Mavenezuela a Ithuta ho Tšepa Jehova

“LILEMO tsa Nala”—ke kamoo boholo ba Mavenezuela ba hopolang nako e latelang 1976. Selemong seo, ’muso o ile oa etsa hore lik’hamphani tsohle tsa oli tsa melata Venezuela li tsamaisoe ke sechaba, ’me moruo oa naha oa hōla ka sekhahla. E le bopaki ba bongata ba thepa e fumanoeng bocha, merero e mengata ea ho haha ea qala ho ata hohle sechabeng. Mehaho e metelele ka ho fetisisa ka har’a naha, Parque Central Towers, e ile ea emisoa Caracas, motse-moholo. Batho ba ile ba bonahala ba e-na le lebaka lohle la ho beha tšepo ea bona holim’a nala e hōlang ka katleho.

Leha ho le joalo, kajeno, ponahalo e bonahala e sa tšepise haholo. Le hoja e ntse e le sechaba se atlehang, Venezuela e kile ea ba le karolo ea eona ea mathata a moruo. Bohle mona ba hopola ‘Labohlano le Letšo,’ joalokaha la 28 Tlhakola, 1983, le tloaetse ho bitsoa joalo, ha chelete ea boleng ba motheo, bolivar, e theoha matleng. Ka baka leo, chelete ea felloa ke matla, ’me melato ea linaha tse ka ntle ea qala ho phahama. Ka tšohanyetso, “Lilemo tsa Nala” tsa fetoha “Lilemo tsa Bofuma.” Ba bangata ba nyahamisitsoe habohloko ke kholiseho le tšepo ea bona tse behiloeng hosele. Ho fapana le hoo, Lipaki tsa Jehova Venezuela li ithutile ho beha tšepo ea tsona ho Molimo oa ’nete, Jehova. Li thabetse khōlo le keketseho tse tsoelang pele ho theosa le lilemo.

Khōlo ea Lipeō Tsa Pele Tsa ’Muso

E ne e le ka 1936 ha lipeō tsa litaba tse molemo tsa ’Muso li ne li tlisoa ka lekhetlo la pele Venezuela ke bo-pula-maliboho ba babeli, kapa basebeletsi ba nako e tletseng, ba tsoang Texas, U.S.A. (Mattheu 24:14) Lilemo tse leshome hamorao, baromuoa ba babeli—ba fumaneng mangolo sehlopheng sa bohlano sa Sekolo sa Bibele sa Gileade sa Watchtower—ba fihla. ’Me ka Loetse selemong seo, ofisi ea lekala ea Mokhatlo oa Watch Tower ea buloa Venezuela. Peho ea selemo seo ea bontša kakaretso ea baboleli ba ’Muso ba 19 Venezuela.

Ka Pulungoana 1953, N. H. Knorr, eo e neng e le mookameli oa Mokhatlo ka nako eo, le mongoli oa hae, M. G. Henschel, ba emisa Venezuela leetong la bona ho ea Amerika Boroa. Ba makholo a robong le mashome a mane a metso e ’meli ba ile ba tla kopanong e neng e tšoaretsoe Caracas. Ka 1977 palo ea bahoeletsi ba ’Muso Venezuela e ne e hōlile ho fihla tlhōrōng ea ba ka holimo ho 13 800. Sena se ile sa etsa hore ho hlokahale hore ho hahuoe ofisi e ncha ea lekala La Victoria, lik’hilomithara tse 85 ka ntle ho motse-moholo. Karolo e ncha e ile ea eketsoa ’me ea neheloa ka 1985. Kajeno, ho na le bahoeletsi ba ka holimo ho 42 900 liphuthehong le lihlopheng tse ka bang 500 Venezuela. ’Me batho ba bangata ba eketsehileng Venezuela ba ithuta ho beha tšepo ea bona ho Jehova, joalokaha ho bontšoa ke palo e tsotehang ea ba bileng teng ba 154 881 Sehopotsong sa lefu la Kreste ka 1988.

Tšimo e Fapaneng Empa e Nonneng

Venezuela ke naha e nang le lintho tse sa tšoaneng, ’me sena se bonoa ho bao ba ithutileng ho beha tšepo ea bona ho Jehova. Pele, naha ena e hlokomeleha ka baahi ba eona ba bangata. Kahoo, esita le har’a Lipaki tsa Jehova, ho na le ba bangata ba tsoang Italy, Portugal, Jeremane, Spain, Fora, Haiti, Trinidad, Cuba, Dominican Republic, Ecuador, le libaka tse ling. Empa ba kopane le Mavenezuela a habo bona ho tšepeng le ho sebeletseng Molimo oa ’nete, Jehova.

Ho boetse ho na le phapang ea libaka. Motšoasi oa litlhapi ea tsoang likarolong tse ka bochabela o fapane ka ho hlakileng le llanero eo e leng morui oa likhomo ho tsoa mahoatateng a ka boroa. Caraqueño ea tsamaeang ka potlako ea tsoang motse-moholo, kapa mosebetsi ea nang le botsoalle ea sebetsang k’hamphaning ea oli ea tsoang Maracaibo, motse oa bobeli o moholo oa sechaba, ba fapane haholo le molemi oa Andino ea tsamaeang butle ea tsoang bophirimela bo ka boroa, moo Lithaba tsa Andes li qalang teng. E mong le e mong o na le tloaelo le tsela eo a bitsang mantsoe ka eona. Kahoo, ’moho le tšobotsi e tlisitsoeng ke bajaki, ho na le ho se tšoane ho hoholo ha ’mala har’a batho.

Ho sa tsotellehe limelo tse joalo tse fapaneng, batho ba tsoang mefuteng eohle ea bophelo ba ithutile ka Jehova. María Luisa e ne e le e mong oa bona. Haesale ho tloha ha a le lilemo li supileng, o ’nile a kenella tšebelisanong le meea. Ha a ntse a hōla, o ile a fetoha lekhoba la lino tse tahang le lithethefatsi, a phela bophelo ba boitšoaro bo bobe, ’me a kenella borapeling ba molimotsana oa Levenezuela María Lionza.a Hoba a tenoe ke tsela ea hae ea bophelo, a sebetsa ’mishoneng oa K’hatholike har’a Maindia karolong e ka bophirimela ho naha. Kapele a etsa qeto ea hore mosebetsi oa hae o ne o sa thuse leha e le Maindia kapa eena. Eaba o qala ho phenya-phenya lithuto tsa boloi le ho tsoaloa la bobeli empa ha se ke ha thusa letho. Boemong bona, María Luisa o ile a eteloa ke Lipaki tsa Jehova. Tsebo ea Bibele eo a ileng a e fumana ea mo fa matla ao a neng a a hloka ho loantša meea e khopo. Hona joale o behile tšepo ea hae ho Jehova ’me ke ’moleli ea mafolo-folo oa litaba tse molemo tsa ’Muso.

Esita le batho ba holofetseng ba ithuta ho beha tšepo ea bona ho Jehova, joalokaha ho le joalo ka Juan le Carlos, bana ba motho a le mong ba babeli. Ha a le lilemo li robong, Carlos o ile a tšoaroa ke meningitis a ba a foufala. Hamorao, le hoja a ne a kene mokhatlo oa K’hatholike oa ho phekola ka tumelo, o ile a qala ho ithuta Bibele le Lipaki tsa Jehova. O ile a kolobetsoa ka 1982, ’me ho tloha ka Tšitoe 1983 e bile mosebeletsi oa nako e tletseng. Joaloka pula-maliboho ea foufetseng, o tsamaea likhutlong tsohle tsa tšimo ea hae, a itsamaisa ka boeena ha ho hlokahala. Leha ho le joalo, ngoan’abo Juan o na le pale e fapaneng ka ho felletseng.

Juan o feta bolelele ba limithara tse 1,8 ’me e ne e le motho ea tsamaeang a phea khang le ho loana seterateng. Ka tsatsi le leng o ile a thunngoa ka morao habeli. Le hoja a ile a pholoha, o ile a shoa litho ho tloha sefubeng ho ea tlaase ’me a robala betheng ka ho felletseng. Ha Lipaki li mo etetse, o ile a amohela kōpo ea bona ea ho ithuta Bibele le eena ka lesisitheho. Thuto e ile ea tsosa ho hlompha ha hae Bibele. Tšepo ea bophelo bo phethahetseng paradeising ea mo ama. Ka mor’a hore a khaotse ho tsuba, ho noa, le ho sebelisa puo e sa hloekang, metsoalle eohle ea hae ea pele ea mo lahla hobane, kamoo ba bolelang, Juan o ne a fetohile “mohalaleli.” Ho ntse ho le joalo, o ile a tsoela pele ho tšepa Jehova, ’me qetellong o ile a kolobetsoa.

Juan o re: “Hore e be sale ke robetse betheng ha hoa nthibela ho etsa thato ea Jehova, hobane bonyane matsoho a ka le boko li ntse li sebetsa hantle.” O sebeletsa Jehova joang boemong ba hae? “Ke sebelisa theipi rekotara ea ka ho finyella boikarabelo ba ka, joaloka lipuo Sekolong sa Tšebeletso sa Puso ea Molimo, likarolo Sebokeng sa Tšebeletso, le ho bala Thutong ea beke le beke ea Molula-Qhooa. Ke na le tokelo ea ho tsamaisa e ’ngoe ea Lithuto tsa Buka tsa Phutheho tsa sebaka sena, e tšoareloang lapeng ha ka. Ke boetse ke khonne ho sebeletsa joaloka pula-maliboho oa ka mehla.” O ikutloa joang ka see sohle? “Ke leboha haholo beng ka ’na le baena le likhaitseli ba moea, bao e leng thuso e khōlō ho ’na. Ke tšepa le ho rapela hore kaofela ha rōna re tšoarelle ho beheng tšepo ea rōna ho Jehova e le hore re ka bona letsatsi la ha ‘sehlotsa se tla tlōla joaloka khama.’”—Esaia 35:6.

Likopano li Tlisa Thoriso ho Jehova

Ho ntšetsa pele mosebetsi o thusang ba bangata hakaalo ho beha tšepo ea bona ho Jehova, Lipaki Venezuela li sa tsoa haha Liholo tse peli tsa Likopano. E ’ngoe ea tsona e Campo Elias, Seterekeng sa Yaracuy, karolong e ka bophirimela bo hare ea naha. E ’ngoe, e ka bang lik’hilomithara tse 60 ka boroa ho Caracas, e hlomelletsoe ka ho felletseng ka letamo la ho kolobetsa, lifehla-moea, kichene, le thepa ea kamore ea ho jela.

Liholo tsena li hlolletse batho ba tsoang ka ntle le batho ba thahasellang ba ileng ba tla ho tla li bona. Mokhanni e mong oa bese o ile a hiroa ke sehlopha sa Lipaki ho li isa kopanong ea tsona ea potoloho. Eitse ha a fihla ’me a bona sebaka sa ho paka makoloi se seholo le tikoloho e ntle, mokhanni o ile a nahana hore o tlamehile le ho ea ka hare ho ea bona sebaka sena. Hamorao o ile a re: “Seo ke se boneng ka har’a Holo eno ea Kopano e ne e le lefatše le leng, pono e ’ngoe.” O ne a hlolletsoe haholo ke taolo le bonngoe hoo a ileng a mamelisisa lenaneo lohle ka hloko. Hamorao o ile a kōpa ho khanneloa thuto ea Bibele ’me hona joale ke moena ea kolobelitsoeng.

Ka lekhetlo le leng kopano ea potoloho e ne e lokela ho tšoareloa El Tigre, motse o karolong e ka boroa bochabela ea naha. Kaha ho ne ho se na Holo ea Kopano sebakeng seo, ho ile ha hiroa setša se seng moo. Leha ho le joalo, baena ba sa tsebe, ho ne ho lokela ho ba le mokete oa boithabiso motseng oo ka matsatsi a tšoanang. Ha ba boholong sebakeng seo ba tlile ho tla hloma sethalla bakeng sa sehlopha sa ’mino hona pel’a setša sa kopano, Lipaki li ile tsa ipiletsa ka tieo ho bahlophisi ba mokete oo oa boithabiso hore ba behe sethalla sa ’mino ’nģa e ’ngoe empa ha se ke ha thusa letho. E le mokhoa oa ho qetela, Paki e ile ea bolella ba ikarabellang: “Tsebang hle hore le ipakela khathatso le Jehova.” Ha a utloa sena, monna ea ikarabellang a arabela: “Oho, che, ha ke batle ho ikenya khathatsong le Jehova!” Mekete e joalo ea boithabiso e ile ea isoa setšeng se hōle haholo ho moo kopano ea potoloho e neng e tlameha ho tšoareloa teng.

Kopanong e ’ngoe, monna oa khaitseli, motho ea nang le mosebetsi oa bopolotiki, o ile a tla ho tla bona hore na ho na le eo a ratanang le eena moo. O ile a makatsoa ke boleng ba lipuo tse fanoang. O ile a bolella mosali oa hae: “Haeba ke ne nka bua joaloka monna eo, ka sebele ke ne ke tla hatela pele mosebetsing oa ka oa lipolotiki.” Ka mor’a lenaneo, o ile a atamela e mong oa baholo ’me a kōpa hore a bontšoe kamoo a ka ntlafatsang ho bua ha hae pontšeng—’me e le hona hoo feela. O ile a hlokomelisa, “Le se ke la lebella hore ke ee ka ntlo le ntlo ka mokotlana oa libuka.” Thuto ea Bibele e ile ea qalisoa, ’me kapele monna eo a fetola mohopolo oa hae—o ile a batla ho ea ka ntlo le ntlo ka mokotlana oa libuka le ho ruta litaba tse molemo! O ile a tlohela lipolotiki ’me a kolobetsoa, ’me hona joale eena le lelapa la hae ba behile tšepo ea bona ho Jehova.

Ho Betla Tsela Bakeng sa Khōlo e Tsoelang Pele

Nakong ea ketelo ea L. A. Swingle, setho sa Sehlopha se Busang sa Lipaki tsa Jehova, letšoele la ba 63 580 le ile la bokana Lebaleng le leholohali moo ho qabanyetsoang lipoho Valencia. Ba bangata ba bona ba ne ba tsamaile ka bese bosiu bohle. Bohle ba leng teng ba ile ba khothatsoa haholo ke ho utloa ha Moena Swingle a ba bolella: “Ha le sa le lekala le lenyenyane. Hona joale le lekala le boholo bo itekanetseng. ’Me kamoo le bonahalang ka teng, ka letsatsi le leng haufinyane le tla be le le ‘sehlopheng sa bahoeletsi ba 100 000’!”

Litokisetso li ntse li etsoa ho atolosa ofisi ea lekala e La Victoria ho hlokomela khōlo e tsotehang. E, ka likete, batho ba Venezuela ba ithuta ho tšepa Jehova.

[Mongolo o botlaaseng ba leqephe]

[’Mapa/Setšoantšo se leqepheng la 21]

(Ha u batla ho bona boitsebiso bo hlophisitsoeng hantle, sheba sengoliloeng)

CARIBBEAN SEA

VENEZUELA

Maracaibo

ANDES MOUNTAINS

Campo Elias

Valencia

La Victoria

Caracas

El Tigre

COLOMBIA

BRAZIL

GUYANA

600 Km

400 mi

[Litšoantšo tse leqepheng la 24]

Ponahalo ea ka ntle le ka hare ea Holo ea Kopano ea Cúa