Ho Hasa Monkho o Monate oa Tsebo ea Molimo

“Liteboho li ea ho Molimo oo ka mehla o re tsamaisang mokolokong oa tlhōlo re e-na le Kreste ’me o etsa hore monkho oa tsebo ea oona o utloahale ka rōna sebakeng se seng le se seng!”—2 BA-KORINTHE 2:14, “NW.”

 1. Ke monkho ofe o monate oo re buisanang ka oona moo, ’me tokelo ea ho o hasa e lokela ho talingoa joang?

TLOA monkho ona! M-m-m-m! Na u utloa monkho o monate? Mona ha re bue ka monkho o monate oa lipalesa tse thunyang empa, ho e-na le hoo, re bua ka monkho o monate oa tšoantšetso o hlahang mengolong ea boleng bo phahameng ka ho fetisisa lefatšeng. Mengolo ena hase e simolohileng ho batho feela empa ke ngata ea tšoantšetso ea lipalesa e bululetsoeng ke Ea ileng a boela a bōpa lipalesa tse nkhang hamonate tse khabisang lefatše. Tokelo ea ho hasa monkho ona o monate oa tsebo ea Molimo ke letlotlo le leholo. E, ke tšebeletso ea bohlokoa ka ho khethehileng—eo e seng bohle ba nang le eona, eo e seng batho ka kakaretso ba kopanelang ho eona.

 2. Barutuoa ba Kreste ba qalile ho hasa monkho o monate oa tšoantšetso neng, hona e le ka phello efe?

² Letlotlo lena la bohlokoahali le ile la fuoa barutuoa ba Kreste ha ba tsebisoa tšebeletso e mafolo-folo ho Jehova Molimo letsatsing la Pentekonta ka selemo sa 33 sa Mehla e Tloaelehileng ea rōna. Ba tletse moea o halalelang, ba ile ba qala ho hasa monkho o monate oa tšoantšetso, ba hlalosa “lintho tse babatsehang tsa Molimo.” (Liketso 2:1-4, 11, NW) Monkho o monate oa tsebo ea Molimo o ne o tla ea ho ba bang ka bona, eseng feela ho Bajode ba tlhaho ba bolotseng empa hape le ho lichaba tse sa bollang, meloko, merabe le lipuo. (Liketso 10:34, 35) Barutuoa ba ’nete ba ne ba talima tšebeletso ena e le ea bohlokoahali ho feta leruo lohle le bonahalang leo batho ba ipokellelang lona.

 3. Mosebetsi oa ho hasa monkho o monate oa tsebo ea Molimo o phethoa ho isa bohōleng bofe, ’me ke potso efe eo ho hlokahalang hore re ipotse eona?

³ Kajeno, mosebetsi o moholo oa ho hasa monkho o monate oa tsebo ea Molimo o ntšetsoa pele lefatšeng ka bophara—ka tekanyo e khōlō ho feta leha e le neng pele historing ea batho. O akarelletsa ho pakela batho bohle ka ’Muso oa Molimo oo joale o hlomiloeng tlas’a Morena oa oona ea khethiloeng, Jesu Kreste. (Mattheu 6:10; Liketso 1:8) Na u talima tšebeletso ea ho phatlalatsa Morena le ’Muso oa hae e le letlotlo la bohlokoa hoo le ke keng la lekanngoa ka theko? Jesu Kreste, ea neng a etelletse pele ho boleloa ha litaba tse molemo tsa ’Muso oo, o ne a le ananela ka tsela eo, ’me o behile mohlala.—Mattheu 4:17; 6:19-21.

Ho Nkhisa Tsela ea Mokoloko oa Tlhōlo Monkho o Monate

 4. Ho latela 2 Ba-Korinthe 2:14, Molimo o tsamaisa bahlanka ba oona lefatšeng joang hona joale, ’me ke mokhoa ofe oa boholo-holo oo mantsoe a Pauluse a o supang?

⁴ Ke hobane’ng ha ho sebeletsa Molimo e le ntho e lokelang ho tšoaroa joaloka letlotlo? Lebaka le leng ke hore esita le hona joale ba sebeletsang Jehova ba na le tokelo e tsotehang ea ho tsamaisoa ke Molimo mokolokong o moholo oa tlhōlo. Ho latela New International Version, 2 Ba-Korinthe 2:14, e re: “Liteboho li ea ho Molimo, oo ka mehla o re tsamaisang mokolokong oa tlhōlo ka Kreste ’me ka rōna o hasa kae kapa kae monkho o monate oa tsebo ea oona [“o etsa hore tsebo ea rōna ka oona e hasane ho pholletsa le lefatše joaloka motsoako o nkhang hamonate o ratehang!” Phillips].” Ho bonahala eka mantsoe ao a moapostola Pauluse a supa mokhoa oa boholo-holo oa ho etsa mekoloko ea tlhōlo.a

5, 6. (a) Ho ne ho etsahala joang nakong ea mekoloko ea tlhōlo ea Roma ea boholo-holo, ’me monkho o monate o ne o bontša eng ho ba fapa-fapaneng? (b) Tšebeliso ea moea ea setšoantšo se ho 2 Ba-Korinthe 2:14-16 (NW) ke efe?

⁵ Mehleng ea riphabliki ea Roma, e ’ngoe ea litlotla tse phahameng ka ho fetisisa tseo Lekhotla le ka Holimo-limo le neng le ka li fa molaoli oa sesole ea hlōlang e ne e le ho mo lumella ho keteka tlhōlo ea hae ka mokoloko oa tlhōlo o bitsang chelete e ngata. Mokoloko oa Roma o ne o tsamaea butle ka Via Triumphalis e be o nyoloha ka tsela e matsoeli-ntsoeke e nyolohelang tempeleng ea Jupitere e ka holim’a Leralla la Capitoline. Marena, mahosana, le balaoli ba sesole ba nkiloeng e le batlamuoa ntoeng, hammoho le bana le bahlanka ba bona, ba ne ba tsamaisoa ba fasitsoe ka mahlaahlela, hangata ba hlobolisitsoe hore ba sale ba le feela, ho ba tlotlolla le ho ba hlabisa lihlong.

⁶ Ha mokoloko oo o feta motseng oa Roma, matšoele a ne a lahlela lipalesa ka pel’a koloi ea mohlōli, ’me libano tse chesitsoeng li ne li nkhisa tsela eo eohle monkho o monate. Monkho ona o monate o ne o bontša litlotla le bophelo bo sireletsehileng haholoanyane bakeng sa masole a hlōtseng. Empa o ne o bontša lefu ho batlamuoa ba sa tšoareloang ba neng ba tla bolaoa qetellong ea mokoloko oo. Sena se re thusa ho utloisisa tšebeliso ea Pauluse ea moea ea setšoantšo se ho 2 Ba-Korinthe 2:14-16. (NW) Setšoantšo seo se hlahisa Pauluse le Bakreste ’moho le eena e le bafo ba Molimo ba inehetseng, “ba tsamaeang ’moho le Kreste,” kaofela ba latela mokoloko oa Molimo oa bahlōli ’me ba tsamaisoa ke Oona mokolokong o moholo oa tlhōlo tseleng e nkhisitsoeng hamonate.

Monkho o Monate oa Bophelo Kapa Monkho oa Lefu

7, 8. (a) Lipaki tsa Jehova li hasa monkho o monate oa tsebo ea Molimo joang? (b) Ha Lipaki li ntse li hasa monkho o monate oa tšoantšetso, karabelo ea ba eang pholohong ke efe? (c) Karabelo ea ba eang timelong ke efe?

⁷ Ka ho hasa ka ho pharalletseng kae kapa kae linnete tsa Bibele tse mabapi le ’Muso oa Molimo tlas’a Kreste, Lipaki tsa Jehova lia hasa, lia bontša, e bile li bonahatsa kae kapa kae monkho o monate oa tsebo ea Molimo o mohau oo ’nete ea oona e li lokollotseng bolumeling ba bohata. Li hatela pele ka tlhōlo tšebeletsong ea Jehova. Linyehelo tsa tsona tsa tšebeletso e le Lipaki tsa hae hammoho le Morena oa hae li tšoana le libano tse khahlisang Jehova. Ka hona, re ka ananela seo moapostola a neng a se bolela ha a re: “Re monko o monate oa Kreste o eang ho Molimo, o utloahalang ho ba eang pholohong, le ho ba eang timelong. Ho ba eang timelong ke monko oa lefu, o bolaeang; ho ba eang pholohong ke monko oa bophelo, o phelisang [“monkho o monate oa bohlokoahali o tlisang bophelo,” The New English Bible; “monkho o monate o khathollang oa bophelo ka bobona,” Phillips].”—2 Ba-Korinthe 2:15, 16, TLP.

⁸ Batho ba tšepahalang ba nang le boikutlo bo kang ba linku ba utloa monate oa tsebo ea Jehova joalokaha o hasoa ke Lipaki tsa hae. Ho batho ba joalo mosebetsi oa bopaki o na le monkho oa bophelo bo botle ba ’mele le bophelo, oa ’nete e phelang, e fanang ka bophelo. Ba isa liteboho ho Jehova le Morena oa hae, bao ba kenellang mokolokong oa bona oa tlhōlo, ’me ba hooa ka lentsoe le phahameng: “Re fumane poloko ka lebaka la Molimo oa rōna, o lutseng teroneng, le ka lebaka la Konyana.” (Tšenolo 7:10, NW) Ba phefumoloha moea oa ’nete ea ’Muso, eo e leng monkho o monate o khathollang oa bophelo o isang bophelong. Empa Satane le bademona ba hae ba sothile matla a ho fofonela a ba khomaretseng bolumeli ba bohata, hoo ba itšoereng linko ’me ka ho nyonya ba hana ’nete. Ho “ba eang timelong,” ’nete le bajari ba eona ba tšepahalang ba hasa monkho oa lefu o isang lefung. Kapa kamoo New International Version e e behang ka teng: “Ho e mong re monkho oa lefu.” Phetolelo ea Phillips e e fetolela tjena: “Ho bana ba sa tsoa boleloa o bonahala eka ke monkho oa lefu oa tlokotsi.”

 9. Joale Pauluse o botsa potso efe, ’me u ne u tla arabela joang, hona hobane’ng?

⁹ Joale moapostola oa botsa: “’Me ke mang ea tšoanelehang ka ho lekaneng bakeng sa lintho tsee?” (2 Ba-Korinthe 2:16, NW) Hoo ke ho re, “’me ke mang ea neng a ka tšoaneleha bakeng sa mosebetsi o kang oo?” (The Jerusalem Bible) “’Me bakeng sa tšebeletso e kang ee ke mang ea nang le matla a lekaneng?” (Weymouth) Karabelo ea Mangolo ke: Lipaki tsa Jehova! Hobane’ng? Hobane ke feela ba inehetseng ba tšepahalang, ba tiileng, ba sa batleng phaello ea boithati le ba buang ’nete, pepenene le ka ho se sekisetse bolumeling ba bohata, ba tšoanelehang bakeng sa mosebetsi ona oa ho hasa monkho o monate oa tsebo ea Molimo.—Ba-Kolosse 1:3-6, 13; 2 Timothea 2:15.

10. Ke hobane’ng ha baruti ba sa tšoanelehe bakeng sa mosebetsi oa ho hasa monkho o monate oa tsebo ea Molimo?

¹⁰ Baruti ba Bokreste-’mōtoana, ba batlang boemo bo botle lefatšeng lena, ba sitoa ho tšoaneleha le ho ba le matla a lekaneng bakeng sa tšebeletso ena eo e seng ea boithati. Hobane’ng? Hobane ba sitoa ho finyella tlhokahalo e bontšitsoeng ke polelo ea Pauluse: “Ha re ke ba bangata ba bapatsang ka lentsoe la Molimo; empa kahobane re rōmiloe ke Molimo, re bua ’nete mahlong a Molimo, re le bahlanka ba Kreste.” (2 Ba-Korinthe 2:17, TLP) Kapa kamoo New International Version e e behang ka teng: “Ho fapana le ba bangata hakana, ha re bapatse ka lentsoe la Molimo bakeng sa phaello. Ho fapana le hoo, re bua ka pel’a Molimo ka tieo ho Kreste, joaloka banna ba neng ba romiloe ke Molimo.”

11, 12. (a) Ke hobane’ng ha Lipaki e se “ba bapatsang ka lentsoe la Molimo” ka lebaka la ho amohela menehelo? (b) Ho fapana le mofuta oa Bokreste bo tsoakiloeng o rekiloeng ke ba bangata, Lipaki tsa Jehova li hlahisa eng?

¹¹ Lipaki tsa Jehova li romiloe ke Molimo, ’me li etsa mosebetsi oa tsona oa ho paka pontšeng ea Molimo. Le hoja li fa batho ba thahasellang libuka le likhatiso tse ling tsa bohlokoahali tse hlalosang Lentsoe la Molimo ’me li amohela menehelo ea boithaopo bakeng sa mosebetsi oa ho bolela ka ’Muso lefatšeng ka bophara, mokhoa o joalo hase ho bapatsa kapa ho tsoaka Lentsoe la Molimo. Ha e le hantle, menehelo e joalo e mpa e le thuso ea ho hasa tsebo ea Molimo ho ba bang ba eketsehileng.

¹² Ba bangata haholo kajeno, ba tseba kapa ba sa tsebe, ba rekile mofuta oa Bokreste bo tsoakiloeng, hobane o lumellana le litakatso tsa bona tsa boithati ’me ha o sitise mokhoa oa bona oa bophelo. Ba lumela hore Molimo oa ba amohela ka baka la boipolelo ba bona ba hore baa o rata ka lipelong tsa bona. Leha ho le joalo, ha ho bontšoa hore Lentsoe la Molimo le hanyetsa litumelo le boitšoaro ba bona, ba sotha Mangolo e le hore ba phahamisetse likhopolo tsa botho ka holimo ho kutloisiso e loketseng ea Bibele. (Mattheu 15:8, 9; 2 Petrose 3:16) Empa Lipaki tsa Jehova li hlahisa ’nete e hloekileng, e sa tsoakoang e tsoang Bibeleng, ka hona li hlahisa monkho o monate o amohelehang ho Molimo le ho barapeli ba oona ba ’nete. Ka tsela eo li leleka lineano tsohle tsa bolumeli le litšitiso tsa ho ba le tsebo ea ’nete ea Molimo.

13. Ntle le Bakreste ba tlotsitsoeng, ke bo-mang ba leng mokolokong oa tlhōlo oa Molimo, ’me ba etsa’ng kae kapa kae moo ba eang?

¹³ Kannete ho ba mokolokong oa tlhōlo oa Molimo hammoho le Kreste ke tokelo eo ho seng e ka bapisoang le eona eo e seng Bakreste ba tlotsitsoeng feela ba e thabelang empa hape e thabeloa ke “bongata bo boholo” ba “linku tse ling” esita le hona joale, hobane tlhōlo ea ’Muso e haufi. (Tšenolo 7:4, 9; Johanne 10:16) Ha re ntse re lebelletse litlhōlo tse eketsehileng tsa Morena oa rōna ea hlōlang, kae kapa kae moo re eang re hasa tsebo ea Molimo e fanang ka bophelo e kang motsoako o nkhang hamonate, kapa libano tsa bohlokoahali, ho bao lipelo tsa bona li laba-labelang ’nete le ho loka. Ke tokelo e khōlō hakaakang ho ba tšoanelehang bakeng sa mosebetsi oo o tsotehang!—Johanne 17:3; Ba-Kolosse 3:16, 17.

Re Lumelletsoe ho ba ba Nkhisang Batho Hamonate

14. Ke hobane’ng ha ba hasang monkho o monate oa tsebo ea Molimo ba sa hloke lengolo la ho fuoa tumello le tsoang ho batho?

¹⁴ Empa na ba hasang monkho o monate oa tsebo ea Molimo le ea ’Muso oa oona ba hloka diploma kapa lengolo le ba fang tumello e tsoang ho batho? Che! Re se re ntse re fuoe thōmo, kapa re khethiloe, ho ba Lipaki tsa Ea Phahameng ka ho Fetisisa bokahohleng. Kahoo, ha ho hlokahale hore re tsila-tsile ho kena tšimong ho hasa monkho o monate oa litaba tse molemo tsa ’Muso oa Molimo. Hopola hore Jehova oa re tsamaisa. Tšebeletso ea Jesu e ile ea phethahatsoa a talimane le “puo e hanyetsang ea baetsalibe.” (Ba-Heberu 12:3, NW) Leha ho le joalo, tlaleho ea Jesu ea tšebeletso ea tšimo, joalokaha e fumanoa ka Bibeleng, e sa ntsane e le ’nete, ’me mosebetsi oa hae tšimong oa mo babatsa ’me o buella khang e tšehetsang hore e ne e le mosebeletsi oa ’nete oa Jehova Molimo.

15. Moapostola Pauluse o bontšitse joang hore Bakreste ba ’nete ha ba hloke ‘mangolo a ba emelang’?

¹⁵ Moapostola Pauluse o ile a hlōla boemo bo tšoanang bo phephetsang mehleng ea hae ka ho phea khang ena: “Hleka re boela re qala ho ikemela na? Kapa a re tšoanela ho batla, joale ka ba bang, mangolo a re emelang pel’a lōna, leha e le a ka tsoang ho lōna ho re emela pel’a ba bang? Ke lōna le leng lengolo la rōna, le ngoliloeng ka lipelong tsa rōna, le tsejoang, le baloang ke batho bohle. Lea bonahala hoba le lengolo la Kreste, le lokisitsoeng ke tšebetso ea rōna, le ngoliloeng, e seng ka enke, empa e le ka Moea oa Molimo o phelang; ha lea ngoloa matlapeng a lejoe, empa e le matlapeng a nama, a lipelo tsa lōna.”—2 Ba-Korinthe 3:1-3.

16. Lipaki tsa Jehova li hlahisa lengolo la mofuta ofe e le bopaki bo ngotsoeng ba hore tšebeletso ea tsona e tsoa ho Molimo?

¹⁶ Ba boholong lefatšeng ha ba amohele thōmo ea rōna ea ho ba Lipaki tsa Jehova. Empa mosebetsi oa rōna oa ho hasa monkho o monate oa tsebo ea Jehova a o ke o ipuelle! Mosebetsi ona o ke ke oa hlakoloa, le hoja banna ba bang ba hana ho bala bopaki bona bo ngotsoeng ba tšebeletso ea rōna. Baruti ba hlahisa litokomane tsa mangolo a bona tse tsoang lihlopheng tse busang baruti. Leha ho le joalo, litokomane tse joalo ke liphephechana tsa pampiri, lentsoe la motho. Lipaki tsa Jehova, ntle le ho qotsa tšehetso e tsoang Lentsoeng la Molimo, li eme e le mangolo a bopaki a nama le mali. Bongata bo boholo ba linku tse ling bo finyelletsoeng ka litaba tse molemo tsa ’Muso le bona bo bokelletsoe ka lehlakoreng le letona la Morena oa Jehova. (Mattheu 25:33, 34) Bana kaofela ke lengolo la rōna la puello, lengolo leo rōna re le Lipaki tsa Jehova re eang kae kapa kae le lona le le lipelong le likelellong tsa rōna ’me re ka le hlahisa ka kholiseho. Ba emelang bobusi ba bokahohleng ba Molimo le ba kopanelang ho sebeletseng Molimo hammoho le Lipaki tsa Jehova ka bobona ke tokomane ea puello eo ho seng mokhoa oa hore e se ke ea baloa le ho tsejoa ke batho bohle.

17. ‘Lengolo la rōna la Kreste’ le ngotsoe joang, hona ke hobane’ng ha Pauluse a re le ngotsoe lipelong?

¹⁷ Ka ho hlakileng, sena se halefisa balumeli ba bohata e bile se ba tlatsa mohono ha ba se bala. Ho ntse ho le joalo, bongata bo boholo ba linku tse ling bo eketsehang ke lengolo la puello le tsoang ho Jesu Kreste, Molisa ea Molemo, ea sebelisang Lipaki tsa Jehova kaofela mosebetsing oa hae oa bolisa. Ke rōna pene, kapa kofuto ea botho, eo a e sebelisang ho ngola lengolo lena. Lengolo lena ha lea ngoloa ka enke e ka hlakoloang, empa le ngotsoe ka matla a sebetsang, kapa moea oa Molimo, o sebetsang ka ho rōna. Ha ho tšoane le tabeng ea Moshe ha Melao e Leshome e ne e ngoloa ka monoana oa Molimo matlapeng a mabeli a lejoe. Lengolo la rōna le ngotsoe matlapeng a nama a lipelo tsa batho, kaha tšebeletso ea rōna ea moea e hlahisa phetoho ea kelello le pelo ka hare ho ba amohetseng litaba tse molemo tse monkho o monate.

18. Ke phello efe e etsang hore ba amohelang litaba tse molemo ba fetohe lengolo la puello?

¹⁸ Mosebetsi oa rōna ka Lentsoe la Molimo o khahlisitse ba amohetseng litaba tse molemo ba nang le kananelo ’me o hlahisitse liphetoho tse tsotehang. Qeto ea bona ea ho sebeletsa Molimo e ipakile e se khato ea motsotsoana feela e tlisoang ke cheseho e itseng eo ba e kentsoeng ke moevangeli ea susumetsoang ke maikutlo. Ho fapana le hoo, e emela phetoho ea ka ho sa feleng ea bophelo ba bona e theiloeng linneteng tsa Bibele e Halalelang tse hlakileng joaloka krystale. Ho rata Molimo oa ’nete, Jehova, ho ba susumelletsa ho ‘hlobola botho ba bona ba khale hammoho le litakatso tsa bona tse thetsang le ho apara botho bo bocha,’ bo bontšang “tholoana ea Moea.” (Ba-Efese 4:20-24, NW; Ba-Galata 5:22, 23) Ka hona, phello e ba etsa lengolo la puello. E bua pepenene ho feta lengolo leha e le lefe le ngotsoeng ka letsoho ke rōna kapa ke mokhatlo leha e le ofe o bonahalang o neng o ka re roma.

19. Pauluse o hlalosa litšoaneleho tsa “basebeletsi ba selekane se secha” joang, ’me mosebetsi oa bona o bile le phello efe holim’a bongata bo boholo ba batho?

¹⁹ Ho 2 Ba-Korinthe 3:4-6 (NW) Pauluse o tsoela pele: “Joale ka Kreste re na le kholiseho ea mofuta ona ho Molimo. Eseng hore rōna ka borōna re tšoaneleha ka ho lekaneng ho lekanya eng kapa eng e le e hlahang ho rōna, empa ho tšoaneleha ha rōna ka ho lekaneng ho hlaha ho Molimo, oo ka sebele o entseng hore re tšoanelehe ka ho lekaneng ho ba basebeletsi ba selekane se secha.” Le hoja e le masala a tlotsitsoeng feela ao e leng “basebeletsi ba selekane se secha,” mosebetsi oa ’ona o bile le tšusumetso holim’a bongata bo boholo ba linku tse ling, ’me o sa ntsane o tla ama matšoele a se nang palo a linku tse ling tse joalo tseo e leng hona li tla bokelloa. Ena ke kholiseho eo Lipaki tsa Jehova kaofela li nang le eona ka Kreste Jesu ho Jehova Molimo. Ka teboho masala a khothalletsa bongata bo boholo ba linku tse ling ho kopanela ka pelo eohle tšebeletsong ea ‘ho ngola mangolo’ eo Jesu Kreste a e boletseng esale pele ho Mattheu 24:14 le Mattheu 28:19, 20.

20. (a) Tlaleho ea Yearbook e bontša’ng mabapi le ba hasang monkho o monate oa tsebo ea Molimo? (b) Rōna kaofela re ka re’ng ka litšoaneleho tsa rōna bakeng sa tšebeletso ea ho ngola mangolo?

²⁰ Seo ke sona seo li se entseng, joalokaha ho hlaka ho tsoa tlalehong ea 1990 Yearbook eo ho eona Lipaki tsa Jehova li bontšoang li hasa monkho o monate oa tsebo ea Molimo linaheng tse 212. Li na le lenane la bahoeletsi ba mafolo-folo ba fetang 3 787 000, ’me selemong se fetileng feela li entse lihora tse ka bang 835 000 000 boboleling ba litaba tsena tse molemo tsa ’Muso. Sejong sa Morena sa Mantsiboea selemong se fetileng, ho bile teng ba 9 479 064. Masala a tlotsitsoeng hammoho le litho tsa bongata bo boholo ba linku tse ling a ka re: “Ho tšoaneleha ha rōna ka ho lekaneng ho hlaha ho Molimo.” Kapa kamoo The Jerusalem Bible e ho behang ka teng: “Litšoaneleho tsa rōna kaofela li tsoa ho Molimo.”

21. Kaofela ha rōna re lokela hore e be re ntse re etsa’ng, hona hobane’ng?

²¹ Ka hona, hasa monkho o monate, o fanang ka bophelo oa tsebo ea Molimo sebakeng se seng le se seng! Etsa hore moea oa tšimo ea phutheho ea heno o tlale monkho o monate oa tsebo ea Jehova. Joale, joaloka Molaoli ea hlōtseng oa Sesole sa puso ea Molimo, o tla u tsamaisa mokolokong oa hae oa bahlōli ha Lipaki tsohle tsa hae li hatela pele tšebeletsong ena ea khanya ea kajeno!

[Mongolo o botlaaseng ba leqephe]

U ne u Tla Arabela Joang?

◻ Pauluse o sebelisa setšoantšo sefe ho 2 Ba-Korinthe 2:14-16? (NW)

◻ Phello ea ho hasa monkho o monate oa tsebo ea Molimo ke efe holim’a ba bang?

◻ Ke bo-mang feela ba tšoanelehang bakeng sa mosebetsi oo, hona hobane’ng?

◻ Ke hobane’ng ha ba nkhisang batho hamonate ba sa hloke mangolo a puello a ngotsoeng ka letsoho bakeng sa mosebetsi oa bona?