Lipotso tse Tsoang ho Babali

◼ Na Jehova Molimo o ne a buisana le Adama ka ho toba, kapa o ne a buisana le eena a sebelisa Lentsoe, Mora oa Molimo ea tsoetsoeng a ’notši?

Bibele ha e re fe karabelo e tobileng potsong ena. Le hoja Molimo o ne o ka ’na oa buisana ka ho toba le mora oa oona oa motho ea phethahetseng Edene, mohlomong O ile oa buisana le Adama o sebelisa Lentsoe.

Hangata Bibele e bolela hore Molimo o ile oa etsa lintho empa ha e le hantle o li entse ka ho sebelisa lengeloi le le leng kapa a mangata. Ka mohlala, Genese 1:1 ea re bolella: “Tšimolohong, Molimo o no o hlole maholimo le lefatše.” Haeba seo e ne e le sohle seo Bibele e se boletseng ka tšimoloho ea bokahohle, re ne re tla fihlela qeto ea hore Molimo o bo bōpile ka ho toba, joalokaha eka ke ka matsoho a oona. Leha ho le joalo, Mangolo a Bokreste a Segerike a eketsa kutloisiso ea rōna. Rea bala: “Ke ka [Mora oa Molimo] Molimo a hlolileng tsohle, maholimong le lefatšeng, tse bonoang le tse sa bonoeng . . . Tsohle li hloliloe ka eena, ’me li hloletsoe eena.” (Ba-Kolosse 1:16, 17, TLP) Litemana tse ling li tiisa karolo eo Mora a e phethileng ho bōpeng bokahohle. (Johanne 1:3, 10; Ba-Heberu 1:1, 2) Leha ho le joalo, karolo eo a neng a e phetha e ne e le ea ho ba mosebetsi-’moho ea tlas’a Jehova, ea neng a qapa, a fana ka matla, a bile a laola pōpo.—Pesaleme ea 19:1.

Molimo o ile oa re ho monna oa pele: “Ha e le lifate tsohle tsa tšimo, u tla li ja.” (Genese 2:16, 17) Jehova o ne a sa hloke mochini o sebelisang likaroloana tsa athomo, o kang mochini o fetisang lentsoe kapa seea-le-moea. Ho joalokaha Molula-Qhooa oa August 1, 1989, o itse: “Motho haa ka a bona ea buang. Lentsoe le ne le e-tsoa sebakeng se sa bonahaleng, se ke keng sa bonoa, ’me le ne le bua le eena. E ne e le lentsoe la Moetsi oa motho, ’Mōpi oa hae! . . . Motho o ne a sa hloke seea-le-moea sa kajeno sa mahlale se amohelang melaetsa hore a utloe lentsoe la Molimo. Molimo o ne o buisana le eena ka ho toba.”

Na Molimo o ile oa sebelisa lengeloi ho bua, mohlomong Logos, ea ileng a fetoha Jesu? Hoo ho ka etsahala. Le hoja a ne a sa hatelle ba bang ka maikutlo, C. T. Russell o ngotse: “Mohlomong Jesu e ne e le Moemeli oa Molimo Tšimong ea Edene ho Adama.” (The Watch Tower, February 1, 1915) Mora oa Molimo oa letsibolo ke khale a sebeletsa boemong bo phahameng ba ho ba “Lentsoe” la Ntat’ae, kapa ’Muelli, ho mangeloi le batho. (Johanne 1:1, NW; 12:49, 50; Tšenolo 1:1, 2) Kahoo esita le haeba tlaleho ea Genese e senola boikutlo ba hore Molimo o ne o buisana ka ho toba le Adama ea neng a lutse a ’notši, hoo ha ho qhelele ka thōko ho sebelisa ha Oona lengeloi ho bua, ho akarelletsa Lentsoe, Mora oa leholimo oa Jehova. Ho ne ho tla ba tjena haholo-holo ha re talima hore Jehova o ile a sebelisa Logos ho bōpa motho ho tloha qalong, le hore enoa ‘o ne a rata lintho tse amang bara ba batho.’—Liproverbia 8:22, 31, NW; Johanne 1:3.

Ka mohlala, nahana ka ketsahalo ea ha Moshe a nyolohela Thabeng ea Sinai. Exoda 19:21-24 ea tlaleha: “Eaba Jehova o re ho Moshe . . . Eaba Moshe o re ho Jehova . . . Eaba Jehova o re ho eena.” Joale tlaleho ea ho fanoa ha Melao e Leshome e kenyelletsoa ka tsela ena: “Eaba Molimo o bolela mantsoe ana kaofela.” (Exoda 20:1) Na hoo ho utloahala eka ke Molimo ka booona o ileng oa bolela mantsoe a Molao oo? Boikutlo bo joalo bo ka ’na ba tšehetsoa ke hore re bolelloa hore Molimo o ne o bua le Moshe “ba talimane lifahleho.”—Exoda 33:11.

Leha ho le joalo, re fumana tšenolo e eketsehileng holim’a sena. Moapostola Pauluse o ngotse tjena ka Molao: “O fetisitsoe ke mangeloi ka letsoho la mokena-lipakeng.” (Ba-Galata 3:19, NW) Hamorao, ka ho toba Pauluse o ile a bapisa litaelo tseo Molimo o faneng ka tsona Molaong le seo Bakreste ba se amohetseng ka Jesu: “Ha esitile lentsoe le boletsoeng ka mangeloi le sa ka la lesa ho tiea, ’me ho tlōla le ho se utloe hohle ha ba ha hlaheloa ke moputso . . . , ana re tla phonyoha joang, ha re sa hlokomele poloko e kalo, e neng e qale ho boleloa pele ke Morena [Jesu], ea ntoo tiisoa ho rōna ke ba e utloileng.” (Ba-Heberu 2:2, 3) Kahoo Molimo ha oa ka oa bolela mantsoe a Molao ka lentsoe la oona ka seqo, leha e le hona hore o ile oa sebelisa Logos. Ho fapana le hoo, o ile oa khetha ho sebelisa mangeloi a mang.

Leha ho le joalo, ntlha ea motheo ke efe? Hangata ha re bala ka Molimo ha o buisana le batho, re hlokomela hore o entse hoo o sebelisa libōpuoa tsa moea tse utloang tse neng li bua lebitsong la oona. (Bapisa le Genese 18:2, 3, 33; 19:1; Exoda 3:2-4; Baahloli 6:11, 12, 20-22.) Ho bitsoa ha Jesu Lentsoe ho fana ka maikutlo a hore ke eena eo hangata Molimo o neng o mo sebelisa ho buisana le libōpuoa tse ling. Na hoo ho ne ho akarelletsa mora ea phethahetseng oa Molimo Adama? Ke ho utloahalang hore ho joalo.—Luka 3:38.

Ke ’nete hore hamorao ha Logos a le lefatšeng, ka makhetlo a mararo Ntate o ile a bua ka lentsoe le phahameng hore ‘Adama enoa oa ho qetela’ a utloe. (1 Ba-Korinthe 15:45, NW; Mattheu 3:16, 17; 17:1-5; Johanne 12:28-30) Liketsahalong tsena, ke hobane’ng ha Molimo o ne o ka bua le Mora oa oona ea ratoang kapa oa bua ka eena o sebelisa lengeloi e le mokena-lipakeng? Ho utloahalang ke hore Jehova o ne a tla bua ka ho toba; Mora oa hae ea phethahetseng, esita le batho ba sa phethahalang ba neng ba le haufi le moo, ba ile ba utloa lentsoe la Molimo ka booona. Kahoo ha motho ea phethahetseng Adama a bōptjoa, Ntate oa hae ea lerato o ne a ka ’na a sebelisana ka ho toba le sebōpuoa sena se secha se phethahetseng. Leha ho le joalo, ha re talima se ka holimo, ke ho utloahalang hore o ile oa sebelisa Lentsoe.