani bao, Adama le Eva. Ho e-na le hore e be ba phethahetseng, joale ba ne ba se ba sa phethahala. ’Me ho e-na le ho phela ka ho sa feleng, ba ile ba qala ho shoa. Bana ba bona ba ile ba futsa ho se phethahale ha bona, boetsalibe, le lefu.—Ba-Roma 5:12.

Qetellong, “Jehova a bona bolotsana ba batho hoba bo boholo.” Ka baka leo, mehleng ea Noe, Molimo oa sebelisa Moroallo oa metsi ho hloekisa lefatše. Na ho ile ha e-ba le batho ba phonyohang? Ba robeli feela—Noe le bara ba hae ba bararo ’moho le basali ba bona ba banè. Ha ba itlhopha bakeng sa ho neng ho ka boleloa e le leeto la bona la sekepe ho ea lefatšeng le leng le fapaneng, ba ne ba ile ba iphaphatha le litaelo tsa Molimo ’me ba haha areka e khōlō e neng e lekane ho nka bona, mefuta e mengata ea liphoofolo, le lijo tse teng tse lekaneng. (Genese 6:5-7, 13-22) Serapa se neng se kile sa thabeloa ke Adama le Eva se ile sa hoholoa ke Moroallo oa metsi. Ka hona, Paradeise ea lahleha—empa e seng ka ho sa feleng!

Paradeise e Tsosolositsoeng

Makholo a lilemo hamorao, Molimo oa romela Mora oa oona ea tsoetsoeng a ’notši lefatšeng ho tla lopolla batho sebeng le lefung. Sena se ile sa etsa hore ho be bonolo ho ba lumelang ho Jesu Kreste ho fumana bophelo bo sa feleng. (Johanne 3:16) Jesu o ile a boela a bolela e sa le pele hore Paradeise e ne e tla tsosolosoa. Ka sebele, ha Jesu a ne a e-shoa thupeng ea tlhokofatso, o ile a bolella sesinyi se neng se khokhothetsoe pel’a hae: “U tla ba le ’na Paradeiseng.”—Luka 23:43, NW.

Ho tsosolosoa ha Paradeise ho tla latela seo hangata se boleloang e le bofelo ba lefatše, bo ileng ba boleloa ke Jesu ha barutuoa ba hae ba ne ba mo kōpa: “Re bolelle . . . ntho eo e tla ba pontšo ea ho tla ha hao, le ea ho fela ha lefatše.” Ha a arabela, Jesu o ile a supa lintoa, litlala, litšisinyeho tsa lefatše, mafu a akaretsang, ho ngatafala ha bokhopo, le phutuho ea lefatše ka bophara ea boboleli ba ’Muso. Litšobotsi tsena tsa pontšo le tse ling li ile tsa totobala ho tloha ka 1914. (Mattheu 24:3-14) Ke lintho tse etellang pele bofelo ba tsamaiso ena le ho tsosolosoa ha Paradeise lefatšeng lena.

Boprofeteng bo tšoanang, Jesu o ile a boela a re: “Ithuteng ho lekanya litaba ka sefate sa feiga. Lekala la sona ha le se le le bonolo, ’me le se le hlahisa mahlaku, le tseba ka hoo hobane lehlabula le haufi. Le lōna, etlare ha le bona tseo tsohle, le tsebe hoba Mor’a motho o haufi, o monyako. Ka ’nete ke re ho lōna: Moloko ona o ke ke oa feta, tseo tsohle li e-so ho etsahale.” (Mattheu 24:32-35) Boprofeta bo bong ba Bibele bo boetse bo bontša hore ho fumaneha hape kapa ho tsosolosoa ha Paradeise ho atametse haholo, hore lefatše le lecha le haufi haholo. Empa le tla ba joang?

Lefatše le Lecha—Ka Sebele le Fapane!

Lipuso tsa kajeno li tla nkeloa sebaka ke ’Muso oa Molimo. (Daniele 2:44) Ho tla ba le toka le khotso tsa ka mehla bakeng sa bohle lefatšeng le lecha tlas’a puso ea ’Muso ka Jesu Kreste, “Morena oa khotso.” (Esaia 9:6, 7) Kaha o tla timetsa ba khopo le lihlotšoana tsa batho ba sa eeng ka molao tse hatellang batho hona joale, ho tla sala feela ba “hloekileng” ba ratang khotso. (Liproverbia 2:21, 22; Tšenolo 19:11-21; 16:14-16) E, baphonyohi e tla ba batho ba bonolo, ba ratang khotso. Hoo e tla ba ho khathollang hakaakang!

Ho khethollana ha merabe le ho khethollana ha mefuta e meng ho tla fela lefatšeng le lecha. Ha e le hantle, letšoele le leholo la batho le se le ntse le kenelletse haholoanyane ho hlōleng lintho tse joalo. Ke lefe? Lipaki tsa Jehova. ’Me ke hobane’ng ha li fapane hakaalo? Hobane li ithuta Bibele ka mehla, li e sebelisa bophelong, ’me lia ratana. (Johanne 13:34, 35; Liketso 10:34, 35) Hona joale Lipaki li baloa ka limillione lefatšeng ka bophara, empa Bibele e bolela e sa le pele hore barapeli ba Jehova ba lefatšeng qetellong e ne e tla ba “bongata bo boholo ba batho, bao ho seng motho ea ka tsebang ho bo bala, ba lichaba tsohle, le ba mefuta eohle, le ba merabe eohle, le ba lipuo tsohle.”—Tšenolo 7:9.

Ntoa e ke ke ea hlola e nka bophelo ba batho. Ha ho sa na limillione tse likete tse tla senngoa libetseng tsa nuclear, lihlomong tse ling tsa ntoa, le makhotleng a sesole. Ho ketoloa ha mebuso, lintoa tsa merabe, le mefuta e meng eohle ea pefo ha e sa tla ba teng. (Esaia 2:4) Ho ikoetlisetsa sesole le litšebeletso tse tlamang tsa sesole li tla fela, hobane li tla be li sa hlokahale. E tla ba letsatsi le thabisang hakaakang mohla Molimo o felisang lintoa!—Pesaleme ea 46:8, 9.

Khotso ea ’nete e tla rena. Mopesaleme o itse: “Ho se ho se hokae, ’me molotsana o tla ba sieo . . . Empa ba bonolo ba tla rua lefatše, ba iketle khotsong e kholo.”—Pesaleme ea 37:10, 11.

Litlala li tla nkeloa sebaka ke nala e khōlō. Libakeng tse ngata, hona joale balemi ba banyenyane ba futsanehileng ba loana le litšehlo le meutloa, mobu o mobe, mahoatata a ntseng a hōla, komello, le litsie tse ripitlang tse tletseng hohle. Lintho tsena kaofela li tla felisoa. (Esaia 35:1, 6, 7) Ka phello efe? Keketseho e khōlō linthong tse hlahisoang ke lefatše! (Pesaleme ea 72:16) Ha a felisitse likhaello tsa lijo le tsa lino, Jehova o tla etsa “mokete”!—Esaia 25:6.

Mosebetsi o putsang o tla thabeloa ke bohle. E tla ba ho khotsofatsang hakaakang ho haha matlo, ho lema lifate tsa litholoana, le ho hlokomela lirapa! ’Me e tla ba ho thabisang hakaakang ho lula tlas’a moriti oa sefate sa hao sa feiga le ho ja litholoana tse hlabosang tsa sona!—Mikea 4:4.

Ho tla ba le matlo a boleng bo ikhethang bakeng sa e mong le e mong. Kajeno ba limillione ba phela litakaneng le metseng ea matlo a hahiloeng habohlasoa ka mahong. Ke bophelo bo bohloko hakaakang! Afrika, ka mohlala, limillione tsa batho ba batšo li ntse li falla mahaeng, ’me hangata ba tlameha ho lula matlung a seretse kapa a makote a ruletsoeng ka makapa, maemong a mabe a bohloeki, ka boikhutso bo fokolang haholo. Leha ho le joalo, lefatšeng le lecha, batho ba tla haha matlo a matle ’me ba lule ho ’ona.—Esaia 65:21, 22.

Ho tla ba le bophelo bo phethahetseng bo khathollang ho e-na le ho kula le mafu a bolaeang joaloka AIDS. Moprofeta ea bululetsoeng o ile a bolela e sa le pele hore ha ho ea tla re: “Ke bohloko.” Ho feta moo, lefatšeng le lecha le haufi, “mahlo a lifofu a tla tutuboloha, litsebe tsa ba thibaneng litsebe li bulehe. Sehlotsa se tla tlola joale ka khama, leleme la semumu le tla bina.”—Esaia 33:24; 35:5, 6.

Lefu, meokho, le matlo a tokiso ea litopo li tla fela. (Tšenolo 21:4) Empa ho thoe’ng ka ba limillione tse likete ba seng ba shoele? Ha e ne e le motho lefatšeng, Jesu o ile a tsosa batho ba bangatanyana. Ka mohlala, o kile a kopana le mokoloko oa ba eang phupung ba neng ba felehetsa mojaro oa mofu oa mohlankana ea neng a sa tsoa shoa motseng oa Naine. Kamor’a hore a khothatse ’mè ea shoetsoeng, oa mohlolohali, Jesu o ile a re: “Mohlankana, ke re ho uena: Tsoha.” ’Me a fela a tsoha! (Luka 7:11-17) Lekhetlong le leng, Jesu o ile a fana ka tšepiso ena e tiileng: “Nako ea tla, eo bohle ba mabitleng ba tla . . . tsoa ho ’ona.” (Johanne 5:28, 29) Kaha Molimo o entse litrillione tsa linaleli le lihlopha tse ling tsa leholimo ’me o li “thonya kaofela ka mabitso a tsona,” ka sebele tsoho ea batho ba limillione tse likete ba shoeleng e ke ke ea fana ka bothata ba letho.—Esaia 40:26.

Na u Ipatla Moo?

Pele-pele Jehova Molimo o ne a rerile hore motho a se ke a shoa le ka mohla empa a thabele ka ho sa feleng lintho tse molemo tseo a fanang ka tsona ka lerato. Ka hona ak’u nahane feela mahlohonolo a bophelo lefatšeng le lecha ka malapa a thabileng! U nahane feela ka bana ba bapalang ka polokeho le liphoofolo tseo hona joale li leng kotsi hakana. (Esaia 11:6-9) Nahana ka mahlohonolo a khotso, matlo a matle, mosebetsi o putsang, nala ea lijo. E, ’me hape nahana ka ho phela ka ho sa feleng lefatšeng la paradeise.

Na u ka ba moo? E, haeba u inkela le ho itšebelisetsa tsebo e nepahetseng ea Lentsoe la Molimo. Lipaki tsa Jehova li eme e le malala-a-laotsoe ho u thusa ho haha tumelo mererong e sa nyopeng ea Molimo. U ka kholiseha hore haufinyane Paradeise e tla tsosolosoa, hobane lefatše le lecha le haufi haholo!