Joaloka Mohlolohali, Ke Fumane Matšeliso a ’Nete
Joalokaha ho boletse Lily Arthur
Mosebeletsi e mong oa Lipaki tsa Jehova e mocha lilemong o ne a ntse a e-ea ka ntlo le ntlo karolong ea Ootacamund, India. Ho latela moetlo basali ba ne ba sa lokela ho bulela motho ea joalo eo ba sa mo tsebeng monyako. Ka mor’a lihora li se kae, a khathetse ’me a batla a nyahame, o ile a reteleha ho leba hae. Empa o ile a ema, a ikutloa ka ho itseng a susumelletseha ho kokota monyakong o hlahlamang. Nahana ka se ileng sa etsahala, joalokaha se hlalosoa ke mosali ea ileng a ’mulela monyako.
KE NKILE lesea la ka la ngoananyana le likhoeli li peli ’me mora oa ka ea likhoeli li 22 a eme lehlakoreng la ka, ke ile ka bula monyako ka potlako ’me ka bona motho eo ke sa mo tsebeng a eme monyako. Bosiung ba letsatsi le ka pele ke ne ke tepelletse ka ho tebileng. Ke batla matšeliso, ke ne ke ile ka rapela: “Ntate ea maholimong, ke kōpa hore u ntšelise ka Lentsoe la hao.” Joale, ke ile ka makala ha motho enoa eo ke sa mo tsebeng a hlalosa: “Ke u tliselitse molaetsa oa matšeliso le tšepo o tsoang Lentsoeng la Molimo.” Ke ile ka ba le boikutlo ba hore e tlameha e be ke moprofeta ea rometsoeng ke Molimo. Empa boemo bo ileng ba ntšusumelletsa hore ke rapelle thuso ke bofe?
Ho Ithuta Linnete tsa Bibele
Ke hlahetse motseng oa Gudalur Lithabeng tse ntle tsa Nilgiri tsa India boroa ka 1922. ’Mè o ile a shoa ha ke le lilemo li tharo. Hamorao, Ntate, eo e neng e le moruti oa Prostanta, o ile a nyala hape. Hang ha ’na le banab’eso re se re tseba ho bua, Ntate o ile a re ruta ho rapela. Ha ke le lilemo li ’nè, letsatsi le leng le le leng e ne e re ha Ntate a lutse deskeng ea hae a bala Bibele, ’na ke ne ke lula fatše ke bala Bibele ea ka.
Ke ile ka ba tichere ha ke hōla. Joale, ha ke le lilemo li 21, ntate o ile a lokisetsa lenyalo la ka. ’Na le monna oa ka re ile ra hlohonolofatsoa ka mora, Sunder, ’me hamorao ra hlohonolofatsoa ka morali, Rathna. Leha ho le joalo, hoo e ka bang hona nakong eo Rathna a hlahileng ka eona, monna oa ka o ile a kula haholo, ’me kapele ka mor’a moo o ile a shoa. Ha ke le lilemo li 24, hang-hang ke ile ka fetoha mohlolohali ea nang le boikarabelo ba bana ba banyenyane ba babeli.
Ka mor’a moo ke ile ka rapela Molimo ka phehello hore o ntšelise ka Lentsoe la oona, ’me letsatsing le hlahlamang mosebeletsi oa Lipaki tsa Jehova o ile a kokota ha ka. Ke ile ka ’mulela ’me ka amohela buka ea “’Nete e be ea Molimo.” Bosiung boo ha ke ntse ke e bala, nako le nako ke ile ka bona lebitso Jehova, le ileng la ’makatsa haholo. Hamorao mosebeletsi eo o ile a khutla ’me a mpontša ka Bibeleng hore leo ke lebitso la Molimo.
Kapele ke ile ka boela ka ithuta hore lithuto tse kang Boraro-bo-bong le mollo oa lihele ha lia theoa Bibeleng. Ke ile ka tšeliseha ’me ka ba le tšepo ha ke ithuta hore tlas’a ’Muso oa Molimo lefatše le tla fetoha paradeise ’me baratuoa ba shoeleng ba tla khutla ka tsoho ea bafu. Habohlokoa ka ho fetisisa, ke ile ka qala ho tseba le ho rata Molimo oa ’nete, Jehova, o ileng oa utloa thapelo ea ka ’me oa nthusa.
Ho Arolelana le ba Bang Tsebo e Ncha eo ke e Fumaneng
Ke ile ka qala ho ipotsa hore na ebe ho tlile joang hore ke se ke ka bala litemana tseo tsa Bibele tse nang le lebitso la Molimo. Hape, ke hobane’ng ha ’malong oa ka oa Bibele ke ne ke sa ka ka bona tšepo e hlakileng ea bophelo bo sa feleng lefatšeng la paradeise? Ke ne ke ruta sekolong se tsamaisoang ke baruti ba Prostanta, kahoo ke ile ka bontša motsamaisi oa sekolo litemana tseo tsa Bibele. (Exoda 6:3; Pesaleme ea 37:29; 83:18; Esaia 11:6-9; Tšenolo 21:3, 4) Ke ile ka bolela hore re ile ra li tlōla ka ho itseng ha re bala. Empa ke ile ka makatsoa ke hore ha aa ka a bonahala a thabile.
Eaba ke ngolla mookameli oa sekolo ea neng a le toropong e ’ngoe, ka qotsa litemana tsena tsa Bibele. Ke ile ka kōpa sebaka sa ho bua le eena. O ile a araba ka hore ntate oa hae, eo e neng e le moruti ea tsebahalang haholo ea tsoang Engelane o ne a tla buisana le ’na ka taba ena. Khaitseli ea mookameli oa sekolo e ne e le mobishopo ea hlahelletseng.
Ke ile ka lokisetsa lintlha tsohle le mangolo ’me ka nka buka ea ka ea “’Nete e be ea Molimo” eaba ke tsamaea le bana ba ka ho ea toropong e latelang. Ka cheseho e khōlō ke ile ka hlalosa hore na Jehova ke mang, hore ha ho Boraro-bo-bong, le lintho tse ling tseo ke neng ke ithutile tsona. Ba ile ba mamela ka nakoana empa ha baa ka ba re letho. Eaba moruti ea tsoang Engelane o re: “Ke tla u rapella.” Eaba oa nthapella ’me a nteleka.
Bopaki ba Seterateng
Ka letsatsi le leng mosebeletsi oa Lipaki tsa Jehova o ile a ’mema hore ke etse bopaki ba seterateng ka limakasine tsa Molula-Qhooa le Tsoha! Ke ile ka ’molella hore eo ke ntho eo le ka mohla ke neng nke ke ka e etsa. Taba ke hore India, batho ba ka ba le mohopolo o mobe ka ho fetisisa ka mosali ea ka emang seterateng kapa a ea ka ntlo le ntlo. Ho ne ho ka tlisa thohako botumong ba mosali eo esita le ho lelapa labo. Kaha ke ne ke rata ntate ka ho teba ’me ke mo hlompha, ke ne ke sa batle ho mo tlisetsa thohako.
Empa mosebeletsi eo o ile a mpontša temana ea Bibele e reng: “Mora oa ka, hlalefa, ’me u thabise pelo ea ka, e le hore nka arabela ea nthohakang.” (Liproverbia 27:11, King James Version) O ile a re: “U thabisa pelo ea Jehova ka ho bontša phatlalatsa hore u emela eena le ’Muso oa hae.” Kaha ke ne ke lakatsa ho thabisa pelo ea Jehova ho feta ho etsa eng kapa eng e ’ngoe, ke ile ka nka mokotla oa limakasine ’me ka tsamaea le eena ho ea mosebetsing oa bopaki ba seterateng. Esita le hona joale ke sitoa ho utloisisa hore na ke ile ka etsa hoo joang. E ne e le ka 1946, hoo e ka bang likhoeli tse ’nè ka mor’a hore ke eteloe.
Ke Ile ka Fumana Khothatso ea Hore ke Hlōle Tšabo
Ka 1947, ke ile ka amohela mosebetsi oa botichere metseng e ka thōko ea Madras, e moeling o ka Bochabela oa India, ’me ka fallela teng le bana. Sehlotšoana sa Lipaki tsa Jehova tse ka bang robeli se ne se kopana ka mehla toropong. Hore re be teng libokeng tseo, re ne re tlameha ho tsamaea lik’hilomithara tse 26. Hangata morao koo basali ba ne ba sa tsamaee ba le bang India. Ba ne ba itšetlehile ka banna hore ba tsamaee le bona. Ke ne ke sa tsebe mokhoa oa ho palama bese, mokhoa oa ho batla tekete, mokhoa oa ho theoha bese, le lintho tse joalo. Ke ne ke ikutloa hore ke tlameha ho sebeletsa Jehova, empa joang? Kahoo ke ile ka rapela: “Jehova Molimo, nke ke ka phela ke sa u sebeletse. Empa ho hang ho ke ke ha khoneha hore ke le mosali oa Moindia ke ee ka ntlo le ntlo.”
Ke ne ke tšepile hore Jehova o tla etsa hore ke shoe e le hore ke lokolohe ntoeng ena. Leha ho le joalo, ke ile ka rera ho bala ho hong ka Bibeleng. Ho ile ha etsahala hore ke e phetle bukeng ea Jeremia, moo e reng: “U se ke ua re: Ke sa le ngoana, u mpe u ee ho bohle bao ke tla u romela ho bona, u bolele tsohle tseo ke tla u laela tsona. U se ke ua ba tšaba, hobane ke na le uena ho u namolela.”—Jeremia 1:7, 8.
Ke ile ka ikutloa hore ruri Jehova o ne a bua le ’na. Kahoo ke ile ka ba sebete ’me hang-hang ka ea mochineng oa ka oa ho rōka eaba ke rōka mokotla o tšelang limakasine. Ka mor’a thapelo e tiileng, ke ile ka ea ka ntlo le ntlo ke le mong, ka tsamaisa lingoliloeng tsa ka kaofela, ka ba ka qalisa thuto ea Bibele letsatsing lona leo. Ke ile ka ikemisetsa ho neha Jehova sebaka sa pele bophelong ba ka, ’me ke ile ka beha tšepo le kholiseho ea ka e felletseng ho eena. Mosebetsi oa boboleli ba phatlalatsa o ile oa fetoha karolo ea ka mehla ea bophelo ba ka ho sa tsotellehe mahlapa. Ho sa tsotellehe khanyetso, tšebetso ea ka e ile ea ama ba bang ka ho tebileng.
Sena se ile sa bonahala ha ’na le morali oa ka re ne re e-ea ka ntlo le ntlo Madras lilemo tse ngata hamorao. Monna oa Mohindu, moahloli oa Lekhotla le Phahameng, a sa elelloe lilemo tsa ka, o ile a re: “Ke tsebile limakasine tsena le pele u hlaha! Lilemong tse mashome a mararo tse fetileng ho na le mosali ea neng a tloaetse ho ema ka mehla Mount Road a ntse a fana ka tsona.” O ile a batla peeletso.
Ntlong e ’ngoe Moruti e Moholo oa Mahindu, eo e neng e le mosebeletsi ea seng a le phomolong, o ile a re memela ho kena ka tlung ’me a re: “Lilemong tse ngata haholo tse fetileng mosali e mong o ne a tloaetse ho fana ka Molula-Qhooa Mount Road. Ke tla nka seo u ’nehang sona ka lebaka la ho mo hlompha.” Ke ile ka tlameha ho bososela ka lebaka la hore ke ne ke tseba hore mosali eo ka bobeli ba bona ba neng ba bua ka eena ke ’na.
Ke Ile ka Matlafatsoa ka ba ka Hlohonolofatsoa
Ke ile ka tšoantšetsa boinehelo ba ka ho Jehova ka kolobetso ea metsing ka October 1947. Ka nako eo e ne e le ’na feela mosali oa Paki ea buang Setamile ka har’a naha kaofela, empa hona joale makholo-kholo a basali ba Batamile ke Lipaki tsa Jehova tse tšepahalang, tse sebetsang ka mafolo-folo.
Ka mor’a hore ke kolobetsoe, khanyetso e ile ea hlaha ka mahlakoreng ’ohle. Khaitseli ea ka e ile ea ngola: “U lahlile mekhoa eohle e metle le boitlhompho.” Ke ile ka boela ka fumana khanyetso sekolong seo ke neng ke sebetsa ho sona le ho baahisani. Empa ke ile ka khomarela Jehova haholoanyane ka thapelo e sa khaotseng, le e tiileng. Haeba ke ne nka phaphama har’a bosiu, hang-hang ke ne ke khantša lebone la parafine ’me ke ithuta.
Kaha ke ile ka matlafatsoa, ke ile ka ba boemong bo botle ba ho tšelisa le ho thusa ba bang. Mosali e mong ea hōlileng oa Mohindu eo ke neng ke ithuta le eena o ile a nka khato e tiileng bakeng sa borapeli ba Jehova. Ha a e-shoa, mosali e mong lelapeng leo o ile a re: “Se re thabisitseng ka ho fetisisa ke botšepehi ba hae ho Molimo oo a ileng a khetha ho o rapela ho isa qetellong.”
Mosali e mong eo ke neng ke ithuta le eena le ka mohla o ne a sa bososele. Ka mehla sefahleho sa hae se ne se bonahatsa ho tšoenyeha le ho sareloa. Empa ka mor’a hore ke mo rute ka Jehova, ke ile ka mo khothalletsa hore a mo rapele, kaha o tseba mathata a rōna ’me oa re hlokomela. Bekeng e hlahlamang sefahleho sa hae se ne se khanya haholo. E ne e le lekhetlo la pele ke ’mona a bososela. O ile a hlalosa: “Ke ile ka rapela Jehova, ’me ke na le khotso ea kelello le ea pelo.” O ile a nehela bophelo ba hae ho Jehova ’me o ntse a tšepahala ho sa tsotellehe mathata a mangata.
Ho Leka-lekanya Boikarabelo
Ke e-na le bana ba babeli ba banyenyane bao ke tlamehileng ho ba hlokomela, ke ile ka ikutloa hore takatso ea ka ea ho sebeletsa Jehova ka nako e tletseng joaloka pula-maliboho e ne e ke ke ea phethahala. Empa joale ho ile ha buleha mocha o mong oa tšebeletso ha ho hlokahala motho e mong bakeng sa ho fetolela lingoliloeng tsa Bibele ka Setamile. Ka thuso ea Jehova ke ile ka atleha ho hlokomela kabelo eo ’me, ka nako e tšoanang, ke ne ke sebetsa mosebetsi oa boipheliso ke le tichere, ke hlokomela bana, ke etsa mosebetsi oa ka oa lelapa, ke kopanela libokeng tsohle, ’me ke nka karolo tšebeletsong ea tšimo. Qetellong ha bana ba hōla, ke ile ka ba pula-maliboho e khethehileng, e leng tokelo eo ke e thabetseng ka lilemo tse 33 tse fetileng.
Ho tloha ha Sunder le Rathna ba sa le banyenyane, ke ile ka leka ho kenya ka ho bona lerato ho Jehova le takatso ea hore ka mehla ba behe lithahasello tsa hae pele likarolong tsohle tsa bophelo ba bona. Ba ne ba tseba hore motho oa pele eo ba neng ba lokela ho buisana le eena ha ba tsoha ke Jehova le hore ke eena motho oa ho qetela eo ba neng ba lokela ho bua le eena pele ba robala. ’Me ba ne ba tseba hore ho lokisetsa liboka tsa Bokreste le tšebeletso ea tšimo ha hoa lokela ho hlokomolohuoa ka lebaka la mosebetsi oa sekolo o etsetsoang hae. Le hoja ke ne ke ba khothalletsa ho etsa hohle ho matleng a bona mosebetsing oa bona oa sekolo, le ka mohla ha kea ka ka tsitlella hore ba fumane lintlha tse phahameng litlhahlobong, ke tšaba hore ba ne ba ka ’na ba fetola hoo ntho ea bohlokoa ka ho fetisisa bophelong ba bona.
Ha ba se ba kolobelitsoe, ba ne ba sebelisa matsatsi a phomolo ea sekolo ho bula maliboho. Ke ile ka khothalletsa Rathna hore a be sebete, a se be boi kapa a ba lihlong joaloka ’na. Ka mor’a hore a qete sekolong se phahameng le koetliso ea khoebo, o ile a qala ho bula maliboho, ’me hamorao e ile ea e-ba pula-maliboho e khethehileng. Qetellong o ile a nyaloa ke molebeli ea tsamaeang, Richard Gabriel, eo hona joale a sebeletsang e le mohokahanyi oa Komiti ea Lekala la Mokhatlo oa Watch Tower India. Bona le morali oa bona Abigail, ba sebetsa ka nako e tletseng lekaleng la India, ’me mora oa bona e monyenyane, Andrew, ke mohoeletsi oa litaba tse molemo.
Leha ho le joalo, ha Sunder a le lilemo li 18 o ile a utloisa pelo ea ka bohloko haholo ha a khaotsa ho kopanela le Lipaki tsa Jehova. Lilemo tse ileng tsa latela e ile ea e-ba tsa mahlomola ho ’na. Ke ne ke kōpa Jehova ka ho sa khaotseng hore a ntšoarele litšito leha e le life tseo e ka ’nang eaba ke ile ka li etsa ha ke hōlisa Sunder le hore a mo thuse hore a hlaphoheloe e le hore a ka khutla. Empa qetellong, ke ile ka felloa ke tšepo eohle. Joale ka letsatsi le leng, lilemo tse 13 hamorao, o ile a tla ’me a mpolella hore: “’Mè, u se ke ua khathatseha, ke tla loka.”
Kapele ka mor’a moo, Sunder o ile a etsa boiteko bo khethehileng ba hore a hōle moeeng. O ile a tsoela pele ho isa ntlheng ea ho tšepeloa bolebeli ka phuthehong ea Lipaki tsa Jehova. Hamorao o ile a tlohela mosebetsi oa hae o lefang hantle e le hore a ka bula maliboho. Hona joale eena le mosali oa hae, Esther, ba sebetsa ’moho mosebetsing ona Bangalore karolong e ka boroa ea India.
Matšeliso a Bophelo Bohle
Hangata ke leboha Jehova bakeng sa ha a ntumelletse ho utloa bohloko le ho feta tlas’a mathata ka lilemo-lemo. Ka ntle le ho latsoa liphihlelo tse joalo nka be ke sa ka ka ba le tokelo e khōlōhali ea ho latsoa molemo oa Jehova hakana, mohau oa hae, le lipontšo tsa hae tsa tlhokomelo e mosa le e lerato. (Jakobo 5:11) Ke ho thabisang ho bala ka hare ho Bibele ka tlhokomelo ea Jehova le kameho ea hae bakeng sa “khutsana, le mosali oa mohlolohali.” (Deuteronoma 24:19-21) Empa hoo hase letho ha ho bapisoa le matšeliso le thabo ea ho latsoa ka ho toba tlhokomelo ea hae le kameho ea hae.
Ke ithutile ho beha tšepo e felletseng le kholiseho ho Jehova, ho se itšetlehe ka kutloisiso ea ka, empa ke mo mamela litseleng tsohle tsa ka. (Pesaleme ea 43:5; Liproverbia 3:5, 6) Joaloka mohlolohali e mocha, ke ile ka rapela Molimo bakeng sa matšeliso a tsoang Lentsoeng la oona. Hona joale, ke le lilemo li 68, ka sebele nka bolela hore ka ho utloisisa Bibele le ho sebelisa keletso ea eona, ke fumane matšeliso a ke keng a lekanngoa.
[Setšoantšo se leqepheng la 26]
Lily Arthur le litho tsa lelapa la hae