‘Ekare ha e se Jehova ea Hahang Ntlo . . .’

HO SA tsotellehe hore na u phela hokae, ho na le sebaka seo u se bitsang lehae. Mefuta ea matlo a bolulo le mekhoa ea ho haha e fapa-fapane haholo. Mekhoro e entsoeng ka mobu le joang, matlo a manyenyane a entsoeng ka mapolanka, matlo a hahoang ka marako a konkreiti a foromiloeng esale pele—lethathamo leo le bonahala le se na moo le fellang. Ba bang ba ikutloa ba phutholohile ha ba le ka har’a mokhoro oa joang joalokaha ba bang ba ikutloa ba phutholohile ha ba le ka har’a matlo a boemo bo phahameng. Ke hobane’ng ha ho le tjee? Hore motho a ikutloe a phutholohile, a khotsofetse, ho itšetlehile haholo ka metsoalle eo a nang le eona. (Liproverbia 18:24) Ho sa tsotellehe mabenyane le majaba-jaba ’ohle ao lefatše le a tšepisang, lapeng ke hona moo ka tlhaho motho a batlang ho retelehela teng bakeng sa khotso le matšeliso. Empa, ha ho ahloloa ka litlaleho tse buang ka bophelo malapeng mehleng ea kajeno, ha ho tiiso ea hore ka mehla motho o tla fumana khotso le matšeliso lapeng. Ho isa tekanyong e khōlō, bao u phelang le bona—lelapa leno—ba ka arolelana khotso le uena kapa ba e felisa. Ka hona, sephiri sa ho haha lelapa le thabileng, le nang le khotso ke sefe?

Ho Haha Ntlo

Temana e qalang ea Pesaleme ea 127 e re: “Ekare ha e se Jehova ea hahang ntlo, ba e hahang ba sebeletsa lefeela.” Ba kopanelang khahong ea mehaho ea borapeli ba Molimo oa ’nete, Jehova, ba fumana hona e le ’nete. Le hoja basebetsi bao e leng litsebi ba ka ’na ba ithaopela ho sebelisa nako ea bona le boiteko ba bona bakeng sa ho haha Liholo tsa ’Muso kapele, ke tlhohonolofatso ea Jehova e tiisang hore katleho e ba teng. Esita le bashebelli hangata ba ka bona hore ho na le ho hong ho sa tloaelehang ho sebetsang. Ka mohlala, makasine o neng o tlaleha ka mosebetsi o mong o joalo Colchester, Engelane, o ile oa sebelisa sehlooho “Jehova o Emisa Ntlo.”

Leha ho le joalo, katleho boitekong bo bong ntle le ba mesebetsi ea sebele ea ho haha le eona e itšetlehile ka tlhohonolofatso ea Jehova. Nahana ka mantsoe a Salomone temaneng ea boraro ea Pesaleme ea 127: “Bonang, bara ke lefa la Jehova, ’me tholoana ea popelo ea mosali ke moputso.” Jehova hape ke Sehahi seo ho seng se ka bapisoang le sona ntlheng ea malapa, ’me batsoali ba na le tokelo e babatsehang ea ho ba basebetsi ’moho le eena.a (Ba-Heberu 11:10) Ke joang batsoali ba Bakreste ba ka sebelisang monyetla oa selekane see seo e leng tokelo e khōlō ’me ka katleho ba haha lelapa le thabileng, le nang le khotso, le tlisang tlhompho ho ’Mōpi, Jehova Molimo?

Ho Haha Lelapa ka Katleho

Karolo ea bohlokoahali khahong e atlehileng ke polane e nepahetseng ea mohaho, kapa moralo. Bakeng sa ho haha barorisi ba banyenyane ba Molimo, ha ho moralo o molemo ho feta Lentsoe la oona le bululetsoeng, Bibele. (2 Timothea 3:16, 17) Salomone o ngotse: “Ruta mohlankana tsela eo a tšoanetseng ho e tsamaea; le mohla a tsofalang, a ke ke a e kheloha.” (Liproverbia 22:6) “Tsela eo a tšoanetseng ho e tsamaea” ke tsela ea Jehova, ’me ha batsoali ba e latela, ba fa bana ba bona tebello ea ho fetoha bahlanka ba tšepahalang ba Molimo.

Mohaho o nepahetseng o hloka thepa e nepahetseng ea ho haha. Moeti e mong oa Afrika ea neng a etetse Europe o ile a ho fumana ho le thata ho lumela hore e meng ea mehaho eo a neng a e bona e ne e le lilemo li lekholo. Ho ileng ha mo senolela kutloisiso e ile ea e-ba ho bona thepa e tšoarellang e sebelisitsoeng mehahong ena. Ka lehlakoreng le leng, ha lihahi li qenehela thepa, hangata liphello li ipaka e le tlokotsi, esita le kotsi e bolaeang. Sena le sona e ka ba ’nete khōlisong ea bana.

Kemolong, bana ba amohela lefa le futsitsoeng le khetholloang ka ho se phethahale ho tlisoang ke sebe. (Pesaleme ea 51:5) Ka mantsoe a mang, ba na le sekoli ho tloha qalong feela. Batsoali ba Bakreste ba tlameha ho loantša sena ka ho loanela ho haha litšobotsi tse tšoarellang, tsa bomolimo ka hare ho bana ba bona. (1 Ba-Korinthe 3:10-15) Ntle le hore ho etsoe sena, ho sa tsotellehe hore na batsoali ba sebetsa ka thata hakae likarolong tse ling, tse kang ho fa bara ba bona le barali ba bona lijo, liaparo, le bolulo tse molemohali, boiteko ba bona ba ho haha e tla ba lefeela.

Ke ka baka leo temoso ea Molimo ho batsoali, haholo-holo bo-ntate, e leng e reng: “Tsoelang pele ho ba [bana] hōlisa ka khalemelo le ho ba kenya khopolo ea Jehova.” (Ba-Efese 6:4, NW) Khalemelo le ho kenya khopolo ea Jehova li akarelletsa meralo le thepa ea ho haha tse molemohali. Ho li sebelisa ho tla fella ka melemo e sa feleng bakeng sa lelapa lohle.

Koetlisong ea Mosebetsi

Ho sa tsotellehe lipolane tse entsoeng ka tsela e molemohali, ka mehla ho ba le litlokotsi tsa tšohanyetso nakong ea mosebetsi leha e le ofe oa ho haha. Ka ho tšoanang, batsoali ba tlameha ho ithuta ho lebella mathata a tšohanyetso bophelong ba letsatsi le letsatsi ba litho tsa lelapa ’me ba itokisetse ho sebetsana le ’ona. See se ka etsoa joang?

Puisano e ntle pakeng tsa batsoali ba babeli ke ea bohlokoahali. Ha ntate le ’mè ba buisana hammoho ka thapelo ka tsoelo-pele ea bana, ba tla fumana libaka tse ling tseo ho tsona pabatso e loketseng le tse ling tseo ho tsona ho hlokahalang “ho haha” ho eketsehileng. Hang ha mefokolo e joalo e hlokometsoe, batsoali ba ka sebetsa hammoho ’me ba nka mehato e loketseng ho sebetsana le eona.

Empa mohlomong le na le lelapa le leholo, ’me le ka ’na la ipotsa: ‘Re ka fetola boiteko ba rōna joang hore bo lokele litlhokahalo tsa botho tsa bana ba rōna ba bangata?’ Ke hobane’ng ha le sa fane ka bona koetlisong ea mosebetsi e le hore bana ba lōna ba ka thusana? Batho ba bacha mosebetsing ba sebetsa ka lilemo ba ithuta litsebo tse khethehileng ba le pel’a litsebi tsa mosebetsi. Mohlomong nakong ea thuto ea lōna ea lelapa, le ka leka ho kōpa bana ba seng ba le lilemong tsa bocha ho hlalosetsa ba banyenyane litaba tse itseng. Botšepehi, khetho ea metsoalle, ho hanyetsa litšusumetso tse mpe sekolong, joalo-joalo, ke litaba tseo bana ba baholo le ba banyenyane ba ka li arabelang hantle. Ka ho abela bana ba baholo mesebetsi e joalo e amang bophelo ba sebele, le ka ba thusa ho koetlisa matla a bona a kutloisiso le matla a ho ruta ha ba ntse ba ruta ba banyenyane seo ho hlokahalang hore ba se tsebe. (Ba-Heberu 5:14) Sena se na le molemo o eketsehileng oa ho hlaolela kamano ea ’nete e mofuthu pakeng tsa bana.

Mohlomong lelapa la lōna le lenyenyane, le na le ngoana a le mong feela. Joale, le na le menyetla e mengata ea hore le khone ho tseba le ho utloisisa ngoana oa lōna. Leha ho le joalo, hlokomelang kotsi ea ho senya ngoana oa lōna ka ho etsa hore e be eena feela eo ho shebanoeng le eena. Le bararo, na ha ho joalo? Kahoo etsang lintho hammoho. Sena se tla mo ruta ho buisana le ba bang le ho isa tlhokomelo ea hae ho ba bang, ka ho etsa joalo a qobe ho ba moithati.

Phehellang ho Etsa Hore Lelapa le Momahane

Ho totobetse hore ho hlokahala ho eketsehileng khahong ea lelapa ho feta ho tsamaisa thuto ea Bibele le ho fana ka taeo le khalemelo. Salomone o itse: “Ho molemo ho motho ke hore a ’ne a je, a noe, a batlele moea oa hae boiketlo ka ho sebetsa ha hae.” (Moeklesia 2:24) Ha ho pelaelo hore lelapa la lōna le thabela lijo tsa lona ha li lokisitsoe ka mokhoa o latsoehang hamonate. Na le lokisetsa ho ja lijo tsa lōna hammoho le le lelapa? Hona ho ka ’na ha se be bonolo ka mehla ha litho tse fapaneng tsa lelapa li le sieo li le mosebetsing, sekolong, kapa mosebetsing o mong. Empa, hangata ho na le bonyane sejo se le seng ka letsatsi seo le ka se jang hammoho le le lelapa. Ke eng e ka tlatsetsang moeeng o mofuthu tafoleng ea lelapa?

Moena e mong o sebelisa monyetla oo ho hlahisa potso ea Bibele eo bohle ba leng teng ba ka buisanang ka eona. Ho totobetse hore o qoba ho hlabisa ba bang lihlong bao e ka ’nang eaba ha ba tsebe karabelo. Ba bang ba pheta liphihlelo tsa tšebeletso ea tšimo. Ka ho ela hloko litaba tsa moea, linako tsa lijo li fetoha menyetla ea ho haha lelapa lohle. (Bona Ba-Roma 14:19.) Ke ’nete hore likarolong tse ling tsa lefatše moetlo ke hore ho se ke ha qoqoa nakong ea lijo. Empa, boiteko bo etsoang ka tieo ba ho boloka moea o thabileng ke ba bohlokoahali. Liproverbia 15:17 e re: “Ho ja meroho feela moo lerato le leng teng, ho monate ho e-na le ho ja khomo e nonneng, moo ho nang le hloeano.”

Ho ikhatholla le ho fetola tsela e tloaelehileng ea bophelo le hona ho na le sebaka bophelong ba lelapa la Bakreste. Batsoali ba bohlale ba sebelisa menyetla e joalo ho haha lelapa le momahaneng le matla la puso ea Molimo. Joang?

Le hoja ho le bonolo ho lumella bana ho ikela thōko le ho lelekisa lithahasello tsa bona, ho na le kotsi ho sena. Ka mohlala, e ka ba booatla bo bokaakang ho lumella bana hore ba kenelle lipapaling ka matla hoo ho nang le kotsi ea ho lahleheloa ke bophelo kapa setho se seng! (1 Timothea 4:8) Ho fihlela moo ho khonehang, khethang lipapali tse akarelletsang setho se seng le se seng sa lelapa. Ntate a ka kōpa likhopolo le maikutlo a tsona ’me a abela setho ka seng ho hong hoo se ka ho etsang ho itokisetsa hoo.

Na lōna joaloka lelapa le ka atolosa lerato la lōna ’me la mema litho tse ling tsa phutheho ho kopanela thabong ea lelapa la lōna? Hangata litho tse seng li hōlile tsa phutheho li thabela ho kopanela moeeng oa lelapa, haholo-holo ha malapa a tsona a le hōle kapa a sa phele tumellanong le melao-motheo ea Bokreste. (Jakobo 1:27) Liphuthehong tse ngata, ho na le malapa a nang le motsoali a le mong. Ka ho nahanela ho loketseng bakeng sa bohlooho ba puso ea Molimo le tlhompho bakeng sa boitšoaro bo loketseng Bakreste, baholo le ba bang ba ka fana ka tšireletso ea moea ho litho tsa malapa a joalo. (Esaia 32:1) “Likhutsana” tse ngata li hōlile ’me li fetohile lihlooho tsa malapa tse itekanetseng ka baka la thahasello e lerato e bontšitsoeng ke motho ea hōlileng oa Mokreste.—Pesaleme ea 82:3.

Ho haha lelapa la Bokreste ke mosebetsi o thata. Empa ka thuso ea Jehova, ruri le tla ananela hore “bara ke lefa la Jehova, ’me tholoana ea popelo ea mosali ke moputso.” (Pesaleme ea 127:1, 3) E ka ba mohloli oa thoriso eseng feela ho batsoali ba Bakreste empa hape le ho ’Mōpi oa bona, Jehova Molimo.

[Mongolo o botlaaseng ba leqephe]